Huku Wati Ohi Maihupu

Otyo tyapopiwa no vokutala etyi omphepo ikahi mouye auho. Ine ove utavela okuti kuna Omutungi usuka novanthu, otyo tyapopia ovanthu ovo tyipondola okukuhinangelesa kovipuka ovinyingi eheke lilinga lilisukule, nokuliviukisa. Ngwe mwene Huku otyo umwe elitunga ngootyo.

Mahi mokonda ovanthu veli nokunyona unene eheke, ha aviho vanyona-nyona malivivili okuviviukisa vala alike. Oityi tuyumbila-ko onthumbi okuti Huku una etyi malingi eliviukise?

Tala etyi tyapopia onotesitu mbuli mokakasa tyituyumbisa-ko onthumbi okuti ohi maihupu, maikehiwa.

• Ohi yatungwa na Huku. “Konthyimbi Huku watunga omaulu, nohi.” — Ehimbikilo 1:1

• Huku mwene weliti oe ohekulu yohi. “Atyiho otya Siovaa,a nohi novipuka viatyo vili-mo.” — Oviimbo 24:1

• Omu Huku atungila ohi, opala umwe ikale-ko apeho. “Ohi weipumphika komalisesu ayo. Apa ili opo vala, kamaihondovolwa-po.” — Oviimbo 104:5

• Huku wati matyikehiwa okukala kouye. “Huku yotyotyili, Una watunga ohi, . . . [keitungile] opo ikale vala ngootyo, mahi weitunga opo ikalwe.” — Isaiya 45:18

• Huku wati ovanthu mavakakala apeho kombanda yohi. “Vokulinga evi viaviuka mavakapiñgana ohi, avakakala-ko apeho.” — Oviimbo 37:29

Mwene omu Huku atungila ohi, wahandele umwe ovanthu vakale-ko nehambu, aveheinyono. Ombimbiliya yati Siovaa Huku una omphango yokumana-ko atyiho tyinyona ohi, mahi meketyilinga momuvo anaka. — Eholololo 11:18

Ombimbiliya yati Huku ohi ei mekeiviukisa aikala ongwa, aihiwa, akapatulula enkhanya liae, “aviho vina omwenyo [evipe] etyi vihanda avikululuka.” — Oviimbo 145:16