Tyomunthu Mwene Okulilinga Onthilo Tyaya Napi?

OITYI TYISUKISILA OMUNTHU MWENE OKULILINGA ONTHILO

Omunthu wokulilinga onthilo, tyina amatumbukilwa notyitateka, ututumba umwe kasoyo. Kawila onkhunye ike.

Omunthu tyina elitomba, pamwe tyimweetela otyiho, nouvela wokulinyengwa, nokulia komutima atyiheya-ko-ale. Pamwe tupu tyimutwala vala kokunwa unene, nokusipa, nokunwa ovihemba vipialukisa.
Omunthu wokulilinga onthilo, kelieeleka na vakwavo. Ya otyo tyokuhelieeleka tyimukwatesako okulivila na vakwavo, nokukala nomapanga. Mahi omunthu tyina elitomba, uyemba vala kokupola-po omapita vakwavo, ya otyo tyinyona oupanga vena na vakwavo.
Omunthu wokulilinga onthilo, tyina atumbukilwa novitateka upameka umwe. Ine una etyi apanga ehetyivili, ututumba umwe atee etyivila. Mahi omunthu wokwelitomba, nokatateka vala okatutu, tyina eketala ngoti otyitateka umwe otyinene. Otyo pamwe omunthu ngoo atila tyina amatumbukilwa notyitateka usoya umwe.

OITYI UNA OKULINGA

Linga oupanga naava mavekupameka. Linga oupanga novanthu vehelitombele, vesuka umwe noove, mavekupameka umone ononkhono.

“Epanga liotyotyili, oyou ukuhole umwe apeho. Ulinga omukulu wove, ondenge yove, owove no putyina tyatokota.” — Omihe 17:17.

Kwatesako vakwenyi. Tyina ulinga omunthu wonkhenda, olingila-ko vakwenyi ovipuka, na vana umwe vehemekupandula-le, mokala nehambu liotyotyili lituka kokwaava. Na tyina umwe utala ñgaa ngoti vakwenyi kavetyilweta-ale etyi ukahi nokuvelingila, ove mokala vala nehambu.

“Okwaava tyihambukiswa vali tyipona okupewa.” — Ovilinga 20:35.

Kwatesako ovana vove velilonge okulilinga onthilo. Tyimwe upondola okulinga, okuti tyina omona wove amatumbukilwa notyitateka, nkhele omuyekela-tyo umwe etyitetulule, etyimone okuti naina utyivila okutetulula ovipuka. Otyo matyikwatesako omona wove okulilonga okututumba novitateka, nokuvitetulula. Tyina etyimona otyo, melilingi onthilo, ngatyo umwe ekekula-kula ngootyo.

“Longesa omona mondyila ena yokweendela. Na tyina akakulupa, omo akakulupila.” — Omihe 22:6.

Omuhikwena Ombangi ya Siovaa ukahi nokulongesa Ombimbiliya omuhikwena omukwavo mombale.

OITYI ONTHWE ONOMBANGI MBA SIOVAA TULI NOKULINGA

Ovanthu ovanyingi veli nokukwatesiwako nomaliongiyo Onombangi mba Siovaa, notyilinga tuna-tyo tyokulongesa ovanthu Ombimbiliya, avalingi evi vitiwa ovievi, nokulilinga onthilo.

OMALIONGIYO TULINGA ONOSIMANU AMBUHO

Momaliongiyo tulinga onosimanu mbatyo ambuho, mupopiwa ovipuka ovinyingi viapolwa m’Ombimbiliya, neetyi munthu na munthu ena okulinga elilonge okulilinga onthilo. Momaliongiyo etu munyingilwa vala otyali, ou wahanda upondola okuya-mo. Ine wenda momaliongiyo etu monoñgonoka . . .

oityi tutila ove wesukisa unene ku Huku
neetyi tweila kouye
neetyi una okulinga ukale apeho nomapanga omawa.

Movasi-mo omapanga otyotyili ‘vesuka umwe na vakwavo.’ — 1 Ova Kolindu 12:25, 26.

Opo unoñgonoke etyi tyilingwa momaliongiyo Onombangi mba Siovaa, enda mo jw.org otale ovindiu yati: Oityi Tyilingwa Mondyuo Yomaliongiyo?

TULONGESA OVANTHU OMBIMBILIYA

Tulongesa ovanthu Ombimbiliya nomukanda Kalako Nomwenyo Apeho! mahi otyali vala. Momukanda oo muna onotesitu mb’Ombimbiliya, nomapulo ekahi nawa, nonovindiu, nomalutalatu omawa. Mwapopiwa onondaka mbwivala nawa. Omunthu okutavela okulilongesa Ombimbiliya, tyimukwatesako umwe okulilinga onthilo, nokulinga evi vitiwa ovievi.

Opo utale ouwa utuka kokulilongesa Ombimbiliya no Nombangi mba Siovaa, enda mo jw.org otale ovindiu yati: Oityi Wesukisila Okulilongesa Ombimbiliya?