OVIPUKA VIALIA OKALU— MOLINGI ÑGENI?

Linga Omunthu Wotyali

Ine noove opo umone tyokulia, ututumba mokonda yovipuka vialonda, upondola okusoka okuti katyitavela okulinga omunthu wotyali, mokonda ovipuka vialema. Mahi ovakulu vati, pa upewe, naina ine ukala omunthu wotyali noove momonena-po. Upondola okuti, ove upaka nawa oumbongo umwe, ove tupu ukala notyali.

OMOKONDA YATYI TYESUKISILA

Ine tulinga ovanthu votyali namphila pamwe etyi matwaave katyihia-le, matyiti umwe onthwe tukala nehambu onthwe tupu twehelitombo. No vokwatanga vetyipopia okuti omunthu wokwaava ukala nawa, ukala nekongoko likahi nawa. Omunthu tyina ena otyali, kalingi otyiho, katokota omutwe, nolumphoki lwae lupepa.

”Okwaava tyihambukiswa vali tyipona okupewa.” — Ovilinga 20:35.

Okwaava tyikahi nawa, mokonda tyina noonthwe kumbi tusukisa okukwatehiwako vakwetu avetukwatesako, kamatyitukala omapita. Umwe utiwa o Howard ukala kotyilongo tyitiwa Inglaterra wati: “Ame nomukai wange, mokonda apeho twoovola okukwatesako vakwetu, nokuvetehelela nawa , noonthwe tyina tusukisa okukwateswako avetukwatesako, katyitulingi navi.” Tyili omunthu wotyali, kaave nae apewe, mahi kotyali kutuka oviwa. Mokonda tyina twaava tukala nomapanga ekahi nawa, haa maetuhukulula tyina ovipuka viamatokota.

“Lingei ovanthu votyali, noonwe mulingwe otyali.” — Luka 6:38.

ETYI UPONDOLA OKULINGA

Ava etyi una. Namphila wehenatyo-ale mahi no ngootyo upondola okulinga omunthu wotyali, upondola okwaavela mukwenyi okakulia. Umwe utiwa o Duncan ukala ko Uganda, vetupu-tyo-ale mahi no ngootyo vena otyali. Duncan wati: “Movityalumingu, ame nomukai wange twiihana vakwetu tulie kumwe meumbo. Tutyihole unene tyokukala kumwe na vakwetu.”

Tyili otyiwa umwe okukala notyali mahi tyisukisa okupola pokati. Wahaave vala atyiho, vo meumbo avahamono etyi mavali. — Sombe 17:5.

Hetekela etyi: Avela mukwenyi okulia, okuti walinga omwavela ombulunga. Okuti una oupuka umwe, wehesukile-ale vali nao, owaavela vakwenyi. Upondola okwaavela omapanga ove, no venyi, novo pomaumbo, evi weete okuti mavivekwatesako.

Lingila vakwenyi oviwa. Vimwe upondola okulingila vakwenyi kavilandwa. Vimwe ongeevi ñgaa, okukala navo, okuvetehelela nawa, okuvepameka, nokuvekwatesako movipuka ovikwavo vali. Pandula vakwenyi, tupu vepopila okuti uvehole!

Hetekela etyi: Kwatesako vakwenyi, okuvepangiyila-ko ovipuka viavo. Tupu upondola okuhonekela okamukanda epanga liove, aa hamwe okumutuma omesasi, namphila wehena-le otyinyingi mopopi.

Pa upewe.

“Otyo tupu mwahalimbwa-ko okulinga oviwa, otyo mwavela vakwenyi evi muna-vio.” — Ova Hembeleu 13:16.

Ovalinepi veli nokukomba omafo peumbo liomukulukai. Omukulukai weveetela okambulunga.