Meongano lietu ononkhala-mutwe kambufetwa. Mahi ngetyi ankho tyilingwa etyi ewaneno lio Vakristau liotete liahimbika, ovalume vafuapo vaholovonwa opo “vanthite ewaneno lia Huku.” (Atos 20:28) Ovakulu ovo, ovalume vokualongoka nawa vahongolela nokunthita ewaneno, “tyahakuluminyua, mahi nomutima welipakula, tupu ha nohole yokufunina-mo, mahi onombili.” (1 Pedro 5:1-3) Ovilinga patyi vetulingila vituetela ouwa?

Vetutekula nawa nokutuyunga. Ovakulu vewaneno vahongolela nokuamena ewaneno mopamphepo. Mokonda ovakulu vewaneno vetyii okuti otyilinga otyo tyakolela vetyipewa na Huku, kavatumina ovanthu vae, mahi vetukuatesako pala ouwa wetu, nehambu. (2 Coríntios 1:24) Ngetyi omunthita ayunga nombili kese imwe po nongi mbae, ovakulu vewaneno valinga ononkhono mbokunoñgonoka kese umwe mewaneno.—Provérbios 27:23.

Vetulongesa okulinga nawa ehando lia Huku. Kese simano ovakulu vewaneno valinga omaliongiyo mewaneno opo vapameke ekolelo lietu. (Atos 15:32) Ovalume ovo vombili tupu vahongolela ovilinga viokuivisa, okuundapa no onthue nokutulongesa ononkhalelo ambuho mbokuivisa.

Vapameka kese umwe puonthue. Opo vakuateseko kese umwe okupameka oupanga wae na Jeova, ovakulu vewaneno vetutalelapo momaumbo etu ine okutomphola no onthue Mondyuo Yomaliongiyo ine Youhamba, opo vetulondole nokutupameka Novihonekwa.—Tiago 5:14, 15.

Ovakulu vewaneno vetupu vala ovilinga mewaneno, mahi tupu vaundapa kukaputu, nokuna ovilinga mombunga yavo viesukisa omuvo omunyingi. Ovakuatate ovo vokuundapa nombili vatokala okuhumbwa. —1 Tessalonicenses 5:12, 13.

• Otyilinga patyi ovakulu vewaneno vena?

• Omononkhalelo patyi ovakulu vewaneno valekesa okuti vesuka na kese umwe puonthue?

Ombimbiliya ipopia ovikundyi vivali vio valume Ovakristau vena ovilinga mewaneno—“ovakulu vewaneno no vakuatesiko vavo.” (Filipenses 1:1) Mu kese ewaneno muna ovakulu ovanyingi vewaneno, novakuatesiko vavo. Oñgeni ovakuatesiko vovakulu vewaneno vetukuatesako?

Vakuatesako ovakulu vewaneno. Ovakuatesiko vovakulu vewaneno vena oupanga wapama na Jeova, vayumbwa onthumbi, ovalume vombili, vamwe ovakuendye, ovakuavo ovakulu. Valinga ovilinga viakolela mewaneno no Mondyuo Yomaliongiyo ine Youhamba. Otyo tyikuatesako ovakulu vewaneno okusuka vali novilinga viokulongesa nokunthita ewaneno.

Valinga ovilinga viakolela. Ovakuatesiko vamwe vovakulu vewaneno vapewa otyilinga tyokuyakula ovanthu aveho veya komaliongiyo. Vamwe vapondola okuundapa nomakina yokuhikisa no nomikrofone, nokuava omikanda, nokuvalula nokuhoneka onombongo mbewaneno, nokuavela ovakuatate mewaneno onomphangu mavakaivisila. Tupu vakuatesako okuyunga nawa Ondyuo Yomaliongiyo ine Youhamba. Ovakulu vewaneno vapondola okuveita vakuateseko vokuakulupa. Ovakuatesiko vovakulu vewaneno vafuapo pala okulinga kese tyilinga vapewa, iya ewaneno livehumba mokonda yononkhono valinga, nehando liokulinga ovilinga ovio.—1 Timóteo 3:13.

Ovalume ovo Ovakristau vaava ongeleka ongwa. Ovakuatesiko vovakulu vewaneno vaholovonwa mokonda yovituwa viavo oviwa Vioukristau. Tyina valinga ononthele mbavo momaliongiyo, vapameka ekolelo lietu. Vetukuatesako okukala vali nombili tyina vaava ongeleka ongwa movilinga viokuivisa. Mokonda vaundapa nawa novakulu vewaneno, vayawisa ehambu, newaneko mewaneno. (Efésios 4:16) Mokueenda kuomuvo, navo vapondola okukala tyafuapo opo vakale ovakulu vewaneno.

• Ovakuatesiko vovakulu vewaneno ovanthu patyi?

• Oñgeni ovakuatesiko vovakulu vewaneno vakuatesako ewaneno opo ovilinga viende nawa?

Ovihonekwa vio Vakristau mo Gregu vipopia unene Mbarnabe na apostolu Paulu. Ovalume ovo ankho valinga omaungendi okukatalelapo omawaneno. Omokonda yatyi? Ankho vesuka unene nouwa wovakuatate vavo vopaspilitu. Paulu wapopile okuti ankho uhanda “okukondoka akatalelepo ovakuatate” atale oñgeni vekahi. Ankho wafuapo pala okuenda kovilongo viokokule opo ekevepameke. (Atos 15:36) Tupu hono ovatalelipo vetu vomawaneno vena ehando olio.

Veya okutupameka. Omutalelipo womauaneno, utalelapo omawaneno 20 ine alamba-po, okukala osimano mu kese limwe, tuvali menima. Tupondola okupola ouwa omunene kounongo wovakuatate ovo, novakai vavo inkha vanepa. Valinga ononkhono mbokunoñgonoka ovakuendye novakulu, tupu vahanda okuenda nonthue movilinga viokuivisa, nokulongesa ovanthu Ombimbiliya. Ovakulu ovo, vetutalela-po pomaumbo etu kumwe novakulu vewaneno, nokulinga omalongomona momaliongiyo no movionge opo vetupameke.—Atos 15:35.

Vesuka novanthu aveho. Ovatalelipo vomauaneno vesuka unene noupanga ewaneno lina na Jeova. Veliongiya novakulu vewaneno novakuatesiko vavo, vatale oñgeni ewaneno likahi nokuenda, nokuava onondonga mambuvekuatesako okulinga nawa ovilinga viavo. Vakuatesako ovakokoli-ndyila okulinga ovilinga viavo nombili, nokunoñgonoka ovape, nokutehelela ononkhono valinga opo vakale Ovakristau. Kese umwe povakuatate ovo, uliava oe muene “ngomuundapi pala ouwa [wetu].” (2 Coríntios 8:23) Tuesukisa okuhetekela ekolelo liavo nombili vena na Huku.—Hebreus 13:7.

• Omokonda yatyi ovatalelipo vomauaneno vatalelapo omawaneno?

• Oñgeni upondola okupola-ko ouwa tyina veya okutalelapo ewaneno?

Tyina pamoneka otyiponga, Onombangi mba Jeova velionganeka liwa-liwa vatale etyi mavalingi opo vakuateseko ovakuatate vavo. Otyo tyilekesa ohole yotyotyili tuna novakuatate vetu. (João 13:34, 35; 1 João 3:17, 18) Omononkhalelo patyi tukuatesako?

Tuava onombongo. Etyi ondyala onene yatumbukila mo Judaa, Ovakristau mewaneno liotete mo Antiokia, vatumikisa onombongo opo vakuateseko ovakuatate vavo. (Atos 11:27-30) Tupu, tyina tuiva okuti ovakuatate vetu kotyilongo tyimwe vekahi nokumona ononkhumbi, tuava mewaneno etyi tuna opo tuvekuateseko.—2 Coríntios 8:13-15.

Tuava ombatelo yesukisa. Ovakulu vomawaneno vakala kuna kuapita otyiponga, vaovola ovakuatate va kese ewaneno opo vatale inkha vahupa. Okomisau yokuyovola yonganeka okulia, nomeva okunua, novikutu, novihemba, na apa mavapake ovanthu. Onombangi ononyingi vena ounongo wokutunga, veliava nokufeta onombongo mbavo avakapindula-po omaumbo, no Nondyuo Mbomaliongiyo ine Mbouhamba. Oupanga tuna meongano, nounongo tuna wokuundapela kumwe novakuatate vetu, tyitukuatesako okulinga liwa-liwa etyi tyesukisa tyina pamoneka oviponga. Namphila tukuatesako “vana tufenda navo,” tupu tyina tyitavela tukuatesako ovanthu vonongeleya ononkhuavo.—Gálatas 6:10.

Tuvekuatesako mopamphepo nokuveungumanesa. Tyina ovanthu vapita motyiponga haunene vesukisa okuungumaneswa ine okupamekwa. Pomuvo opo, tupola ononkhono ku Jeova, “Huku weungumaneso aliho.” (2 Coríntios 1:3, 4) Tuna ehambu liokupopila omilao Viombimbiliya vana vasoya, nokuti apa katutu Ouhamba wa Huku maukamana-ko oviponga aviho vieta oluihamo no nonkhumbi.—Apocalipse 21:4.

• Oñgeni Onombangi vetyivilila okuava liwa ombatelo tyina pamoneka oviponga?

• Oñgeni matupameka nondaka ya Huku vana vahupa-po?

Etyi ankho kuakamba katutu opo Jesus aipawe, watomphola novalongwa vae vekuana—Petulu na Tiagu na João na Andre. Etyi apopia enyingilikilo lio nonthiki mbahulililako, Jesus walinga epulo eli liakolela: “Olie tyili-tyili omupika wekolelo nokualunguka, waholovonua nomuhona wae opo aavele ovanthu vae okulia kuopaspilitu momuvo wanakua?” (Mateus 24:3, 45; Marcos 13:3, 4) Jesus ankho ukahi nokupopila ovalongwa vae okuti mokonda oe “tatekulu” yavo, ankho ukahi nokuvepopila okuti maholovona “omupika” maavela okulia kuopaspilitu ovalanduli vae mokueenda kuomuvo wonthyulilo. Omupika oo olie?

Otyikundyi otyitutu tyo valanduli va Jesus valembulwa. “Omupika” oo, Ononkhalamutwe mbo Nombangi mba Jeova. Omupika oo ukahi nokuavela okulia kuopamphepo ovafendi ovakuavo va Jeova. Onthue tutei komupika oo wekolelo utualako okutuavela “ongelo yetu ya kese nthiki.”—Lucas 12:42.

Vatekula ombunga ya Huku. (1 Timóteo 3:15) Jesus waavela omupika wekolelo otyilinga otyinene tyokuyunga ovilinga vieongano lia Jeova pano pohi, okuyunga omalumono ae, nokuhongolela ovilinga viokuivisa, no viokulongesa momawaneno etu. Ngotyo, opo etuavele etyi tuesukisa momuvo watyo, “omupika wekolelo no kualunguka” ukahi nokuava okulia kuopaspilitu, mokutuavela omikanda tuundapesa movilinga viokuivisa, neevi tulilongesa momaliongiyo no movionge.

Omupika, wakolela motyili tyikali Mombimbiliya nokutualako novilinga viokuivisa onondaka onongwa, iya walunguka konthele yo ñgeni afuisapo nounongo omasuka-suka a Kristu pano pohi. (Atos 10:42) Jeova ukahi nokuyamba ovilinga ovio mokueta ovanthu ovanyingi motyili, nokuava okulia okunyingi kuopaspilitu.—Isaías 60:22; 65:13.

• Olie wapewa na Jesus otyilinga tyokuavela ovalongwa vae okulia kuopaspilitu?

• Omononkhalelo patyi “omupika” ena ekolelo nokualunguka?

Pomuvo wo Vakristau votete, otyikundyi tyimwe otyitutu, tyo no “apostolu novakulu ko Jelusalei,” vaundapele ngo nonkhalamutwe opo valinge omatokolo akolela pala ouwa weuaneno aliho lio Vakristau ovalembulwa. (Atos 15:2) Konyima yokutomphola etyi Ovihonekwa vipopia, nokulandula ehongolelo liospilitu ya Huku, velitavela pokati avalingi etokolo liaviuka. (Atos 15:25) Ononkhalamutwe hono valandula ongeleka oyo.

Vekahi nokuundapeswa na Huku opo valinge ehando liae. Ovakuatate ovalembulwa Ononkhalamutwe mbo Nombangi mba Jeova, vena esuko enene Nondaka ya Huku, nokutokola oñgeni matulingi ovilinga via Huku, novipuka ovikuavo viesukisa. Veliongiya kese simanu opo vapopie omasuka-suka ovakuatate ouye auho. Ngetyi ankho tyilingwa pomuvo wo Vakristau votete, tupewa onondonga mbapolwa Mombimbiliya, nomikanda ine novatalelipo vomawaneno, novikuavo vali. Otyo tyikuatesako ovanthu va Huku okusoka, nokulinga ovipuka monkhalelo yaongana. (Atos 16:4, 5) Ononkhalamutwe mbo Nombangi mba Jeova, vapongiya okulia kuopaspilitu, nokuavela ondundo aveho vapake tete momuenyo ovilinga viokuivisa Ouhamba, nokuholovona ovakuatate mavapewa ovilinga mewaneno.

Valandula ehongolelo liospilitu ya Huku. Ononkhalamutwe mbo Nombangi mba Jeova, vahongolelwa Nohamba Youye Auho, Jeova, na Jesus Omutwe weuaneno. (1 Coríntios 11:3; Efésios 5:23) Ovo kavelitale ngatyina vatumina ovanthu va Huku. Kumwe no Vakristau aveho ovalembulwa, “vekahi nokulandula Ondyona [Jesus] kese oku yenda.” (Apocalipse 14:4) Ononkhalamutwe mbo Nombangi mba Jeova, vapandula unene tyina tulikuambela okuveitilako opo ovilinga viavo viende nawa.

• Kohale ankho ovalie Ononkhalamutwe mbo vanthu va Jeova?

• Oñgeni Ononkhalamutwe mbo Nombangi mba Jeova hono vaovola ehongolelo lia Huku?

Ombetele, enyina lio Hebreu, lihangununa okuti: “Ondyuo ya Huku.” (Gênesis 28:17, 19, okatoi) Enyina olio liaviuka pala okutumbula onondyuo Onombangi mba Jeova vatunga mouye auho pala okuvatela nokuhongolela ovilinga viokuivisa. Ononkhalamutwe mbo Nombangi mba Jeova, vaundapa mombala yo Nombangi ouye auho ko Nova York, EUA, nokuhongolela ovilinga mono Filiyale movilongo ovinyingi. Vana vaundapa mo nondyuo ombo vaihanwa okuti ombunga Yombetele. Ngetyi tyilinga ombunga, ovo vakala kumwe, nokuundapela kumwe, nokulia kumwe nehambu nokulilongesa kumwe Ombimbiliya. Otyo vaihanenwa okuti “ombunga Yombetele.”—Salmo 133:1.

Omphangu yelikalela muundapa ovanthu veliava. Mono Mbetele ambuho, muna ovalume novakai Ovakristau veliava pala okulinga ehando lia Huku nokuundapela omasuka Ouhamba omuvo auho. (Mateus 6:33) Aveho vaundapa-mo kavafetwa, mahi vapewa onondyuo, nokulia, noula, noumbongo uhehi uvekuatesako okulanda etyi vesukisa. Aveho vapewa otyilinga mo Mbetele, vamwe vaundapa mo noseketa, nokuteleka, ine omondyuo yokulila. Ovakuavo valinga omikanda, nokusukula monondyuo, nokukoha, nokupangiya evi viateka, novikuavo vali.

Mulingwa ovilinga ovinyingi viokuvatela ovilinga viokuivisa Ouhamba. Onombetele ambuho mbuhanda unene otyili tyikahi Mombimbiliya tyinoñgonokwe novanthu aveho. Ombulusula ei nayo otyo yalingilwa. Yahonekwa no Nonkhalamutwe mbo Nombangi mba Jeova, aitumwa mono komputadole kovapitiyi ouye auho, ailingwa no nomakina mbuhatekesa mbukahi mo no Mbetele ononyingi, nokupakwa mo nombapolo okutumwa komawaneno alamba po 110.000. Movilinga ovio aviho, ombunga Yombetele yundapa nondyanga, mokonda ovilinga viokuivisa onondaka onongwa vialumbana unene.—Marcos 13:10.

• Ovalie vaundapa mo Mbetele iya oñgeni vatekulwa?

• Ovilinga patyi vialumbana vivatelwa mo Mbetele?

Ombunga yo Mbetele yundapa monoseketa mbelikalaila, okuvatela ovilinga viokuivisa motyilongo tyike ine ovinyingi. Vamwe vapitiya, ovakuavo valinga omikanda, nokuvinyika, nokuvipaka nawa, nokulinga ono vidiu, novilinga ovikuavo viesukisa motyilongo.

Okomisau yo Filiyale ihongolela ovilinga. Ononkhalamutwe mbo Nombangi mba Jeova, mbuholovona ovakulu valongoka nawa vetatu ine valambapo mu kese Filiyale opo vakale vo Komisau yo Filiyale. Okomisau oyo, ipopila Ononkhalamutwe mbo Nombangi mba Jeova etyi ovilinga motyilongo tyavo vikahi nokuenda, novitateka ovikuavo. Etyi vapopia tyikuatesako Ononkhalamutwe ombo, okutokola etyi matyililongeswa momikanda, no momaliongiyo no movionge. Ovatumwa vo Nonkhalamutwe mbo Nombangi mba Jeova vatiwa ovatalelipo vono Mbetele, vatumwa apeho vakatalelepo ono Filiyale, nokuvatela Okomisau yo Filiyale okufuisapo nawa ovilinga viavo. (Provérbios 11:14) Otyilinga tyakolela tyomutalelipo oo, muakutikinya elongomona lilingwa pala okupameka vana vakala motyilongo atalelapo.

Ombatelo ipewa omawaneno. Ovakuatate vaundapa moseketa yovilinga mo Filiyale vena otyilinga tyokuonganeka omawaneno omape, nokutavela, nokupaka nawa omikanda viokuholovona ovakulu vewaneno novakuatesiko vavo. O Filiyale tupu ihongolela ovilinga vio vakokoli-ndyila, no nomisionaliu, novatalelipo vomawaneno vaundapa motyilongo tyavo. Vaonganeka ovionge ovinene, novilinga viokutunga Onondyuo Mbomaliongiyo nokutuma omikanda komawaneno opo vivekuateseko. Ovilinga aviho vilingwa mo Filiyale vivatela okufuisapo nawa ovilinga viokuivisa.—1 Coríntios 14:33, 40.

• Oñgeni Okomisau yo Filiyale ivatela Ononkhalamutwe mbo Nombangi mba Jeova?

• Ovilinga patyi vilingwa mo Filiyale?

Opo tuivise nawa “onondaka onongwa” “komalongo aeho nomihoko, nomalaka, novanthu,” tulinga omikanda vilamba pomalaka 750. (Apocalipse 14:6) Oñgeni tulinga ovilinga ovio viepuiya? Tutyilinga nombatelo yo vahoneki ouye auho, novapitiyi valinga ononkhono—aveho Onombangi mba Jeova.

Onondaka tete mbuhonekwa mo Inglesi. Ononkhalamutwe mbo Nombangi mba Jeova, vahongolela ovilinga mo Seketa yo Vahoneki Kombala yo Nombangi mba Jeova ouye auho. Oseketa oyo ihongolela ovahoneki vaundapa mombala, noko no filiyale mbumwe. Mokonda tuna ovahoneki velikalaila, otyo tyitukuatesako okuhoneka ovipuka vikuatesako ovanthu vomihoko aviho. Ngotyo, omikanda vietu vikuatesako ovanthu ouye auho.

Onondaka mbutumwa kovapitiyi. Tyina ovahoneki vatala okuti etyi vahoneka tyikahi nawa, vetyituma mono nomakina ine onokomputadole kovapitiyi ouye auho, opo vapitiye, nokutanga nawa, nokutala inkha tyayandyuluka nawa. Valinga ononkhono opo vaovole “onondaka mbotyotyili mbaviuka” mambukuatesako okuhangununa nawa melaka liavo etyi tyapopia o Ingelesi.—Eclesiastes 12:10.

Ono komputadole mbukuatesako okukanyaukisa ovilinga. Okomputadole kaipingi po vahoneki novapitiyi. Mahi, ovilinga viavo vipondola okukanyauka tyina vaundapesa ono disionaliu mo komputadole, nokuovolola ovipuka ovikuavo viesukisa. Onombangi mba Jeova vena o programa itiwa (MEPS) Sistema de Editoração Eletrônica Multilíngüe, ikuatesako okupitiya momalaka omanyingi, nokuonganeka nawa onondaka nomalutalatu momikanda.

Omokonda yatyi tulingila ononkhono ombo ambuho, alo umwe okupitiya omalaka apopiwa novanthu vehehi? Omokonda Jeova “uhanda ovanthu vatyo aveho vayovolwe iya avakala nenoñgonoko liafuapo konthele yotyili.”—1 Timóteo 2:3, 4.

• Oñgeni omikanda vietu vihonekwa?

• Omokonda yatyi tupitiyila omikanda vietu momalaka omanyingi?

Eongano lietu lilinga, nokuyandyanesa Onombimbiliya ononyingi, nomikanda omikuavo kese enima, tyihalandesa. Tutunga, nokulinga nawa Onondyuo Mbomaliongiyo no Nombetele. Tukuatesako ovanthu ovanyingi vakala mo Mbetele no nomisionaliu, nokuava ekuateso tyina pamoneka oviponga. Hamwe upondola okulipula okuti: ‘Onombongo mbokufeta ovipuka ovio aviho mbutunda-pi?’

Onthue katuiti onombongo, tupu katulandesa omikanda. Namphila ovilinga vietu viokuivisa viesukisa onombongo ononyingi, onthue katuiti onombongo. Omanima omanyingi konyima, Omutala Womulavi wavali, wapopile okuti onthue tutavela okuti o Jeova utukuatesako iya “nalumwe matuiti onombongo kovanthu” tyilityili katunetyilinge!—Mateus 10:8.

Ovilinga vietu vivatelwa novanthu votyali. Ovanthu ovanyingi vapanda ovilinga vietu viokulongesa Ombimbiliya, vehole okuava onombongo. Tupu Onombangi mba Jeova ovo muene vaava nehambu omuvo wavo, no nononkhono, no nombongo, novipuka ovikuavo opo ehando lia Huku lilingwe ouye auho. (1 Crônicas 29:9) Mondyuo Yomaliongiyo ine Youhamba no movionge, muvahiwa oukasa opo kese umwe uhanda apake-mo onombongo. Tupu tyitavela okuava onombongo okutyilingila mo site, jw.org. Ovikando ovinyingi, onombongo mbuhole okuawa novanthu vahepa, velifwa nomukai omuhepe omuhepi Jesus apopia nawa, wapakele ouvela uvali wonombongo uhena esilivilo enene mokakasa koviawa mondyuo ya Huku. (Lucas 21:1-4) Ngotyo, kese umwe upondola okukala notyinthyiliyo “tyokupakela tyimwe ponthele” opo aave, “ngetyi atokola momutima wae.”—1 Coríntios 16:2; 2 Coríntios 9:7.

Tuna onthumbi yokuti Jeova matualako okulunda omitima via vana vahanda ‘okumunkhimaneka novipuka viavo viakolela’ pala okuvatela ovilinga Viouhamba opo ehando liae lilingwe.—Provérbios 3:9.

• Omonkhalelo patyi eongano lietu lielikalela no nongeleya ononkhuavo?

• Oñgeni onombongo mbuawa mbuundapeswa?

Onombangi mba Jeova veliongiya Mondyuo Yomaliongiyo ine Youhamba opo velilongese Ombimbiliya, Nouhamba wa Huku—osapi yovilinga via Jesus.—Lucas 8:1.

Ombo onomphangu mbefendelo liotyotyili potyilongo. Monomphangu ombo, muaonganekwa ovilinga viokuivisa onondaka onongwa Mbouhamba. (Mateus 24:14) Onondyuo ombo mbelikalaila mounene nomokutungwa, mahi hanonene unene, tupu mutupu ovipuka ovinyingi iya pamwe kamuliongiyila vala ewaneno like. Momanima okualamba pahetyino, tuatunga Onondyuo Mbomaliongiyo ine Mbouhamba ononyingi onomphe (kese nthiki tutunga ononthano) mokonda omawaneno ekahi nokuliyawisa unene. Oñgeni tuetyivila?—Mateus 19:26.

Mbutungwa no nombongo mbuawa novakuatate. Onombongo ombo, mbutumwa ko filiyale opo mbuvatele omawaneno esukisa okutungilwa Ondyuo Yomaliongiyo ine Youhamba ine okuilinga vali nawa.

Mbutungwa novanthu velikalaila veliava vahafetwa. Movilongo ovinyingi, muna ovikundyi Viokutunga Onondyuo Mbomaliongiyo ine Mbouhamba. Ovakuatate ovo valinga oungendi motyilongo tyavo okuenda komawaneno kuesukisa okutungwa Onondyuo Mbomaliongiyo, opo vatunge nokulongesa Onombangi potyilongo vekahi nokutunga. Kovilongo ovikuavo kuna Ovakuatate vaholovonwa opo ihongolele ovilinga viokutunga nokulinga vali nawa Onondyuo mbo Maliongiyo motyilongo vaundapa. Ovakulu vomawaneno vokuna ounongo wokutunga ovo vahongolela omawaneno mokueenda kuovilinga viokutunga iya ovakuatate vana vena ounongo wokutunga navo veliava pala okuvatela. Pokutunga kese ondyuo, ovakuatate vewaneno likahi nokutungilwa, ovo vavatela vali unene ovilinga ovio. Ospilitu ya Jeova no nonkhono ovanthu vae valinga nomutima auho, vikuatesako ovilinga ovio okuenda nawa.—Salmo 127:1; Colossenses 3:23.

• Omokonda yatyi onomphangu mbetu mbefendelo mbuihanenwa okuti Onondyuo Mbomaliongiyo?

• Oñgeni tutyivila okutunga Onondyuo Mbomaliongiyo ouye auho?

Kese Ondyuo Yomaliongiyo Yonombangi mba Jeova ina enyina likola lia Huku. Ngotyo, tutyii okuti okuisukukisa opo ikale tyefiwa, elao enene nokuakolela mefendelo lietu. Aveho vapondola okutyilinga.

Konthyulilo yeliongiyo ovanthu veliava opo vakombe. Konyima yeliongiyo, ovakuatate no nomphange vakomba nehambu nokuviukisa nawa Ondyuo Yomaliongiyo ine Youhamba. Like mosimano, ondyuo ikombwa vali nawa nokusukulwa. Omukulu weuaneno ine omukuatesiko wavo, uhongolela ovilinga ovio, okulandula omukanda muahonekwa etyi tyina okulingwa. Tyitei kuetyi tyesukisa, ovakuatate vakomba, nokusukula pohi, nokusekuna ombuma, nokuviukisa ovipundi, nokusukula moundyuo wokutalamena-ko okupaka-mo o lixívia, nokukoha onondyanena, nokukayumbahi ovipuka viasila, ine okukomba pondye, nokulinga nawa otyikunino. Konthyulilo yenima, kuholovonwa onthiki ewaneno liya okukomba vali nawa. Okuenda novana vetu atuveavela ovilinga vimwe, tuvelongesa okukala nonthilo nomphangu yetu yefendelo.—Eclesiastes 5:1.

Vamwe veliava opo vapangiye etyi tyesukisa. Kese enima, ovakuatate vatala inkha Ondyuo Yomaliongiyo ine Youhamba ikahi nawa, mokati no kondye. Otyo tyikuatesako apeho okupangiya nawa kese tyimwe tyateka, opo vahapesele onombongo. (2 Crônicas 24:13; 34:10) Ondyuo Yomaliongiyo yasukuka nokuefiwa nawa, omphangu yaviuka pala okufenda Huku yetu. Tyina tuundapa movilinga ovio, tulekesa okuti tuhole Jeova, nokuapanda omphangu yetu yefendelo. (Salmo 122:1) Tupu ovanthu potyilongo mavapopi nawa efendelo lietu.—2 Coríntios 6:3.

• Omokonda yatyi tuesukisa okusuka nomphangu yetu yefendelo?

• Oityi tulinga opo Ondyuo yetu Yomaliongiyo ine Youhamba itualeko tyasukuka?

Okuti uhanda okuovolola vali nawa momikanda opo uyawise kenoñgonoko liove Liombimbiliya? Okuti una otestu imwe ine omunthu, nomphangu ine otyipuka otyikuavo tyapopiwa Mombimbiliya uhanda okunoñgonoka vali nawa? Ine welipulale inkha Ondaka ya Huku ipondola okukukuatesako motyitateka tyimwe una? Inkha ongotyo, enda ukaovolole mo mbimbilioteka Mondyuo Yomaliongiyo ine Youhamba.

Muna omikanda vikuatesako unene. Hamwe utupu omikanda aviho vio Nombangi mba Jeova melaka liove. Mahi, Mondyuo Yomaliongiyo ine Youhamba muna omikanda ominyingi. Tupu hamwe muna Onombimbiliya ononyingi mbelikalaila, no disionaliu ongwa, nomikanda omikuavo vikuatesako unene. Tyina eliongiyo lihenehimbike na tyina liamapu, upondola okutala-mo omukanda uhanda. Inkha muna okomputadole, tyafuile muapakwa o Watchtower Library. Oyo oprograma ipakwa mo komputadole ina omikanda ominyingi vio Nombangi mba Jeova, ihepuiya okuundapesa. Upondola okuovola-mo etyi uhanda, ondaka imwe ine otestu.

Ikuatesako vana velihonekesa Meliongiyo Omuenyo Wetu Woukristau. Inkha welihonekesa meliongiyo olio, upondola okukatala mo mbimblioteka Mondyuo Yomaliongiyo ine Youhamba, tyina upongiya onthele yove. Omuendesi Weliongiyo Omuenyo Wetu Woukristau oe uyunga o mbimblioteka. Oe una otyilinga tyokutala inkha omikanda omipe omo vikahi, nokuvionganeka nawa. Oe ine omulongesi wove Wombimbiliya upondola okukulekesa oñgeni movasi etyi wesukisa. Mahi, omikanda ovio kavipondola okupolwa Mondyuo Yomaliongiyo ine Youhamba. Tupu, tuhanda okuvikuata nawa, nokuhahoneka-mo.

Ombimbiliya ipopia okuti opo tuvase “enoñgonoko lia Huku” tuna okuliovola ngatyina “omalumono aholekwa.” (Provérbios 2:1-5) Ombimblioteka Mondyuo Yomaliongiyo ine Youhamba ipondola okukukuatesako okuhimbika okuovolola.

• Oityi tuvasa mo mbimblioteka Mondyuo Yomaliongiyo ine Youhamba?

• Olie upondola okukukuatesako okuovola etyi uhanda mo mbimblioteka?

Jesus Kristu wapopilile ovalongwa vae okuti: “Yekei otyitei tyenyi tyiliaimine ovanthu, opo vamone ovilinga vienyi oviwa, avankhimaneka Tate yenyi ukahi keulu.” (Mateus 5:16) Moluotyo, hono tuundapesa nawa ounongo wouye, okukutikinya-mo o Internet. Mo site yetu jw.org, muna omikanda vipopia konthele yomatavelo novilinga vio Nombangi mba Jeova. Oityi tyili-mo?

Omakumbululo Ombimbiliya omapulo ovanthu vehole okulinga. Upondola okuvasa-mo omakumbululo omapulo amwe akolela vali. Mongeleka, omapulo epandu akumbululwa mo tratadu yati: Okuti Ove Uhanda Okunoñgonoka Otyili? No yokuati Okuti Vokuankhia Vapondola Okukala vali Nomuenyo? mbukahi mo site momalaka 600. Tupu upondola okuvasa-mo Ombimbiliya Tradução do Novo Mundo yapitiyua momalaka 130, nomikanda omikuavo tuundapesa pokulilongesa Ombimbiliya, okukutikinya-mo omukanda Oityi Ombimbiliya Tyili-tyili Ilongesa? no Mutala Womulavi omipe, no Despertai! Omikanda ovio, ovinyingi vipondola okutangelwa ine okutehelelwa mo Internet, ine okuvipola-mo okumanga po MP3, PDF, ine EPUB atuvipake mo komputadole yetu. Tupu tupondola okupola-mo ononthele mbumwe melaka liomunthu walekesa esuko! Muna ono vidiu mbomikanda momalaka omanyingi 20 onompholo. Upondola okupola-mo ondalama Yombimbiliya yokutehelela vala, no nondalama Mbombimbiliya, noviimbo opo utehelele tyina uhanda.

Otyili konthele Yonombangi mba Jeova. Tupu muna ono vidiu onomphe mbulekesa ovilinga vietu ouye auho, netyi tulinga opo tukuateseko ovanthu vesukisa ombatelo, novipuka ovikuavo konthele yo Nombangi mba Jeova. Upondola okuvasa-mo ononthiki makulingua ovionge, netyi upondola okulinga opo upopie nono filiyale mbetu.

Okulinga ngotyo, tukahi nokuliaimisa otyitei tyotyili kononthele mbokokule-kule mbo ohi. Otyili tyikahi nokukuatesako ovanthu vovilongo aviho, alo umwe ko Antártida. Tulikuambela opo “ondaka ya Jeova itualeko okuhika liwa-liwa” ouye auho, opo Huku ankhimanekwe.—2 Tessalonicenses 3:1.

• Oñgeni o site jw.org, ikahi nokukuatesako ovanthu ovanyingi okulilongesa otyili Tyombimbiliya?

• Oityi uhanda okuovola mo site yetu?