Ovanthu ovanyingi vayeka-po okuenda kongeleya mokonda kavavasi-ko ombatelo yopaspilitu ine epameko. Mahi, oityi ove wesukisila okuenda komaliongiyo alingwa no Nombangi mba Jeova? Oityi movasi-mo?

Ehambu liokukala novanthu vena oluembia nesuko. Pomuvo wono apostolu, Ovakristau ankho velionganeka momawaneno, nokulinga omaliongiyo pala okufenda Huku, nokulilongesa Ovihonekwa, nokulipameka pokati. (Hebreus 10:24, 25) Tyina veliongiya, ankho velitehelela okuti vekahi nomapanga otyotyili, ovakuatate vavo no nomphange. (2 Tessalonicenses 1:3; 3 João 14) Nonthue tulandula ongeleka yavo iya tuna ehambu ngolio.

Ouwa wokulilongesa okulandula onondonga Mbombimbiliya. Ngetyi ankho tyilingwa kohale, ovalume, novakai, novana aveho veliongiya kumwe. Ovalongesi ovanongo vaundapesa Ombimbiliya opo vetukuateseko okunoñgonoka oñgeni matulandula onondonga mbayo kese nthiki momuenyo wetu. (Deuteronômio 31:12; Neemias 8:8) Aveho vakalapo vapondola okukumbulula tyina palingwa omapulo, nokuimba, otyo tyitukuatesako okulekesa ekevelelo lietu.—Hebreus 10:23.

Ouwa wokupameka ekolelo liove mu Huku. Apostolu Paulu wapopilile ewaneno limwe lio kononthiki mbae okuti: “Nahanda unene okumumona, . . . opo tulipameke otyikati kese umwe nekolelo lia mukuavo, tyilinge lienyi no liange.” (Romanos 1:11, 12) Okukala apeho novakuatate vetu momaliongiyo, tyipameka ekolelo lietu, netokolo liokulandula onondonga mbo Mbimbiliya.

Oityi uhetavelela okuenda keliongiyo matulingi osimano ino, olitalelako ove muene? Matukutambula nehambu enene. Momaliongiyo aeho munyingilwa vala, kamuitwa onombongo.

• Omaliongiyo etu alandula ongeleka patyi?

• Ouwa patyi tupolako tyina tuenda komaliongiyo Ovakristau?

Namphila pamwe tuna okukuata mokati kohika yanthikovela ine omombila, apeho tuenda komaliongiyo etu. Namphila vena ovitateka, nokuepuila mokonda yovilinga ovinyingi, oityi Onombangi mba Jeova valingila ononkhono ombo opo veliongiye novakuatate vavo?

Tyitukalesa nawa. Paulu wahoneka okuti: “Lipamekei pokati,” okupopila vana tuliongiya navo mewaneno. (Hebreus 10:24) Onondaka ombo mbulekesa okuti “tuesukisa okunoñgonoka nawa vakuetu.” Onondaka mbo apostolu mbutuavela ondundo yokusukalala na vakuetu. Inkha tunoñgonoka onombunga mbo Vakristau vakuetu, matutale okuti vamwe puvo vetyivila okutetulula nawa ovitateka vielifwa novietu iya vapondola okutukuatesako.

Tyipameka oupanga. Momaliongiyo etu, ovakuatate no nomphange havanthu twii vala, mahi omapanga etu otyotyili. Tupu, pamwe tukala kumwe povitalukiso viaviuka. Ouwa patyi tupolako? Tulilongesa okupanda vali vakuetu iya otyo tyipameka ohole yetu. Iya tyina ovakuatate vetu no nomphange vena ovitateka, tuvekuatesa-ko mokonda tuna navo oupanga wapama. (Provérbios 17:17) Tyina tuliwaneka novanthu aveho mewaneno lietu, tulekesa okuti tukahi “nokulitekula nawa pokati.”—1 Coríntios 12:25, 26.

Tukuavela ondundo opo ulinge oupanga na vana valinga ehando lia Huku. Movasi omapanga oo pokati ko Nombangi mba Jeova. Mbambavo uhayeke natyike tyikutyilike okuliwaneka nonthue.

• Omokonda yatyi okuliongiya na vakuetu momaliongiyo tyituetela ouwa?

• Onalupi moiya okuliongiya nonthue mewaneno lietu?

Momaliongiyo Ovakristau votete ankho muimbwa, nokulikuambela, nokutanga Ovihonekwa nokuvihangununa, mahi ankho kamulingwa oviso. (1 Coríntios 14:26) Tupu, hono otyo tyilingwa momaliongiyo etu.

Etyi tulilongesa tyapolwa Mombimbiliya no kuna esilivilo enene. Konthyulilo yosimano, kese ewaneno liliongiya pala okutehelela mono minutu 30 elongomona Liombimbiliya lilekesa oñgeni Ovihonekwa vitukuatesako, momuvo tukahi. Atuho tupewa ondundo yokulandula onotestu Mombimbiliya yetu. Konyima yelongomona, tulinga moola ike Elilongeso “Liomutala Womulavi,” iya kese umwe mewaneno upondola okukumbulula omapulo monthele ikahi nokulilongeswa. Elilongeso olio litukuatesako okuundapesa momuenyo wetu onondonga mbo Mbimbiliya. Omawaneno alamba 110.000 ouye auho elilongesa onthele yelifwa Yomutala Womulavi kese simano.

Tukuateswako okuyawisa ounongo wetu wokulongesa. Tupu tuliongiya mokati kosimano komutenya ine kongulohi, meliongiyo litiwa Omuenyo Wetu Woukristau Novilinga Vietu. Onondonga mbulilongeswa meliongiyo olio mbapolwa momukanda Omuenyo Wetu Woukristau Novilinga Vietu—Omukanda Wovilinga tutambula kese hanyi. Eliongiyo olio liayapulwa ononthele ononthatu. Yotete itiwa Olumono Lukahi Mondaka ya Huku itukuatesako okunoñgonoka nawa onthele imwe Yombimbiliya ovakuatate vatangale keumbo. Onthele ya vali itiwa Kala Nombili Movilinga Viokuivisa. Mu oyo mulingwa omalekeso etulongesa oñgeni matupopi novanthu konthele Yombimbiliya. Konyima, omukuatate umwe utuavela onondonga oñgeni tupondola okukala ovatangi novalongesi vekahi nawa. (1 Timóteo 4:13) Onthele ya tatu itiwa Omuenyo Wetu Woukristau, itukuatesako okuendela monondonga mbo Mbimbiliya nthiki na nthiki. Oyo ilingwa nomapulo nomakumbululo ayawisa enoñgonoko lietu konthele Ombimbiliya.

Tyina wamaende komaliongiyo etu, mohuvu nelongeso ewa Liombimbiliya mopewa.—Isaías 54:13.

• Oityi mokatehelela momaliongiyo Onombangi mba Jeova?

• Pomaliongiyo tulinga mosimano olipi ove uhanda okuenda tete?

Watalale omalutalatu momukanda ou oñgeni Onombangi mba Jeova vavala nawa tyina vaya komaliongiyo ewaneno? Omokonda yatyi tusukila nokuvala nawa nokulifiwisa?

Opo tulekese onthilo ku Huku yetu. Otyili Huku katale vala kondye. (1 Samuel 16:7) Mahi, tyina tuliongiya pala okumufenda, ehando lietu liokomutima okulekesa onthilo kwe, no kovakuatate vetu. Inkha tuenda komukoyesi umwe mombonge, tuvala nawa nokulifiwisa opo tulekese okuti tuna onthilo nomukoyesi. Tupu, onkhalelo tuvala tyina tuenda komaliongiyo mailekesa okuti tupanda “Omukoyesi wouye auho,” Jeova Huku, nomphangu apa tumufendela.—Gênesis 18:25.

Opo tulekese okuti tupanda ovitumino tulandula. Ombimbiliya yavela ondundo Ovakristau vavale “no nondunge nokuapola pokati” ngetyi tyilinga vana “vena onthilo na Huku.” (1 Timóteo 2:9, 10) Okuvala “tyapola pokati,” tyihangununa okulityilika okuvala ovikutu viavatuka unene, viokulihandesa, ine vilekesa olutu. Tupu, okukala “no nondunge” tyitukuatesako okuholovona ovikutu vikahi nawa. Ovitumino ovio nkhele vituyeka tuholovone etyi onthue muene tuhole. Tyihapopi natyike, onkhalelo yetu ongwa yokuvala “ifiwisa elongeso lio Muyovoli wetu,” “nokunkhimaneka Huku.” (Tito 2:10; 1 Pedro 2:12) Tyina tuvala nawa momaliongiyo, vakuetu mavatale nawa efendelo lia Jeova.

Mahi, inkha nkhele utupu ovikutu viaviuka, uhayeke otyo tyikutyilike okuenda Kondyuo Yomaliongiyo ine Youhamba. Ovikutu vietu kaviesukisile okulanda onombongo ononyingi, mahi vina vala okusukuka, vitavela okuya povanthu.

• Okuti onkhalelo tuvala tyina tukafenda Huku yakolela?

• Ovitumino patyi vituhongolela tyina tuholovona ovikutu matuvale?

Inkha ukahi nokulilongesa Ombimbiliya Nombangi imwe ya Jeova, tyafuile uhole okupongiya etyi mamulilongesa. Tupu opo upole ouwa keliongiyo, otyiwa upongiye ononthele mamulilongesa. Tyina tutyilinga apeho tupolako vali ouwa.

Holovona onalupi naapa molilongesila. Onalupi upondola okulilongesa vali nawa ohatalukwa? Okuti okomuhuka tyina uhenehimbike ovilinga, ine oko kangulohi, tyina ovana velele? Namphila kumelilongesa ehimbwe, tokola omuvo ulifuepi molilongesa, ohayeke natyike tyikutyilike. Ovola omphangu yapoleya, polapo aviho vipondola okukutalula, okuika olaliu, notelevisau, notelefone. Okulikuambela tyina uhenehimbike okulilongesa matyikukuatesako okuhasukalala novipuka ovikuavo osoko vala Kondaka ya Huku.—Filipenses 4:6, 7.

Nthinda omakumbululo, nokulipongiya opo ukumbulule. Tete, ovola okunoñgonoka onthele aiho molilongesa. Soka kosapi yonthele ine okapitulu, tala oñgeni kese okasapi kelikuata nosapi yonthele aiho, tala nawa kese lutalatu, nokupitulula omapulo apopia ononthele mbavilapo. Konyima, tanga kese palagrafu, tala epulo oovola ekumbululo. Ovola onotestu mbukahi-mo nokumbutanga, nokusoka oñgeni mbelikuata netyi ukahi nokulilongesa. (Atos 17:11) Tyina uvasa ekumbululo liepulo, linthinda ine okuhoneka onondaka ponthele yo palagrafu mambukukuatesako okuhinangela ekumbululo mokueenda kueliongiyo. Iya tyina ukahi meliongiyo, upondola okuyelula okuoko inkha uhanda, okumbulula monondaka mbehehi.

Inkha ulilongesa ononthele ambuho mambulilongeswa momaliongiyo a kese simano, moyawisa ovipuka ovipe “kolumono” luove luenoñgonoko Liombimbiliya. —Mateus 13:51, 52.

• Oityi upondola okulinga opo upongiye apeho omaliongiyo?

• Oñgeni upondola okulipongiya opo ukumbulule meliongiyo?

Tunde kohale, Jeova ankho uhanda onombunga mbukale kumwe opo mbupameke oupanga wavo nae, na kese umwe mombunga. (Deuteronômio 6:6, 7) Moluotyo, Onombangi mba Jeova vaholovona onthiki imwe mosimano opo vafende kumwe, okukala pomphangu yahiliya nokutomphola ovipuka viopaspilitu vielikuata nomasuka avo. Alo umwe tyina ukala awike, omuvo oo omphitilo yakolela yokukala na Huku opo ulinge elilongeso lio Mbimbiliya, etyi waholovona.

Efendelo liombunga omuvo wokufuena ku Jeova. “Fuenei ku Huku, nae opo afuene kuonwe.” (Tiago 4:8) Tunoñgonoka vali nawa Jeova tyina tulilongesa Mondaka yae, Ombimbiliya, konthele yovituwa viae, netyi alinga. Onkhalelo imwe yapepuka yokuhimbika efendelo liombunga, okutangela peulu Ombimbiliya kumwe, hamwe okulandula ehinangeleso momukanda Omuenyo Wetu Woukristau Novilinga Vietu. Kese umwe mombunga upondola okupewa onthele matange iya aveho avapopi etyi vanoñgonoka mo Vihonekwa.

Omuvo ukuatesako ombunga okukala vali noupanga wapama. Ovalume novakai vavo, na vana vena ovana, vapameka oupanga wavo kese umwe na mukuavo tyina valinga elilongeso Liombimbiliya mombunga. Olio lina okukala omuvo wehambu, nombembwa iya kese umwe mombunga una okukevela onthiki oyo nehambu. Tyitalela komanima ovana, ovohe vapondola okuholovona ononthele mambuvekuatesako, hamwe okuundapesa ononthele mbo Mutala Womulavi no Despertai! Ine ononthele mbukahi mo site jw.org. Mupondola okupopia ovitateka ovana vavasa kosikola, no ñgeni vapondola okuvitetulula. Tupu mupondola okutala o JW Broadcasting (mo tv.jw.org) iya konyima amutomphola etyi muelilongesa. Ine mulilongesa oviimbo mavikaimbwa momaliongiyo, nokulia nombunga tyina muamana.

Omuvo oo mukala kumwe kese simano pala okufenda kumwe Jeova, maukuatesako ombunga aiho okulilongesa nehambu Ondaka ya Huku iya Huku mayambe ononkhono mbenyi.—Salmo 1:1-3.

• Omokonda yatyi tuholovonena omuvo opo tulilongese efendelo liombunga?

• Oityi ovohe vapondola okulinga opo omuvo oo uhambukiswe ombunga aiho?

Ovanthu ava vena ehambu mokonda yatyi? Omokonda vekahi motyonge tyetu. Ngovaumbili va Huku vokohale, vatuminwe okuliongiya ovikando vitatu menima, nonthue tukevela nehambu ovionge vietu ovinene. (Deuteronômio 16:16) Kese enima, tuna ovionge vitatu ovinene: ovionge vivali vio nthiki ike, no tyo no nthiki ononthatu. Ouwa patyi tupola kovionge ovio?

Vipameka oupanga novakuatate vetu Ovakristau. Ngetyi ova Isilayeli ankho vahambukilwa okuhivilika Jeova “pokati kounyingi waongana,” nonthue tuhambukilwa okufenda kumwe Jeova movionge ovinene. (Salmo 26:12; okatoi; 111:1) Ovionge ovio vituavela omphitilo yokulivasa no Nombangi mbo mawaneno omakuavo, novilongo ovikuavo. Komutenya, tuomba-po opo tulie nokutomphola novakuatate vetu pomphangu yotyonge. (Atos 2:42) Movionge ovio tutala nawa ohole iwaneka “ovakuatate vetu” mouye auho.—1 Pedro 2:17.

Vitukuatesako okukula mopaspilitu. Ova Isilayeli navo ankho vakala nouwa “wokunoñgonoka onondaka” Mbovihonekwa vahangununinwa. (Neemias 8:8, 12) Nonthue tupanda elongeso Liombimbiliya tupewa movionge vietu. Kese nthele, ina osapi yapolwa Movihonekwa. Omalongomona, nomalekeso tutehelela, etulongesa oñgeni matulingi ehando lia Huku. Tupamekwa tyina tutehelela onongeleka mbo Vakristau vetyivila okufinda ovitateka mononthiki mbuno mbepuiya. Movionge viononthiki ononthatu, mulingwa onondalama mbutukuatesako okunoñgonoka vali nawa omahipululo Ombimbiliya, nokutuavela onondonga mbakolela. Mu kese tyonge, mumbatisalwa vana vahanda okulekesa okuti velipakula ku Huku.

• Omokonda yatyi ovionge vituhambukiswa?

• Okukala povionge matyikuetela ouwa patyi?

Etyi ankho kuakamba katutu opo Jesus aipawe, wati: “Onondaka ombu onongwa mbouhamba wa Huku, mambukaiviswa kombanda yohi aiho, pala oumbangi movilongo aviho, iya konyima onthyulilo aiya.” (Mateus 24:14) Mahi oñgeni ovilinga ovio viokuivisa ankho mavilingwa ouye auho? Omokulandula ongeleka Jesus aava etyi ankho ekahi pano pohi.—Lucas 8:1.

Tuovola ovanthu pomaumbo avo. Jesus walongesile ovalongwa vae okuivisa onondaka onongwa umbo na umbo. (Mateus 10:11-13; Atos 5:42; 20:20) Pomuvo wo Vakristau votete, ovaivisi ovo ankho vatumwa movilongo vena okuivisa. (Mateus 10:5, 6; 2 Coríntios 10:13) Tupu hono, ovilinga vietu viokuivisa viaonganekwa nawa, kese ewaneno lipewa omphangu apa liivisa. Otyo tyitukuatesako okufuisapo otyitumino tya Jesus “tyokuivisa kovanthu nokuava oumbangi nombili.”—Atos 10:42.

Tulinga ononkhono mbokupopia novanthu kese apa vekahi. Jesus tupu waava ongeleka ongwa mokuivisila po nomphangu pena ovanthu ovanyingi, ngetyi o konthele yelunga ine po nonyombo. (Marcos 4:1; João 4:5-15) Nonthue tutomphola novanthu konthele Yombimbiliya momatapalo, na pana palingilwa ovitanda, na pana patalama omatukutuku ine oko telefone. Tupu tuavela oumbangi ovo munthele yetu, na vana tuundapa navo, na vana tulongeswa navo kosikola, nombunga. Ononkhono ambuho tulinga mbukuatesako ovanthu ovanyingi ouye auho okutehelela “onondaka onongwa mbeyovo.”—Salmo 96:2.

Okuti wii omunthu umwe upondola okupopila onondaka onongwa Mbouhamba wa Huku, netyi mambukaeta komutwe? Onondaka ombo mbekevelelo mbahakale vala mbove. Mbupopila vakuenyi liwa-liwa!

• “Onondaka patyi onongwa” mbuna okuiviswa?

• Oñgeni Onombangi mba Jeova vahetekela ongeleka ya Jesus yokuivisa?

Ondaka “omukokoli-ndyila” ovikando ovinyingi ipopia vana vatetekela okuundapa povilongo, nokuikula ondyila opo ovakuavo valandule-mo. Jesus ankho welifua nomukokoli-ndyila, watumua pano pohi opo alinge ovilinga viokuyovola omienyo, nokuikula ondyila yeyovo. (Mateus 20:28) Hono, ovalanduli vae vemuhetekela mokuundapa omuvo omunyingi ‘okulinga ovalongwa.’ (Mateus 28:19, 20) Vamwe vetyivila okuundapa movilinga tuihana okuti oukokoli-ndyila.

Omukokoli-ndyila omunthu wivisa omuvo auho. Onombangi mba Jeova, aveho vaivisa onondaka onongwa Mbouhamba. Mahi, vamwe vaonganeka nawa omuenyo wavo opo vakale ovakokoli-ndyila, iya vaundapa movilinga viokuivisa onoola 70 kese hanyi. Opo vetyivile, ovanyingi vaundapa vala mu kaputu komuhuka ine o kekumbi. Ovakuavo vaholovonwa opo vakale ovakokoli-ndyila vavilapo, avakaundapa kuna kuesukisa vali unene ovaivisi Vouhamba, okulinga onoola 130 kese hanyi. Ovakokoli-ndyila vahambukilwa etyi vena, nonthumbi yokuti Jeova meveavela etyi vesukisa. (Mateus 6:31-33; 1 Timóteo 6:6-8) Vana vehetyivili okuundapa movilinga ovio omuvo auho, pamwe vakala ovakokoli-ndyila vapola pokati, okulinga onoola 30 ine 50 mohanyi.

Omukokoli-ndyila ulundwa nohole ena na Huku novanthu. Nga Jesus, nonthue tuete ovanthu ovanyingi vehena ekevelelo vesukisa okunoñgonoka Huku nevangelo liae. (Marcos 6:34) Mahi, onthue tuna enoñgonoko lipondola okuvekuatesako pahetyino, nokuveavela ekevelelo liapama pala komutwe. Ohole ovakokoli-ndyila vena novanthu ivelunda okuava omuvo wavo, no nonkhono, opo vakuateseko vakuavo okunoñgonoka onondaka onongwa Mbouhamba. (Mateus 22:39; 1 Tessalonicenses 2:8) Otyo tyipameka ekolelo lio vakokoli-ndyila, nokuvefueneka vali ku Huku, nokukala nehambu enene.—Atos 20:35.

• Omukokoli-ndyila oityi?

• Oityi tyilunda ovanthu vamwe okukala ovakokoli-ndyila?

Tunde kohale, Onombangi mba Jeova vatualako okulongesa ovaivisi vouhamba. Vana vaundapa omuvo auho movilinga viokuivisa valongeswa mo nosikola mbeongano opo ‘vafuisapo nawa ovilinga viavo viokuivisa’.— 2 Timóteo 4:5.

Osikola Yovakokoli-ndyila. Tyina omukokoli-ndyila amatuukisa enima movilinga viokuivisa omuvo auho, ukongwa opo apite mosikola yovakokoli-ndyila ilingwa ononthiki epandu. Osikola oyo ikuatesako omukokoli-ndyila okufuena vali ku Jeova, okulinga vali nawa ovilinga viae nokutualako movilinga ovio apeho.

Osikola Yovaivisi Vouhamba wa Huku. Kulingwa Osikola Yovaivisi Vouhamba wa Huku monohanyi onombali okuholovona po vakokoli-ndyila ovanongo vafuapo pala okukaivisa kuna kuesukisa vali ovaivisi. Okulandula ongeleka yomuivisi wavilapo vali pano pohi, Jesus Kristu, ongatyina kese apopia okuti: “Ame uno! Nthume.” (Isaías 6:8; João 7:29) Okuilukila kokule tyipondola tyakutikinya okutyinda onkhalelo yapola pokati yomuenyo. Otyivala tyovanthu ine hamwe ovikulia vipondola vielikalela unene nevi omunthu etyiliya. Tyipondola hamwe tyisukisa alo umwe okulilongesa elaka ekuavo. Osikola oyo ikuatesako ovakuatate no nomphange vana vanepa na vana vahanepele, vena omanima 23 alo 65, okukala novituwa viopaspilitu nokukala nounongo wesukisa opo vaundapele vali unene Jeova neongano liae.

Osikola Yombimbiliya yo Gileade. Melaka lio Hebreu ondaka “Gileade” ihangununa okuti “Onthumbo Youmbangi.” Tunde etyi yahimbika mo 1943, onomisionaliu valamba po 8.000 vakuata mosikola oyo avatumwa opo vakaivise “alo kononthele mbokokule mbohi” iya otyo tyikahi nokueta ouwa omunene. (Atos 13:47) Etyi onomisionaliu vehika ko Peru, ankho kutupu ewaneno nalike. Hono kuna omawaneno alamba po 1000. Etyi vahimbika okuivisa mo Japau, ankho muna vala onombangi mba Jeova vahatuuka 10. Hono kuna Onombangi mba Jeova 200.000. Onosimanu ononthano mbo sikola muakutikinya okulilongesa unene ondaka ya Huku. Ovakokoli-ndyila vavilapo, no nomisionaliu, na vana vakala mombunga Yombetele ine ovatalelipo womawaneno vapondola okukongwa opo vapite mosikola oyo yokulilongesa, opo vakale no nonkhono nokutuala no komutwe ovilinga via Huku ouye auho.

• Osikola yovakokoli-ndyila oityi ilingilwa?

• Ovalie vapondola okupita mosikola Yovaivisi Vouhamba wa Huku?