Siovaa Upopia na Samuwele

Omunene-nakwa Elii ankho una ovana vevali ovanakwa vaundapa mekaka liefendelo. Vatiwa o Hofini na Fineya. Ankho kavetavela ovitumino vya Siovaa, valinga onya ovanthu. Tyina ova Isilayeli valinga oviawa viavo ku Siovaa, o Hofini na Fineya ankho velipolela-ko ohitu ikahi vali nawa. Ovanthu avapopila Elii etyi ovana vae valinga, mahi ehesuku natyo. Okuti Siovaa wetyiyekele vala ngootyo?

Namphila Samuwele ankho omona vali ku Hofini na Fineya, mahi ankho kalingi ngavo. Siovaa ahambukwa unene na Samuwele. Onthiki imwe kounthiki pweetyi Samuwele elele eivi ou wemwihana. Akahateka noku Elii, ati: ‘Ame uno!’ Mahi Elii ati: ‘Ame hekwiihanene. Enda kalangale-po.’ Samuwele akalangala-po. Aihanwa vali. Etyi Samuwele aihanwa mo lya tatu, Elii etyinoñgonoka okuti o Siovaa ukahi nokwiihana Samuwele. Elii apopila Samuwele okuti tyina wamaihanwa vali popia okuti: ‘Siovaa popia, omuundapi wove ukwiivite.’

Samuwele akalangala-po vali. Ukatehela wiihanwa vali, wiivala okuti: ‘Samuwele! Samuwele!’ Samuwele ati: ‘Popia tatekulu, omuundapi wove ukwiivite.’ Siovaa emupopila okuti: ‘Popila Elii okuti mandyinyimi-ko eumbo liae, mokonda ovivi ovana vae valinga mekaka liefendelo uvii umwe, mahi ngwe uvetala vala.’ Etyi kwatya Samuwele akaikula ekaka liefendelo ngeetyi ankho alinga-le. Samuwele ankho watila owoma okupopila omunene-nakwa etyi Siovaa emupopila. Mahi Elii aihana Samuwele, emupulu okuti: ‘Mona wange, oityi Siovaa ekupopila? Mphopile atyiho.’ Samuwele apopila Elii atyiho apopilwa.

Atee umwe etyi Samuwele ekekula, Siovaa apeho wemukwatesileko. Ova Isilayeli vetyimwene umwe okuti Siovaa wakoya Samuwele atie umwe oe omuuli oe omukoyesi.