Ovalie Veli Nokulongesa Ovanthu Ondaka ya Huku?

Siovaa wapopia okuti makamanako ovitateka aviho viovanthu. Otyipuka otyo otyiwa unene! Ñgeno ovanthu aveho vetyiiva, ine hatyo? Sesusi watuma ovalongwa vae vetyipopile ovanthu. (Mateusi 28:19, 20) Oityi Onombangi mba Siovaa vehole okulinga opo vetyivile okulinga etyi Sesusi evetuma?

1. Oñgeni etyi tyapopiwa mu Mateusi 24:14 tyili nokulingwa?

Sesusi watile: “Onondaka ombu onongwa Mbouhamba wa Huku, mambukaiviswa kombanda yohi aiho.” (Mateusi 24:14) Onombangi mba Siovaa ovo veli nokulinga otyilinga otyo. Vekahi nokulongesa ovanthu Ombimbiliya momalaka alamba 1000. Otyilinga otyo otyinene unene! Tuli tupu nokutyivila okulongesa ovanthu ovanyingi ngotyo, o kononkhono mba Huku vala, mokonda kuna ovipuka ovinyingi viesukisa okuonganekwa nawa.

2. Oityi tuhole okulinga opo tutyivile okulongesa ovanthu ovanyingi?

Onthwe etyi tuhanda, okuvasa umwe vala ovanthu tuvelongese. Tuenda “momaumbo” ovanthu ngetyi ankho tyilinga ovalongwa vo tete va Sesusi. (Ovilinga 5:42) Tyokuenda momaumbo ovanthu, tuvasa ovanthu ovanyingi tulongesa omanima atyo aeho. Mahi ha aveho tuhole okuvevasa momaumbo avo. Otyo tupu tulongesila apa tuhole okumonena ovanthu ovanyingi. Apeho tulongesa ovanthu oñgeni Siovaa ekahi, netyi meketulingila komutwe wandyila.

3. Olie una otyilinga tyokulongesa vakuavo Ondaka ya Huku?

Aveho Ovakilisitau votyotyili vena otyilinga tyokupopila vakuavo etyi Huku makalingila ovanthu. Onthwe Nombangi mba Siovaa, otyilinga tyokulongesa vakuetu Ondaka ya Huku katunyane natyo. Utyii omokonda yatyi? Omokonda otyilinga tyimwe tyihupisa ovanthu. Otyo onthwe tulingila ononkhono tulongese ovanthu. (Tanga 1 Timotiu 4:16.) Pala okulinga otyilinga otyo petupu etyi tufetwa. Tulinga vala etyi Ombimbiliya yapopia okuti: “Muetyipewa otyali, no onwe tyiavei otyali.” (Mateusi 10:7, 8) Otyili, ovanthu vamwe pamwe kavetavela. Mahi katutyiyeke-po otyilinga otyo mokonda tutyii okuti Siovaa uhambukwa tyina tulongesa vakuetu Ondaka yae.

KUHANDE OKUNOÑGONOKA VALI?

4. Onthwe tulinga ononkhono mbokulongesa ovanthu aveho

OVIDIU: Ivisei “Alo Kononthele Mbokokule Mbohi” (7:33)

• Wamona ononkhono Onombangi mba Siovaa valinga opo valongese vakuavo Ondaka ya Huku? Oityi wahumba-mo vali?

Tangei Mateusi 22:39, nomukanda Ova Loma 10:13-15, amutomphola omapulo aa:

• Oñgeni otyilinga etyi tulinga tyokulongesa vakuetu tyilekesa okuti tuvehole?

• Tyina Siovaa atala ovanthu valongesa vakuavo Ondaka yae, ukala ñgeni? — Tala povelesikulu 15.

5. Onthwe tuundapela kumwe na Huku

Ovipuka ovinyingi vihole okumoneka vilekesa okuti Huku una onthwe motyilinga etyi tyokulongesa vakuetu Ombimbiliya. Kotyilongo tyimwe tyitiwa Nova Zelândia, omukai umwe welikuambelele, atumbula umwe enyina lya Huku, emuiti atume-vo omunthu meumbo liae emulongese Ombimbiliya. Mahi soka ngotyo welikuambela komuhuka. Pahe tyina tyiti komakumbi, wakati-ko vala ñgaa, omukulu umwe utiwa o Paulo, Ombangi ya Siovaa, weya peumbo liae emulongese Ombimbiliya.

Tangei 1 Ova Kolindu 3:9, amutomphola omapulo aa:

• Ku ove, otyipuka otyo tyalingwa ko Nova Zelândia tyilekesa okuti Siovaa uli nokukuatesako ovilinga viokulongesa ovanthu Ombimbiliya? Oityi wapopila ngotyo?

Tangei Ovilinga 1:8, amutomphola epulo eli:

• Oityi tuesukisila ononkhono mba Huku opo tutyivile okulinga nawa otyilinga etyi tyokulongesa ovanthu Ombimbiliya?

Okuti ankho utyii-ale?

Onosimanu ambuho, momaliongiyo etu o mokati kosimanu, tuhole okulongeswa oñgeni tyilongeswa vakuetu Ondaka ya Huku. Ine nthiki imwe waile-ale keliongiyo lyo mokati kosimanu, otyipuka patyi tyapopiwa-mo tyayemba kokulongesa vakuetu Ombimbiliya, wahumba vali?

6. Onthwe tutavela etyi Huku etutuma

Kwali ovanthu vamwe vahandele okutalameka ovalongwa vo tete va Sesusi opo vahalongese vali Ondaka ya Huku. Mahi ovalongwa ovo ankho vapopia novatumini, okuvepopila umwe nawa okuti o Huku wevetuma valongese Ondaka yae. (Ova Filipu 1:7) Onthwe Nombangi mba Siovaa tupu otyo tulinga ngotyo.a

OVIDIU: Tuamena Otyili tya Huku (2:28)

Tangei Ovilinga 5:27-42, amutomphola epulo eli:

• Oityi tuahamatalamena okulongesa vakuetu Ombimbiliya? — Tala vali ponovelesikulu 29, 38, 39.

ETYI WELILONGESA

Welilongesa okuti Sesusi watuma ovalongwa vae valongese ovanthu aveho Ondaka ya Huku. Tupu wamona okuti otyilinga otyo kaveli nokutyilinga aveke, Siovaa uli nokuvekuatesako.

Okupitulula

• Ovalie vekahi nokulongesa ovanthu aveho Ondaka ya Huku?

• Oityi tulongesila vakuetu Ombimbiliya?

• Tyina utala ñgaa, okuti otyilinga etyi tyokulongesa vakuetu Ondaka ya Huku, otyilinga tyimwe tyikahi nawa? Oityi wapopila ngotyo?

KUHANDE OKUOVOLA VALI?

Tala oñgeni Onombangi mba Siovaa valongesa ovanthu momapunda-umbo omanene.

Etyi Tualongesa Ovanthu Mepunda-Umbo Lyo Paris (5:11)

Ovanthu vamwe vatunda kovilongo viavo viya nokuluwa, avakatilila kovilongo ovikwavo. Oityi Onombangi mba Siovaa valinga valongese ovanthu ovo?

Wokuakaholama Ovilwa Veli Nokunoñgonoka Huku (5:59)

Omukulukai ou, nkhele vala tyo pouna, otyilinga tyae okulongesa vala ovanthu Ombimbiliya. Tala etyi apopia movidiu ei.

Ovilinga Viange Vinthyambukiswa (6:29)

Tanga onthele ei, utale ovipuka vimwe viapopaiwa monombonge viakuatesako Onombangi mba Siovaa movilinga viavo viokulongesa Ombimbiliya.

“Ovaivisi Vouhamba wa Huku Vatuala Omphela Yavo Kombonge” (Ouhamba wa Huku Ukahi Nokutumina!, okapitulu 13)