ELONGESO 49
Oityi Una Okulinga Eumbo Litunge? — Onthele 1
Ovanthu tyina velinepa pahe, vahanda ñgeno ehambu vena-lyo monthiki velinepa lituala-tualako vala. Mahi okuti tyitavela umwe okukala nehambu meumbo? Yoo, tyitavela. Tupopia ngotyo mokonda kuna ovanthu ovanyingi velinepa-le kohale, mahi na hono veli kumwe, vena ehambu, mokonda velikuatehila umwe valinge etyi Ombimbiliya ipopia.
1. Oityi Ombimbiliya yapopia omulume ena okulinga?
Siovaa wapopia okuti omulume meumbo, oe una okululika ovipuka. (Tanga Ova Efesu 5:23.) Tupu Siovaa uhanda ñgeno tyina pena etyi omulume ahanda okulinga, asoko ku etyi matyeetela ouwa vomeumbo liae. Ombimbiliya yati: ‘Valume, tualeiko okuhumba ovakai venyi.’ (Ova Efesu 5:25) Onondaka ombo mbahanda okutiwi? Omulume uhole omukai wae umutekula nawa, tyilinge povanthu tyilinge meumbo. Ututumba umwe emuavele okulia, nomuvalo, novipuka ovikwavo. Ulinga ovipuka vihambukiswa omukai wae. Ututumba umwe opo omukai wae akale nawa. (1 Timotiu 5:8) Mahi otyipuka otyinene vali omulume apondola okulingila omukai wae, okumukuatesako alinge epanga enene lya Siovaa. Vapondola okulikuambela aveho, avatangela kumwe Ombimbiliya. (Mateusi 4:4) Omulume wokutekula nawa omukai wae utualako okukala epanga lya Siovaa. — Tanga 1 Petulu 3:7.
2. Oityi Ombimbiliya yapopia omukai ena okulinga?
Ondaka ya Huku yati “omukai una okukala nonthilo onene nomulume wae.” (Ova Efesu 5:33) Omukai wokuna onthilo nomulume wae, usoka koviwa omulume wae alinga, no kononkhono alinga atekule vomeumbo liae. Tyina omulume wae amemuti tulinge tyongandi no tyongandi, utavela, elikuatehila opo etyi omulume wae asoka tyeende nawa. Kapopi omapita omulume wae, tyilinge meumbo tyilinge povanthu, naapa umwe omulume wae ehelilongesa.
3. Oityi vokuelinepa vapondola okulinga opo oupanga wavo upame?
Ombimbiliya yati ovanthu vevali tyina vamelinepe, “vakala ohitu ike.” (Mateusi 19:5) Onondaka ombo mbahanda okuti vokuelinepa vena okulikuatehila opo oupanga wavo wahavombe-po. Opo oupanga wavo upame, apeho vena okukala kumwe otyo vahipulula; tyina vena etyi vahanda okulinga avalingila kumwe. Tupu vena okulunguka vehelihande vali nomunthu omukuavo opo pahamoneke ou weenda mukuavo konyima. Omunthu wokuanepa, no wokuanepwa, pano pohi omunthu ena okusuka vali nae, oyou velinepa nae.
KUHANDE OKUNOÑGONOKA VALI?
Monoñgonoka etyi Ombimbiliya ipopia ovalinepi vapondola okulinga na velikuatepo avakala omapanga.
4. Omulume una okuhumba omukai wae, emutekula nawa
Ombimbiliya yati ‘ovalume vena okuhumba ovakai vavo ngetyi vehole omalutu avo muene.’ (Ova Efesu 5:28, 29) Onondaka ombo mbahanda okutiwi? Talei OVIDIU, amutomphola epulo eli
Oityi omulume apondola okulinga opo omukai wae etyimone okuti umuhole?
Tangei Ova Kolosu 3:12, amutomphola epulo eli:
Oñgeni omulume apondola okulinga ovipuka viapopiwa mo tesitu ei tuatanga?
5. Omukai una okuhumba omulume wae, emulingi onthilo
Ombimbiliya yati omukai una okulinga onthilo omulume wae, tyilinge ulilongesa tyilinge kelilongesa. Tangei 1 Petulu 3:1, 2, amutomphola omapulo aa:
Ine omulume wove kelilongesa, tyipondola hamwe uhanda ñgeno nae utavela okulilongesa afende Siovaa. Tyina usoka, oityi matyimupe okulilongesa? Okuti okukalela vala okumupopila Ombimbiliya, ine okukala nonondunge meumbo, nae etyimono umwe okuti umulinga onthilo? Oityi wapopila ngotyo? Omulume nomukai meumbo, vena okulipakaila-mo. Pamwe omulume mapopila omukai wae ati tulinge tyongandi, mahi omukai okutyisoka, pamwe ehetyihande nawa. Pohika ngo opo, omukai malingi ñgeni?
Upondola okupopila omulume wae etyi asoka, mahi okupopia umwe nawa. Mahi tupu una okuhinangela okuti una otyilinga tyokupopia etyi mavalingi meumbo, omulume. Namphila etyi tyasoka omulume wae ketyihandele, una umwe vala okutavela, emukuatesako opo tyeende nawa. Tyina omukai alinga ngotyo, eumbo litunga, amukala ombembwa. Tangei 1 Petulu 3:3-5, amutomphola epulo eli:
Siovaa ukala ñgeni tyina atala omukai una onthilo nomulume wae?
6. No onwe mamutyivili okumana-ko ovitateka muna-vyo
Kutupu ovanthu velinepa vakala umwe vala avehelipono. Mahi pahe etyi vokuelinepa vena okulinga, okulikuatehila vamane-po ovitateka vena-vyo. Talei OVIDIU, amutomphola omapulo aa:
Oityi tyalekesa okuti oupanga wovalinepi tuamona movidiu pahe ankho uli nokuomba-po?
Oityi valinga opo oupanga wavo upame vali?
Tangei 1 Ova Kolindu 10:24 nomukanda Ova Kolosu 3:13. Tyina muamatange otesitu ike, tompholei epulo eli lili pombuelo:
Oñgeni okulinga etyi tyapopia otesitu ei matyimukuatesako motyinepo tyenyi?
Ombimbiliya yati tuna okuhumba vakuetu. Okuhumba vakuetu, okuvetekula nawa, nokuvelinga onthilo. Tangei Ova Loma 12:10, amutomphola omapulo aa:
Okuti vokuelinepa vena umwe vala okupumphama pohi, avakevela mukuavo evelinge onthilo? Oityi wakumbululila ngotyo?
OVANTHU VAMWE VATI: “Onthwe na mukuetu meumbo, pahe katumapanga-ko vali ngo kohale.”
Oñgeni movepopila okuti Ombimbiliya ipondola okuvekuatesako vakondoke vali moupanga vali nao?
ETYI WELILONGESA
Welilongesa ovipuka vitatu omulume nomukai meumbo vena okulinga vakale nehambu: (1) Okulihumba; (2) Okulilinga onthilo; (3) Okulinga etyi Ombimbiliya ipopia tyayemba kotyinepo.
Okupitulula
Oityi omulume ena okulinga opo eumbo litunge, mukale ombembwa?
Oityi omukai ena okulinga opo eumbo litunge, mukale ombembwa?
Tyilinge wanepa, tyilinge wanepwa, onondunge patyi mbuli mo Mbimbiliya mambukukuatesako mukale omapanga na mukwenyi meumbo?
Hetekela okulinga ñgaa
Tala ovipuka mavikukuatesako opo mukale nombembwa meumbo.
Otyiimbo etyi tyipopia oviwa vokuelinepa vamona tyina velikuatehila avalingi etyi Ombimbiliya ipopia.
Tyina Ombimbiliya ipopia okuti omukai una okulinga onthilo omulume wae, muene-muene oityi ili nokupopia?
“Vakai, Oityi Muesukisila Okutavela Etumino Lio Nonkhalamutwe?” (Omutala Womulavi 1 ya Maio yo 2010)
Tala etyi tyakwatesako ovakulu ava ankho vehelivili, avelihenge umwe.