Oityi Ove Una Okusukila No Endene

OTYIPUKA tyimwe povinyingi ovanongo vamwe vomouye vehetavela konthele yehipululo lio Endene, otyokuti kaliapopilwe unene Mombimbiliya. Mongeleka, Paul Morris, Omunongo Wokulilongesa konthele Yonongeleya, wahoneka okuti: “Kutupu onthele onkhuavo Yombimbiliya ipopia konthele yehipululo lio Endene.” Namphila vamwe vatiwa “ovanongo” vatavela etyi apopia, mahi, otyo tyipililika otyili.

Tyotyili Ombimbiliya ipopia ovikando ovinyingi konthele yotyikunino tyo Endene, na Andau na Eva no yonyoka.a Mahi omatutu ovanongo vehehi, kaasilivila okueeleka netyi ovanyingi vetavela, tyayandyana vali. Okuhetavela ehipululo lia Genesis konthele yotyikunino tyo Endene, ononkhalamutwe mbonongeleya, no vokupopia navi Ombimbiliya, vekahi nokuanya otyili Tyombimbiliya. Ñgeni ngotyo?

Okunoñgonoka etyi tyaendele mo Endene, tyakolela opo tunoñgonoke Ombimbiliya aiho. Mongeleka, Ondaka ya Huku, yahonekwa opo itukuateseko okuvasa omakumbululo omapulo akolela vali unene ovanthu vehole okulinga. Ovikando ovinyingi, omakumbululo Ombimbiliya konthele yomapulo oo, elikuata netyi tyaendele motyikunino tyo Endene. Tala onongeleka mbumwe.

● Omokonda yatyi tukulupila nokunkhia? Andau na Eva ñgeno vakalako apeho inkha vatualeleko okutavela ku Jeova. Ankho mavankhi vala inkha vaanya ku Huku. Monthiki vaanya ku Huku, vahimbika okunkhia. (Gênesis 2:16, 17; 3:19) Vavombesa omuenyo uhena nkhali nokutambulisa onkhali kovana vavo. Ombimbiliya ihangununa okuti: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.”—Romanos 5:12.

● Omokonda yatyi Huku ayekelako ovivi? Motyikunino tyo Endene, Satanasi waihana Huku okuti onkhembi waholeka otyiwa kovanthu. (Gênesis 3:3-5) Ngotyo watyitukilapo onkhalelo yaviuka yokutumina ya Jeova. Andau na Eva vaholovona okulandula Satanasi. Ngotyo vaanya ouhamba wavilapo wa Jeova, moluotyo vetavela okuti ovanthu ovo muene vena okutokola etyi tyaviuka netyi tyapenga. Mouviuki wae nounongo, Jeova ankho utyii okuti onkhalelo yaviuka pala okumbulula otyitateka otyo, okuyeka papite omuwo, okuavela ovanthu omphitilo opo velitumine ngetyi vahanda. Ovivi vikahi nokumoneka mokonda yehongiliyo litualako lia Satanasi, iya otyili otyinene tyikahi nokuhololola katutu-katutu, tyokuti: Ovanthu vetupu epondolo liokulitumina tyihena ehongolelo lia Huku.—Jeremias 10:23.

● Olipi ehando lia Huku konthele yoohi? Motyikunino tyo Endene, Jeova waavele ovitumino oviwa konthele yoohi. Oe watumine Andau na Eva veyulise oohi novana vavo, ‘nokuitumina,’ opo vefiwise oohi aiho. (Gênesis 1:28) Ngotyo Huku uhanda oohi ikalwe nombunga yovanthu vehena onkhali nokuna ewaneko vatuka ku Andau na Eva. Ononthele ononyingi Mbombimbiliya mbupopia oñgeni ehando olio liotete lia Huku malifuisuapo.

● Oityi Jesus Kristu eililile pano pohi? Oumphuki waendele mo Endene waetela ononkhia Andau na Eva novana vavo aveho. Mahi noluembia Huku weveavela ekevelo. Oe watuma Omona wae pano pohi opo aave etyi Ombimbiliya iihana okuti ofeto yeyovo. (Mateus 20:28) Otyo tyihangununa tyi? Jesus wakala “Andau wahulililako”, afuisapo etyi Andau ehevilile. Jesus watualako nomuenyo wae uhena nkhali, mokuatualako okutavela ku Jeova. Konyima tyihakuluminyua aave omuenyo wae ngotyilikutila ine ofeto yeyovo, opo ovanthu vekolelo vaevelwe ononkhali mbavo, avakamona omuenyo una ovo Andau vali nao etyi vehenelinge onkhali motyikunino tyo Endene. (1 Coríntios 15:22, 45; João 3:16) Ngotyo Jesus waava onthumbi yokuti Jeova makafuisapo ehando liae liokupilulula oohi ino, aikala ngotyikunino tyo Endene.b

Ehando lia Huku kalipiluluka, tupu haluñgano vala. Anthi, oliotyotyili. Ngetyi otyikunino tyo Endene tyali omphangu yotyotyili pano pohi, ankho muna ovinyama novanthu votyotyili, tupu omulao wa Huku konthele yo komutwe wandyila owotyotyili, iya apa katutu maufuiswapo. Okuti noove mokakalamo? Otyo tyitei kuove. Huku uhanda ovanthu aveho vakakalemo, alo umwe onondingavivi mbelivela.—1 Timóteo 2:3, 4.

Puetyi Jesus ankho ekahi nokunkhia, wapopia nomulume ankho watyindile omuenyo omuvi. Omulume oo wali omuipai, iya ankho utyii okuti watokala okuipawa. Mahi, waita ku Jesus epameko nekevelelo. Oñgeni Jesus akumbulula? “Mokakala naame Momphangu Yombembwa.” (Lucas 23:43) Jesus ankho uhanda omunthu oo wokuali ondingavivi atutiliswe apewa omphitilo yokukala nomuenyo uhapu momphangu yombembwa ngo Endene. Okuti kahande noove ukakale momphangu oyo? Tyotyili uhanda! Tupu na Tate yae utyihanda! Inkha uhanda okukala momphangu oyo, linga atyiho upondola opo ulilongese konthele ya Huku una walingile otyikunino tyo Endene.

[Onondaka Poutoi]

[Ehangununo liolutalatu pefo 11]

Andau na Eva vamuene ononkhumbi mbatuka konkhali

[Okakasa​Omalutalatu pefo 10]

EULO LIWANEKA KUMWE OMBIMBILIYA

“Iya mandyipake oundyale pokati kove [onyoka] nomukai, no pokati kombuto yove nombuto yomukai. Oe mekekumiangula omutwe, iya ove mokemunumata kotyikomeko.”—Gênesis 3:15.

Eli eulo liotete Liombimbiliya, liapopiwa na Huku mo Endene. Ava vekuana vapopiwamo, omukai, nombuto yae, nonyoka, nombuto yayo, ovalie? Oñgeni “oundyale” wapopiua ankho maukaenda?

ONYOKA

O Satanasi Eliapu.—Revelação 12:9.

OMUKAI

Eongano lia Jeova lionoandyu keuku. (Gálatas 4:26, 27) Isaia wapopile konthele “yomukai,” okuti komutwe makatyita elongo liopaspilitu.—Isaías 54:1; 66:8.

OMBUTO YONYOKA

Ovovana vaholovona okulinga ehando lia Satanasi.—João 8:44.

OMBUTO YOMUKAI

Tete o Jesus Kristu, una watunda meongano lia Jeova lio keulu. “Ombuto” oyo tupu yakutikinyua onondenge mba Kristu mbopaspilitu, vana mavakatumina nae keulu. Ovakristau ovo ovalembulwa, ovo elongo liopaspilitu, “o Isilayeli ya Huku.”—Gálatas 3:16, 29; 6:16; Gênesis 22:18.

OKUNUMATWA KOTYIKOMEKO

Mesiya wamuene omuihamo omunene mahi kawatualeleko. Satanasi wetyivilile okuipaa Jesus pano pohi. Mahi Jesus atutiliswa.

OKUTYOPWA KOMUTWE

Satanasi matyopwa komutwe. Jesus makanyimako Satanasi ahakapinduka vali. Tyina nkhele ehenemutyope, Jesus makanyimako ovivi Satanasi ahimbika mo Endene.—1 João 3:8; Revelação 20:10.

Opo unoñgonoke vali nawa osapi Yombimbiliya, tala obruchula A Bíblia​—Qual É a sua Mensagem? yalingwa no Nombangi mba Jeova.