Oñgeni Mamulongesa Ovana Konthele ya Huku​—Ononkhalelo Patyi Mbokulongesa Mbaviuka?

“Onondaka ombu ndyikahi nokukutuma hono, mbuna okukala momutima wove. Iya una okumbupopila ovana vove, tyina upumphi meumbo liove, tyina wendaenda metapalo, tyina ulangalapo, na tyina upindukapo.”—DEUTERONÔMIO 6:6, 7.

OVOHE pamwe valemenwa notyilinga tyokulongesa ovana. Tyina vaovola ombatelo, vapondola okunguanguana nonondonga ovinyingi vapopilwa na mbuna vatanga. Ovohe nomapanga, ovikando ovinyingi mavaave liwa onondonga mbavo. Iya omikanda, no Internete vitualako okuavela ovohe omalondolo elikalaila.

Anthi, Ombimbiliya yaavela ovohe onondonga nehongolelo liotyotyili konthele yetyi mavalongesa ovana vavo, no ñgeni mavevelongesa. Ngetyi onoversikulu mbo Mbimbiliya mbapopiwa pombanda mbulekesa, ovohe vena okuvasa kese nthiki omphitilo yokupopia novana vavo konthele ya Huku. Pahe matupopi onondonga ononkhuana mbo Mbombiliya mbuhole okukuatesako ovohe ovanyingi okulongesa ovana vavo konthele ya Huku.

1. Velongesilei kuevi Huku atunga. Apostolu Paulu wahoneka okuti: “Ovituwa via [Huku] vihamoneka vimoneka nawa okupolelela kokutungwa kuouye alo kovipuka ovikuavo. Tyetyi vinoñgonokelwa kovipuka atunga, tyilinge ononkhono mbae mbahapu, nokuti oe Huku.” (Romanos 1:20) Ovohe valinga ononkhono mbokukuatesako ovana okuimbuka okuti Huku Omunthu wotyotyili, nokunoñgonoka aviho atunga, nokuimbuka ovituwa viae vimonekela kovipuka atunga.

Jesus waundapesa ounongo oo etyi alongesa ovalongwa vae. Oe wati: “Talei nawa oviila viomeulu, mokonda ovio kavikunu, kaviteye, tupu kaviongiya movimbundu, mahi Tate yenyi keulu uviavela okulia. Onwe kamuavililepo vali tyipona ovio?” (Mateus 6:26) Apa, Jesus watoneka okupopia ovituwa via Jeova, oluembia nokankhenda. Mahi, hatyo vala otyo alinga. Wakuatesako ovalongwa vae okutala oñgeni Huku alekesa ovituwa ovio kovana vae.

Omunongo Ohamba Salomau wapopia ounongo Huku aavela onohinyinyiki, iya oe aundapesa ounyama oo oututu, opo alekese nawa onondonga mbakolela tupolako. Oe wahoneka okuti: “Ove mukuandende, enda kohinyinyiki, katale onondyila mbayo opo ukale omunongo. Namphila ihena onkhalamutwe, ine omutumini, ine ohamba. Ipongiya okulia pokuenye, yongiya okulia kuayo pomuvo wokuteya.” (Provérbios 6:6-8) Oyo onkhalelo yaviuka nawa yokulongesa ovana okuovola ovilinga viakolela iya atuundapesa ononkhono tuapewa na Huku opo tuvivase!

Ovohe vapondola okuhetekela ounongo wa Jesus no wa Solomau mokulinga ngetyi: (1) Vapula ovana vavo omiti patyi novinyama vehole vali. (2) Avelilongesa nawa konthele yomiti ovio novinyama ovio. (3) Avapoloko onondonga mbokulongesa ovana vavo konthele ya Huku.

2. Hetekelei onkhalelo ya Jesus konthele ya vana oe alongesa. Jesus wapopia vali ovipuka ovinyingi viakolela, tyipona ovanthu vatyo aveho valiko. Anthi, ankho ulongesa vali nomapulo. Oe ankho wasuka unene nomalusoke a vana alongesa no ñgeni velitehelela. (Mateus 17:24, 25; Marcos 8:27-29) Tupu, novohe vena onondonga ononyingi mbakolela pala okulongesa ovana. Opo vetyivile vesukisa okuhetekela Jesus, nokulunda ovana vavo opo vapopie oñgeni vilitehelela tyelihandya.

Iya inkha omona umwe ulekesa ovituwa ovivi ine useta okunoñgonoka onondonga mbumwe mbakolela? Tala etyi Jesus alongesa ono apostolu. Pamwe ankho vatañguna, nokuhanoñgonoka liwa ouwa wokukala nomutima weliola. Anthi, Jesus watualako okuvepopila okuwana-wana noumphua-lundo okuti vesukisa okuliola omutima. (Marcos 9:33, 34; Lucas 9:46-48; 22:24, 25) Ovohe vahetekela Jesus, mavaviyula ovana vavo noumphua-lundo, iya tyina tyesukisa vawana-wana okuvelongesa otyipuka tyike alo vanoñgonoka esilivilo liatyo.a

3. Longesei novituwa vienyi. Otyiwa ovohe valandule onondonga apostolu Paulu avelele Ovakristau mo Roma. Wevehonekela okuti: “Ove ulongesa mukuenyi, kulilongesa ove muene? Ove wivisa okuti: ‘Uhavake,’ uvaka?”—Romanos 2:21.

Elondolo olio liakolela, mokonda ovana valandula vali etyi ovohe valinga tyipona etyi vapopia. Tyotyili, ovohe valinga etyi valongesa, ovana vavo mavalandula vali etyi vevelongesa.

4. Himbikei tyina omona omututu. Omisionaliu Timoteo mundyila ya apostolu Paulu, ankho wapandua potyilongo tyavo. (Atos 16:1, 2) Ehunga limwe ankho omokonda “tunde pouna” walongesilue “ovihonekwa vikola.” Ina ya Timoteo na ina kulu, ankho vemutangela Ovihonekwa, nokumukuatesako okusokolola nawa otyili tyivahiwa movihonekwa ovio.—2 Timóteo 1:5; 3:14, 15.

Opi Mamuvasi Ombatelo

Onombangi mba Jeova valinga omikanda ominyingi, opo vakuateseko ovohe okulongesa ovana vavo otyili konthele ya Huku. Omikanda vimwe viahonekwa opo vikuatesako vala ovana. Ovikuavo opala okukuatesako ovohe novana vekahi nokukola, opo vetyivile okutomphola tyelihandya.b

Tyina nkhele ovohe vehenelongese ovana konthele ya Huku, vesukisa okunoñgonoka omakumbululo omapulo amwe epuiya, ovana vehole okulinga. Nkhele soka oñgeni upondola okukumbulula omapulo aa: Oityi Huku ayekelelako emone? Olipe evangelo lia Huku konthele yoohi? Vokuankhia vekahi pi? Onombangi mba Jeova vena ehambu liokukukuatesako okuvasa omakumbululo omapulo oo nomakuavo, makuatesako ove nombunga yove okufuena ku Huku.—Tiago 4:8.

[Onondaka Poutoi]