Ombimbiliya Itukuatesako Alo Umwe Hono
“Ondaka ya Huku otyimimikilo tyonomphai mbange. Notyimimi tyondyila yange.”—SALMO 119:105.
OÑGENI OMBIMBILIYA YELIKALELA? Omikanda ominyingi hono vipondola okutalwa ngatyina omiwa, mahi kaviavela ovanthu ehongolelo ewa. Omikanda ominyingi hono viesukisa okupilaululwa apeho. Mahi Ombimbiliya ipopia okuti “ovipuka aviho viahonekwa kohale, viahonekwa pala okutulonga.”—Romanos 15:4.
ONGELEKA: Namphila Ombimbiliya hamukanda wokuava ehongolelo konthele yovihemba, mahi ina onondonga onongwa konthele yekongoko. Mongeleka, ipopia okuti “omutima wahiliya omuenyo pala olutu.” (Provérbios 14:30) Ombimbiliya tupu ilondola okuti: “Una uhanda okukala vala aike, maovola omahando ae muene elungavi, nokunyona onondunge ambuho onongwa.” (Provérbios 18:1) Tupu ipopia okuti, “okuava tyihambukiswa vali tyipona okupewa.”—Atos 20:35.
OITYI OVAOVOLOLI VAPOPIA: Okuhiliya, nokukala nomapanga omawa, notyali, tyipondola okukalesa nawa ekongoko liove. O Jornale yo American Medical Association yapopia okuti: “Omunthu wonyengo onene, upondola okukala vali nouvela womutima tyipona vana velikondola omutima.” Meovololo limwe lialingwa momanima ekwi mo Austrália, vatala okuti ovanthu vana vokuakulupa “vatomphola vali nomapanga, nokupopia ovipuka viavo novanthu vayumba onthumbi,” vakala vali nomuenyo omule. Iya mo 2008, ovaovololi voko Canadá no Estados Unidos vanoñgonoka okuti “vana vaundapesa onombongo pala okukuatesako vakuavo vena vali ehambu tyipona vana vanumina.”
OITYI OVE USOKA? Okuti upondola okuyumba onthumbi kelondolo lipopia konthele yekongoko liapolwa momukanda wahonekua omanima 2.000 konyima? Ine Ombimbiliya vala?
[Onondaka Mbavilapo pefo 8]
“Ombimbiliya ndyiihole unene . . . mokonda ipopia nawa konthele yekongoko.”—HOWARD KELLY, M.D., UMWE PONONKHALAMUTWE MBOSIKOLA ONENE THE JOHNS HOPKINS UNIVERSITY SCHOOL OF MEDICINE