Omokonda Yatyi Tuesukisila Huku

Ovanongo konthele yekongoko vetupopila okuti opo ovanthu vakale nehambu liotyotyili, kavesukisa vala okulitekula nawa. Otyo tutyitalela kuetyi ovanthu vaovola okulinga opo vavase etyi vahanda, ine okuundapa motyipuka tyimwe tyiveetela ehambu. Opo vakale nehambu olio, vamwe vatalukilwa kokutala onohika, nokuhonga ovipuka, nokuimba ine okutehelela oviimbo, novikuavo vali. Mahi, kavavasi ehambu litualako.

Tyotyili, ovanthu vokutanga Ombimbiliya vetyii okuti ovanthu vatyitwa nehando liokukala nehambu liotyotyili. Ovikapitulu viotete via Gênesis vilekesa okuti etyi Huku atunga Andau na Eva, ankho apeho upopia navo, opo vakale noupanga omuwa nae. (Gênesis 3:8-10) Huku katungile ovanthu opo velitumine, vesukisa okutomphola Nomutungi wavo. Ombimbiliya ipopia unene konthele yotyo.

Mongeleka, Jesus wapopile okuti: “Vena ehambu ovovana vaimbuka okuti vesukisa okulongeswa na Huku.” (Mateus 5:3) Nonondaka ombo, tupondola okupopia okuti otyipuka tyakolela vali opo tukale nehambu, okufuisapo ehando lietu liokunoñgonoka Huku. Oñgeni tupondola okutyilinga? Jesus wakumbulula epulo olio etyi ati: “Omunthu kakala vala nomuenyo mokonda yombolo, mahi omokonda yondaka aiho itunda momulungu wa Jeova.” (Mateus 4:4) Omononkhalelo patyi onondaka mba Huku, ine omalusoke ae, no nondonga mbae mbukahi Mombimbiliya, mbupondola okutukalesa nehambu liotyotyili? Tutalei ononkhalelo ononthatu mbakolela.

Tuesukisa Ehongolelo Ewa

Hono, kuna ovanongo ovanyingi vaava onondonga konthele youpanga, noluembia, nombunga, nehambu, nokutetulula ovitateka, nokukala nomuenyo omuwa. Mahi, olie wafuapo vali nawa pala okuhongolela ovanthu konthele yovipuka ovio aviho tyipona una Watunga ovanthu, Jeova Huku?

Mongeleka: Tyina ulanda otyipuka tyimwe otyipe, ngetyi olaliu ine o televisau, uhanda iye ‘nomukanda’ uhangununa omokonda yatyi yalingilwa, noñgeni una okuyuundapesa monkhalelo yaviuka. Ombimbiliya ipondola okuelekwa nomukanda oo. Mokonda o Huku wetutunga, wetuavela Ombimbiliya opo ihongolele omuenyo wetu.

Ngomukanda uhangununa oñgeni tuna okuundapesa otyipuka tualanda, Ombimbiliya itulondola kovipuka vipondola okunyona omuenyo wetu. Ovanthu vakuetu vapondola okuava onondonga mbumoneka ngatyina mbapepuka vali okumbulandula. Okuti hatyiwa okusoka okuti matupoloko vali ouwa, nokulityilika ovitateka inkha tulandula ehongolelo liauna Wetutunga?

Namphila Jeova Huku aava ehongolelo nonondonga, ketukuluminya okumbutavela. Mahi, mokonda utuhole iya uhanda okutukuatesako, utupopila okuti: “Ame, Jeova, ame Huku yove, Una ukulongesa etyi tyakolela, Una ukuhongolela mondyila una okuendela. Inkha wetavelele tyilityili ovitumino viange! Ñgeno ombembwa yove yakala ngenyana, iya ouviuki wove ngomakufikufi elunga.” (Isaías 48:17, 18) Tyotyili, inkha tutavela ehongolelo lia Huku, matukala nomuenyo omuwa. Ngotyo, opo tukale nehambu, nomuenyo omuwa, tuesukisa Huku.

Tuesukisa Okunoñgonoka Omokonda Yatyi Tumonena Ononkhumbi

Vamwe vasoka okuti kavesukisile Huku mokonda vena ovitateka ovinyingi vivetyilika okutavela okuti kuna Huku una oluembia. Mongeleka, vapondola okulipula okuti: ‘Omokonda yatyi ovanthu onondalawa vamonena ononkhumbi?’ ‘Omokonda yatyi omalukembe ehena etyi ei atyitilwa tyalemana?’ ‘Omokonda yatyi omuenyo weyulila ovitateka?’ Oo, omapulo akolela unene, iya inkha tuvasa omakumbululo aviuka, tyipondola okutukalesa nehambu enene momuenyo. Ngotyo, tuhavelei liwa onombei Huku mokonda yovitateka, mahi tutalei etyi Ondaka ya Huku, Ombimbiliya, ipopia konthele yotyo.

Mokapitulu katatu ka Gênesis, tuvasamo ehipululo lia Satanasi, waundapesile onyoka opo ahongiliye Andau na Eva okuanya otyitumino tya Jeova Huku tyokuahali komuti wenoñgonoko liotyiwa notyivi. Satanasi watolelele Eva okuti: “Tyotyili kamamunkhi. Mokonda, Huku utyii okuti onthiki muliako omaiho enyi maaikuka, iya amukala nga Huku, okunoñgonoka otyiwa notyivi.”​—Gênesis 2:16, 17; 3:4, 5.

Nonondaka ombo, Satanasi ankho kekahi vala nokupopia okuti Huku onkhembi, mahi tupu ankho ukahi nokupopia okuti Huku ketyivili okutumina. Eliapu liapopile okuti inkha ovanthu vetavela kulio, mavakala vali nawa. Oñgeni otyitateka otyo ankho tyipondola okutetululwa? Jeova wayeka palambe omuvo utuuka opo aveho vatale inkha etyi tyapopia Eliapu otyili ine omatutu. Huku ankho ukahi nokuavela Satanasi navana veli konthele yae omuvo opo valekese inkha ovanthu vapondola okukala nawa tyehena Huku.

Oityi ove usoka konthele yetyi Satanasi apopile? Okuti ovanthu vapondola okukala nawa, nokulitumina nawa tyehena ombatelo ya Huku? Ononkhumbi, novivi, nomauvela, nononkhia, noungangala, novituwa ovivi, novilwa, nokuliipaa, novitateka ovikuavo vimonekela ovanthu omanima aa aeho, tyilekesa okuti ovanthu kavetyivili okulitumina tyehena ombatelo ya Huku. Ombimbiliya kaipopi okuti o Huku weetela ovanthu ononkhumbi, mahi ipopia oityi tyimbuetako, yati: “Omunthu utumina omunthu mukuavo pala okulimonesa ononkhumbi.”​—Eclesiastes 8:9.

Otyo tyilekesa okuti tuesukisa okufuena ku Huku, pala okunoñgonoka omokonda yatyi tumonena ononkhumbi, noñgeni membutetulula. Oityi Huku makalinga?

Tuesukisa Ombatelo ya Huku

Tunde kohale ovanthu vahanda okuyovoka komauvela, no kokukulupa, no kononkhia. Vapesela omuvo, nomalumono omanyingi, nokulinga ononkhono opo vayovoke kovipuka ovio, mahi kavetyivili. Vamwe vanwa ovihemba, nokuhataika, nokukakohua kovimbanda opo vahakulupe. Ovanthu vanoñgonoka okuti ovipuka ovio aviho ononkhono-mphuila vala.

Huku uhanda ovanthu vakale nehambu nomuenyo omuwa. Otyo ahandele etyi atunga ovanthu, iya kalimbuilueko. (Gênesis 1:27, 28; Isaías 45:18) Jeova Huku utukalesa nonthumbi yokuti makafuisapo etyi alaa. (Isaías 55:10, 11) Ombimbiliya itupopila omulao wa Huku wokuetako vali Omphangu Yombembwa Andau na Eva vapesela. Momukanda wahulililako Wombimbiliya, tuvasamo onondaka ombu: “[Jeova Huku] makasekuna ononkhuka momaiho avo, ononkhia, okulila, no nongembia kamavikakalako vali. Mokonda ovipuka ovio aviho mavikalamba.” (Revelação 21:4) Oñgeni Huku makamanako ovipuka ovio, iya oñgeni tupondola okupola ouwa komulao oo?

Omona wa Huku, Jesus Kristu, walongesile ovalongwa vae okulikuambela opo ehando lia Huku lilingwe. Ovanthu ovanyingi vei elikuambelo olio, litiwa Elikuambelo lia Tatekulu. Lilingwa ñgaa: “Tate yetu keulu, enyina liove lisukukiswe. Ouhamba wove uye. Ehando liove lilingwe pano pohi, ngetyi lilingwa keulu.” (Mateus 6:9, 10) Tyotyili, Jeova Huku maundapesa Ouhamba wae opo amaneko ovitateka viaetwa noutumini wovanthu, nokuetako ouye omupe wouviuki alaa.a (Daniel 2:44; 2 Pedro 3:13) Oityi tuna okulinga opo tupole ouwa komulao wa Huku?

Jesus Kristu wapopia etyi tuna okulinga, wati: “Omuenyo wahapu oyou, okukala nenoñgonoko liove Huku wike yotyotyili, na Jesus Kristu una watumine.” (João 17:3) Tyotyili, nombatelo ya Huku tupondola okukakala nomuenyo wahapu mouye omupe alaa. Olio ehunga ekuavo litukalesa nonthumbi yokuti tuesukisa Huku.

Ou Pahe Omuvo Wokusoka ku Huku

Omanima 2.000 konyima, mo Areopagu” (Ombonge Onene yoko Atena), apostolu Paulu wapopile nova Atena ankho vena otyituwa tyokunoñgonoka ovipuka ovipe, evepopila konthele ya Huku okuti: “Oe muene wavela omuenyo ovanthu aveho, nomufuimo, novipuka aviho. Tyetyi, tuna omuenyo, tuendaenda nokukahiko mokonda yae. Alo umwe ovanongo vamwe pokati kenyi vati, ‘Nonthue tuvana vae.’”​—Atos 17:25, 28.

Etyi Paulu apopilile ova Atena nkhele otyili. Omutungi wetu utuavela omphepo tufima, novikulia tulia, nomeva tunwa. Katupondola okukala nomuenyo tyehena ovipuka oviwa Jeova etuavela. Mahi omokonda yatyi Huku atuailako okuavela ovipuka ovio ovanthu aveho, tyilinge vemufenda ine kavemufende? Paulu wapopile okuti otyo opala “vaovole Huku, inkha tyili vahanda okumuvasa, namphila Huku ehekahi kokule na kese umwe puonthue.”​—Atos 17:27.

Okuti uhanda okunoñgonoka vali nawa Huku, ine okulilongesa vali konthele yevangelo liae, nonondonga mbae opo ukale nomuenyo omuwa hono no komutwe wandyila? Inkha ongotyo, tukuavela ondundo opo ukapopie nomunthu wekuavela omukanda ou ine uhonekela kuvana veuhoneka. Mavakala nehambu liokukukuatesako.