Apeho Yumba Onthumbi mu Jeova!
“Yumbei onthumbi mwe omivo aviho.”—SALMO 62:8.
1-3. Omokonda yatyi Paulu ankho apondola okuyumba onthumbi mu Jeova? (Tala olutalatu pefo pahimbikila onthele.)
INKHA wali Omukristau mo Roma motyita tyotete, ñgeno wakalele momuvo wovitateka. Ovakristau vamenesilwe unene ononkhumbi nova Roma. Ova Roma avahungu Ovakristau okuti ovo vaetako otupia otunene tuayokele o Roma nokuti veyele ovanthu. Ovakuatate vamwe nonomphange avehimbika okumoneswa ononkhumbi. Vamwe avaliwa novinyama. Vakuavo avapapelwa momiti avayokwa opo vamimikile kounthiki. Kese nthiki ove usoka okuti ovipuka ovio nove upondola okuvilingwa.
2 Mokueenda kuomuwo oo wokuepuiya, apostolu Paulu ankho ukahi mokaleya. Paulu hamwe ankho ulipula inkha Ovakuatate vae Ovakristau mavemukuatesako mokonda ankho uhinangela otyikando tyotete etyi pehena ou wemukuatesileko. Mahi Paulu wakuatesilueko na Jeova etyi aundapesa Tatekulu Jesus. Wahoneka okuti: “ Tatekulu ankho ukahi popepi naame, andyavela ononkhono; iya ahoneka vali okuti: Andyiyovolwa komulungu wonkheama.”—2 Timóteo 4:16, 17.a (Tala onondaka pokatoi.)
3 Paulu wahinangelele oñgeni Jeova emukuatesileko konyima. Ngotyo, Paulu wakalele nonthumbi yokuti Jeova wemuavela ononkhono esukisa opo elikuatesile movitateka ankho avasiwa nevi maviya komutwe. Paulu ankho una onthumbi oyo, etyi ahoneka okuti: “Tatekulu mandyovola kovilinga aviho ovivi.” (2 Timóteo 4:18) Paulu welilongesa okuti namphila ovakuatate kavetyivili okumukuatesako motyitateka otyo, ankho upondola okukala nonthumbi yokuti Jeova na Jesus mavemukuatesako. Ankho utupu ondima.
ONOMPHITILO TUNA MBOKUYUMBA ONTHUMBI MU JEOVA
4, 5. (a) Olie mekuavela apeho ekuateso wesukisa? (b) Oñgeni upondola okupameka oupanga wove na Jeova?
4 Okuti nthiki imwe wakaleliale motyitateka, olitehela okuti petupu ou mekukuatesako? Hamwe ankho wapolwa movilinga ine umoneswa ononkhumbi kosikola. Hamwe wavela unene ine una vali ovitateka ovikuavo. Hamwe waitiliale kumukuenyi opo ekukuateseko mahi onumana mokonda kekukuatesileko ngetyi ankho uhanda. Tyotyili, ovitateka vimwe ovanthu kavevivili okuvitetulula. Oityi molingi? Ombimbiliya itupopila okuti “yumba onthumbi mu Jeova.” (Provérbios 3:5, 6) Mahi okuti upondola okukala nonthumbi yokuti mekukuatesako? Enga! Tupondola okutanga onongeleka ononyingi Mombimbiliya mbutukalesa nonthumbi yokuti Jeova tyilityili ukuatesako ovanthu vae.
5 Wahanumane tyina vakuenyi vehekukuatesileko ngetyi ankho uhanda. Mahi, nga Paulu, tala otyitateka otyo ngatyina omphitilo yokuyumba onthumbi nomutima wove auho mu Jeova. Tupu tyikuavela omphitilo opo utale oñgeni Jeova ekutekula. Onthumbi yove mu Jeova noupanga wove nae maupame vali.
TUESUKISA OKUYUMBA ONTHUMBI MU JEOVA
6. Omokonda yatyi katyapepukile okuyumba onthumbi mu Jeova tyina tuna ovitateka?
6 Hamwe una ovitateka vikunumanesa. Walingale atyiho uvila konthele yotyitateka otyo, iya welikuambelale ku Jeova opo ekukuateseko. Okuti pahe upondola okutula omutima mokonda una onthumbi yokuti Jeova mekukuatesako? Enga, upondola! (Tanga Salmo 62:8; 1 Pedro 5:7.) Inkha uhanda okukala noupanga omuwa na Jeova, wesukisa okulilongesa okuyumba onthumbi mwe. Mahi okulinga ngotyo hapeho tyapepuka. Omokonda yatyi? Ehunga limwe omokonda Jeova hapeho ukumbulula omalikuambelo monkhalelo ove ukevelela.—Salmo 13:1, 2; 74:10; 89:46; 90:13; Habacuque 1:2.
7. Omokonda yatyi Jeova ahakumbululila apeho omalikuambelo ngetyi tuhanda?
7 Omokonda yatyi Jeova ahakumbululila apeho omalikuambelo ngetyi tuhanda? Ombimbiliya ipopia okuti Jeova o Tate yetu iya onthue tuvana vae. (Salmo 103:13) Omunthu kaavela ovana vae ovipuka aviho vemuita ine okuvepa ngetyi vahanda. He utyii okuti omona pamwe uhanda otyipuka iya ha ehetyihande vali. He tupu utyii etyi tyikahi nawa pala omona wae, iya utyii oñgeni matyikalesa vakuavo. He wii etyi omona wae esukisa iya onalupi memuavela tyo. Inkha he wavela omona wae ovipuka aviho emuita, monkhalelo omona ahanda, he makala omupika womona wae. Jeova, Tate yetu wokeulu, utuhole unene. Mokonda Omutungi wetu omunongo, Jeova wii etyi tuesukisa, iya utokola omuwo waviuka pala okutuavela etyi tuaita. Otyiwa onthue tukevelele atutale oñgeni Jeova makumbulula omalikuambelo etu.—Tyieleka na Isaías 29:16; 45:9.
8. Oityi Jeova alaa matyitukuatesako okukoleleya mononkhumbi?
8 Hinangela okuti Jeova wii etyi kese omunthu evila okukoleleya netyi ehevili. (Salmo 103:14) Ngotyo Jeova utuavela ononkhono tuesukisa. Otyo otyili mokonda pamwe tulitehela okuti kamatutyivili okutualako. Mahi Jeova walaa okuti inkha tulinga atyiho tuvila opo tukoleleye, ‘metupolo movitateka’. (Tanga 1 Coríntios 10:13.) Tyitupameka okunoñgonoka okuti tupondola okukala nonthumbi yokuti Jeova utyii alo pi tupondola okukoleleya movitateka.
9. Oityi tuna okulinga inkha tulikuambela ku Jeova mahi ehetukumbulula ngetyi tuhanda?
9 Inkha ulikuambela ku Jeova opo ekukuateseko mahi otyo ehekukumbulula ngetyi uhanda, pwa elundo. Hinangela okuti Jeova wafuapo opo etukuateseko, mahi ukevela noumphua-lundo omuwo waviuka opo etuavele etyi tuesukisa. Ombimbiliya itupopila okuti: “Jeova ukahi nokukevela noumphua-lundo opo emulekese oluembia, iya makatuka opo emulekese okankhenda. Mokonda Jeova o Huku youviuki. Ovana-mbembwa ovovana vakevela kwe.”—Isaías 30:18.
“MOMULUNGU WONKHULIKA”
10-12. (a) Oityi tyipondola okulingwa tyina ukahi motyitateka tyokutekula umwe mombunga wavela? (b) Tyina uyumba onthumbi mu Jeova mumuvo wovitateka, oñgeni matyikalesa oupanga wove nae? Ava ongeleka.
10 Ovitateka viove vipondola okukala ovinene olitehela nga Paulu, iya osukisa okuyovolwa “momulungu wonkhulika.” (2 Timóteo 4:17) Momivo ngovio, tyesukisa unene okuyumba onthumbi mu Jeova. Mongeleka, hamwe ukahi nokutekula umwe wavela mombunga. Uhole okulikuambela ku Jeova opo ekukuateseko okulinga omatokolo omawa nokukala tyapama.b (Tala pokatoi.) Upondola okukala nombembwa tyina uhinangela okuti Jeova utyiete iya wii nawa otyitateka tyove. Jeova mekukuatesako okutualako tyapama nokukala nekolelo mwe.—Salmo 32:8.
11 Pamwe upondola okusoka okuti Jeova kekahi nokukukuatesako. Hamwe onondotolo kambutavela okukuhakula monkhalelo uhanda. Ine hamwe ankho ukevela okuti ombunga yove maikukuatesako, mahi avehetyilingi. Apeho yumba onthumbi mu Jeova mekupameka. Tualako okufuena ku Jeova. (Tanga 1 Samuel 30:3, 6.) Konyima, tyina wamaimbuka oñgeni Jeova ekukuatesako, oupanga wove nae maupame.
12 Otyo Linda ankho elitehelela.c (Tala okatoi.) Watekulile ovohe vavela mokueenda kuomanima omanyingi alo vankhia. Wati : “Motyitateka otyo, ame nomulume wange, nomphange yange, tuakalele novilinga ovinene opo tunoñgonoke etyi ankho tuna okulinga. Pamwe tulitehelela ngoti ankho tuehulilwa. Mahi tyina tuhinangela pomuwo oo, tutyimona nawa oñgeni Jeova etukuatesako. Jeova wetupameka iya etuavela etyi ankho tuesukisa, namphila ankho mokutala ngoti ankho tutupu vali etyi tupondola okulinga.”
13. Oñgeni okuyumba onthumbi mu Jeova tyakuatesileko Rhonda okukoleleya movitateka akalele navio?
13 Onthumbi yetu mu Jeova maitukuatesako okukoleleya movitateka. Otyo tyamonekele na Rhonda. Wahengwa nomulume wae Wehembangi ya Jeova. Momuvo oo, omphange yae avasiwa nouvela umwe omunene utiwa lúpus. Apakala vala onohanyi mbehehi omukai womphange yae ankhi. Etyi ovitateka vialinga ngoti vitepuluka, Rhonda ehimbika ovilinga vioukokoli-ndyila. Mahi apakala vali katutu me yae nae ankhi. Oityi Rhonda alinga opo akoleleye movitateka ovio? Rhonda wati: “Ankho ndyitomphola na Jeova ononthiki ambuho, alo umwe tyina ndyilinga vala omatokolo omatutu. Etyi nalinga ngotyo, Jeova akala omunthu wotyotyili pala ame. Nelilongesa okuyumba onthumbi mwe, anahayumbu onthumbi muame muene ine movanthu. Jeova wankhuatesako movipuka aviho nesukisa. Atyindyetela ouwa wokuundapela kumwe na Jeova.”
Ovitateka mombunga vipondola okulola oupanga wove na Jeova (Tala pono palagrafu 14-16)
14. Oñgeni Jeova apondola okukukuatesako inkha umwe mombunga yove upolwa mewaneno?
14 Soka kovitateka ovikuavo viepuiya. Hamwe umwe mombunga yenyi wapolua mewaneno. Ove utyii etyi Ombimbiliya oñgeni tyitekulwa omunthu wapolua meuaneno. (1 Coríntios 5:11; 2 João 10) Mahi mokonda ove uhole omunthu oo, upondola okulitehelela okuti otyitumino otyo Tyombimbiliya tyalema ine katyapepukile okutyilandula. Okuti moyumbu onthumbi yokuti Tate yove keulu mekuavela ononkhono ove wesukisa opo umutavele noukuatyili? Okuti motale otyitateka otyo ngomphitilo yokufuena vali ku Jeova?
15. Omokonda yatyi Andau ehetavelele ku Jeova?
15 Oñgeni otyo tyipondola okuelekwa notyitateka tyomulume wotete, Andau? Okuti ankho utavela okuti upondola okuhetavela ku Jeova mahi atualako nomuenyo? Au, Andau “kakembelwe.” (1 Timóteo 2:14) Ngotyo omokonda yatyi ehetavelele ku Jeova? Andau walia kotyinyango apewa nomukai wae, mokonda ankho uhole vali omukai wae tyipona Jeova. Watehelela komukai wae tyipona okutehelela otyitumino tya Jeova.—Gênesis 3:6, 17.
16. Olie tuna okukala nae nohole yapama iya omokonda yatyi?
16 Etokolo lia Andau litulongesa okuti ohole tuna na Jeova ina okulamba pohole tuna novanthu. (Tanga Mateus 22:37, 38.) Iya tyina ohole yetu na Jeova yapama, onthue tupondola okukuatesako onombunga mbetu monkhalelo ikahi nawa, tyilinge vaumbila Jeova ine kavemuumbila. Ngotyo, tualako okupameka ohole una na Jeova nokuyumba onthumbi mwe. Inkha wasukalala nombunga yove wapolua mewaneno, likuambela ku Jeova nokumupopila ovipuka aviho noñgeni ulitehelela.d (Tala pokatoi.) (Romanos 12:12; Filipenses 4:6, 7) Namphila ukahi nokumona unene ononkhumbi, soka kotyitateka otyo okuti omphitilo yokupameka oupanga wove na Jeova. Konyima mokala tyafuapo pala okuyumba onthumbi mwe nokunoñgonoka okuti okutavela kwe tyieta ouwa omunyingi.
PUTYINA TUKEVELELA
Lekesa ku Jeova okuti uyumba onthumbi mwe mokutualako okuundapa unene movilinga viae (Tala po palagrafu 17)
17. Inkha tutualako okuundapa unene movilinga viokuivisa, tupondola okukala nonthumbi yokuti Jeova malingi tyi?
17 Omokonda tyatyi Jeova ayovolela Paulu “momulungu wonkhulika”? Paulu wati: “Opo onondaka onongwa mbuiviswe nombili.” (2 Timóteo 4:17) Jeova tupu wetuavela ovilinga viokuivisa “onondaka onongwa” iya utuihana okuti “tuvaundapi kumwe nae.” (1 Tessalonicenses 2:4; 1 Coríntios 3:9) Inkha tutualako okuundapa unene movilinga via Huku, tupondola okukala nonthumbi yokuti Jeova metuavela atyiho tuesukisa. (Mateus 6:33) Iya otyo matyitupepukila okukevelela Jeova akumbulule omalikuambelo etu.
18. Oñgeni tupondola okutualako okuyumba onthumbi mu Jeova nokupameka oupanga wetu nae?
18 Ononthiki ambuho linga ononkhono opo upameke oupanga wove na Jeova. Tyina ovitateka viameya natyina una otyiho, tala ovipuka ovio ngatyina omphitilo yokufuena ku Jeova. Tanga, nokulilongesa, nokusokolola Mondaka ya Huku Ombimbiliya. Tualako okulikuambela ku Jeova iya undapa unene movilinga viae. Inkha ulinga ovipuka ovio, upondola okukala nonthumbi yokuti Jeova mekukuatesako opo ukoleleye movitateka aviho unavio pehepano nevi vipondola okuya komutwe.
a Paulu hamwe wayovolelwe umwe kononkheyama ine okoviponga ovikuavo vali.
b Ononthele mbalingwa opo mbukuateseko Ovakristau vavela nava vevetekula. Tala mono ; noya 8 de Fevereiro de 1997; noya 22 de Maio de 2000; noya 22 de Janeiro de 2001.
c Omanyina apilululwa.
d Ononthele mbutukuatesako tyina umwe mbombunga ayekapo okuumbila Jeova. Tala mo A Sentinela 1 de Setembro de 2006, pomafo 17-21, no ya 15 de Janeiro de 2007, pomafo 17-20.