Okuhinangela Oluembia Luange Luotete Tyinkhuatesako Okukoleleya

MU Pepo Linene yo 1970, ame ankho navela andyiende mosipitali ko Pensilvânia, mo Estados Unidos. Ame ankho ndyifualali ndyina omanima 20, ankho ndyina ouvela umwe omunene ulitambuliswa. Ofulumelu ankho ukalapo vala katutu eya okunthala oñgeni ndyikahi. Ofulumelu ankho omukulu vali kuame, mahi ankho wasukalala. Andyihimbika okusosoloka, andyimupulu okuti: “Nthiki imwe wamueneale omunthu unkhia?” Atili owoma akumbulula okuti: “Au, hinemone.” Ngoti ankho himahupu. Mahi oñgeni napita mosipitali? Mandyipopi katutu konthele yomuenyo wange.

OÑGENI NANOÑGONOKA OVILWA

Navela etyi ankho ndyiundapa nondotolo yokutanda mokueenda kuovilwa ko Vietnã. Ame ankho ndyityihole tyokukuatesako ovavei novokuna ovipute iya ankho nahanda okukala ondotolo yokutanda. Nehika ko Vietnã mu Kakwenye yo 1969. Mokonda yomutenya nekumbi lihatundu mola ike nouku natunda, andyipewa osimano opo ndyityiliye ngetyi tyilingwa omafualali omape.

Andyitumua okukaundapa mosipitali yoko Mekong Delta. Omalikopitu ankho aeta ovanthu vena ovipute mosipitali. Ame ankho ndyihole unene otyilongo tyange, nokuundapa, iya ankho ndyihanda okukuatesako ovanthu vomotyilongo tyange. Omafualali okuna ovipute vakohua, avatualwa liwa-liwa me kotendole muatenda omu vatandelwa. Ondotolo yokutanda, nonkhuavo yokutoma, no nofulumelu onombali, avanyingila mekotendole olio opo valinge etyi vevila opo vayovole omienyo. Ankho ndyimona onosaku ononene ononthikovei mbahalongololwa melikopitu. Andyipopilwa okuti muna onohitu mbomafualali vaipawa no nombomba. Ongotyo nanoñgonoka ovilwa.

NEHIMBIKA OKUOVOLA HUKU

Etyi neiva otyili ko Nombangi mba Jeova ankho ndyimukuendye. Me ankho ulongeswa Ombimbiliya no Nombangi, mahi kambatisalelwe. Mahi, ame ankho ndyendapo tyina alongeswa Ombimbiliya. Nthiki imwe, atukaenda-enda na tate koutekuli atukuate Pondyuo Yomaliongiyo. Andyimupulu okuti: “Ondyuo ei oyatyi?” Apopi okuti: “Wahafuene povanthu ovo!” Mokonda ankho ndyimuhole nokumuyumba onthumbi andyitavela anehelimona-mona vali no Nombangi mba Jeova.

Mahi, etyi natunda ko Vietnã, ankho ndyihinangela ovipuka ovinyingi vindyihamesa omutima. Mokonda yovipuka namona mokueenda kuovilwa, ankho ndyitupu vali okankhenda. Ngoti ankho petupu omunthu wii etyi tyikahi nokupita ko Vietnã. Ame ndyihinangela ovanthu vapopia omapita omafualali oko América okuti vaipaa ovana vehena etyi valinga. Ovipuka ovio aviho ankho vinthyokesa okuti nesukisa okukala noupanga na Huku.

Nehimbika okueenda mo nongeleya ononyingi okuovola Huku. Ame ankho ndyihole Huku, mahi ovipuka namwene monongeleya omo hevihandele. Konyima, andyiende Mondyuo Yomaliongiyo ko Delray Beach, mo Flórida. Eliongiyo liotete napita lialingwa mo Tyalumingu mu Hitandyila yo 1971.

Etyi nanyingila Mondyuo Yomaliongiyo, elongomona liounyingi ankho likahi nokumanuhuka, andyitehelela vala elilongeso Liomutala Womulavi. Ame hihinangala osapi yonthele mahi ndyihinangela ovana vavasa liwa onotestu mo Nombimbiliya mbavo. Otyo atyinthyuvisa unene! Andyihiliya otyo ndyitala nokutehelela. Etyi ndyikahi nokutunda Mondyuo Yomaliongiyo omukuatate umwe ondyandyi una omanima 80 eya okupopia naame. Enyina liae o Jim Gardner. Amphe omukanda A Verdade Que Conduz à Vida Eterna amphulu okuti: “Uhanda okutyinda omukanda ou?” Ame andyiti enga, atulilae opo tulilongese Ombimbiliya otyikando tyotete Mukuana komuhuka.

Mo Tyalumingu otyo kounthiki andyiende kovilinga. Ame ankho ndyiundapa omu muhikila ovavei mosipitali imwe mo Boca Raton, mo Flórida. Ankho ndyinyingila ko 22 ola andyipetuka ko 7 ola. Mokonda mosipitali kounthiki kamueile ovavei, andyitange omukanda Verdade. Ofulumelu imwe aiya ponthele yange, aimpholo omukanda, eutale kondye ati: “Nove mokala Ombangi ya Jeova!” Andyitambula omukanda oo andyiti: “Nkhele neutanga vala alo pokati, mahi tyafuile mandyikala Ombangi.” Ofulumelu ayende, andyimane okutanga omukanda motyinthyiki otyo.

Etyi nehimbika okulilongesa Ombimbiliya nomukuatate Gardner nemupula okuti: “Oityi matulilongesa?” Akumbulula okuti: “Omukanda nekuavela.” Ame andyiti: “Omukanda neutangale.” Omukuatate Gardner nokankhenda apopi okuti: “Ewa, tutale liwa-liwa okapitulu kotete.” Andyihuvu mokonda yovipuka ovinyingi ankho nahanoñgonokele! Aiti ndyitange ono testu ononyingi Mombimbiliya yange Rei Jaime. Pahe ankho ndyikahi nokulilongesa konthele ya Huku yotyotyili, Jeova. Monthiki omo komuhuka Jim elilongesa naame ovikapitulu vitatu viomukanda Verdade. Okuhimbikila opo, apeho mukuana komuhuka ankho tulilongesa ovikapitulu vitatu. Ame ankho ndyityihole tyokulongesua. Kuame ankho elao limwe enene okulongeswa nomukuatate una omulembulwa ankho wii Charles T. Russell!

Etyi palamba onosimano mbehehi tunde apa tuehimbika okulilongesa, andyitavelwa opo ndyikale omuivisi. Okuivisa umbo-na-umbo ankho katyapepukile, mahi Jim ankhuatesako okuhakala notyiho. (Atos 20:20) Mokonda wankhuatesako, andyililongesa okupanda ovilinga viokuivisa. Ame ankho ndyilitehelela okuti ovilinga viokuivisa elao limwe enene ame ndyina. Okuundapa kumwe na Huku tyitupu etyi tyielekwa natyo!​—1 Coríntios 3:9.

OHOLE YANGE YOTETE NA JEOVA

Pahe mandyipopi otyipuka tyimwe tyakolela tyaenda momuenyo wange, ohole yange yotete na Jeova. (Revelação 2:4) Ohole na Jeova yankhuatesako okukoleleya momalusoke omavi ovita novitateka ovikuavo.​—Isaías 65:17.

Mo 1971, napopilwa opo ndyitunde mondyuo omu ankho mukala ombunga yange. Omokonda yatyi? Tate koutekuli ankho kahande mondyuo mukale Ombangi ya Jeova! Pomuwo opo ame ankho ndyitupu onombongo ononyingi. Mosipitali ankho ndyiundapa ankho vafeta tyina pamalambe onosimano onombali, iya ame onombongo mbange nembumanena movikutu viokuenda movilinga viokuivisa, mokonda ankho nahanda okulekesa nawa okuti ndyimbangi ya Jeova. Ankho ndyina onombongo mbumwe mombango yoko Michigan, mepundaumbo nekulila. Moluotyo, andyihimbika okulala metuku-tuku liange mononthiki mbehehi. Ame ankho ndyilikulula onondyeli nokulikoha ponombomba mbo gasolina.

Nthiki imwe, etyi ankho nkhele ndyilala metuku-tuku liange, nehika Pondyuo Yomaliongiyo etyi kuakamba onoola onombali opo tuende movilinga viokuivisa. Ankho natunda kovilinga. Andyiende nokonyima Yondyuo Yomaliongiyo andyipumphama apa ovanthu vahapondola okumona. Andyihimbika vali okuhinangela ovipuka namwene ko Vietnã. Ankho ongatyina ndyiete nokuivite ovakuendye vamphula okuti: “Okuti mandyihupu? Okuti mandyihupu?” Ame ankho ndyityii okuti mavankhi, mahi ankho ndyilinga atyiho opo ndyivekengelele. Tyina ankho ndyipumphi puvo ndyihanda okulila.

Ankho ndyilikuambela ku Jeova, mahi ononkhuka mbange otyo mbutoka vala. (Salmo 56:8) Andyihimbika okusoka unene ketutilo. Andyiimbuka okuti ekevelelo olio otyipuka tyimwe tyihuvisa! Jeova makatutilisa ovakuendye ovo, eveavela vali omphitilo yokulilongesa konthele yae. Etutilo malikamanako omaluihamo aeho nononkhumbi tumona hono. (Atos 24:15) Andyinoñgonoka okuti, ohole ndyina na Jeova yapama vali tyipona kohale. Pena vali otyipuka tyakolela nasokele monthiki oyo. Tunde opo, tyina ndyina ovitateka, ndyilinga atyiho opo ndyihinangele ohole yange yotete na Jeova.

JEOVA WALEKESA KUAME OKUTI OMUNTHU OMUWA

Ovanthu valingile ovipuka ovivi unene movita, iya naame nevilingile. Mahi tyinkhuatesako okusokolola mono testu onombali ndyihole. Yotete o Revelação 12:10, 11, ipopia okuti Eliapu kalikoyeswa vala no nondaka tuivisa mahi tupu onohonde ya Jesus. Yavali o Gálatas 2:20 inthyinangelesa okuti Jesus wankhia mokonda yange. Ndyipandula otyilikutila tya Kristu, mokonda Jeova undyevela ovipuka nalingile. Ngotyo pahe ndyina omutima wasukuka nehando enene liokupopila vakuetu konthele ya Huku yetu yokankhenda, Jeova.​—Hebreus 9:14.

Tyina ndyisoka kuetyi tyaendele momuenyo wange, tyimoneka nawa okuti Jeova apeho undingila ovipuka oviwa. Mongeleka, monthiki Jim anoñgonoka okuti ndyilala metuku-tuku liange, andekesa omphange una onondyuo mbulukalwa. Ame ankho ndyina onthumbi yokuti Jeova waundapesa Jim nomphange oo opo amphe ondyuo ikahi nawa. Jeova omuna-kankhenda! Tyilityili utekula nawa ovafendi vae vekolelo.

NELILONGESA OKUKALA NOMBILI NOKULUNGUKA

Mu Kapepo yo 1971, andyisukisa okuenda ko Michigan. Etyi nehenetunde ko Flórida, andyiyulisa etuku-tuku liange nomikanda iya andyiende nokokulio kuekumbi kuotyilongo otyo. Naendapo vala katutu, andyimanuhula okuava omikanda. Neivisa nombili onondaka onongwa Mbouhamba ponomphangu ambuho. Ovanthu aveho navasile nevelongesile otyili.​—1 Coríntios 3:6, 7.

Ame ndyitavela okuti onthiki yotete nelilongesa otyili, ame ankho hityivili okupopia nokankhenda novanthu, haunene tyina ndyipopia nombunga yange. Ovikando vimwe ankho ndyipopia tyahaholeka ovipuka. Ame ndyihole ava ndyilikuai navo John na Ron, tyina ndyiveivisa ankho ndyivekuluminya okutaveva omatavelo ange. Konyima, andyiveiti otyiponyo. Mahi ame ndyitualako nokulikuambela opo vetavela otyili. Mokueenda kuomanima, Jeova ukahi nokunkhuatesako opo ndyipopie nokankhenda putyina ndyiivisa nokulongesa.​—Colossenses 4:6.

OVANTHU OVAKUAVO NDYIHOLE

Oupanga wange na Jeova apeho neupaka tete momuenyo wange. Mahi kuna ovanthu ovakuavo ame ndyihole unene, haunene omukai wange, Susan. Ame ankho apeho nahanda omukai unkhuatesako okutualako okuumbila Jeova. Susan omukai umwe uhole unene Jeova. Onthiki imwe etyi ankho tulihanda, andyeende peumbo liavo ko Rhode Island. Andyimuvasi upumphi pepata liavo utanga Omutala Womulavi Nombimbiliya yae. Atyinthyuvisa mokonda ankho ukahi nokutanga ono testu ambuho namphila ankho ehekahi nokutanga onthele yokulilongeswa. Andyimono okuti oupanga wae na Jeova wakolela unene kwe. Atulinepe mu Kayovo yo 1971. Ame ndyipandula mokonda ndyina omukai unkhuatesako. Etyi ndyihole kwe omokonda uhole vali Jeova tyipona ame.

Jeova wetuavela ovana vevali ovawa, Jesse na Paul. Puetyi vekahi nokukula Jeova wevehongolela. (1 Samuel 3:19) Ankho vena oupanga omuwa nae iya otyo atyituhambukiswa unene. Ovana vetu vekahi movilinga viomuvo auho omanima alamba po 20. Vatualako okuumbila Jeova mokonda navo tupu vahinangela ohole yavo yotete na Jeova. Tupu ndyina ehambu novakuekai vange Stephanie na Racquel, ame ndyivetala ngatyina ovana vange muene. Ndyipandula unene mokonda ovana vange vanepa ovakai vehole Jeova, nomutima wavo auho iya vaundapesa omienyo viavo movilinga viae.​—Efésios 6:6.

Ame naundapa omanima 16 mo Rhode Island, oku nalinga omapanga omanyingi. Nkhele ndyihinangela ovakulu vewaneno vekahi nawa naundapa navo. Tupu ndyipandula ovatalelipo ovanyingi vewaneno naundapa navo. Tupu ndyina elao liokuumbila Jeova kumwe novalume vatualako nokusoka ohole yavo yotete vena na Jeova. Mo 1987, tuailukila ko Carolina do Norte oku ankho kuesukisa vali ovaivisi, iya tupu atulingiko omapanga omanyingi.a​—Tala pokatoi.

Mu Kwenye Kunene yo 2002, Ame na Susan atukongwa opo tukale mombunga yo Mbetele ko Patterson mo Estados Unidos. Andyuundapa Moseketa Yovilinga, iya Susan alingi ovilinga ankho ehole, okukoha ovikutu. Mu Kwenye Kunene yo 2005, napewa otyilinga tyokukala umwe Pononkhalamutwe mbo Nombangi mba Jeova. Ame ankho ndyilitehelela okuti hafuilepo pala otyilinga otyo. Omukai wange Susan asukalala unene, mokonda youngendi novipuka ovikuavo viakutikinya motyilinga otyo. Omukai wange ketyihande tyokuendela mo aviau mahi otyipuka tulinga unene. Susan wati onondaka mbokupameka apopilwa navakuavo vanepwa no Nonkhalamutwe mbo Nombangi mba Jeova mbumuavela ondundo yokunkhuatesako. Ulinga atyiho evila opo ankhuateseko iya ame ndyimuhole mokonda yotyo!

Moseketa yange muna omalutalatu omanyingi omawa atyinangelesa omuenyo wange wehambu. Napewa ononkhano ononyingi onongwa mokonda yokulinga atyiho ndyivila opo ndyihinangele ohole yange yotete ndyina na Jeova!