Okuti Onoandyu Mbupondola Okukuatesako Ovanthu?

Nthiki imwe Kenneth na Filomena, vakala ko Curaçau, vakatalelapo ovalinepi valongesa Ombimbiliya.

Kenneth wati: “Etyi tuehika, pondyuo ankho paikwa, iya ankho etuku-tuku kalipo. Mahi, pena otyipuka tyimwe tyampha ondundo yokulikalela kotelefone yomukai watyo.”

Omukai watyo etavela, apopi okuti omulume wae wakaundapa. Etyi anoñgonoka okuti Kenneth na Filomena veli pondye, ayelulapo, eveiti vanyingile.

Ngwe avetyimono okuti ankho ukahi nokulila. Etyi Kenneth ati pokulinga elikuambelo liokuhimbika opo velilongese Ombimbiliya, omukai ahimbika vali okulila. Pahe, Kenneth na Filomena avemupulu oityi eivite.

Omukai apopi okuti ankho uhanda okuliyendya, iya pahe ankho ukahi nokuhonekela omukanda omulume wae, puetyi Kenneth emulikalela kotelefone. Ngwe evepopila okuti ankho welinyengwa. Ngotyo, Kenneth na Filomena avemupameka no nondaka mbo Mbimbiliya. Mokonda yotyo, omukai eheliipaa vali.

Kenneth wati: “Atupandula unene Jeova etyi etukuatesako okuyovola omukai una wehulilwa. Atumupandula haunene etyi atuma oandyu yae, ine osipilitu sandu, opo tulikalele kotelefone yomukai una!”a

Okuti Kenneth na Filomena vaviukisa etyi vapopia okuti, Huku oe wevekuatesako pokati koandyu ine Osipilitu Sandu? Ine otyipuka otyo tyamoneka-po vala?

Onthue katutyii nawa. Mahi, tutyii okuti Huku utuma onoandyu mbae opo mbukuateseko ovanthu vemufenda. Mongeleka, Ombimbiliya ipopia okuti, Huku watumine oandyu yae ihongolele Omukristau utiwa Filipe, opo aye komuundapi wombala yova Etiope, ankho uhanda okukuatesako okunoñgonoka ondaka ya Huku.​—Atos 8:26-31.

Onongeleya ononyingi mbulongesa okuti kuna onoandyu mbumwe mbukahi nawa mbesuka novanthu, mbulinga ehando lia Huku, ine mbuyunga ovanthu. Ovanthu ovanyingi kavetavela vala okuti kouye kuna onoandyu, mahi tupu vetavela okuti mbuvekuatesako mononkhalelo ononyingi. Mahi, ovakuavo vati kouye kutupu onoandyu.

Okuti onoandyu mbutukuatesako umwe? Inkha mbutukuatesako, opo mbatuka-pi? Mbukahi ñgeni? Okuti mbukuatesako ovanthu? Tutyitalei.