Okuti Kuna Onoandyu Ononkhalavi?

Yoo kuna onoandyu ononkhalavi. Mbatuka-pi? Hinangela okuti Huku watunga onoandyu nepondolo liokulinga etyi mbuhanda. Konyima yetyi Huku atunga omulume nomukai wotete, Andau na Eva, oandyu imwe ankho yatungwa nawa, ailingi etyi yasoka okuti tyaviuka. Aiholovona okutyitukilapo Huku pano pohi. Aihongiliya Andau na Eva okutyitukilapo Huku. (Gênesis 3:1-7; Apocalipse 12:9) Ombimbiliya kaipopi enyina lioandyu oyo notyilinga ankho ilinga puetyi yehenetyitukile-po Huku. Konyima yetyi atyitukilapo Huku, Ombimbiliya aimuihana okuti, o Satanasi tyihangununa okuti, “Ondyale.” Tupu imuihana okuti, Eliapu tyihangununa okuti “Omutendeleyi.”​—Mateus 4:8-11.

Oumphuki oo hapoko wahulila. Pononthiki mba Noe, onoandyu mbumwe “mbasapo omphangu yambo yaviuka,” mombunga ya Huku keulu. Ambuya pano pohi, ambulipilulula omalutu ambo opo mbunepe ovahikuena, ngwe ankho kambalingilwe nehando liokunepa.​—Judas 6; Gênesis 6:1-4; 1 Pedro 3:19, 20.

Oityi tyaendele no noandyu ombo­­? Puetyi Huku aetako ombila onene opo asukukise ohi aiho, onoandyu ombo ambulipilulula opo mbukale vali onoandyu. Mahi Huku ehetavela opo onoandyu ombo mbukondoke ‘pomphangu yambo.’ Ngotyo Huku “wembuyumba menthiki” limwe liihanwa okuti Tartaro. (Judas 6; 2 Pedro 2:4) Ovilulu ovio, muene ovio viaovola okuhula ku Satanasi Eliapu, “omutumini wovilulu,” “utualako okulilekesa ngoandyu yotyitei.”​—Mateus 12:24; 2 Coríntios 11:14.

Ombimbiliya ilongesa okuti Huku wavialeka keulu Ouhamba wa Mesiya menima 1914.a Okutuka opo Satanasi novilulu viae avitahulilwa pano pohi. Ovivi vikahi nokuliyawisa unene, nomaundalelapo otyilekeso tyokuti, vianumana iya ovo vekahi nokuhongiliya ovanthu okulinga ovivi.​—Apocalipse 12:9-12.

Mokonda ovivi vikahi nokuliyawisa unene, otyo tyilekesa okuti apa katutu mavihanyuako. Apa katutu, ovilulu ovio kamavikahongailiya vali ovanthu. Konyima yotyo, Ouhamba wa Huku mautumina mokueenda kuomanima 1.000, ohi aikala omphangu yombembwa. Ovilulu ovio mavipewa vala omphitilo ike opo vilole ovanthu. Konyima yotyo avihanyuako avihakakalako vali kamavikamonaika vali.​—Mateus 25:41; Apocalipse 20:1-3, 7-10.