OSAPI YOKONDYE | OITYI OMBIMBILIYA IPOPIA KONTHELE YONOANDYU?
Oñgeni Onoandyu Mbupondola Okukukuatesako?
Onoandyu mbekolelo mbesuka unene novanthu iya mbuundapa unene pala ehando lia Jeova lilingwe. Etyi Huku atunga ohi, onoandyu “ambuho kumwe ambukuwililila, ovana va Huku aveho vahimbika okukuwililila nehambu.” (Jó 38:4, 7) Tunde ponthyimbi, onoandyu mbuhanda “okunoñgonoka” etyi matyikamoneka komutwe wandyila.—1 Pedro 1:11, 12.
Ombimbiliya ipopia okuti opo ehando lia Huku lifuisuepo, pamwe onoandyu mbuhole okuyakulila ovafendi votyotyili. (Salmo 34:7) Mongeleka:
Etyi Jeova ahanyako epunda-umbo lio Sodoma no Gomorra, onoandyu mbumwe mbakuatesileko Lote nombunga yae opo vahupe.—Gênesis 19:1, 15-26.
Mombambilonia yokohale, etyi vakuendye vetatu ova Hebreu vayumbwa mofolono yotupia, Huku “atumu oandyu yae opo iyovole ovaumbili vae.”—Daniel 3:19-28.
Etyi Daniele akala otyinthiki metoto liononkhulika, ngwe apopi okuti, wahupa mokonda “Huku watuma oandyu yae aipate omilungu viononkhulika.”—Daniel 6:16, 22.
Tunde kohale onoandyu mbuhole okukuatesako ovanthu ovakuatyili
ONOANDYU MBAKUATESILEKO OVAKRISTAU VOTETE
Pamwe, onoandyu mba Huku ankho mbukuatesako Ovakristau votete pala okufuisapo etyi Jeova ahanda. Mongeleka:
Oandyu imwe yaikulile omapito okalavoso, aipopila ono apostolu ankho mbuli mokaleya opo vatualeko okukalongesa mondyuo ya Huku.—Atos 5:17-21.
Oandyu imwe yapopilile Filipe opo aye netapalo limwe lili moluhandya litunda ko Jerusalei lienda no ko Gaza, akalongesa Ondaka ya Huku omu Etiope wakafendele ko Jerusalei.—Atos 8:26-33.
Puetyi omuvo wa Huku wokuyeka ovanthu vehe va Judeu vakale Ovakristau wehikapo, oandyu imwe aimonekela efualali limwe lioko Roma litiwa Korneliu, aimupopila opo akaihane apostolu Petulu na eye meumbo liae.—Atos 10:3-5.
When the apostle Peter was imprisoned, an angel appeared to him and led him out of the prison.—Acts 12:1-11.
OÑGENI ONOANDYU MBUPONDOLA OKUKUKUATESAKO
Hono, petupu otyipuka natyike tyilekesa okuti Huku utuma onoandyu mbae opo mbukuateseko ovanthu komahuviso, ngetyi alingile kohale. Mahi, mononthiki mbetu Jesus wapopia okuti: “Onondaka ombu onongwa Mbouhamba wa Huku, mambukaiviswa kombanda yohi aiho, pala oumbangi movilongo aviho, iya konyima onthyulilo aiya.” (Mateus 24:14) Okuti utyii okuti ovalongwa va Kristu vekahi nokulinga otyilinga etyi nekuateso lio noandyu?
Oandyu yayakulila Daniele kononkhulika
Omukanda wa Apocalipse upopia okuti, onoandyu mbuhanda unene okukuatesako ovanthu opo vanoñgonoke Jeova Huku netyi makalingila ovanthu. Apostolu João wahoneka okuti: “Ame namona oandyu onkhuavo inthanana pokati keulu, ina onondaka onongwa mba apeho pala okuivisa, no nondaka onongwa pala vana vakala kombanda yohi, nomalongo aeho nomihoko, nomalaka, novanthu. Yapopila peulu okuti: ‘Tilei Huku, munkhimanekei, mokonda oola yae yekoyeso yehikapo, iya ngotyo fendei Una walinga eulu, nohi, nelunga no nondyivi-ndyivi mbomeva.’ ” (Apocalipse 14:6, 7) Ovanthu ovanyingi hono, vetyimona okuti tyili onoandyu mbukahi nokukuatesako ovilinga viokuivisa Ouhamba wa Huku ouye auho. Tyotyili, tyina omunthu umwe amalingi onkhali elivele, akondoka ku Huku, “ponoandyu mba Huku pakala ehambu enene.”—Lucas 15:10.
Oityi matyimoneka-po tyina ovilinga viokulongesa ovanthu viamapu? Onoandyu “mbovita mbo keulu” mambukuatesako Jesus Kristu, Ohamba yonohamba, mambukalwa “movita vionthiki onene ya Huku Wepondolo aliho” vitiwa o Armagedom. (Apocalipse 16:14-16; 19:14-16) Onoandyu mbepondolo mbuundapa kumwe na Tatekulu Jesus “opo akoyese vana . . . vehetavela onondaka onongwa konthele ya Tatekulu yetu Jesus.”—2 Tessalonicenses 1:7, 8.
Kala nonthumbi yokuti, onoandyu mbesuka no ove. Mbesuka unene na vana vahanda okulingila Huku. Huku uhole okutuma onoandyu mbae opo mbupameke nokuyakulila ovaumbili vae pano pohi.—Hebreus 1:14.
Kese umwe puonthue una etokolo liakolela ena okulinga. Okuti matutehelela atutavela onondaka onongwa mbukahi nokuiviswa mouye auho? Onombangi mba Jeova vopotyilongo tyove, mavakala nehambu liokukukuatesako okunoñgonoka oñgeni mopolo ouwa kuetyi onoandyu mba Huku mbukahi nokulinga.