Omapulo Ovatangi
Okuti Omukristau upondola okukala nouta ine otyiti otyikuavo opo eliyakulile kovanthu?
Ovakristau valandula onondonga Mbombiliya tyina vaholovona oñgeni maveliyakulila. Onondonga ombo mbulekesa nawa okuti tyapenga Omukristau okukala nouta ine oviti ovikuavo pala okuliyakulila kovanthu. Soka konondaka ombu:
Omuenyo womunthu ku Jeova ukola. Omuhoneki wo salmu David wahoneka konthele ya Jeova okuti: “Ondyivindyivi yomuenyo ikahi nove.” (Salmo 36:9) Ngotyo, inkha Omukristau uholovona okuliyakulila ine okuyakulila omalumono ae, una okulinga atyiho opo elityilike okunengula ohonde ine okuipaa, ukala motyitateka otyinene inkha omunthu unkhia.—Deuteronômio 22:8; Salmo 51:14.
Tyotyili, kese otyiti omunthu aundapesa opo eliyakulile, upondola okuvelwa onombei inkha uvanga omunthu. Moluotyo, okukuata outa katyipuiya, tyilinge motyiponyo ine otyawina.a (Tala onondaka pokatoi.) Tupu una uluiswa nae upondola okunumana vali unene, inkha omunthu una outa, ovilwa vipondola okulinga ovinene iya umwe upondola okuipaa mukuavo.
Etyi Jesus apopila ovalongwa vae opo vatyinde omitunga viavo motyinthiki tyahulililako opo aipawe, otyo ankho katyilekesa okuti opala veliyakulile. (Lucas 22:36, 38) Mahi, ankho Jesus una etyi uhanda okuvelongesa, wati: Ovalanduli vae kavapondola okulwa, tyina vamatumbukilwa novanthu vatyinda omitunga. (Lucas 22:52) Konyima Petulu alwisa omupika womunene-nakwa nomutunga iya Jesus apopila Petulu okuti: “Kondola omutunga pomphangu yao.” Konyima Jesus apopi onondonga mbukuatesako Ovakristau hono mbati: “Aveho vakuatela vakuavo omutunga navo mavakaipawa nomutunga.”—Mateus 26:51, 52.
Ngetyi tyipopia Miquéias 4:3 ovanthu va Huku “mavakanthila omitunga viavo omatemo no nosaluwa, iya omaonga avo avekeenthila onofoso.” Ovakristau votyotyili vaimbukilwa kombembwa vena. Valandula ovitumino Huku aava pokati ka apostolu Paulu etyi ati, “muhakondolelei nawike otyivi notyivi” iya “sukei novipuka vikahi nawa komaiho ovanthu aveho.” (Romanos 12:17, 18) Namphila Paulu nae ankho alambela movitateka, okukutikinya-mo “oviponga vio vimphulu,” mahi nalumwe ataulukile ovitumino via Huku opo eliyakulile. (2 Coríntios 11:26) Mahi, wayumbile onthumbi mu Huku iya ankho utyii okuti onondonga mbo Mbimbiliya “mbukahi vali nawa tyipona oviti pala okulwa.”—Eclesiastes 9:18.
Omuenyo kovanthu va Huku wakolela vali unene tyipona omalumono. Onthue tutyii okuti “omuenyo womuthu kautundu movipuka ena.” (Lucas 12:15) Ngotyo, tuatumbukilwa notyimphulu atuhetyivili okutyityilika tulandula elondolo lia Jesus liati: “Muhelinanei nondingavivi.” Otyo tyilekesa okuti onthue tumuyeka alinge etyi ahanda. (Mateus 5:39, 40; Lucas 6:29)b (Tala onondaka pokatoi.) Tyotyili, oyo onkhalelo ongwa yokulityilika okuipaa. Kamavetuluisa inkha tulandula omalondolo Ombimbiliya iya atulityilika “okulihapa mokonda yomalumono omunthu ena.” (1 João 2:16) Tupu mavetuyakulila inkha ovo munthele yetu vetyimona okuti tu Nombangi mba Jeova iya tuna ombembwa novanthu aveho.—Provérbios 18:10.
Ovakristau vena onthilo nomalusoke avakuavo. (Romanos 14:21) Ovakuatate vamwe no nomphange tyipondola okuvenumanesa ine okuvepundukisa tyina vanoñgonoka okuti umwe povakuatate una outa opo eliyakulile kovanthu. Ovanyingi puonthue tyipondola tutavelwa novatumini okukala nouta, mahi mokonda tuhole ovakuatate vetu, nalumwe tupondola okulinga tyimwe tyipondola okuvepundukisa.—1 Coríntios 10:32, 33; 13:4, 5.
Ovakristau vahanda okuava ongeleka ongwa ku vakuavo. (2 Coríntios 4:2; 1 Pedro 5:2, 3) Inkha Omukristau una outa meumbo pala okuliyakulila kovanthu, ovakulu vewaneno mavemuavela onondonga mbatunda mo Mbimbiliya. Inkha utokola okukala nouta oo, opo kamaave ongeleka ongwa ku vakuavo. Ngotyo, kapondola okukala notyilinga natyike mewaneno. Tupu Omukristau kapondola okunyingila movilinga viokutyinda outa. Inkha ongotyo, hahe vali aovole ovilinga ovikuavo.c—Tala onondaka pokatoi.
Omukristau una yokulinga omatokolo oñgeni meliyakulila, nokuyakulila ombunga yae, nomalumono ae alo ovilinga malingi. Mahi tyina alinga omatokolo oo, otyiwa okulandula onondonga mbo Mbimbiliya. Huku yetu omunongo utuavela onondonga ombo mokonda utuhole. Tyina Ovakristau vena oupanga wapama na Jeova kavaholovona okukala nouta opo veliyakulile kovanthu. Vetyii okuti inkha vayumba onthumbi mu Huku nokulandula onondonga mbo Mbimbiliya, mavakala apeho nondyakulilo yotyotyili.—Salmo 97:10; Provérbios 1:33; 2:6, 7.
Mokueenda kuononkhumbi ononene, Ovakristau mavakayumba vala onthumbi mu Jeova iya kamavaovola okuliyakulila
a Omukristau upondola okuholovona okukala nouta (okapatee ine ekaniangulu) ine oviti ovikuavo, pala okuyeva ovinyama pala okulia ine okuliyakulila kovinyama ovikalavi. Tyina omunthu ekahi peumbo ine ehekahi nokuyeva , una okupola-mo onovala iya eupake pomphangu paholama. Movilongo vimwe muna ovatumini vehetavela ovanthu vakuate omauta, mononkhalelo mbatyo ambuho, Ovakristau vena okutavela otyitumino otyo.—Romanos 13:1.
b Opo unoñgonoke oñgeni moliyakulila ku vana vahanda okukukuatwa kononkhono, tala onthele yati “Oñgeni Moliyakulila Okukuatwa Kononkhono” (Como evitar o estupro) Mo Despertai! 8 ya Tyitalale yo 1993
c Opo unoñgonoke vali konthele yokutyinda outa kovilinga, tala Omutala Womulavi 1 ya Novembro yo 2005 pefo 31, no 15 Julho yo 1983, pomafo 25-26.