Finda Ovilwa Viluisa Omalusoke Ove

OVE ukahi nokuluiswa! Ondyale o Satanasi nomauta ae ekahi nokuundapesa nepondolo enene. Outa oo, opala okulwisa omalusoke ove, halutu luove. Outa patyi oo? Onondaka mbounkhembi!

Apostolu Paulu ankho utyii okuti omatutu a Satanasi anyona unene. Mahi haveho Ovakristau ankho vetavela komatutu oo. Mongeleka, vamwe mo Korintu ankho vasoka okuti vapama motyili iya nalumwe mavayondyua na Satanasi. (1 Coríntios 10:12) Otyo Paulu evelondolela okuti: “Ndyina owoma wokuti ngetyi onyoka yayondya Eva neliva liayo, omitima vienyi vipondola okuyondyua, amuyapuka koukuatyili nousukuki watuka ku Kristu.”—2 Coríntios 11:3.

Onondaka mba Paulu mbulekesa okuti tyakolela okuheliyumbu unene onthumbi. Opo ulwise onondaka mbounkhembi mba Satanasi ove una okunoñgonoka okuti mbunyona unene iya oliyungu.

OÑGENI ONONDAKA MBOUNKHEMBI MBUNYONA?

Monthele ei, onondaka mbounkhembi ombo mbuna omunthu apopia opo ayondye ovanthu ine ayapule omalusoke avo nehando liokuyunga etyi valinga. Ngetyi tyipopia omukanda Propaganda and Persuasion, ounkhembi “otyipuka tyapenga, tyahaviukile ine tyihetyili.” Ovanthu vapopia onondaka ombo okuti “okukemba, okukembela monondaka, okuyapula, okuyondya, okupiambiula omalusoke.”

Onondaka mbounkhembi mbunyona unene mokonda mbupondola okuhongiliya katutu-katutu omalusoke etu otyo tuhetyiete. Mbupondola okuelekwa noukola tuhapondola okumona ine okunika. Vance Packard, upopia konthele yovitateka vio vanthu wati: Onondaka mbounkhembi mbupondola okuhongiliya onkhalelo yetu yokusoka “otyo tuhetyiete.” Omunongo omukuavo wati onondaka mbounkhembi mbuhole okuetela ovitateka ovinene ovanthu, okumoneswa ononkhumbi nokulipaa mokonda yovivala ine onongeleya.—Easily Led—Ehipululo Lionondaka Mbounkhembi.

Inkha omunthu utyivila okutukemba iya pahe Satanasi? Satanasi ukahi nokulilongesa oñgeni ovanthu vatuwa tunde etyi omulume wotete atungwa. Tupu mokonda pahe omutumini “wouye auho,” upondola okuyandyanesa omatutu ae kese nthele youye. (1João 5:19; João 8:44) Satanasi “watuikisa omitima” viovanthu no nondaka mbae mbounkhembi iya pahe “ukahi nokuyondya ovanthu aveho.” (2 Coríntios 4:4; Apocalipse 12:9) Oñgeni upondola okuanya onondaka ombo mbounkhembi?

PAMEKA EKOLELO LIOVE

Jesus wetulongesa onkhalelo yapepuka yokuluisa onondaka mbounkhembi, okuti: “Noñgonokei otyili iya otyili atyimuyovola.” (João 8:31, 32) Movilwa, omafualali esukisa okunoñgonoka onondaka mbo tyotyili mokonda onondyale mbupondola okuyandyaneka omatutu opo eveyondye. Opi upondola okuvasa onondaka mbo tyotyili? Jeova wembupaka Mondaka yae, Ombimbiliya. Ove upondola okuvasa-mo atyiho wesukisa opo uluise onondaka mbounkhembi wa Satanasi.—2 Timóteo 3:16, 17.

Mahi, Satanasi wii otyipuka otyo. Uundapesa ouye wae opo etutalule nokutusoyesa tyina tutanga nokulilongesa Ombimbiliya. Katupondola okuyondyua “nomaliva Eliapu”! (Efésios 6:11 okatoi) Otyo katyituuka opo tukale nenoñgonoko liotyotyili. Onthue tuesukisa okulinga ononkhono opo tukale nenoñgonoko liotyili. (Efésios 3:18) Omuhoneki Noam Chomsky wapopia okuti: “Nawike mapake otyili momutwe wove. Otyo otyipuka ove muene wovola awike.” “Utyivasa muene” tyina “wovolola nawa Movihonekwa kese nthiki.”—Atos 17:11.

Omulume ukahi nokutanga Ombimbiliya opo eliyakulile kovipuka ovinyingi vionondaka mbounkhembi — Opo ufinde ovilwa vio malusoke ove, una okuimbuka oñgeni onondaka mbounkhembi mbunyona unene iya konyima oliyakulila kumbo

Satanasi kahande ove ukale nomalusoke omawa nokunoñgonoka otyili konthele yetyi wiiva. Omokonda yatyi? Mokonda onondaka mbounkhembi “mbuava ondundo onene” inkha ovanthu “vasoyeswa nomalusoke ahaviukile.” (Media and Society in the Twentieth Century) Kupondola okutavela vala kese otyipuka wiiva, una okusoka nawa konthele yotyo. (Provérbios 14:15) Huku wemuavela “ounongo wokusoka” “nonondunge mbenyi ambuho,” opo mutyivile okupameka ekolelo lienyi.—Provérbios 2:10-15; Romanos 12:1, 2.

TUALAKO OKULIWANEKA

Omafualali ahongiliyua no nondaka mbounkhembi, akala nowoma iya ayekepo okulwa. Onondaka mbounkhembi mbuvehongiliya okulwa poyavo ine okuliyapuka. Ngetyi tyapopia omutumini womafualali mo Alemanha, onondaka mbounkhembi ombo mbevekuatesakoopo vafindwe Movita Viotete Viouye Auho. Wati, ovanthu vahongiliyua netyi veiva iya otyo atyivepolo ononkhono. Satanasi uundapesa ononkhalelo ononyingi ngo ombo, opo anyone Ovakristau velikuata okapandi hono. Mongeleka, Satanasi wovola okupaka onondyaya pokati kovakuatate. Tupu usokesa ovanthu okuti eongano lia Jeova kaliaviukile, ine lilinga ovivi, opo vayekepo okukala meongano.

Uhakembwe! Landula omalondolo Ondaka ya Huku iya tualako okulihonyeka novakuatate vove. Mongeleka, Ombimbiliya itupameka opo tutualeko “okulievela pokati tyihakuluminyua” iya nokutetulula liwa-liwa kese tyitateka. (Colossenses 3:13, 14; Mateus 5:23, 24) Tupu itulondola opo tuhayapuke ku vakuetu mewaneno. (Provérbios 18:1) Kala nonthumbi yokuti wafuapo opo uhayondyue nounkhembi wa Satanasi. Lipula okuti: ‘Onthiki ovakuatate vange vandevele, natetululile otyitateka monkhalelo ihambukiswa Jeova ine ihambukiswa Satanasi?’—Gálatas 5:16-26; Efésios 2:2, 3.

UHAYEKEPO ONTHUMBI YOVE

Omafualali ahayumbu onthumbi monkhalamutwe yao, kaetyivili okufinda ovilwa. Tupu onondyale mbuundapesa onondaka mbounkhembi opo omafualai ahayumbe vali onthumbi mo nonkhalamutwe mbao. Inkha ononkhalamutwe mbulinga oviponyo, onondyale mambuovola okutyiyandyanesa iya ambuti: “Uhayumbe onthumbi muvo!” iya “Uhayeke vekupake motyiponga!” Satanasi otyo alinga. Wovola okunyona onthumbi tuna mu vana Jeova aundapesa opo vahongolele ovanthu vae.

Oñgeni upondola okuliyakulila? Tokola okutualako okukala meongano lia Jeova. Tualako okukala omukuatyili nokutavela kovalume vahongolela ovanthu va Huku, namphila ovakuankhali. (1 Tessalonicenses 5:12, 13) Ovanthu vokuayapuka motyili no vakuavo vali vapondola okulwisa eongano. (Tito 1:10) Alo umwe tyina vamoneka ngoti vapopia otyili, “muhayekeipo liwa onondunge mbenyi onongwa.” (2 Tessalonicenses 2:2) Landula ehongolelo Paulu aavela Timoteo, liati: “Tualako movipuka welilongesa” iya “nokuhinangela ovanthu vekulongesa-vio.” (2 Timóteo 3:14, 15) Soka kovipuka aviho vilekesa okuti ove upondola okuyumba onthumbi momupika wekolelo una Jeova aundapesa momanima ano, opo vetulongese otyili.—Mateus 24:45-47; Hebreus 13:7, 17.

UHAKALE NOWOMA

Satanasi tupu uhanda okukuhongilinya mononkhalelo ononkhuavo. Pamwe wovola okukukalesa nowoma. Owoma “otyipuka tyimwe otyikulu mononkhalelo ambuho mbo nondaka mbounkhembi.” (Easily Led—Ehipululo Lionondaka Mbounkhembi) Philip M. Taylor omulongesi woko Britania, wahoneka okuti: Mongeleka ova Asilia ankho vaundapesa onondaka mbounkhembi opo vatilise owoma onondyale mbavo. Satanasi maundapesa owoma wovanthu, nowoma wokumoneswa ononkhumbi, no wononkhia, opo tuyeke-po okuumbila Jeova.—Isaías 8:12; Jeremias 42:11; Hebreus 2:15.

Uhayeke Satanasi ekuyondye! Jesus wati: “Muhatilei owoma vana vapondola okumuipaa, mahi vahapondola okulinga vali natyike.” (Lucas 12:4) Kala nonthumbi yokuti Jeova matualako nomulao wae opo ekutekule, mekuavela “ononkhono mbavilapo” iya ekukuatesako okufinda omaliva a Satanasi.—2 Coríntios 4:7-9; 1 Pedro 3:14.

Mahi ovikando ovinyingi, molitehelela okuti wasoya ine mokala nowoma. Mahi hinangela onondaka mbupameka Jeova apopila Josue: “Kala tyapama nokuakola omutima. Uhakale nowoma, mokonda Jeova, Huku yove, ukahi nove kese oku wenda nako.” (Josué 1:9) Inkha una otyiho, likuambela liwa-liwa ku Jeova konthele yomasuka-suka ove. Ove upondola okukala nonthumbi yokuti “ombembwa ya Huku, ipona onondunge nomalusoke aeho, maiyungu omitima vienyi nomalusoke enyi.” Konyima otyo matyikupameka, opo ufinde onondaka ambuho mbounkhembi wa Satanasi.—Filipenses 4:6, 7, 13.

Ove uhinangela onondaka mbounkhembi omutumwa wo ko Asilia, Rabesake, apopile opo atilise owoma ovanthu va Huku? Ankho uhanda vetavele okuti nawike meveamena ko va Asilia, alo umwe Jeova. Tupu wapopile okuti o Jeova watuma ova Asilia opo vahanye-po o Jelusalei. Oityi Jeova emukumbulula? “Uhakale nowoma no nondaka weiva, nomatutu ovakuatesiko vo hamba yo Asilia vapopia konthele yange.” (2 Reis 18:22-25; 19:6) Konyima Jeova atumu oandyu aipaa ovanthu vo ko Asilia 185.000 motyinthiki tyike vala.—2 Reis 19:35.

KALA OMUNONGO—APEHO TEHELELA JEOVA

Ove wamuene-ale omunthu mosinema ukahi nokuyondyua mahi ngwe otyo ehetyiete? Ohande okumupopila okuti: ‘Uhetavele! Vekahi nokukukemba!’ Pahe soka, onoandyu mbukahi nokukupopila okuti: “Uhetavele komatutu a Satanasi!”