Fenda Vala Siovaa

1. Omokonda yatyi tuesukisila okufenda vala Siovaa?

TUESUKISA okufenda vala Siovaa mokonda oe wetutunga iya etuavela omuenyo. (Ehol. 4:11) Mahi tukahi motyiponga. Mokonda namphila tuhole Siovaa iya tuna onthilo nae, pena ovipuka ovikuavo vipondola okututyilika okumufenda vala aike. Tuesukisa okunoñgonoka oñgeni otyo tyipondola okumonekapo. Mahi tete tutalei oityi tyihangununa okufenda vala Siovaa.

2. Ngetyi tyipopia Êxodo 34:14, tyina omunthu ehole unene Siovaa ulityilika okulinga-tyi?

² Mo Mbimbiliya, okufenda vala Siovaa tyihangununa okukala nohole nae. Tyina tuhole unene Siovaa, kamatufende vali otyipuka otyikuavo. Iya kamatuyeke omunthu nawike ine otyipuka natyike tyinyingile pomphangu ya Siovaa ikahi momutima wetu. — Tanga Êxodo 34:14.

3. Omahunga patyi tuna opo tukale nohole na Siovaa?

³ Onthue tuna omahunga omanyingi opo tukale nohole na Siovaa. Twii ovipuka ovinyingi konthele yae. Mongeleka, twii nawa ovituwa viae, novipuka ehole nevi eyele iya tuovola okutala ovipuka ovio ngetyi evitala. Onthue twii nawa etyi ahandela ovanthu iya tumukuatesako okufuisapo ehando liae. Tupandula unene etyi etuavela omphitilo yokukala omapanga ae. (Sal. 25:14) Kese tyipuka tulilongesa konthele Yomutungi wetu, tyipameka vali oupanga wetu nae. — Tia. 4:8.

4. (a) Oityi Satanasi auundapesa opo anyone ohole tuna na Siovaa? (b) Oityi matulilongesa monthele ei?

⁴ Satanasi Eliapu, oe ukahi nokutumina ouye uno. Moluotyo, uundapesa ouye opo etuhongiliye okusoka okuti ovipuka tuhanda, ovio viakolela momuenyo wetu. Iya mokonda yonkhalelo aonganeka ouye, tyitupuiya unene okuanya omahando omavi. (Efe. 2:1-3; 1 Suau 5:19) Satanasi uhanda okutepula omutima wetu opo tuhakale vala nohole na Siovaa. Matulilongesa ononkhalelo onombali aovola okutyilinga. Tete, utuhongiliya okuovola omalumono. Vali, utuhongiliya okuholovona ovitalukiso vihekahi nawa.

LITYILIKA OHOLE NONOMBONGO

5. Omokonda yatyi tuesukisila okulunguka opo tuhakale nohole nonombongo?

⁵ Atuho tuhanda okukala netyi tuesukisa. Ngetyi okulia, novikutu, nondyuo ikahi nawa. Mahi tuesukisa okulunguka opo tuhakale nohole nonombongo. Ovanyingi mouye wa Satanasi, “vehole onombongo” nomalumono. (2 Tim. 3:2) Sesusi ankho utyii nawa okuti ovalongwa vae mavahongiliyua okukala nohole nonombongo. Otyo apopilile okuti: “Nawike upondola okukala omupika wovahona vevali; mokonda mayale-po wike, ahumbu-po omukuavo, ine mahulu ku wike ayeke-po omukuavo. Onwe kamupondola okukala ovapika va Huku no Vomalumono.” (Mat. 6:24) Inkha omuumbili wa Siovaa umanena omuvo wae nononkhono mbae mokuovola omalumono, ngotyo ukahi nokuundapela ovahona vevali. Iya ngotyo kekahi nokufenda vala Siovaa.

6. Oityi onondaka Sesusi apopilile ewaneno lyo Laodiseia mbutulongesa?

⁶ Konthyulilo yotyita tyo tete, ovanyingi mewaneno lyo Laodiseia ankho velimphanda okuti: “Ame ndyimuhona, nakala nomalumono omanyingi iya hesukile notyipuka natyike.” Mahi komaiho a Siovaa na Sesusi, ovanthu ovo ankho ‘ovahepi, vaetesa onkhenda, ovamphoki iya kavavalele.’ Sesusi keveviyulile mokonda ankho ovahona. Mahi omokonda ohole vena nomalumono, ankho ikahi nokunyona oupanga wavo na Siovaa. (Ehol. 3:14-17) Inkha tuimbuka okuti tukahi nokukala nohole nomalumono, tuesukisa okulinga ononkhono mbokuviukisa liwa onkhalelo yetu yokusoka. (1 Tim. 6:7, 8) Mokonda inkha katulingi ngotyo, omutima wetu maukala tyatepuka iya Siovaa kemetavela efendelo lietu. Siovaa “uhanda okufendwa vala aike.” (Deut. 4:24) Mahi oñgeni omunthu apondola okukala nohole nonombongo?

7-9. Oityi ulilongesila komukulu umwe wewaneno utiwa o David?

⁷ Tala ongeleka yomukulu umwe wewaneno ukala ko Estados Unidos utiwa o David. Wapopia okuti ankho uundapa unene. Iya mokonda yotyo, apewa vali ovilinga iya ayawisilwa konombongo afetwa. Alo umwe potyilongo tyae, ankho o umwe utyivila vali okulinga nawa ovilinga ovio. Wati: “Pomuvo opo, ankho ndyisoka okuti o Siovaa ukahi nokundyamba.” Mahi okuti ankho otyo umwe?

⁸ Katutu-katutu, David ahimbika okuimbuka okuti ovilinga viae ankho vikahi nokunyona oupanga wae na Siovaa. Wati: “Momaliongiyo no movilinga viokuivisa, ankho ndyisoka vala kovitateka nasa kovilinga. Ankho ndyina umwe onombongo ononyingi, mahi ankho ndyisukalala unene iya andyihimbika okukala novitateka motyinepo.”

⁹ David aimbuka okuti ankho wesukisa okutala nawa ovipuka viakolela vali. Wati: “Andyitokola okuviukisa onkhalelo yomuenyo wange.” David aovola okutepulula konoola aundapa iya akapopila omuhona wae etyi ankho ahanda okulinga. Iya mokonda yotyo, apolwa movilinga. Okuti wasoyele? Wati: “Etyi natewa movilinga, monthiki onkhuavo, andyihoneka omukanda wokukala omukokoli-ndyila wapola pokati.” Iya opo velitekule, David nomuhikuena wae avahimbika okulinga ovilinga viokukomba ponondyuo otyo vafetwa. Etyi palamba onohanyi mbumwe, David akala omukokoli-ndyila iya konyima omuhikuena wae nae akala omukokoli-ndyila. Ovanthu ovanyingi vatomba ovilinga viavo. Mahi ngwe kavesukile. Namphila pahe vehena vali onombongo ngo kohale, mahi apeho vena etyi vesukisa opo velitekule. David nomuhikuena wae vahanda okupaka Siovaa, Nouhamba wae pomphangu yo tete, iya vaimbuka okuti Siovaa utekula vana valinga ngotyo. — Mat. 6:31-33.

10. Oñgeni tupondola okuyakulila omutima wetu?

¹⁰ Tyilinge tuna omalumono omanyingi ine tutupu, apeho tuesukisa okuyakulila omutima wetu. Oñgeni matutyilingi? Uhakale nohole nomalumono. Uhayeke ovilinga viove vikale otyipuka tyakolela vali tyipona okufenda Siovaa. Oñgeni moimbuka inkha uhole omalumono? Lipula okuti: ‘Okuti tyina ndyili momaliongiyo no movilinga viokuivisa ndyisoka vala kovilinga viange? Okuti apeho ndyisukalala inkha komutwe wandyila mandyikala umwe nonombongo? Okuti onombongo nomalumono vikahi nokueta ovitateka motyinepo tyange? Okuti ndyitavela okulinga ovilinga viatombwa novanthu inkha vindyeka ndyiundape vali movilinga vya Siovaa?’ (1 Tim. 6:9-12) Tyina tulipula omapulo oo, tuhinangelei okuti Siovaa utuhole unene iya walaa otyipuka otyiwa ku vana vemuhole. Wati: “Ame nalumwe mandyikuyeke iya nalumwe mandyikusi-po.” Naina, otyo apositolu Paulu ahonekela okuti: “Muhakalei nohole nonombongo.” — Heb. 13:5, 6.

HOLOVONA NAWA OVITALUKISO VIOVE

11. Oñgeni ovitalukiso vipondola okunyona ovanthu?

¹¹ Siovaa uhanda tukale nehambu, iya ovitalukiso vipondola okutukuatesako okukala nehambu. Alo umwe Ombimbiliya ipopia okuti “pala omunthu kutupu natyike otyiwa vali tyipona okulia nokunwa, nokuhambukilwa oviwa vitundilila kovilinga viae.” (Ecl. 2:24) Mahi ovitalukiso ovinyingi mouye uno vinyona. Ñgeni ngotyo? Vinyona ovituwa viovanthu, vilunda ovanthu okutavela, nokupanda ovipuka viailikwa Mondaka ya Huku.

12. Ngetyi tyipopia 1 Ova Kolindu 10:21, 22, omokonda yatyi tuesukisila okuholovona nawa ovitalukiso?

¹² Onthue tuhanda okufenda vala Siovaa. Ngotyo, katupondola “okulia ‘komesa ya Siovaa’ no komesa yovilulu.” (Tanga 1 Ova Kolindu 10:21, 22.) Okulia nomunthu umwe tyilekesa okuti tumapanga. Inkha tuholovona ovitalukiso vilekesa ine vipopia konthele youngangala, nomaumbanda, novinepo viasila, novituwa ovikuavo ovivi, ngotyo tukahi nokulia okulia kuatelekwa nonondyale mba Siovaa. Oityi tyitundililako? Tunyona ovituwa vietu, noupanga wetu na Siovaa.

13-14. Ngetyi tyipopia Tiaku 1:14, 15, omokonda yatyi tuesukisila okuholovona nawa ovitalukiso? Popia ongeleka.

¹³ Tala oñgeni ovitalukiso vielifwa nokulia. Tyina tulia, onthue muene tutyii etyi matupake momulungu. Mahi tyina tuamanyini, katutyivili vali okuholovona oñgeni okulia makukalesa olutu luetu. Okulia okulia kukahi nawa, tyituetela ekongoko, mahi okulia ovikulia vihekahi nawa, tyituetela vala omauvela. Hamwe omauvela kamaamoneka liwa-liwa, mahi mokueenda kuomuvo maamoneka.

¹⁴ Tyelifwa notyo, tyina tuholovona ovitalukiso, onthue muene tutyii ovipi matuyulisa navio omutima wetu. Mahi tyina tuamalingi ovitalukiso tuaholovona, hanthue-ko vali tutokola oñgeni mavikalesa omutima wetu nomalusoke etu. Ovitalukiso vikahi nawa vitukalesa nawa; mahi ovitalukiso ovivi, vitunyona vala. (Tanga Tiaku 1:14, 15.) Ovitateka vitundilila kovitalukiso vihekahi nawa vipondola okuhamoneka liwa, mahi mokueenda kuomuvo vimoneka. Otyo Ombimbiliya itupopila okuti: “Muhakembwei: Huku kanyanenwa. Mokonda etyi omunthu akuna tupu otyo makateya; mokonda omunthu ukuna nolusoke luomahando olutu luonkhali, makateya ehanyauno momahando olutu.” (Gal. 6:7, 8) Naina, tyakolela unene okulityilika ovitalukiso aviho viyandyanesa ovipuka Siovaa eyele! — Sal. 97:10.

15. Otyiawa patyi Siovaa etuavela?

¹⁵ Ovanyingi povakuatate vetu vetyihole tyokutala onovidiu mbukahi mo JW Broadcasting^®. Omphange umwe utiwa o Marilyn wati: “O JW Broadcasting ihole okunkhuatesako okukala nehambu. Iya hesukisile okuholovona etyi mandyitale-mo mokonda atyiho tyilimo otyiwa. Tyina namaliwa nounye na tyina nasoya, ndyinyingila-mo opo ndyivase-mo ovidiu imwe ipondola okumphameka. Pahe ndyilitehelela okuti nafuena vali ku Siovaa no keongano liae. O JW Broadcasting yapilulula omuenyo wange.” Okuti no ove ukahi nokupola ouwa kotyiawa otyo tya Siovaa? Mo JW Broadcasting, muna ovidiu ya kese hanyi, no novidiu ononkhuavo, noviimbo vipameka. Upondola okunyingila-mo apeho tyina uhanda.

16-17. Omokonda yatyi tuesukisila okuyunga nawa omuvo tumanena movitalukiso iya oñgeni tupondola okutyilinga?

¹⁶ Katuesukisile vala okulunguka konthele yovitalukiso tuholovonona, mahi tupu tuesukisa okulunguka konthele yomuvo tumanena movitalukiso. Mokonda inkha katulingi ngotyo, tupondola okumanena vali omuvo movitalukiso tyipona movilinga vya Siovaa. Ovanyingi tyivepuiya unene okuyunga omuvo vakala povitalukiso. Omphange umwe una omanima 18 utiwa o Abigaili, wati: “Tyina namaundapa onthiki aiho, ndyitala o televisau opo ndyipululukwe-po. Mahi pamwe ndyikala onoola ononyingi motelevisau.” Omukuatate una omanima 21 utiwa o Samuel, wati: “Pamwe ndyikala omuvo omunyingi nokutala ono vidiu mbuhasete mo Internete. Ndyihimbikila vala ku ike, tyina ndyikati vala ñga, nakala-le onoola ononthatu ine ononkhuana mo Internete.”

¹⁷ Oñgeni upondola okuyunga omuvo umanena movitalukiso? Onkhalelo imwe yokutyilinga, okunoñgonoka omuvo ulifuepi ukahi-ale nokumanena-mo. Mongeleka, upondola okuhoneka omuvo ukala nokutala otelevisau, no mo Internete, nokuyumba omawela mo telefone. Inkha wiimbuka okuti ukahi nokumanena omuvo omunyingi movipuka ovio, linga ehinangeleso liovipuka wesukisa okulinga mokueenda kuonthiki. Panga okulinga ovipuka viakolela vali tete iya konyima ngapo ulinga ovitalukiso. Likuambela ku Siovaa opo ekukuateseko okuendela muetyi wahoneka. Inkha ulinga ngotyo, mokala nomuvo nononkhono mbokulilongesa Ombimbiliya, nokulinga efendelo liombunga, nokuenda komaliongiyo, no movilinga viokuivisa. Iya mohambukilwa vali ovitalukiso viove, mokonda wapaka ovilinga vya Siovaa pomphangu yo tete.

TUALAKO OKUFENDA VALA SIOVAA

18-19. Oñgeni tupondola okutala inkha tukahi umwe nokufenda vala Siovaa?

¹⁸ Konyima yetyi apositolu Petulu ahoneka konthele yonthyulilo youye uno, nekevelelo liokukakala mouye omupe, ayawisako okuti: “Nonthyolwe mokonda mukahi nokukevelela ovipuka ovio, lingei ononkhono opo konthyulilo [Huku] emuvase tyihena onkhako, tyasukuka no kuna ombembwa.” (2 Pet. 3:14) Tyina tuendela monondonga ombo iya atulingi ononkhono mbokutyinda omuenyo wasukuka, nokuumbila Siovaa monkhalelo ahanda, ngotyo tulekesa okuti tufenda vala Siovaa.

¹⁹ Satanasi nouye wae mavatualako okutuhongiliya okupaka ovipuka ovikuavo pomphangu ya Siovaa. (Luka 4:13) Mahi ngatukala-kala novitateka, katupondola okuyeka otyipuka natyike ine omunthu, avake omphangu ya Siovaa momutima wetu. Onthue tuatokola okuavela vala Siovaa otyipuka tyimwe tyakolela unene: efendelo lietu.