Oityi Ouhamba wa Huku Maukalinga?

OITYI OUHAMBA WA HUKU WALINGA-LE?

Monthele yokualamba, tuamona ovipuka Sesusi apopile mavilekesa okuti Ouhamba wa Huku ukahi-ale nokutumina keulu. Ovipuka ovio viyandyulula nawa okuti Ouhamba oo waviala-le keulu, iya Sesusi Kilisitu, oe Ohamba yatyo.

Ombimbiliya ipopia okuti otyipuka tyo tete Sesusi ankho malingi tyina amakala Ohamba, okutaatela pano pohi Satanasi novilulu viae. Pahe etyi vevila vala, okuhongiliya ovanthu pano pohi. Otyo ovivi vieliyawisila unene tunde mo 1914! — Eholololo 12:7, 9.

Namphila ouye uhekahi nawa, Ohamba Sesusi Kilisitu, ukahi nokukuatesako ovanthu mouye auho. Mongeleka, ovanthu ovanyingi vekahi nokulongeswa Ombimbiliya. Pahe vena omuenyo ukahi nawa mokonda vaendela monondongwa mbo Mbimbiliya. (Isaías 2:2-4) Pahe kaveliipa vali novilinga, vena ehambu mombunga iya vatala omalumono monkhalelo yapola pokati. Ouhamba wa Huku ukahi nokulongesa ovanthu ngo ovo okukala nomuenyo omuwa pahetyino, nokuvefuika opo vakale ovanthu Huku ahandela mouye omupe.

OITYI OUHAMBA WA HUKU MAUKALINGA APA KATUTU?

Tutyii okuti Sesusi ukahi nokutumina keulu. Tupu tutyii okuti pano pohi nkhele patuminwa novanthu. Mahi Huku wapopile okuti Sesusi ankho ‘matumina pokati konondyale mbae.’ (Salmo 110:2) Otyo tyilekesa okuti apa katutu, Sesusi makahanyako onondyale mbae, ine omautumini aeho ovanthu, opo aetele ombembwa yotyotyili vana vaendela movitumino vya Huku.

Tala ovipuka Ouhamba wa Huku maukalinga apa katutu:

• Maukahanya-ko onongeleya mbomatutu. Onongeleya ambuho mbuhole okulongesa omatutu konthele ya Huku, nokumonesa ovanthu ononkhumbi, mambukahanyua-ko. Ombimbiliya yeeleka onongeleya mbomatutu nekunga. Ovanthu ovanyingi mavakahuva nehanyauno lionongeleya ombo! — Eholololo 17:15, 16.

• Maukamana-ko omautumini ovanthu. Petu- pu vali omunthu makatumina mukuavo. — Eholololo 19:15, 17, 18.

• Maukahanya-ko ovanthu valinga ovipuka ovivi. Ovanthu vokulinga ovipuka ovivi iya vahahande okupiluluka, mavakahanyua-ko. Ombimbiliya yati: “Onondingavivi mambukanyimuako kombanda yohi.” — Provérbios 2:22.

• Maukapaka Satanasi novilulu viae mokaleya. Satanasi novilulu viae mavakapolwa ononkhono opo ‘vahayapule vali ovanthu.’ — Eholololo 20:3, 10.

Mahi tupu kuna ovanthu vokutavela okutuminwa Nouhamba wa Huku. Oityi Ouhamba wa Huku maukalingila ovanthu ovo?

OITYI OUHAMBA WA HUKU MAUKALINGILA OVANTHU VETAVELA?

Ohamba Sesusi makalinga ovipuka ovatumini vehevili okulinga. Mavekelikuatesako novanthu vena 144.000 vatunda pano pohi. (Eholololo 5:9, 10; 14:1, 3) Ouhamba wa Huku maukalinga etyi Huku ahandela ovanthu, nohi. Oityi?

• Maukamana-ko omauvela, nononkhia. “Nawike kombanda yohi makati: ‘Ame navela.’” Iya “ononkhia kamambukakala-ko vali.” — Isaías 33:24; Eholololo 21:4.

• Maukaeta ombembwa yotyotyili. “Aveho mavakapumphama mombuelo yomuvinyu wavo no mombuelo yomukuyu wavo, iya nawike mekevetilisa owoma.” — Isaías 54:13; Miquéias 4:4.

• Maukaavela ovanthu ovilinga oviwa. “Ovanthu mavakalinga ovilinga vieta ehambu liotyotyili. Kamavakaundapa vala ononkhono-puila.” — Isaías 65:22, 23.

• Maukasukula eheke. “Ohi yakukuta maikahambukwa, otyipembe matyikeliyolela mokonda mamukatema ononthemo.” — Isaías 35:1.

• Maukalongesa ovanthu etyi vesukisa okulinga opo vakale nomuenyo uhapu. “Opo vakamone omuenyo uhapu, vena okunoñgonoka ove Huku wike wotyotyili, nokunoñgonoka una ove watuma, Sesusi Kilisitu.” — Suau 17:3.

Huku ukuhandela ovipuka ovio aviho. (Isaías 48:18) Mahi oityi ove wesukisa okulinga pahetyino opo ukevimone? Tyitala monthele mailandulako.