“Fuenei ku Huku, nae mafuene ku onwe.” — Tiaku 4:8

Okuti Huku Utehelela Omalikuambelo Etu?

Okuti kumbi wasokeliale okuti, Huku katehelela omalikuambelo ove? Inkha wasokeliale ngotyo, haveko vala. Ovanthu ovanyingi velikuambela ku Huku tyina vena ovitateka na evekuateseko, mahi nongotyo ovitateka viavo vitualako vala. Okuti Huku wevenianga? Au! Ombimbiliya ipopia okuti Huku utehelela omalikuambelo, ine tuita etyi tyimuhambukiswa. Tutalei etyi Ombimbiliya ipopia.

**HUKU UTEHELELA OMALIKUAMBELO.**

“Muteheleli womalikuambelo ku ove makuya ovanthu vomihoko aviho.” — Salmo 65:2.

Ovanthu vamwe velikuambela, vati okulikuambela otyo tyivekuatesako okukala nawa, mahi okuvepula, vati kavetyii ine omalikuambelo valinga pena umwe ou weeiva. Mahi okulinga elikuambelo katyitukalesa vala nawa, tupu tyitukuatesako okukoleleya movitateka. Ombimbiliya yati “Siovaaa ukahi popepi na vana vemuita, vana vemuita noukuatyili. . . . Uvetehelela tyina vaita evekuateseko.” — Salmo 145:18, 19.

Ngotyo tupondola okuyumbako onthumbi, okuti Siovaa utehelela omalikuambelo avana vemufenda. Muene Huku yatyo wati: “Mamundyihana amulikuambela ku ame, ame andyimutehelela.” — Jeremias 29:12.

**HUKU UHANDA TULIKUAMBELE KWE.**

O he una nokunyana nomona wae omukainthu.

“Tualeiko okulikuambela.” — Ova Loma 12:12.

Ombimbiliya itutuma ‘tutualeko okulikuambela,’ okulikuambela ‘apeho.’ Onondaka ombo mbulekesa okuti Siovaa Huku wahanda umwe tulikuambele. — Mateusi 26:41; Ova Efesu 6:18.

Omokonda yatyi Huku ahandela tulikuambele kwe? Soka kuetyi: Okuti pena omunthu umwe unumana tyina omona wae ati: “Tate nkhuateseko?” Otyili, he oe wii etyi omona wae ena okulinga opo akale nawa. Mahi tyina atehelela etyi omona wae apopia tyilekesa okuti wahanda vakale omapanga nomona wae. Nonthue, tyina tulikuambela ku Siovaa Huku tyilekesa okuti tuahanda okukala omapanga ae. — Provérbios 15:8; Tiaku 4:8.

**HUKU WESUKA UNENE NO OVE.**

Omulume wononiñgoso upumphi ponondondelo mbo ondyuo weliunga-unga. Ponthele yae pena otyikasa tyina ovityuma viae.

“Pakulei otyiho tyenyi atyiho kwe, mokonda ngwe wesuka no onwe.” — 1 Petulu 5:7.

Huku wahanda tulikuambele, mokonda utuhole, wahanda okututekula. Huku wii nawa-nawa etyi tyitusoyesa netyi tyitulingisa otyiho, pahe wahanda okutukuatesako.

Ohamba Daviti waitile ku Siovaa Huku emukuateseko, wapopilile Huku atyiho ankho asoka, otyo atyimukalesa nawa. (Salmo 23:1-6) Oñgeni Huku akalele etyi Ndaviti apopia nae? Huku ankho uhole unene Daviti, watehelelela omalikuambelo ae aeho. (Ovilinga 13:22) Tupu, Huku utehelela omalikuambelo etu, mokonda wahanda okutukuatesako.

“AME NDYIHOLE SIOVAA MOKONDA UNTHEHELELA”

Onondaka ombo mbuvahiwa mo Mbimbiliya. Omunthu wokuahoneka onondaka ombo, ankho utyii okuti Huku matehela omalikuambelo ae. Eyumba-nthumbi ankho ena-lyo, liapamekele oupanga wae na Huku, tupu liemukuatesile-ko okukoleleya movitateka. — Salmo 116:1-9.

Tyina twii okuti Huku utehelela omalikuambelo etu, tutualako okulikuambela. Otyo, otyo tyalingile umwe utiwa Petulu, ukala ko Espanha. Etyi omona wae ankho una omanima 19 anyima, tyemuihamene unene. Apeho ankho ulikuambela, apopila Huku oñgeni ononkhia mbomona wae mbemuihama. Tupu, ankho wiita ku Huku emukuateseko okukoleleya. Oñgeni elikuambelo liemukuatesileko? Petulu wati: “Atyiti omukai wange, omapanga ange, avankhuatesako unene. O Siovaa wakumbulula omalikuambelo ange evetumu vankhuateseko.”

Namphila omona wa Petulu akondokele komuenyo, mahi okulikuambela tyemukuatesako. Omukai wae utiwa o María Carmen, wati: “Okulikuambela tyankhuatesako okukoleleya. Tyina ndyilikuambela, ndyikala nawa, otyo tyankhuatesako andyiyumbu onthumbi mu Siovaa Huku okuti wii nawa oñgeni neihamenwa.”

Onongeleka ngo mbovanthu vapopiwa monthele ei, netyi Ombimbiliya ipopia, tyilekesa nawa okuti, Huku utehelela omalikuambelo etu. Mahi, otyo katyilekesa okuti Huku ukumbulula omalikuambelo aeho. Omokonda yatyi Huku ahakumbululila omalikuambelo amwe?

a Siovaa enyina lya Huku. — Salmo 83:18.