Omokonda Yatyi Huku Ahakumbululila Omalikuambelo Amwe?

Tate yetu keulu Siovaa Huku, wahanda okutehelela omalikuambelo aeho atunda komutima. Mahi pena ovipuka vimwe vipondola okumutyika, ahakumbulula omalikuambelo etu. Ovipuka patyi? Omokonda yatyi tuesukisila okuñongonoka ovipuka ovio tyina tulikuambela? Tutalei etyi Ombimbiliya ipopia.

Ovanthu veli mokapela vena okamukanda komalikuambelo.

“Tyina ulikuambela, wahawane-wane otyipuka tyike.” — Mateusi 6:7.

Siovaa kahande tupake elikuambelo limwe momutwe ngalio vala tukalaila okuita. Tupu kahande tyina tulikuambela, tuhoneka pomukanda, ngapo tutanga. Wahanda onondaka tupopia melikuambelo mbutunda komutima. Nkhele soka: Ñgeno una epanga liove, ononthiki mbatyo ambuho tyina eya ku ove, upopia vala otyipuka tyike. Uhambukwa? Au, ove utyii okuti omapanga omawa, atomphola vala ovipuka ovinyingi. Nonthue tyina tulikuambela ku Tate yetu keulu, atuahapopi vala otyipuka tuita-itale, atumupopila etyi umwe tyili monthulo yetu, uhambukwa mokonda tyilekesa okuti tuna oupanga nae.

Omulume wakuatelela komikanda viokuyumba omawela mahi uli nokutala ine matyutyu vakuavo.

‘Tyina muita, kamutyipewa mokonda muita nomalusoko apenga.’ — Tiaku 4:3.

Onthue katupondola okukevela Huku akumbulule omalikuambelo ovipuka tuaita viapenga, ngwe tutyii okuti uviyele. Mongeleka, kuna ovanthu vamwe, vaovola onombongo avembupake ngoopo, pahe avayumbu owela, avatale olie matyutyu vakuavo, ngae umbupolapo. Tusoke ñgeno pahe umwe puvo, wiita Huku emukuateseko atyutye vakuavo opo onombongo mbuhula kwe. (Isaías 65:11; Luka 12:15) Okuti Huku makumbulula elikuambelo olio? Au! Opo Huku akumbulule omalikuambelo etu, tuna okuita etyi tyelikuata netyi Ondaka yae Ombimbiliya ilongesa.

“Una waanya ovitumino viange, elikuambelo liae litoyesa.” — Provérbios 28:9.

Nkhele tyakohale Huku ketavela omalikuambelo a vana vehetavela ovitumino viae. (Isaías 1:15, 16) No hono otyo ekahi. (Malaquias 3:6) Ine tuhanda Huku akumbulule omalikuambelo etu, tuna okulinga ononkhono mbokutavela ovitumino viae. Mahi ine pahe kohale tualingile ovipuka ovivi? Okuti ngotyo tyapwa umwe, Huku kametutehelela vali? Au! Ine tulivela, atulingi ononkhono mbokumuhambukiswa, Huku metuevela. — Ovilinga 3:19.