Oñgeni Okulikuambela Tyipondola Okukukuatesako?

Pamela ankho una ouvela umwe omuvi, aovola ondotolo na imuhakule. Mahi tupu elikuambela ku Huku na emukuateseko okukoleleya. Okuti elikuambelo liemukuatesileko umwe?

Pamela wati: “Apeho tyina ankho ndyikahakulwa ndyitila owoma. Mahi tyina ankho namelikuambela ku Siovaa Huku, andyitulu omutima. Nalino nkhele ndyiiva omaluihamo, mahi elikuambelo linkhuatesako nahosoye. Tyina ovanthu vamphula oñgeni ndyiliivite, ndyivekumbulula okuti: ‘Hahe kapii! Nkhele omouli, ndyitai!’”

Okuti matukevela okukala notyitateka otyinene ngo tya Pamela opo tulikuambele? Au. Atuho tuna ovitateka, tyilinge vina viehetulalesa, tyilinge vina vitulalesa. Olie wahahande okukuatesuako tyina ena ovitateka? Okuti okulikuambela tyitukuatesako? Yoo.

Ombimbiliya yati: “Pakula otyiho tyove ku Siovaa, ngwe mekukuatesako. Kamayeke omuviuki atoke.” (Salmo 55:22) Onondaka ombo mbupameka! Mahi oñgeni elikuambelo lipondola okukukuatesako? Tyina ulikuambela ku Huku, ukukuatesako okukoleleya motyitateka tyove. — Tala okakasa kati: “Oityi Tyituka Kokulikuambela?”

Oityi Tyituka Kokulikuambela?

Kumakala notyiho

“Mu kese tyipuka likuambelei; iya ombembwa ya Huku ipona enoñgonoko aliho maiyungu omitima vienyi nomalusoke enyi menyina lya Kilisitu Sesusi.” (Ova Filipu 4:6, 7) Tyina upopila Huku ovitateka viove, ukukuatesako okutula omutima, otyivili okukoleleya movitateka ovio.

Mopewa ounongo na Huku

‘Ine umwe wakamba ounongo, atualeko okuita ku Huku, meupewa mokonda Huku waavela aveho ounongo, otyali mahi ehevepenye.’ (Tiaku 1:5) Tyina tuehulilwa, pamwe tulinga ovipuka viahatiwa ovievi. Oityi tyipondola okutukuatesako? Okulikuambela. Ine ulikuambela ku Huku tyina wehulilwa, mekukuatesako okuhinangela onondongwa mbuli Mondaka yae Ombimbiliya.

Mopewa ononkhono, oungumaneswa

‘Movipuka aviho ndyina ononkhono mokonda ya una unkhuatesako.’ (Ova Filipu 4:13) Mokonda Siovaa Huku, una vali ononkhono tyipona ovanthu, upondola okukukuatesako okukoleleya movitateka viove. (Isaías 40:29) Ombimbiliya ipopia okuti, Siovaa, o Huku “upameka ovanthu.” Omokonda yatyi? Omokonda utupameka movitateka vietu. — 2 Ova Kolindu 1:3, 4.