Vohe Kuateseiko Ovana Venyi Okuhumba Siovaa

1-2. Popia oñgeni onondongwa mbo Mbimbiliya mbutukuatesako, tyina pena tyimwe tyapilulula momuenyo wetu.

MONTHIKI yotyinepo, vokuelinepa vatehelela umwe nawa tyina omulongomoni apopia onondongwa mbo Mbimbiliya mambuvekuatesako motyinepo tyavo. Ovipuka vekahi nokutehelela havipe-ko kuvo. Mahi monthiki velinepa, onondongwa ombo, mbuna esilivilo enene kuvo. Omokonda yatyi? Mokonda okutuka opo, pahe mavahimbika okuendela muetyi vapopilwa.

² Otyo tyelifwa natyina vokuelinepa vahimbika okukala novana. Mokueenda kuomanima omanyingi, ankho vehole-ale okutehelela omalongomona omanyingi apopia etyi tyayemba kokutekula ovana. Mahi pahe onondongwa ombo mambuvekuatesako unene motyinepo tyavo, mokonda vena ovana. Ovohe vapewa otyilinga tyimwe otyinene! Tupu, tyina ovipuka vimwe vipiluluka, onondongwa mbumwe mbuvasiwa Mombimbiliya, mbukala nesilivilo enene kuonthwe. Otyo ovafendi va Siovaa vapopilwa okuti vena okutanga Ondaka ya Huku, iya ngetyi ankho tyilinga onohamba mbo Isilayeli, avasokolola kuyo “ononthiki ambuho mbomuenyo wavo.” — Deut. 17:19.

3. Oityi matulilongesa monthele ei?

³ Vohe, onwe muna otyilinga tyimwe otyinene tyokulongesa ovana venyi Ondaka ya Huku. Iya onwe mutyii okuti okupopila vala ovana venyi evi viayemba ku Huku katyituuka. Etyi muhanda okuvekuatesako umwe avahumbu Siovaa. Oityi mamulingi na mukuateseko ovana venyi okuhumba Siovaa? Monthele ei, matulilongesa onondongwa ononkhuana mambukuatesako ovohe okulongesa ovana vavo vahumbe Siovaa. (2 Tim. 3:16) Tupu matutale oñgeni ovohe vapondola okupolako ouwa tyina vaendela monondongwa mbo Mbimbiliya.

ONONDONGWA ONONKHUANA MBUKUATESAKO OVOHE

4. Ondongwa patyi ikuatesako ovohe okulongesa ovana vavo vahumbe Siovaa? (Tiaku 1:5)

⁴ Ondongwa 1: Ita ku Siovaa ekukuateseko. Ita Siovaa ekuavele ounongo wesukisa utyivile okukuatesako ovana vove okumuhumba. (Tanga Tiaku 1:5.) Siovaa oe vala waava onondongwa mbukahi nawa. Ita ku Siovaa ekukuateseko mokonda yovipuka evi vivali: Tete, Siovaa oe vali una ounongo kokutekula ovanthu. (Sal. 36:9) Vali, onondongwa mbae apeho mbeeta ouwa. — Isa. 48:17.

5. (a) Ovipuka patyi eongano lya Siovaa lilinga, vikuatesako ovohe? (b) Ngetyi tyalekesa ovidiu, oityi welilongesila konkhalelo omukuatate nomphange Amorim vatekula ovana vavo?

⁵ Siovaa ukahi nokuavela ovohe okulia okunyingi kuopaspilitu opo vetyivile okukuatesako ovana vavo okumuhumba. Ukahi nokutyilinga Nondaka yae, neongano liae. (Mat. 24:45) Mongeleka, upondola okuvasa ovipuka ovinyingi monthele yati “Etyi Tyikuatesako Ombunga,” ihole okuya momukanda Pahukei! iya pahe ivasiwa mo site jw.org. Tupu, onovidiu mbuvasiwa mo jw.org, novakuatate vapulwa mbupondola okukuatesako ovohe tyina valongesa ovana vavo.b — Pro. 2:4-6.

6. Oñgeni ovohe vakala mokonda yovipuka vapewa neongano lya Siovaa?

⁶ Ovohe ovanyingi vapandula unene ovipuka ovinyingi vapewa neongano lya Siovaa. He umwe utiwa o Joel, wati: “Okulongesa ovana vetu vetatu otyili, katyapepukile. Mahi ame nomukai wange apeho ankho tulikuambela opo Siovaa etukuateseko. Iya pamwe tulitehela okuti omukanda umwe, aa ovidiu yeya umwe momuvo watyo opo itukuateseko motyitateka tyimwe tuna-tyo. Okuyumba onthumbi mu Siovaa tuetyimona okuti tyitukuatesako unene.” Joel nomukai wae, vetyimona okuti evi Siovaa etuavela, viakuatesako unene ovana vavo okukala noupanga wapama na Siovaa.

7. Omokonda yatyi otyiwa ovohe vakale ongeleka ongwa kovana vavo? (Ova Loma 2:21)

⁷ Ondongwa 2: Kala ongeleka ongwa. Ovipuka ovana valinga, haunene vevitalela kovohe. Mahi, ovohe aveho ovakuankhali. (Loma 3:23) No ngotyo, vapondola okukala ongeleka ongwa kovana vavo. (Tanga Ova Loma 2:21.) He umwe wapopia etyi tyayemba kovana, wati: “Ovana vaheketela umwe atyiho vamona. Ngwe mavetupopila inkha evi tulinga kavielikuatele neevi tuvelongesa.” Ngotyo, ine tuhanda ovana vetu vahumbe Siovaa, tuna okumuhumba tete onthwe.

8-9. Oityi ulilongesila kuetyi tyapopia ovo Andrew na Emma?

⁸ Opo ovohe valongese ovana vavo okuhumba Siovaa, kuna ononkhalelo ononyingi vapondola okutyilinga. Tala etyi tyapopia omukuendye umwe utiwa o Andrew una omanima 17. Wati: “Ovo tate apeho ankho vamphopila omokonda yatyi otyiwa okulikuambela. Ovinthiki aviho, tate undingila-ko elikuambelo, namphila ame nelikuambela-le. Ovo tate ankho vanthyinangelesa okuti: ‘Ove upondola okupopia na Siovaa momuvo uhanda.’ Otyipuka otyo ankho valinga tyankhuatesako unene, iya pehepano ame ndyihole unene okulikuambela ku Siovaa mokonda o Tate yange ndyihole.” Vohe, muahalimbueiko okuti etyi muhole Siovaa, tyipondola okukuatesako unene ovana venyi.

⁹ Tutalei etyi tyaendele na Emma. Etyi tate yae evesapo, me yae esala tyehena onombongo mbokufeta onongele. Emma wapopia okuti: “Mee hapeho ankho ena onombongo, mahi apeho ankho upopia oñgeni Siovaa atekula ovaumbili vae. Ankho ndyityimona umwe nawa okuti mee weendela muetyi elilongesa mondaka ya Huku. Ankho ulinga umwe etyi amphopila.” Oityi tulilongesilako? Tulilongesilako okuti ovohe vapondola okulongesa neevi valinga, namphila pamwe vena ovitateka. — Gal. 6:9.

10. Onomphitilo patyi ovohe ova Isilayeli ankho vena, mbuvekuatesako okutomphola novana vavo? (Deuteronômio 6:6, 7)

¹⁰ Ondongwa 3: Apeho tompholei novana venyi. Siovaa wapopilile ova Isilayeli apeho valongese ovana vavo Ondaka yae. (Tanga Deuteronômio 6:6, 7.) Ovohe ova Isilayeli ankho vena onomphitilo ononyingi mbokupopia novana vavo otyo vevelongesa okuhumba Siovaa. Mongeleka, ovana ovakuendye ankho vakala omuvo omunyingi nokukuatesako ovohe tyina valima, na tyina vateya ovilia. Ovakainthu ankho vakala omuvo omunyingi nokukuatesako ovo ina. Pamwe ankho vanyika ovikutu, nokulinga ovilinga ovikuavo meumbo. Tyina ovohe ankho vaundapa novana, ankho vevepopila ovipuka ovinyingi. Ankho vapondola okuvepopila okankhenda ka Siovaa, no ñgeni akuatesako ovanthu.

11. Onomphitilo patyi ovohe Ovakilisitau hono vena, mbuvekuatesako okutomphola novana vavo?

¹¹ Mononthiki mbuno, ovipuka vielikalela unene nevi ankho vilingwa kohale. Ovohe novana kavetyivili okukala kumwe ehimbwe mokueenda kuonthiki. Tyiti vala ovohe vaundapa, ava ovana venda kosikola. Mokonda yovipuka ovio, pahe ovohe avahamono omuvo wokukala novana vavo. (Efe. 5:15, 16; Fili. 1:10) Efendelo liombunga olio livekuatesako okukala kumwe. Omukuendye umwe utiwa o Alexander, wati: “Tate ulinga atyiho opo tukale nefendelo liombunga, iya kayeke otyipuka natyike tyitutyike. Tyina tuamamane okulinga efendelo liombunga, pahe atwii vala mokuhipulula.”

12. Oityi ovohe vahapondola okuhalimbwa tyina veli mefendelo liombunga?

¹² Inkha unkhalamutue yombunga, oityi una okulinga opo ovana venyi vahambukilwe efendelo liombunga? Upondola okulongesa ovana venyi momukanda omupe Kalako Nomwenyo Apeho! Omukanda oo walinga monkhalelo ikuatesako okukala netompho likahi nawa. Okuti uhanda ovana vekupopile oñgeni velitehelela? Ine otyo uhanda, wahakevele vala omuvo wefendelo liombunga opo upopie navo ine okuveviyula. Tyina upopia novana vove, wehevepopile vala ovipuka viehelikuatele nonondongwa mbo Mbimbiliya. Mahi, vepandula mokonda vekupopila umwe etyi vasoka, ovepameka. Motyivili vala okukuatesako ovana vove tyina unoñgonoka oñgeni velitehelela.

13. Ombupi onomphitilo ononkhuavo ovohe vena opo vakuateseko ovana okukala omapanga a Siovaa?

¹³ Vohe, ononthiki ambuho ovolei okukuatesako ovana venyi okukala noupanga wapama na Siovaa. Muahakevelelei vala omuvo mamulilongesa opo mulongese ovana venyi Ondaka ya Huku. Tala etyi tyapopia ina umwe utiwa o Lisa. Wati: “Onthwe tulongesa ovana vetu novipuka Siovaa atunga. Mongeleka, tyina ovana vetu vanyana novimbwa otyo vayola, omo tukuatelela tuvelongese okuti Siovaa uhanda tuhambukwe.”

14. Omokonda yatyi otyiwa ovohe vakuateseko ovana vavo okukoya nawa omapanga? (Provérbios 13:20)

¹⁴ Ondongwa 4: Kuateseiko ovana venyi okukoya nawa omapanga. Ombimbiliya ipopia umwe nawa okuti omapanga etu apondola okutuhongiliya okulinga etyi tyaviuka, aa okulinga etyi tyapenga. (Tanga Provérbios 13:20.) Vohe, okuti mwii ovalie omapanga ovana venyi? Okuti uhole okukala omuvo umwe novana vove? Oityi mupondola okulinga opo mukuateseko ovana venyi vakoye omapanga ehole Siovaa? (1 Kol. 15:33) Mupondola okukuatesako ovana venyi okukala nomapanga omawa, tyina mukonga ovanthu vehole Siovaa mukale navo tyina mulinga otyipuka tyimwe tyayemba kovilinga vya Huku. — Sal. 119:63.

15. Oityi ovohe vapondola okulinga opo vakuateseko ovana vavo okukoya omapanga ekahi nawa?

¹⁵ Tala ongeleka ya he umwe utiwa o Tony. Wapopia okuti oe nomukai wae vehole okukuatesako ovana vavo okukoya omapanga ekahi nawa. Wati: “Mokueenda kuomanima omanyingi, ame nomukai wange, tuhole okukonga ovakuatate nonomphange vomati elikalaila meumbo lietu. Pamwe tuvekonga tulie navo, iya pamwe tulinga navo efendelo liombunga. Oyo, oyo onkhalelo ikahi nawa yokunoñgonoka vana vehole Siovaa iya vemuumbila nehambu. Tuali nelao liokukala novatalelipo vomawaneno, no nomisionaliu, novakuatate ovakuavo meumbo lietu. Onongeleka mbavo nombili yavo movilinga vya Huku, yakuatesako unene ovana vetu okukala noupanga wapama na Siovaa.” Vohe, apeho kuateseiko ovana venyi okukoya omapanga ekahi nawa.

WAHASOYE!

16. Oityi molingi ine omona wove kahande okuumbila Siovaa?

¹⁶ Oityi molingi inkha ulinga umwe ononkhono, mahi nongotyo omona wove ahahande okuumbila Siovaa? Wahasoke okuti una etyi wahalingile nawa. Atuho, okukutikinyamo omona wove, Siovaa wetuavela ounongo wokulikoyela etyi matulingi. Onthwe muene tukoya aa matumuumbila aa kamatumuumbila. Pahe ine omona wove wayekapo Siovaa, wahasoye, mokonda nthiki imwe upondola okukondoka. Hinangela onthengele-popia yomona omupeseli Sesusi apopile. (Luka 15:11-19, 22-24) Etyi omona una atunda meumbo, akalinga ovipuka ovivi, mahi konyima, tyilinga ovipuka akondoka umwe. Vamwe vapondola okupopia okuti: “Otyo hanthengele-popia vala, okuti omona wange upondola umwe okukondoka?” Yoo upondola okukondoka! Opo tutyimone, matutale etyi tyapopia omukuendye umwe utiwa o Elie.

17. Oñgeni ongeleka ya Elie ikupameka?

¹⁷ Elie wapopia konthele yo tate yae okuti: “Ovo tate valingile atyiho opo vandongese okuhumba Siovaa, Nondaka yae. Mahi etyi ndyina omanima 15, andyihimbika okuehetavela.” Elie ehesuku vali netyi ovohe ankho valinga opo vemukuateseko okukala noupanga wapama na Siovaa. Etyi atunda meumbo, alingi onkhali. No ngotyo, pamwe ankho upopila omapanga ae ovipuka elilongesa mo Mbimbiliya. Elie wapopia okuti: “Tyina ankho ndyipopila omapanga ange ondaka ya Siovaa, ankho ndyisoka vali unene ku Siovaa. Katutu-katutu, ovipuka ankho vili momutima wange nalongesilwe no tate, avihimbika okuya vali.” Etyi pakala, Elie akondoka motyili.c Soka kehambu ovohe vakalele nalio etyi valingile atyiho opo valongese omona wavo okuhumba Siovaa! — 2 Tim. 3:14, 15.

18. Oñgeni ukala tyina utala ovohe valinga ononkhono valongese ovana vavo okuhumba Siovaa?

¹⁸ Vohe, onwe muna otyilinga tyimwe otyinene, tyokulongesa ovana opo vaumbile Siovaa. (Sal. 78:4-6) Otyo otyilinga tyahapepukile, iya onthwe tumupandula nomutima auho muetyi mukahi nokulinga opo mukuateseko ovana venyi! Inkha mulinga atyiho mukuateseko ovana venyi okuhumba Siovaa avemutavela, kalei nonthumbi yokuti Tate yetu Siovaa mahambukwa unene. — Efe. 6:4.