Wahayeke Ohole Yove Itepuluke

1, 2. (a) Onalupi onondaka mba Jesus mu Mateus 24:​12, mbehimbika okufuisuapo? (b) Oñgeni omukanda wa Atos ulekesa etyi Ovakristau votyita tyo tete vatuaileko okupameka ohole yavo? (Tala olutalatu pefo pahimbikila onthele.)

ETYI Jesus ali pano pohi, wahangununine oñgeni ovanthu ankho vapondola okuimbuka okuti vekahi “konthyulilo youye.” Povipuka vimwe apopia, wati: “Ohole yovanthu ovanyingi maikatepuluka.” (Mateus 24:3, 12) Ova Judeu potyita tyo tete ankho vapopia okuti ovanthu va Huku, mahi vayekele ohole yavo mu Huku itepuluke.

² Mahi, Ovakristau ovanyingi pomuvo opo ankho vena ovituwa vielikalaila. Ankho vena ombili movilinga viokuivisa “onondaka onongwa konthele ya Kristu” tupu ankho valekesile ohole ku Huku, no kovanthu vafenda navo, alo umwe kuvana ankho vehei otyili. Ovakristau ovo vatuaileko nokupameka ohole yavo mu Huku. (Atos 2:44-47; 5:42) Mahi, Ovakristau vamwe vayekele ohole yavo itepuluke. Oñgeni tutyii?

3. Oityi tyatendesa ohole yo Vakristau vamwe?

³ Jesus wapopilile Ovakristau votyita tyo tete vomo Efesu okuti: “Wayekapo ohole ankho una ponthyimbi.” (Apocalipse 2:⁠4) Tyipondola hamwe Ovakristau vomo Efesu ankho vekahi nokuhongiliyua novanthu vakala navo, vahanda vala okulihambukiswa ovo muene. (Efésios 2:2, 3) O Efesu ankho epunda-umbo limwe lina olumono, omu ovanthu ankho vahanda okukala vali nomalumono tyipona ovipuka ovikuavo. Ovanthu ovanyingi vomo Efesu ankho valinga oundalelapo tupu ankho vetupu onthilo novitumino via Huku. Ankho vahanda vali okulihambukiswa tyipona okukala nohole na Huku novanthu.

4. (a) Omokonda yatyi ohole yovanthu ikahi nokutepuluka? (b) Ononkhalelo patyi ononthatu ohole yetu ina okutualako okukula?

⁴ Onondaka mba Jesus konthele yohole ipondola okutepuluka, tyipondola okumoneka nonthue hono. Ohole ovanthu hono vena mu Huku, kese nthiki ikahi nokutepuluka. Ovanthu ovanyingi kavakevela Huku atetulule ovitateka viouye, mahi vakevela omaongano omouye evitetulule. Ohole yavo itualako nokutepuluka. Alo umwe ohole yovaumbili va Jeova ipondola okutepuluka, ngetyi ohole Yovakristau mo Efesu yatepulukile. Pahe matutale ononkhalelo ononthatu ohole yetu ina okutualako okukula: (1) ohole yetu mu Jeova, (2) ohole notyili tyo Mbimbiliya iya (3) ohole novakuatate vetu.

OHOLE NA JEOVA

5. Omokonda yatyi tuna okukala nohole na Huku?

⁵ Olie tuna okukala vali unene nohole? Jesus wati: “ ‘Una okukala nohole na Jeova Huku yove nomutima wove auho, nomuenyo wove auho nonondunge mbove ambuho.’ Otyo, otyo otyitumino tyotete, otyinene vali.” (Mateus 22:37, 38) Ohole tuna na Huku itulunda okutavela ovitumino viae, opo tukoleleye nokuyala ovivi. (Tanga Salmo 97:10.) Mahi Satanasi nouye wae, uhanda okutendesa nokuhanya ohole tuna na Huku.

6. Oityi tyimoneka tyina ovanthu vehena ohole na Huku?

⁶ Ovanthu mouye vehole ovipuka vihaviukile. Ovanyingi kavehole Huku, mahi “velihole ovo muene.” (2 Timóteo 3:2) Vahanda vali “epeleyo liolutu, nepeleyo liomaiho, nokulekesa omalumono.” (1 João 2:16) Apostolu Paulu walondolele konthele yetyi tyipondola okumoneka inkha tupaka tete momuenyo omahando etu. Wapopia okuti: “Omalusoke opalutu, atuala ko nonkhia.” Omokonda yatyi? Mokonda vana valinga ngotyo vakala onondyale mba Huku. (Romanos 8:6, 7) Ovanthu vamanena omuvo wavo mokuovola onombongo, ine okulinga oundalelapo vetupu ehambu.​—1 Coríntios 6:18; 1 Timóteo 6:9, 10.

7. Omalusoko patyi apondola okunyona Ovakristau hono?

⁷ Ovanthu vokuhetavela okuti kuna Huku no vokuti ovipuka vieya vala avike, vaovola okuhindila vakuavo okuhakala nohole na Huku alo umwe okuhetavela okuti kouye kuna Huku. Vapopia okuti omunthu utavela okuti kuna Huku otyova ine katangele unene mosikola. Tupu, ovanthu ovanyingi vena vali onthilo novanongo tyipona Huku. (Romanos 1:25) Alo umwe Ovakristau vapondola okuhongiliyua nomalusoke oo. Inkha katulunguka, oupanga wetu na Jeova upondola okutepuluka, tupu nohole tuna nae ipondola okutenda.​—Hebreus 3:12.

8. (a) Ovitateka patyi vipondola okusoyesa ovanthu va Jeova? (b) Oñgeni o Salmo 136 ipondola okutupameka?

⁸ Onthue tukahi mouye wa Satanasi iya pena ovipuka ovinyingi vipondola okutusoyesa. (1 João 5:19) Mahi inkha tusoya, ekolelo lietu malitepuluka iya ohole yetu mu Huku aitende. Mongeleka, tupondola okusoyeswa notyitateka tyekulupo, novitateka viekongoko, ine okuhena onombongo. Ine omokonda katutyivili vali okulinga nawa ovipuka ngetyi ankho tuhanda. Tupondola okusoya mokonda yovipuka vimwe viahaendele nawa ngetyi ankho tukevelela. Namphila tukahi nokumona ovitateka ovinyingi, mahi katupondola okusoka okuti Jeova wetuyeka-po. Soka konondaka mbupameka mbukahi mu Salmos 136:23 mbati: “Uhinangela ononkhumbi tumoneswa iya oluembia lwae malutualako pala apeho.” Tupondola okukala nonthumbi yokuti Jeova utehelela ovipuka “tuiita” iya metuavela-vio.​—Salmo 116:1; 136:24-26.

9. Oityi tyapamekele Paulu opo atualeko nohole yapama mu Huku?

⁹ Apostolu Paulu ankho usoka oñgeni Jeova emukuatesako iya otyo atyimuavela ondundo yokutualako tyapama. Wahoneka okuti: “Jeova omukuatesiko wange, himakala nowoma. Oityi omunthu apondola okundinga?” (Hebreus 13:⁠6) Onthumbi ankho Paulu ena mu Jeova, yemukuatesileko okufinda ovitateka alambelele. Tyina Paulu ankho ena ovitateka, kayekelepo okuyumba onthumbi mu Jeova. Alo umwe etyi ankho apakua mokaleya, wapamekele Ovakristau vakuavo etyi ahonekelela omawaneno omikanda vipameka. (Efésios 4:1; Filipenses 1:7; Filêmon 1) Paulu watuaileko okupameka ohole yae mu Jeova namphila ankho ena ovitateka ovinyingi. Wayumbile onthumbi mu “Huku weungumaneso aliho. Utuungumanesa mononkhumbi mbetu ambuho.” (2 Coríntios 1:3, 4) Oñgeni tupondola okumuhetekela?

10. Oñgeni tupondola okutualako okupameka ohole yetu mu Jeova?

¹⁰ Paulu wahangununa oñgeni tupondola okupameka ekolelo lietu mu Huku etyi ahoneka okuti: “Tualeiko nokulikuambela.” Konyima ahoneka vali okuti: “Likuambelei apeho.” (1 Tessalonicenses 5:17; Romanos 12:12) Omokonda yatyi elikuambelo litukuatesako okufuena ku Huku? Tyina tulikuambela, tupopia na Jeova. Otyo tyitukuatesako okukala noupanga wapama na nae. (Salmo 86:3) Tyina tupopila Tate yetu keulu konthele yatyi tusoka netyi tulitehelela, tufuena vali kwe. (Salmo 65:⁠2) Tupu, tyina tuimbuka oñgeni akumbulula omalikuambelo etu, ohole yetu na Jeova iliyawisa. Onthue tuna onthumbi yokuti “Jeova ukahi popepi novanthu aveho vemuihana.” (Salmo 145:18) Onthumbi tuna yokuti Jeova utuhole tupu metukuatesako, ituavela ondundo yokukoleleya tyina tumona ovitateka pehepano nokomutue wandyila.

OHOLE NOTYILI TYO MBIMBILIYA

11, 12. Oñgeni tupondola okuyawisa ohole tuna Nombimbiliya?

¹¹ Mokonda Tuvakristau, tuhole otyili. Mondaka ya Huku omo tuvasa otyili. Jesus wapopila Tate yae okuti: “Ondaka yove otyili.” (João 17:17) Opo tukale nohole Nombimbiliya, tuna okunoñgonoka etyi tyikahi-mo. (Colossenses 1:10) Mahi tuna okulinga vali ononkhono. Tupu o Salmo 119 itukuatesako okunoñgonoka etyi tuesukisa okulinga. (Tanga Salmo 119:97-100.) Ononthiki ambuho, tuesukisa okusoka oñgeni tupondola okuendela movipuka tutanga Mombimbiliya. Tyina tusokolola oñgeni tupondola okupola ouwa tyina tuundapesa otyili tyo Mbimbiliya momuenyo wetu, ohole yetu Nombimbiliya iliyawisa vali.

¹² Omuhoneki wo salmu tupu wahoneka okuti: “Onondaka mbove momulungu wange mbupepa vali unene tyipona owiki!” (Salmo 119:103) Omikanda viapolwa mo Mbimbiliya eongano lia Huku likahi nokulinga vikahi ngokulia kuapepa nawa. Tyina onthue tulia okulia tuhole, tyituhambukiswa unene. Tyilifwa notyo, onthue tuna okuovola omuvo wokulilongesa. Okulinga ngotyo matyitukuatesako okuhinangela nokuundapesa etyi tuelilongesa pala okukuatesako vakuetu.​—Eclesiastes 12:10.

13. Oityi tyakuatesako Jeremia okukala nohole notyili tyikahi Mondaka ya Huku? Oñgeni otyo tyikukalesa?

¹³ Omuuli Jeremia ankho uhole ondaka ya Huku. Wati: “Onondaka mbove nembuvasa, andyimbuli. Iya onondaka mbove mbahambukiswa omutima wange, mokonda ame natyinda enyina liove, Jeova, Huku yo mambamba ovita.” (Jeremias 15:16) Jeremia ankho usoka unene kuetyi atanga Mondaka ya Huku, iya ankho uhole etyi elilongesa. Jeremia ankho upanda otyilinga apewa na Jeova tupu ankho wivisa ondaka yae. Inkha tukala nohole notyili tyo Mbimbiliya, matuimbuka okuti tuna elao enene liokukala Onombangi mba Jeova, nokuivisa konthele Youhamba ko nonthiki mbuno mbo nthyulilo.

14. Oityi tuna okulinga opo tuyawise ohole tuna notyili tyo Mbimbiliya?

¹⁴ Oityi matyitukuatesako okukala vali nohole Nombimbiliya? Tuesukisa okuenda apeho komaliongiyo, oku tulongeswa na Jeova. Onosimano ambuho tuundapesa Omutala Womulavi opo tulilongese Ombimbiliya, oyo onkhalelo imwe tulongeswa. Inkha tuhanda okupola ouwa komaliongiyo, tuesukisa okulipongiya apeho. Mongeleka, tupondola okutanga onotestu ambuho mbapopiwa. Hono, tyapepuka unene okupongiya omaliongiyo. Omikanda vivasiwa momalaka omanyingi mo site jw.org no mo JW Library. Omikanda vikahi mo JW Library viapepuka okuvasa onotestu. Tyilinge tupongiya omaliongiyo mo JW Library ine tupongiya momikanda, tuna okutanga onotestu ambuho, nokusoka kumbo. Okulinga ngotyo matyitukuatesako okukala vali nohole Nombimbiliya.​—Tanga Salmo 1:2.

OHOLE NOVAKUATATE

15, 16. (a) Ngetyi tyipopia João 13:34, 35, otyitumino patyi Jesus etuavela? (b) Oñgeni ohole tuna na Huku no Mbimbiliya yelikuata nohole tuna novakuatate vetu?

¹⁵ Motyinthiki tyahulilila tya Jesus pano pohi, wapopilile ovalongwa vae okuti: “Ame ndyimupa otyitumino otyipe, tyokuti: Kalei nohole pokati kenyi, ngetyi ame ndyimuhole, nonwe kalei nohole kese umwe na mukuavo. Moluotyo, ovanthu aveho mavaimbuka okuti muvalongwa vange inkha mukala nohole pokati kenyi.”​—João 13:34, 35.

¹⁶ Ohole tuna novakuatate no nomphange yelikuata nohole tuna na Jeova. Inkha katuhole Huku, tupu katupondola okukala nohole novakuatate vetu. Inkha katukala nohole novakuatate vetu, tupu katupondola okukala nohole na Huku. Apostolu João wahoneka okuti: “Una uhena ohole nomukuatate wae eete, kapondola okukala nohole na Huku ehenemone.” (1 João 4:20) Ohole tuna na Jeova novakuatate vetu tupu yelikuata nohole tuna no Mbimbiliya. Omokonda yatyi? Mokonda inkha tuhole etyi tuelilongesa mo Mbimbiliya, matutavela ovitumino tuvasamo viokukala nohole na Huku novakuatate vetu.​—1 Pedro 1:22; 1 João 4:21.

17. Ombupi ononkhalelo mbumwe tulekesa ohole?

¹⁷ Tanga 1 Tessalonicenses 4:9, 10. Ononkhalelo patyi tupondola okulekesa ohole mewaneno? Ovakuatate vakulupa no nomphange vesukisa okukuatesuako. Ovahepe hamwe vesukisa okukuatesuako okupangiya ovipuka vimwe mondyuo yavo. (Tiago 1:27) Omukuatate ine omphange wasoya ine una ovitateka ovikuavo tuesukisa okumutehelela nawa, nokumukuatesako ine okumupameka. (Provérbios 12:25; Colossenses 4:11) Onthue tulekesa ohole “kuvana tufenda navo” muevi tupopia nevi tulinga.​—Gálatas 6:10.

18. Oityi matyitukuatesako okutetulula ovitateka novakuatate vetu?

¹⁸ Ombimbiliya ipopia okuti “ko nonthiki mbahulilila,” ovanthu ovanyingi mavelipakeko nokuhole vali onombongo. (2 Timóteo 3:1, 2) Mokonda Tuvakristau, tuesukisa okulinga ononkhono opo ohole yetu na Jeova, Nondaka yae, novakuatate vetu iliyawise. Mokonda tuvakuankhali, ovikando vimwe tupondola okukala novitateka novakuatate vetu. Mahi mokonda tuhole ovakuatate vetu, matuovola okutetulula liwa ovitateka nohole. (Efésios 4:32; Colossenses 3:14) Katupondola okuyeka ohole yetu itepuluke! Mahi, tuna okutualako okuyawisa ohole yetu na Jeova, Nondaka yae, novakuatate vetu.