Ehambu Litundilila Kokutyinda Omuenyo Wapepuka
DANIEL NA MIRIAM velinepa mu Tungonkhe yo 2000 iya ankho vena omuenyo ukahi nawa mo Barcelona ko Espanha. Daniel wapopia okuti: “Mokonda kovilinga vietu ankho tufetwa nawa, ankho tulia monombale mbalia okalu, nokuenda kovilongo tuhanda, nokulanda ovikutu vialia okalu. Tupu ankho tuenda apeho movilinga viokuivisa.” Mahi liwa-liwa apamoneka tyimwe.
Motyionge tyimwe mo 2006, Daniel weiva omulongomoni umwe walinga epulo liati: “Okuti ukahi nokulinga atyiho opo ukuateseko vana ‘vekahi mondyila yononkhia’ opo veye mondyila yomuenyo?” (Provérbios 24:11) Elongomona liapopia okuti opo ovanthu vakahupe onthue tuna otyilinga tyokuvelongesa onondaka onongwa. (Atos 20:26, 27) Daniel uhinangela okuti, “nelitehelela ngatyina Jeova ekahi nokupopila ame.” Elongomona tupu liapopia okuti tukala vali nehambu tyina tuundapa unene movilinga via Jeova. Daniel ankho utyii okuti otyili mokonda ankho umona ehambu omukai wae Miriam ena, mokonda ankho omukokoli-ndyila.
Elongomona olio liahika unene komutima wa Daniel aimbuka okuti wesukisa okulinga epiluluko limwe enene momuenyo wae. Atepulula ko noola aundapa kovilinga, akala omukokoli-ndyila iya ehimbika okusoka vailukile komphangu kuesukisa vali ovaivisi Vouhamba.
OVITATEKA NEHAMBU
Mu Kapepo yo 2007 Daniel na Miriam avayepo ovilinga viavo iya availukila ko Panamá kotyilongo ankho veiale. Ankho pahe mavehimbika okuivisa ko Bocas del Toro povilongo vikala pokati Kelunga ko Coribé. Ovanthu ovanyingi vakalamo ova Guaymi. Daniel na Miriam vaimbuka okuti vapondola okukala ko Panamá onohanyi etyinana, mokonda onombongo vaongiya mbutuuka opo mbuvekuateseko onohanyi ombo.
Tyina vakaivisa kovilongo ovikuavo vikahi pokati kelunga vaendela kowato no komisikaleta. Mahi Daniel na Miriam vahinangela onthiki yotete valinga oungendi wono Kilometu 30, monomphunda nomo tyingala-ngala tyomutenya. Mokonda Daniel ankho waponua unene aambuka ine ankhi-po. Mahi, ahambukwa unene etyi vatambulwa nawa nova Guaymi, haunene etyi Daniel na Miriam velilongesa okupopia elaka liovanthu ovo. Pakala vala katutu ahimbika okulongesa Ombimbiliya ovanthu 23.
Oityi tyaenda-po etyi onombongo mbavo mbapwa? Daniel wati: “Atuhimbika okusoka okukondoka ko Espanha. Atyituihama unene tyina tusoka okusapo ovalongwa vetu vo Mbimbiliya.” Mahi etyi palamba ohanyi, atupopilwa otyipuka tyimwe tyetuhambukiswa. Miriam wati: “Tuapopilwa opo tukale ovakokoli-ndyila vavilapo. Atuhambukwa unene okutualako novilinga vietu!”
EHAMBU LIAVO LILIYAWISA
Mokonda yomapiluluko eongano, mo 2015 Daniel na Miriam avapopilwa opo vayekeko okukala vakokoli-ndyila vavilapo. Pahe oityi mavalingi vali? Avayumbu onthumbi momulao wapopiwa mu Salmo 37:5 wati: “Yeka Jeova ahongolele onondyila mbove kolela mwe, iya mekuvatela.” Avavasi ovilinga vivekuatesako opo vatualeko okukala ovakokoli-ndyila, pahe vekahi mewaneno limwe ko Veraguas mo Panamá.
Daniel wati: “Etyi tukahi ko Espanha, ankho tutupu onthumbi yokuti matutyivili okutyinda omuenyo wapepuka. Mahi nalumwe tuakalele tyihena okulia.” Oityi tyeveetela ehambu liotyotyili? Vapopia okuti: “Petupu otyipuka tyieta ehambu enene tyipona okukuatesako ovanthu vomitima vieliola okunoñgonoka Jeova!”