Ewaneko Lihambukiswa, Nehinangelo lio Nonkhia mba Tatekulu

1, 2. Mo 2018, eliongiyo patyi maliwaneka ovanthu monkhalelo ike iya omokonda yatyi? (Tala olutalatu pefo pahimbikila onthele.)

MONTHIKI 31 ya Março yo 2018, ovanthu ovanyingi mouye auho maveliwaneka meliongiyo limwe lilingwa vala like menima. Tyina ekumbi liamanyingila, Onombangi mba Jeova novanthu ovakuavo maveliongiya pala okuhinangela otyilikutila Jesus etulingila. Kese nima, Ehinangelo liononkhia mba Kristu liwaneka ovanthu monkhalelo ihuvisa tyipona otyipito otyikuavo mouye.

² Jeova na Jesus vahambukwa unene tyina vatala ovanthu ovanyingi mouye auho venda keliongiyo olio liakolela unene. Ombimbiliya ipopia konthele “yotyinyingi tyovanthu, tyihevilwa okuvalulwa nomunthu nawike, tyatunda movilongo aviho, no momihoko, nomalongo, no momalaka aeho” iya vakuililila okuti: “Eyovo lietu litunda ku Huku yetu, una wapumphama kotyipundi tyoutumini, no Kondyona.” (Apocalipse 7:9, 10) Otyiwa okutala okuti kese nima Mehinangelo, ovanthu ovanyingi vankhimaneka Jeova na Jesus mokonda yovipuka oviwa vehole okutulingila!

3. Omapulo patyi maakumbululwa monthele ei?

³ Monthele ei, movasi omakumbululo omapulo aa ekuana: (1) Oñgeni ndyipondola okulipongiya, opo ndyipole ouwa Kehinangelo? (2) Omononkhalelo patyi Ehinangelo likuatesako ovanthu va Huku okulikuata okapandi? (3) Oityi ame ndyipondola okulinga opo ndyikuateseko ovanthu va Huku okulikuata okapandi? (4) Okuti makukakala Ehinangelo liahulililako? Inkha makukakala, onalupi otyo matyikamoneka?

OÑGENI TUPONDOLA OKULIPONGIYA OPO TUPOLE OUWA KEHINANGELO?

4. Omokonda yatyi kuonthwe tyakolela unene okuenda Kehinangelo?

⁴ Omokonda yatyi kuonthwe tyakolela okuenda Kehinangelo? Ehunga limwe, omokonda okuenda komaliongiyo onkhalelo imwe yokufenda Jeova. Ngotyo, tupondola okukala nonthumbi yokuti Jeova na Jesus vamona ononkhono kese munthu alinga opo ende keliongiyo liakolela unene menima. Onthwe tuhanda Jeova na Jesus vakale nonthumbi yokuti matuende Kehinangelo, nkhuali katuende vala tyina pamamoneka otyitateka otyinene tyipondola okututyilika. Tyina ovipuka tulinga vilekesa okuti omaliongiyo akolela unene kuonthwe, ngotyo tukahi nokuavela vali Jeova ehunga opo enyina lietu litualeko okukala “momukanda wehinangelo” tupu wiihanua okuti “omukanda womuenyo.” Momukanda oo muvasiwa omanyina ovanthu aveho Jeova ahanda okuavela omuenyo uhapu.—Malaquias 3:16; Apocalipse 20:15.

5. Tyina nkhele Ehinangelo lihenehikepo, oñgeni ove upondola “okutualako okutala nawa inkha ukahi mekolelo”?

⁵ Tyina nkhele onthiki Yehinangelo ihenehikepo, tupondola okukala omuvo omunyingi nokulikuambela, nokusoka unene konthele yoñgeni oupanga wetu na Jeova ukahi. (Tanga 2 Coríntios 13:5.) Apostolu Paulu wapopilile Ovakristau okuti: “Tualeiko okutala nawa inkha mukahi mekolelo.” Oñgeni tupondola okutyilinga? Tupondola okulipula okuti: ‘Okuti ndyina onthumbi yokuti eli eongano Jeova aholovona opo alinge ehando liae? Okuti ndyikahi nokulinga atyiho movilinga viokuivisa nokulongesa ovanthu onondaka onongwa? Okuti ovipuka ndyilinga vilekesa okuti ndyina onthumbi yokuti tukahi momuvo wonthyulilo iya onthyulilo youtumini wa Satanasi ikahi popepi? Okuti onthumbi ndyina mu Jeova na Jesus itualako tyapama ngo momuvo nahimbika okuumbila Jeova?’ (Mateus 24:14; 2 Timóteo 3:1; Hebreus 3:14) Okusoka komakumbululo omapulo oo, matyitukuatesako “okutualako okulinoñgonoka” nawa.

6. (a) Oipi onkhalelo ike vala yokukamona omuenyo uhapu? (b) Oñgeni omukulu umwe wewaneno kese nima elipongiya pala Ehinangelo iya oñgeni ove upondola okumuhetekela?

⁶ Onkhalelo imwe yokulipongiya pala Ehinangelo, okutanga nokusokolola kononthele mbumwe mbomikanda mbuhangununa omokonda yatyi Ehinangelo liakolela unene. (Tanga João 3:16; 17:3.) Onthwe matukapewa vala omuenyo uhapu inkha tunoñgonoka Jeova nokukala nekolelo Momona wae, Jesus. Opo tulipongiye pala Ehinangelo, tupondola okuholovona ononthele mbomikanda mambutukuatesako okufuena vali kuvo. Otyo omukuatate umwe omukulu wewaneno omanima omanyingi ehole okulinga. Omanima omanyingi uhole okuongiya ononthele mbo Mutala Womulavi mbupopia konthele yehinangelo nohole Jeova na Jesus vena nonthwe. Onosimanu mbumwe tyina nkhele onthiki Yehinangelo ihenehike-po, utanga vali ononthele ombo iya asokolola unene omokonda yatyi Ehinangelo liakolela unene. Pamwe kononthele apongiya uyawisako ike ine onombali. Tupu, utanga nokusokolola onthele Yombimbiliya itangwa Pomuvo Wehinangelo. Omukulu oo wewaneno wapopia okuti okulinga ngotyo, unoñgonoka vali ovipuka ovipe kese nima. Tyakolela vali, tyina elilongesa Ombimbiliya ohole ena na Jeova na Jesus iliyawisa vali. Tyina nove ulilongesa monkhalelo ngoyo, ohole una na Jeova na Jesus iliyawisa vali unene. Mopandula vali unene etyi Jeova na Jesus vekahi nokukulingila iya ngotyo mopolo vali ouwa Kehinangelo.

EHINANGELO LITUKUATESAKO OKULIKUATA OKAPANDI

7. (a) Motyinthiki tyotete Tyondalelo ya Tatekulu, Jesus welikuambela konthele yatyi? (b) Oityi tyilekesa okuti Jeova wakumbululile elikuambelo lia Jesus?

⁷ Motyinthiki tyotete mualingilwe Ondalelo ya Tatekulu, Jesus walingile elikuambelo liakolela unene. Welikuambelele konthele yewaneko ena na Tate yae. Tupu, Jesus welikuambelele opo ovalongwa vae navo velikuate okapandi. (Tanga João 17:20, 21.) Jeova tyotyili wakumbulula elikuambelo Liomona wae ehole unene. Tyelikalela nomaliongiyo omakuavo, Ehinangelo lilekesa nawa-nawa okuti Onombangi mba Jeova ovanthu velikuata okapandi. Monthiki ike vala, ovanthu ovanyingi-nyingi vovilongo novivala vielikalaila maveliongiya mouye auho opo valekese okuti vena onthumbi yokuti Jeova watumine Omona wae. Movilongo vimwe, katyakakele ovanthu vovivala vielikalaila okuliwaneka kumwe iya tyina vetyilinga vakuavo velitehelela okuti katyaviukile. Mahi, hangotyo-ko Jeova na Jesus velitehelela, mokonda kuvo ewaneko lietu Mehinangelo otyipuka otyiwa unene.

8. Onondaka patyi Jeova apopilile Ezekiele?

⁸ Mokonda tuvaumbili va Jeova, onthwe katuhuvu tyina tutala okuti tuelikuata okapandi monkhalelo ngoyo. Monondaka Jeova apopilile Ezekiele, waulile konthele yokulikuata okapandi kovanthu vae. Wapopilile Ezekiele akuate ovimuti vivali, otyimuti tyimwe “o pala Juda” iya otyikuavo “o pala Jose” iya ankho una okuvihonyeka opo vikale otyimuti tyike vala. (Tanga Ezequiel 37:15-17.) Momutala Womulavi wa Kakwenye yo 2016, onthele yati “Omapulo Ovatangi” yahangununine okuti: “Jeova waundapesa omuuli wae Ezekiele, opo aule okuti ovanthu vae mavakondoka Kotyilongo Tyalaelwe iya avelikuate okapandi ngelongo like. Eulo olio tupu liapopia okuti vana vafenda Huku mononthiki mbahulilila maveliwaneka avakala vala ovanthu veke.”

9. Oñgeni onthwe tumona ewaneko Ezekiele aulile kese nima momuvo Wehinangelo?

⁹ Okuhimbikila menima lio 1919, katutu-katutu Jeova ahimbika okuonganeka nokuwaneka vali ovalembulwa. Ovanthu ovo ankho vekahi ngotyimuti “tya Juda.” Ovanyingi vena ekevelelo liokukala apeho pano pohi avahimbika okuliwaneka novalembulwa. Ovanthu vokuna ekevelelo liokukala pano pohi, vekahi ngotyimuti “tya Jose.” Jeova walaele okuhonyeka ovimuti ovio vivali, avikala “otyimuti tyike” vala pomaoko ae. (Ezequiel 37:19) Jeova wahonyeka ovalembulwa “no nongi ononkhuavo” avakala “otyunda tyike” vala. (João 10:16; Zacarias 8:23) Hono, ovikundyi ovio vivali vielikuata okapandi iya viumbila kumwe Jeova. Tupu, vena Ohamba ike vala Jesus Kristu, una Ezekiele apopile meulo liae okuti “omuumbili” wa Huku, “David.” (Ezequiel 37:24, 25) Kese nima tyina tuliongiya Mehinangelo liononkhia mba Jesus, tumona okuti ovikundyi ovio vivali vielikuata okapandi ngetyi Ezekiele aulile. Mahi oityi kese mukuatate apondola okulinga opo ovanthu va Huku vatualeko okulikuata okapandi?

OITYI KESE UMWE APONDOLA OKULINGA OPO TUTUALEKO TYELIKUATA OKAPANDI?

10. Oñgeni tupondola okukuatesako ovanthu va Huku okukala newaneko?

¹⁰ Oipi onkhalelo yotete onthwe tupondola okukuatesako ovanthu va Huku okulikuata okapandi? O putyina tulinga ononkhono pala okuliola omutima. Etyi Jesus ankho eli pano pohi, wapopile okuti ovalongwa vae vesukisa okuliola omutima. (Mateus 23:12) Ovanthu vomouye velitala ngatyina vakolela vali ku vakuavo. Mahi inkha tuliola omutima, matukala nonthilo novakuatate vena otyilinga tyokuhongolela ewaneno nokutavela ehongolelo liavo. Inkha tulinga ngotyo ewaneno malikala newaneko. Tyakolela vali unene, inkha tuliola omutima matuhambukiswa Huku, mokonda “uyele vokulipakako, mahi una okankhenda na vana vena omutima weliola.”—1 Pedro 5:5.

11. Oñgeni okusoka kombolo novinyu Pehinangelo, tyitukuatesako okulikuata okapandi?

¹¹ Oipi onkhalelo yavali onthwe tupondola okukuatesako ovanthu va Huku okulikuata okapandi? Omokusokolola nawa konthele yetyi ombolo novinyu vihangununa. Otyipuka otyo tuna okutyilinga tyina nkhele onthiki Yehinangelo ihenehike-po, mahi haunene motyinthiki Tyehinangelo. (1 Coríntios 11:23-25) Ombolo yehena onkhiso ilekesa olutu lwa Jesus luhena onkhali aava ngotyilikutila. Ovinyu ilekesa ohonde ya Jesus. Mahi okunoñgonoka vala ovipuka ovio katyituuka. Tuesukisa okuhinangela okuti otyilikutila tya Jesus tyakutikinya ovipuka vivali viakolela unene vilekesa ohole. Jeova wetuavela Omona wae iya Jesus ankho wafuapo opo aave omuenyo wae pala onthwe. Tyina tusoka ohole vetulekesa, tyituavela ondundo yokukala nohole navo. Iya ohole kese umwe ena na Jeova maitukuatesako okulikuata okapandi.

12. Mehipululo konthele yohamba imwe novapika vayo, oñgeni Jesus ahangununa okuti Jeova uhanda tuevele vakuetu?

¹² Oipi onkhalelo ya tatu ipondola okukuatesako ovanthu va Huku okulikuata okapandi? Oputyina tuevela vakuetu nomutima auho. Tyina tulinga ngotyo, tulekesa okuti tupandula Jeova, apeho wevela ononkhali mbetu pokati kotyilikutila tya Jesus. Opo alekese omokonda yatyi tyakolela okuevela, Jesus wapopia ehipululo limwe konthele yohamba imwe novapika vayo. Tanga Mateus 18:23-34 iya olipulu okuti: ‘Okuti ame nahanda okulinga etyi Jesus alongesa? Okuti napwa-elundo iya ndyinoñgonoka ovakuatate vange no nomphange? Okuti nafuapo opo ndyevele vana vandinga oviponyo?’ Tyotyili oviponyo vimwe ovinene vali tyipona ovikuavo. Iya oviponyo vimwe pamwe vitupuiya okuevela mokonda tuvakuankhali. Mahi ehipululo lia Jesus litulongesa etyi Jeova ahanda tulinge. (Tanga Mateus 18:35.) Jesus wahangununa nawa okuti Jeova kametuevela inkha onthwe katuevela ovakuatate vetu tyina velivela nomutima auho. Tyotyili tuna okusoka nawa konthele yotyo. Opo tuyakulile ewaneko lietu, tuna okuevela vakuetu ngetyi Jesus etulongesa tulinge.

13. Oñgeni okukala nombembwa na vakuetu tyikuatesako okulikuata okapandi?

¹³ Tyina tuevela vakuetu, tukala nombembwa novakuatate vetu no nomphange. Apostolu Paulu wapopile okuti tuna okulinga ononkhono mbokutualako okulikuata okapandi nokukala nombembwa pokati ketu. (Efésios 4:3) Ngotyo, momuvo Wehinangelo, haunene monthiki Yehinangelo, sokolola unene onkhalelo utekula vakuenyi. Lipula okuti: ‘Okuti ovanthu vetyimona okuti hapakele onkhongo nomunthu wandinga otyipuka otyivi? Ovanthu vamona okuti ndyikahi nokulinga ononkhono mbokukala nombembwa nokulikuata okapandi?’ Tyakolela unene okusoka konthele yotyo.

14. Oñgeni tupondola okulekesa okuti “tulikoleleya kese umwe na mukuavo nohole”?

¹⁴ Oipi onkhalelo ya kuana ipondola okukuatesako ovanthu va Huku okulikuata okapandi? Oputyina tuhetekela Jeova okukala nohole na vakuetu. (1 João 4:8) Onthwe katupondola okupopia okuti: “Ame ndyina okukala nombembwa novakuatate vange, mahi ame hesukile okukala epanga liavo.” Inkha tusoka ngotyo, katukahi nokulandula elondolo lia Paulu liokuati tuna “okulikoleleya kese umwe na mukuavo nohole.” (Efésios 4:2) Tala okuti Paulu kapopile okuti onthwe tuesukisa ‘okulikoleleya vala kese umwe na mukuavo,’ mahi wapopia okuti tuna okutyilinga “nohole.” Ovipuka ovio vielikalela unene. Momawaneno etu, muna ovanthu ovanyingi velikalaila iya Jeova wevekokela kwe. (João 6:44) Otyo tyilekesa okuti Jeova una omahunga omanyingi omawa okukala nohole navo. Inkha ovakuatate vetu no nomphange vatokala ohole ya Huku, oñgeni tupondola okupopia okuti kavatokalele ohole yetu? Tuna okukala nohole navo monkhalelo Jeova ahanda tutyilinge.—1 João 4:20, 21.

ONALUPI MAKUKAKALA EHINANGELO LIAHULILILAKO?

15. Oñgeni tutyii okuti makukakala Ehinangelo liahulililako?

¹⁵ Nthiki imwe, matulingi Ehinangelo liahulililako. Oñgeni tutyii? Apostolu Paulu wapopila Ovakristau ovalembulwa okuti tyina vahinangela ononkhia mba Jesus kese nima, ‘vekahi nokupopia ononkhia mba Tatekulu alo eya.’ (1 Coríntios 11:26) Jesus tupu wapopile konthele “yokuya” kwae meulo liae liapopia onthyulilo. Mokupopia konthele yononkhumbi onene mambuya apa katutu, Jesus wati: “Enyingilikilo Liomona womulume malikamoneka meulu, iya omihoko aviho kombanda yohi, mavekeliveta, nokuliyavela, iya mavakamona Omona womulume ukahi nokuya komakaka o keulu, nepondolo nenkhimano enene. Iya makatuma onoandyu mbae nondaka onene yonkhuino iya ambukaongiya vana vaholovonwa konomphepo ononkhuana, okuhimbikila konthele imwe yeulu alo konthele onkhuavo yeulu.” (Mateus 24:29-31) Jesus meya “okuongiya vana vaholovonwa” tyina ameya okupola Ovakristau ovalembulwa nkhele veli pano pohi opo vende keulu. Otyo matyikamoneka mokueenda kuononkhumbi ononene, mahi tyina nkhele ovilwa vio Armagedom vihenehimbike. Movilwa ovio, Jesus novo 144.000, mavakalwa novatumini va pano pohi iya afindi. (Apocalipse 17:12-14) Ehinangelo liahulililako malikalingwa tyina Jesus “eheneye” okutyindapo ovalembulwa vahulililako.

16. Omokonda yatyi ove watokolela okuenda Kehinangelo enima lino?

¹⁶ Tokola okuenda Kehinangelo monthiki 31 ya Março yo 2018. Ita Jeova ekukuateseko okulinga onthele yove opo ovanthu vae vatualeko tyelikuata okapandi. (Tanga Salmo 133:1.) Nthiki imwe, matuende Kehinangelo liahulililako. Mahi tyina nkhele onthiki oyo ihenehike-po, tulekesei okuti ewaneko tuna kese nima Mehinangelo liakolela unene.