Oñgeni Ononkhia Mba Sesusi Mbuyovola Ovanthu Ovanyingi-Nyingi?
Etyi Ombimbiliya Ipopia
Huku wayovola ovanthu konkhali no kononkhia etyi ayeka omona wae Sesusi aipawe. Ombimbiliya ipopia okuti ohonde ya Sesusi oyo yafeta ononkhali mbetu. (Ova Efesu 1:7; 1 Petulu 1:18, 19) Otyo Sesusi apopilile okuti weya pano pohi “opo ayovole ovanthu ovanyingi.” — Mateusi 20:28.
Oityi “ovanthu ovanyingi” vesukisila okuyovolwa?
Omunthu wotete Andau, ankho watungwa tyehena onkhali. Ine wetavelele ku Huku ñgeno kankhile. (Gênesis 3:17-19) Ovana vae, navo evetambulisa onkhali. (Ova Loma 5:12) Otyo Ombimbiliya ipopila okuti Andau welilandesa, tupu alandesa ovana vae konkhali no kononkhia. (Ova Loma 7:14) Mokonda ovana va Andau aveho ovakwankhali, petupu ou utyivila okuyovola mukwavo. — Salmo 49:7, 8.
Huku akala nokankhenda novana va Andau, mokonda vetupu etyi mavalingi. (Suau 3:16) Mokonda Huku uhole etyi tyaviuka, ankho kapondola vala okuevela ovana va Andau, apahalingwa natyike. (Salmo 89:14; Ova Loma 3:23-26) Mokonda Huku uhole ovanthu, alingi otyipuka tyimwe matyivekuatesako okuevelwa ononkhali mbavo, opo komutwe wandyila vakakale umwe tyehena onkhali. (Ova Loma 5:6-8) Otyipuka tyatyo Huku alinga okwatuma omona wae ankhie opo etuyovole.
Oñgeni otyilikutila tyokuyovola tyifetwa?
Ombimbiliya tyina ipopia “okuyovola,” palingwa ovipuka vitatu:
Okufeta. — Números 3:46, 47.
Okuyovola. — Êxodo 21:30.
Okufeta etyi tyata mwetyi tyanyonwa.a
Pahe tutalei oñgeni ovipuka ovio vitatu vielifwa notyilikutila tya Sesusi.
Okufeta. Ombimbiliya ipopia okuti Ovakilisitau “valandwa, vafetelwa.” (1 Ova Kolindu 6:20; 7:23) Tyafetwa-po ohonde ya Sesusi, ‘walandela Huku ovanthu nohonde yae momihoko aviho, no momalaka aeho no movanthu vovilongo aviho.’ — Eholololo 5:8, 9.
Okuyovola. Ononkhia mba Sesusi “mbayovola” ovanthu konkhali. — 1 Ova Kolindu 1:30; Ova Kolosu 1:14; Ova Hebeleu 9:15.
Etyi tyata-mo. Omwenyo Sesusi aava wata umwe momwenyo Andau avombesa, omwenyo wehena nkhali. (1 Ova Kolindu 15:21, 22, 45, 46) Ombimbiliya yati: “Mokonda yomunthu wike vala uhetavelele [Andau] ovanthu ovanyingi vakala ovakuankhali, tupu mokonda yomunthu wike vala wetavela [Sesusi Kilisitu], ovanthu ovanyingi mavakala ovaviuki.” (Ova Loma 5:19) Onondaka ombo mbupopia umwe nawa okuti kombanda yomunthu wike vala wankhia, ovanthu ovanyingi ovakwankhali mavayolwa. Naina etyi Sesusi alinga tyata-mo umwe. Ovanthu aveho valinga etyi Huku ahanda, mavakamona oviwa vituka kuetyi Sesusi alinga. — 1 Timotiu 2:5, 6.
a Momalaka Ombimbiliya yahonekwa tete, ondaka “ofeto” otyetyi omunthu afeta opo ayovole tyae tyakwatwa. Ondaka yo Hembeleu kaphar, ipopia “okupata.” (Gênesis 6:14) Haunene ipopia okupata onkhali. (Salmo 65:3) Pahe ondaka kopher ipopia etyi tyifetwa opo tyipate etyi onkhali yaeta. (Êxodo 21:30) Ondaka yo Ngeleku lytron, ipopia “okuyovola,” tupu ipopia “ofeto yeyovo.” (Mateus 20:28) Ova Ngeleku vamwe vokuahoneka omikanda vapopia ondaka oyo opo vapopie etyi tyifetelwa omunthu wakuatwa movilwa, nokufetela omupika opo ayovoke.