Ahabw’Enki Nituza omu Nteerane Empango?

Ahabw’enki abantu aba bashemereirwe? N’ahabw’okuba bari omu rumwe aha nteerane zaitu empango. Nk’abaheereza ba Ruhanga aba ira abaabaire nibaragiirwa kugira enteerane empango emirundi eshatu omu mwaka, naitwe nituba twine ekihika kuba omu nteerane nk’ezo. (Eky’Ebiragiro 16:16) Buri mwaka nitugira enteerane empango ishatu ezi: Ibiri ez’ekiro kimwe hamwe n’orw’ebiro bishatu. Enteerane ezi nizitugasira zita?

Nizihamya omukago gwaitu nk’ab’eishe-emwe. Nk’oku Abaisraeli baabaire bakunda kuhimbisiza Yehova “omu iteeraniro rihango ry’abantu,” naitwe nitukunda kumuramiza hamwe omu nteerane empango. (Zaaburi 26:12, 111:1) Enteerane ezi nizitubaasisa kuba n’Abajurizi ba Yehova bagyenzi baitu kuruga omu bibiina ebindi nari omu mahanga agandi. Omu bwire bwa kyamushana niturya hamwe, kitubaasisa kumanyana n’okwombekana omu by’omwoyo. (Ebyakozirwe 2:42) Omu nteerane ezi nitwereebera oku “ab’eishe-emwe” omu nsi barikukwatanisa ahabwa rukundo.—1 Petero 2:17.

Nizituhwera kweyongyera kukura omu by’omwoyo. Abaisraeli bakaba bagasirwa “ahabw’okushoborokyerwa ebigambo” by’ebyahandiikirwe ebi baabaire babashoboororera. (Nehemia 8:8, 12) Naitwe nitusiima obuhabuzi kuruga omu Baibuli obu turikuheebwa omu nteerane zaitu empango. Buri mutwe gw’oruteerane nigwihwa omu Byahandiikirwe. Kurabira omu by’okureeberaho n’embazo ezirikuheebwa omu nteerane ezi, nitwega oku turikubaasa kukora ebi Ruhanga akunda. Ku turikuhurira ebirikukwata aha Bakristaayo ababaasize kwemera oburemeezi omu biro ebi ebigumire, nitugarukwamu amaani. Emizaano eyihirwe omu Baibuli erikubaho omu nteerane empango ez’ebiro bishatu neetuhwera kwetegyereza gye oku ebi turikushoma omu Baibuli byabaireho. Aha nteerane ezi, abo abarikwenda kworeka ku beehaireyo ahari Ruhanga nibabatizibwa.

• Ahabw’enki enteerane empango nizireeta okushemererwa?

• Noobaasa kugasirwa ota waaza omu ruteerane oruhango?