Obuhame bw’Okwikiriza Kuhamire!
1. Yesu akaranga bintu ki ebirikutiinisa ebyabaire nibiija kubaho?
1 Entumwa zikahurikiza gye obu Yesu yaabaire naagamba aha kubaho kwe omu bukama hamwe n’aha kuhwaho kw’obusingye obu. Ebintu ebirikutiinisa bikaba nibiza kuhika aha bantu—entaro, eibura ry’eby’okurya, emitsitsa, endwara z’amaani. Ekindi, Yesu akagira ngu abakuratsi be bakaba nibaija kwangwa, babonabonesibwe kandi baitwe. Hakaba nihaija kwimukaho baanabi b’ebishuba kandi bahabise abantu baingi. Okukunda kwa baingi kukaba nikwija kuhora.
2. Ahabw’enki nikitangaaza okureeba amakuru marungi nigabuurirwa omu nsi yoona?
2 Kurugiirira aha bintu ebyo, nikibaasa kuba kyatangaarize entumwa, Yesu ku yaagizire ngu amakuru marungi g’Obukama bwa Ruhanga gakaba nigaija kubuurirwa omu nsi yoona. (Mat. 24:3-14) Hati nitureeba okuhikiirira kw’obunabi obwo. N’obu turaabe tutwire omu bwire bubi, Abajurizi ba Yehova nibabuurira amakuru marungi n’omujinya. N’obu okukunda kw’ab’ensi kuraabe nikuhora, okwaitu nikweyongyera kukanya. N’obu turaabe nitwangwa “amahanga goona,” nitubuurira haihi omuri buri ihanga.
3. Ni mibaro ki ei orikureeba omuri ripoota y’ensi yoona erikugaruramu amaani?
3 Ka nikigaruramu amaani kweijutsya aha murimo gw’Abajurizi ba Yehova ogw’omwaka gw’obuheereza oguhweire nk’oku gurikworekwa aha rupapura 3 kuhika aha rwa 6! Okumara emyaka 16 ekurataine, abajurizi ba Yehova batwire nibabuurira eshaaha ezirikurenga omu bukaikuru rukumi buri mwaka omu murimo gw’okubuurira n’okuhindura abantu abeegi. Obu n’obuhame ngu abajurizi ba Yehova baine okwikiriza kuhamire! Baapayoniya beyongyeireho obucweka 5.8 ahari igana, ababuurizi, obucweka 3.1 ahari igana kandi abarikwega Baibuli beyongyeireho obucweka 4.4 ahari igana. Abarikubatizibwa beyongyeireho obucweka 20.1 ahari igana omu mwaka ogw’obuheereza oguhweire. Nikishemeza okureeba ngu haihi abantu obukaikuru mushanju bariyo nibaheereza Yehova n’obwesigwa—omubaro ogurikukirira kimwe ogw’abaheereza be abaarabaireho omu byafaayo by’omuntu! Ku waashoma ebiri aha rupapura 3 kuhika aha rwa 6, niki ekyakira kukugaruramu amaani?
4. Ni buremeezi ki obu omushaija omwe yaasingwire obu yaabaire naakora empindahinduka kubaasa kubatizibwa?
4 N’obu emibaro egyo eraabe neetangaaza, titushemereire kwebwa ngu neeyoreka abantu aboorekire ngu baine okwikiriza kuhamire. Teekateeka aha ky’okureeberaho kimwe. Guillermo akakurira omuri Bolivia. Akazaarwa omu gwa 1935, yaakora omu ishamba rya coca aine emyaka mwenda. Kuruga omu buto, akaba naarya amababi ga coca okubaasa kweyebesa enaku ei yaabaire aine ahabw’okukora emirimo y’amaani. Bwanyima akaba omusinzi ahabw’okunywa amaarwa maingi kandi yaareetsa n’etaabe. Guillermo ku yaatandikire kwega ebi Yehova arikumwenza, yaareka okureetsa n’okukoresa kubi amaarwa. Oburemeezi obw’amaani obu yaatungire n’okureka omuze gwe ogwa ira ogw’okurya amababi ga coca. Akaguma naashaba butoosha, yaabaasa kucwa omuze ogwo. Bwanyima y’okucwa emize ye, akabatizibwa. Naagira ati: “Hati nimpurira nyezire kandi nshemereirwe.”
5. Iwe oine kyetengo ki?
5 Yehova buzima naata omutima aha bantu. Naayenda ngu abantu boona beeteise. (2 Pet. 3:9) Naitwe nikyo kyetengo kyaitu. Ka tuteereho kukora kyona eki turikubaasa, kugumizamu nituhwera ab’emitima egororokire kuhika aha kumanya n’okukunda Yehova nkaitwe.