Enteerane Empango ez’Ebiro Bishatu —n’Obwire bw’Okuramya Okurimu Okushemererwa
1. Obugyenyi bw’Abaisreali obw’okuhingurwaho nibushushana buta n’enteerane zaitu empango ez’ebiro bishatu?
1 Yosefu, Mariamu, abaana baabo hamwe n’abandi buri mwaka bakaba baza Yerusaalemu aha bugyenyi bw’okuhingurwaho. Omu bwire obwo, bo hamwe n’abaramya abandi bakaba bateeraho kwehuzya oburemeezi obu baabaire baaba baine reero bata omutima aha by’omwoyo ebyabaire nibikwata aha magara gaabo. Obugyenyi obwo bukaba bubabaasisa kutunga obwire bw’okugamba n’okuteekateeka munonga aha burungi bwa Yehova n’okwegyesibwa Ebiragiro bye. Oruteerane rwaitu oruhango orw’ebiro bishatu nirwija kutubaasisa kutunga omugisha nk’ogwo ogw’okuramya Yehova n’okushemererwa.
2. Tushemereire kukora ki okubaasa kwetebeekanisiza oruteerane oruhango orw’ebiro bishatu orurikwija kubaho?
2 Okwetebeekanisa Gye Nikwetengyesa: Okugyenda kuruga Nazareesi kukaba nikwetengyesa ngu ab’omu ka ei Yesu yaabaire arimu bagyende orugyendo rwa mailo 60. N’obu turaabe tutarikumanya omubaro gwa barumuna ba Yesu na banyaanya, beitu nitubaasa kuhamya ngu Yosefu na Mariamu bakaba baine kukoresa amaani kandi bakeetebeekanisa gye. Waakozire entebeekanisa ezirikwetengyesa kubaasa kuba omu ruteerane oruhango ebiro bishatu byona? Eki nikibaasa kukwetengyesa kutunga akahuumuro kuruga aha murimo nari kugamba n’ou orikukorera nari n’omushomesa w’abaana baawe kubaasa kuheebwa obwire bw’okuba omu ruteerane orwo. Ku oraabe noija kwetenga oburaaro waabusherweire? Noobaasa kuteeraho kuhwera omuntu omwe omu kibiina orikwetenga obuhwezi kuza omu ruteerane orwo oruhango?—1 Yoh. 3:17, 18.
3. Obugyenyi bw’Abaisreali bukaba bubabaasisa buta kwombekana?
3 Okwombekana omu by’Omwoyo: Obugyenyi bw’Ekiyudaaya bukaba bubabaasisa kutunga omugisha gw’okuba hamwe n’abaramya bagyenzi baabo kandi n’okwombekana. Ab’omuka ei Yesu yaabaire naarugamu buzima bakaba baaba baine ekihika ky’okugaruka kuba hamwe n’abanywani baabo. Kandi bakaba bagira omugisha gw’okutunga abanywani abasya baingi omu Bayudaaya hamwe n’omuri abo abaahindukire bakaza omu diini y’Ekiyudaaya abaabaire baaba bariyo nari omu baabaire baaba nibaza Yerusaalemu nari nibarugayo.
4. Nitubaasa kworeka tuta ngu nitusiima obumwe bwaitu bw’Ekikristaayo?
4 Enshonga emwe ahabw’enki omwambari orikwesigwa kandi ow’obwengye arikutebeekanisa kugira ngu tubaase kuba hamwe kuhuurira embazo aha ruteerane oruhango orw’ebiro bishatu omu mwanya gw’okuta ebi turikwega aha nteerane ezo omu bitabo, n’ahabw’okwenda ngu tugumyane. (Heb. 10:24, 25) N’ahabw’ekyo, kora entebeekanisa buri izooba kuguma noohika kare omu ruteerane orwo kubaasa kugaaniira n’ab’eishe-emwe, ceeyamaani atakaanjwire obweshongoro oburikubanza kutumanyisa ngu tushemereire kushutama. Omu mwanya gw’okuruga omu mwanya gw’oruteerane omu bwire bwa kyamushana kuza kusherura eky’okurya, nituhigwa kwija n’eby’okurya byaitu kandi tukaguma omu mwanya gw’oruteerane kugira ngu tubaase kugaaniira n’abaija aha ruteerane orwo. Obumwe bwaitu bw’Ekikristaayo n’ekiconco kuruga ahari Yehova eki tushemereire kusiima.—Mik. 2:12.
5. Niki ekiraije kukuhwera kugasirwa munonga omu puroguramu?
5 Obwire bw’Okwega: Okuruga omu buto, Yesu akaba akoresa omugisha ogw’okuza omu bugyenyi bw’Abaisreali obw’okuhingurwaho kwega ebirikukwata ahari Ishe ow’omu iguru. (Luk. 2:41-49) Niki ekiraije kutuhwera n’amaka gaitu kugasirwa omu mbazo eziraaheebwe? Baaba nibaha embazo, guma oshutami kandi oyetantare kugamba kyaba kitarikwetengyesa. Hamya ngu esimu yaawe terikwija kukuteganisa hamwe n’abandi. Hamya omugambi amaisho kandi ogire ebi waahandiika. Ni kirungi okushutama hamwe nk’eka okuhamya ngu abaana baanyu nabo bariyo bahurikiize gye. Omu mwabazyo muteereho kugaaniira aha byabashemeza.
6. Tushemereire kuguma nitwijuka ki aha bikwatiraine n’enjwara n’endeebeka yaitu?
6 Eby’Enjwara Hamwe n’Endeebeka: Abashuubuzi abaabaire baaba nibaraba omu ruguuto bakaba barahuka kumanya ab’omu ka ei Yesu yaabaire naarugamu hamwe n’abaramya abandi Abayudaaya abaabaire baaba nibaza aha bugyenyi nari nibarugayo ahabw’okuba bakaba baaba bajwire emyenda eriho ebijwengye aha mikugiro yaayo kandi aharuguru y’ekijwengye hariho akenda ka bururu. (Kub. 15:37-41) N’obu Abakristaayo baraabe bataine kujwara emyenda y’omutaano, nitumanywa nk’abantu abarikujwara gye n’okuba abecumi. Tushemereire kuta omutima aha ndeebeka yaitu twaba nituza aha ruteerane nari niturugayo nari turi omu tauni ei oruteerane orwo ruri. N’obu twakuhindura ebijwaro bwanyima ya puroguramu, tushemereire kuguma tujwire gye kandi tukajwara zaabaagi zaitu. Twakora tutyo nitwija kutaana aha batari Bajurizi ba Yehova kandi tuhe ekishushani kirungi abarikutureeba.
7. Ahabw’enki tushemereire kuteekateeka aha kuhwera omu ruteerane oruhango?
7 Abahwezi Nibetengwa: Oruteerane orwo okubaasa kugyenda gye, abakozi baingi nibetengwa. Noobaasa kwehayo kuhwera? (Zab. 110:3) Emirimo erikukorwa aha nteerane empango n’ekicweka ky’okuramya kwaitu kandi neereetera abantu kusiima okuramya kwaitu. Omuntu omwe owaabaire naakurira ekyombeko ekyabaire kirimu oruteerane oruhango akatangaara ahabw’abahwezi abaaboneize ekyombeko kandi akahandiika ati: “Niinyenda kubasiima ahabw’omukoro murungi munonga ogwakizire ei ndareebire yoona. Ntwire nimpurira ngu Abajurizi ba Yehova n’abantu b’omutaano abatwire baine eiziina rirungi ahabw’okukira kutsiga ekyombeko eki kicumire gye okukira oku bakishangire. Imwe n’ekibiina kyanyu muhindwire ekyombeko eki omwanya murungi ogu abantu b’omu kicweka eki barikukunda kandi tushemereirwe n’okumanya abantu b’omu kibiina kyanyu ab’emitwarize mirungi.”
8. Ni migisha ki ey’okubuurira ei turikwija kugira omu tauni eziraabemu oruteerane oruhango?
8 Emigisha y’Okubuurira: Baingi abaraabe bari omu tauni ezirikwija kubamu oruteerane orwo nibaija kureeba abagyenyi bajwire gye kandi bajwire na zaabaagi, kandi ekyo nikibaasa kureetera abandi kutubuuza, kituhe omugisha gw’okubagambira ebirikukwata aha ruteerane orwo. Omwojo w’emyaka ena bwanyima ya puroguramu akaza omu hoteeri n’ekitabo eki baabaire baheza kushohoza reero yaakyoreka omukazi omwe owaabaire naaheereza omu hoteeri egyo. Eki kikaha omugisha abazaire b’omwojo okweta omukazi ogwo aha ruteerane.
9. Nitubaasa kutooreza tuta okusiima nk’oku ab’omu ka ei Yesu yaabaire naarugamu baabaire baine ahabw’eby’omwoyo ebi Yehova arikutuha?
9 Obugyenyi bw’Abaisreali bukaba buri obwire bw’okushemererwa, obu Abayudaaya abaabaire nibakunda kwega ahari Yehova baabaire baaba baine ekihika kubamu. (Bir. 16:15) Ab’omu ka ei Yesu yaabaire naarugamu bakaba bashemererwa kwefeerereza bingi okubaasa kububamu bakagasirwa munonga. Naitwe tushemereire kworeka okusiima nk’okwo ahabw’enteerane zaitu empango ez’ebiro bishatu, tukazireeba nk’ekiconco kuruga ahari Tataitwe ow’omu iguru. (Yak. 1:17) Hati nibwo bwire kwetebeekanisiza oruteerane orwo orurikubaho buri mwaka okubaasa kuramya Yehova n’okushemererwa.
[Akabokisi aha rupapura 3 4]
Eby’Okweijutsya Ebirikukwata aha Ruteerane orw’Ebiro Bishatu
◼ Eshaaha za Puroguramu: Puroguramu neija kuba neetandika shaaha 3:20 ez’Omukasheeshe ebiro byona bishatu. Emyanya y’oruteerane neija kuba neigurwa shaaha 2:00 ez’Omukasheeshe. Obweshongoro ku buraatandike, buri omwe ashemereire kutunga ah’okushutama kugira ngu puroguramu etandikye hatabaireho okuteganisibwa. Orwakataano n’Orwamukaaga puroguramu neija kuhendera shaaha 10:55 ez’omu mwabazyo reero aha Sande ehendere shaaha 9:40 ez’omu mwabazyo.
◼ Ah’Okwemereza Ebiiruka: Aha myanya y’Enteerane yoona, ah’okwemereza ebiiruka, abaraabanze kwija nibo barabyemerezeho.
◼ Okukwata Emyanya: Noobaasa kukwatira emyanya abu waija nabo, abu orikutuura nabo nari abu orikwega nabo Baibuli.—1 Kor. 13:5.
◼ Kyamushana: Nooshabwa kwija n’eby’okurya omu mwanya gw’okuza kubisherura ahandi omu shaaha za kyamushana. Noobaasa kureetera eby’okurya byawe omu kintu kikye eki orikubaasa kuta ahansi y’entebe. Ebintu ebihango, ebirikwatika, tibirikwikirizibwa aha mwanya gw’oruteerane.
◼ Okuhayo: Nitubaasa kworeka okusiima kwaitu turikuhayo twekundiire ahabw’entebeekanisa y’enteerane empango ez’ebiro bishatu, twaba turi omu Kyombeko ky’Obukama nari omu nteerane ezo empango. Ceeka ezirikuheebwayo omu nteerane empango, zishemereire kuhandiikwa omu eiziina ry’ekibiina eririkukoresibwa omu eihanga ryanyu.
◼ Zaabutandu: Haabaho orikwetenga obujanjabi obw’ahonaaho aha ruteerane oruhango, hikiirira omwe aha barikwakiira abantu oraahikiirire abarikukora aha by’obujanjabi omu ruteerane kugira ngu abakugu abo babaase kwetegyereza embeera ye kandi bamuhe n’obujanjabi oburikwetengyesa. Abarikukora aha by’obujanjabi obw’ahonaaho nibaija kureeba oku baraatware enshonga egi omumaisho.
◼ Eby’Okujwara omu Bigyere: Buri mwaka ni baingi abarikuhutaara ebigyere ahabw’okujwara enkaito zitashemeire. N’ahabw’ekyo ni kirungi okujwara enkaito ezishemeire kandi ezirikukuhika gye ezirikukubaasisa kugyenda gye aha matembero n’ahandi.
◼ Okukwata eby’Aha Ntambi: Ebintu ebirikukwata eby’aha ntambi eby’omuringo gwona tibishemereire kuteebwa aha mashanyarazi nari aha byoma ebirikukoresibwa omu ruteerane kandi omu kubikoresa tibishemereire kuteganisa abandi.
◼ Eby’Emigaju: Enteerane ezi ezimwe niziba omu byombeko. N’ahabw’ekyo, nikiba kiri kirungi okutakoresa emigaju ey’amaani, erikubaasa kukora kubi abaine oburemeezi omu kwitsya.—1 Kor. 10:24.
◼ Foomu z’Okuhandiikaho Abo Abarikwenda Kwega Baibuli: Foomu Please Follow Up (S-43) eshemereire kukoresibwa kubaasa kuhandiika ebirikukwata aha muntu ogwo owaayoreka ngu naayenda kumanya ebirikukiraho bwanyima y’okumubuurira kitaraariire omu bwire bw’oruteerane. Ababuurizi bashemereire kwija na foomu Please Follow Up (S-43) emwe nari ibiri aha ruteerane. Foomu ezijuziibwe gye nizibaasa kuheebwa abarikukora aha by’Ebitabo nari omuhandiiki w’ekibiina kyawe waaheza kugarukayo.—Reeba Obuheereza Bwaitu obw’Obukama aka Novemba 2009, rup. 4.
◼ Emyanya y’Okuriiramu: Haisa Yehova ekitiinisa orikutwaza gye omu myanya y’okuriiramu. Omu myanya mingi, abantu nibakira kuhayo akasiimo kurugiirira aha buheereza.
◼ Oburaaro: (1) Nooshabwa kutakwatisa ebishengye ebi otaraakorese, kandi otakaarenzya aha mubaro ogurikwikirizibwa kuraara omu kishengye ekyo. (2) Waaba nooyenda kushazamu okushaba kwawe, manyisa aba hoteeri bukiri kare. (3) Waakoresa akagaari k’emigugu kagarure ahonaaho kugira ngu abandi bakakorese. (4) Otakateekyera omu bishengye ebitarikwikirizibwa kuteekyerwamu. (5) Tsigira ogwo orikuboneza ekishengye akasiimo buri eizooba. (6) Otakaatwara eby’okurya ebirengire ahari ebyo ebi oshemereire kutwara ka tugire nka kyantsya n’ebindi ebirikuba biteereirweho abarikuraara omu hoteeri egyo. (7) Obwire bwona yoreka ebyana by’omwoyo orikukoragana gye n’abakozi ba hoteeri. Nibareberera abagyenyi baingi n’ahabw’ekyo nibashemererwa twayoreka embabazi, okugumisiriza n’obwengye. (8) Ku oraatungye oburemeezi omu kishengye omu orikuraara, manyisa abarikukora aha by’Oburaaro mwaba muri aha mwanya gw’oruteerane.
◼ Abahwezi: Okushemererwa oku turikutunga ahabw’okwija omu ruteerane oru nikwija kweyongyera ku turaahwere aha mirimo eraabe eriho. (Byak. 20:35) Ogwo weena orikwenda kuhwera ashemereire kumanyisa abo abarikukora aha by’Okuboneza aha ruteerane oru. Abaana abari ahansi y’emyaka 16 n’abo nibabaasa kwejumba omu murimo ogu ogw’okuboneza barikworekyererwa abazaire baabo nari abandi bantu bakuru abatoorainwe.