‘Amakuru Marungi Aga Nigaija Kubuurirwa’!
1. Nitumanya tuta ngu tihariho ekirikubaasa kuremesa omurimo gw’okubuurira?
1 Buzima tihariho ekirikubaasa kuremesa Yehova kuhikiiriza ekigyendererwa kye. (Isa. 14:24) N’obu Omuramuzi Gideoni n’abashaija be 300 baraabe baabaire bari nk’abatarikubaasa kusingura eihe rya Abamidiani 135,000, Yehova akamugambira ati: ‘Noija kucungura Abaisraeli omu mikono y’Abamidiani. Tiinye naakutuma?’ (Bar. 6:14) Obushagiki bwa Yehova bwine mugasho ki obunaku obu? Yesu akagira ati: ‘Amakuru marungi aga ag’Obukama nigaija kubuurirwa omu nsi yoona.’ (Mat. 24:14) Tihaine n’omwe orikubaasa kuremesa omurimo ogu kuhikiirizibwa!
2. Ahabw’enki turikubaasa kuhamya ngu omu kubuurira,Yehova naija kuhwera buri omwe ahariitwe?
2 Yehova Naahwera Buri Omwe Ahariitwe: N’obu turaabe nituhamya ngu Yehova naija kuhwera Abajurizi be kusingura nk’ekibiina, nitubaasa kugira amatsiko ngu naahwera buri omwe ahariitwe? Omu bwire obu entumwa Paulo yaabaire aine oburemeezi, akereebera oku Yehova yaamuhwereire kurabira omu Mwana we Yesu. (2 Tim. 4:17) Naitwe nitubaasa kuhamya ngu Yehova naija kuhwera buri omwe ahariitwe kukora ebi akunda.—1 Yoh. 5:14.
3. Yehova naatuhwera mu mbeera ki?
3 Ebirikukwerarikiriza buri izooba nibikuhezamu amaani ogu waakukoreise omu kubuurira? ‘Naaha oruhire amaani.’ (Isa. 40:29-31) Nohiiganisibwa nari nohakanisibwa? “Yegyekyera MUKAMA omutwaro gwawe, nawe aryaguma naakukwatirira.” (Zab. 55:22) Obumwe noohurira otarikweyesiga? “Irooko ogyende, ndyaba ndi hamwe n’akanwa kaawe.” (Kur. 4:11, 12) Oine amaani mabi agarikukuremesa kwejumba omu kubuurira nk’oku waakwenzire? Yehova naasiima ebi orikukora n’omutima gwawe gwona n’obu byakuba biri bikye.—1 Kor. 3:6, 9.
4. Okwesiga Yehova nikiija kutureetera kukora ki?
4 Omukono gwa Yehova “ku guraabe gubangire, n’oha origuhinya?” (Isa. 14:27) Twine amatsiko g’okutunga emigisha ya Yehova omu kubuurira kwaitu, ka tuteereho kubuurira ‘n’obumanzi, turikuhwerwa Yehova.’—Byak. 14:3.