Obunushu Bubiri bw’Omuhendo Mukye

Omuringo mukuru ogu turikushagikamu eby’Obukama n’okuhayo ahabw’omurimo gw’okubuurira omu nsi yoona. Kandi shi ku twakuba twine entaasya nkye?

Eizooba rimwe Yesu akareeba omufaakazi arikuta obunushu bubiri omu ibiikiro ry’omu hekalu. Ahabw’okukunda Yehova ‘akatamu ebi yaabaire aine byona, kandi eitungo rye heza.’ (Mak. 12:41-44) Ahabw’okugira ngu Yesu akamugambaho, nikyoreka ngu okuhayo kwe kukaba kuri okw’omuhendo ahari Ruhanga. Abakristaayo b’omu kyasha ky’okubanza okuhayo nabo bakaba nibakutwara nk’ekintu kikuru. Boona abagaiga n’abooro bakaba bahayo nk’oku barikubaasa. Entumwa Paulo akagamba aha Baamakedonia ngu n’obu baraabe baabaire bari ‘abooro munonga, bakagaba bingi munonga nk’abatungi . . . beekundiire nk’oku baabaasize.’—2 Kor. 8:1-4.

N’ahabw’ekyo, twaba nitubaasa kuhayo ebiri ‘nk’obunushu bubiri’ obwo, twijukye ngu bikye ebi turikuhayo byona hamwe nibirugamu bingi. Twahayo twekundiire, ekyo nikishemeza Tataitwe ow’omu iguru ahakuba “Ruhanga akunda efura.”—2 Kor. 9:7.