Oku Turikubaasa Kugasirwa omu Kweshomesa
1. Okweshomesa n’okuteekateeka nibitugasira bita?
1 Okweshomesa n’okuteekateeka aha bi turikushoma nibitugasira munonga ‘twataho omutima.’ (Heb. 2:1) Twashoma kandi tukateekateeka munonga aha biri omu Baibuli n’ebitabo by’ekibiina, nikiija kutuhwera kuta omu biteekateeko byaitu amazima agari omu Kigambo kya Ruhanga. Eki nikiija kutuhwera omu miteekateekyere yaitu, omu mitwarize yaitu n’okukunda kukora ebi Ruhanga akunda. (Zab. 1:2; 40:8) N’ahabw’ekyo, nitwetenga kwemanyiiza kuta omutima aha bi turikushoma kugira ngu tubaase kubigasirwamu. Kwonka nihabaasa kugira ebyatuhuzya. Ebintu ebimwe nk’esimu nari orwari nibibaasa kutuhuzya. Nari nitubaasa kutandika kushoma tutaireho omutima, kwonka bwanyima y’akaanya kakye hagire ekyatuhuzya. Mbwenu shi nitubaasa ‘kutaho omutima’ tuta twaba nitweshomesa Ekigambo kya Ruhanga?
2. (a) Ahabw’enki ni kikuru kugira obwire bw’okweshomesa? (b) Otebeekaniise ota kutunga obwire bw’okushoma Ekigambo kya Ruhanga?
2 Ni kikuru okukora entebeekanisa n’okugira omwanya murungi gw’okushomeramu. Baingi ahariitwe tikirikutworobera kutunga omwanya gwehereire n’obwire bw’okweshomesa. Emirimo mingi eya buri izooba neebaasa kutubuza akahuumuro tube nk’akataagi akari omu maizi garikwiruka. Buzima nitwetenga kurwanisa embeera nk’egyo kubaasa kutunga obwire bw’okwehereera kweshomesa. Titushemereire kuteekateeka ngu eby’okukora nibiija kuhwa reero tutungye obwire. Tushemereire kuteeraho munonga tukataho obwire bw’okweshomesa. (Efe. 5:15, 16) Abamwe nibashoma omu kasheeshe obu harikuba hatariho ebirikubahuzya bingi. Kandi abandi omwabazyo nigwo gurikubabeera murungi. Ekikuru kiri ngu titwine kwehuzya ekyetengo kikuru eky’okutunga okumanya okuhikire okurikukwata ahari Ruhanga n’Omwana we. (Yoh. 17:3) N’ahabw’ekyo ka tuteereho kukora entebeekanisa y’okweshomesa kandi tugikuratire.
3. Okuteekateeka munonga nikutugasira kuta?
3 Okuteekateeka munonga aha bi twegire turikweshomesa, ni kikuru munonga. Nikutuhwera kwiha emisingye ya Ruhanga omu bihandiikire tukagita omu mitima yaitu. Kandi nikutuhwera kugyendera aha buhabuzi bwa Baibuli kugira ngu tube “abarikworobera Ekigambo, beitu ti kukihurira kwonka.” (Yak. 1:22-25) Okuteekateeka munonga nikutuhwera kweyongyera kwirira haihi Yehova, ahakuba nikutubaasisa kuteekateeka aha mitwarize ye n’oku erikugambwaho omu bi turikuba nitushoma.
4. Okubaasa kuteekateeka aha bi twegire twine kukora ki?
4 Kubaasa kugasirwa omu kweshomesa, twine kuta ebiteekateeko byaitu aha bi turiyo nitushoma. Kubaasa kuta ebintu bisya omu biteekateeko byaitu, titwine kwikiriza ebirikukira kuhuzya abantu kutuhuzya. Ekyo nikyetengyesa obwire n’okwehereera, kwonka nikigaruramu amaani ahakuba nituba nitugasirwa omu by’okurya eby’omwoyo n’amaizi g’amazima agari omu Kigambo kya Ruhanga.
5. (a) Niki ekihwereire abamwe kwongyera kuta omutima aha bi barikushoma? (b) Twine kugira miteekateekyere ki aha kweshomesa, kandi ekyo nikirugamu birungi ki?
5 Kandi shi ku twakuba nituta omutima aha bi turikushoma kumara akiire kakye reero tukahuga? Abamwe babaasize kwongyera kuta omutima aha bi barikushoma barikutandika n’obwire bugufu bw’okweshomesa reero bakaguma nibabwongyeraho. Ekigyendererwa kyaitu kishemereire kuba okwetegyereza ebi turikushoma beitu kutari kurahukiiriza kubiheza. Tushemereire kukunda ebi turiyo nitushoma. Kandi nitubaasa kwongyera kucondooza turikukoresa ebitabo ebi omwambari orikwesigwa kandi ow’obwengye arikutuha. Nikigasha munonga kuta omutima aha ‘bintu bya Ruhanga ebitoorobi kumanywa.’ (1 Kor. 2:10) Okukora ekyo nikituhwera kwongyera kumanya Ruhanga n’aha kubaasa kwaitu okw’okwetegyereza. (Heb. 5:14) Twaba nitweshomesa Ekigambo kya Ruhanga n’obweziriki, nikiija ‘kutubaasisa kwegyesa abandi.’—2 Tim. 2:2.