Hwera Abatakahikire Kwega Akatabo Eki Baibuli Erikwegyesa
1. Akatabo Eki Baibuli Erikwegyesa nikashemeza buri muntu omu kubanza? Shoboorora.
1 Omuntu kubaasa kuba omuheereza wa Yehova, aine kwega eki Baibuli erikwegyesa. Kwonka, bamwe nibaba bari omu diini etarikwikiririza muri Kristo kandi batarikutwara Baibuli nk’Ekigambo kya Ruhanga. Abandi tibarikwikiririza muri Ruhanga nakakye kandi Baibuli tibarikugiha kitiinisa. Ni bitabo ki ebirikuhwera abo abatarikukira kukunda akatabo Eki Baibuli Erikwegyesa omu kubanza? Ebiri ahaifo n’ebigambirwe ababuurizi kuruga omu mahanga nka 20.
2. Omuntu yagira ngu tarikwikiririza muri Ruhanga, niki ekitushemereire kuteeraho kumanya kandi ahabw’enki?
2 Abatarikwikiririza Muri Ruhanga: Omuntu yagira ngu tarikwikiririza muri Ruhanga, nikiba kiri kirungi kumanya ahabw’enki. Mbwenu shi naikiriza ngu ebintu bikabaho nibiruga omu bindi? Takikiririza muri Ruhanga ahabw’okugira ngu hariho obutariburinganiza omu nsi nari ahabw’oburyarya oburi omu diini? Naaruga omu ihanga eririkuhakanisa okwikiririza omuri Ruhanga? Naabaasa kuba naamanya ngu Ruhanga ariho, kwonka atakateekateekaga ngu ni kikuru kumwikiririzamu. Ababuurizi abaingi bashangire ngu ku barikubuuza ekibuuzo, “Niyo nteekateeka ei otwire oine?” nikihiga omuntu kushoboorora. Ohurikize gye yaaba nashoboorora. Twamanya ahabw’enki omuntu atarikwikiririza muri Ruhanga, nitwija kumanya oku turaamugarukyemu hamwe n’ekitabo ekituraamuhe.—Enf. 18:13.
3. Nitubaasa kworeka tuta ngu nituha ou turikubuurira ekitiinisa hamwe n’ebi arikwikiriza?
3 Waaba oine ou orikugarukamu, yetantare kumureetera kuteekateeka ngu noohakanisa enteekateeka ye. Obu n’obuhabuzi kuruga omuri United States: “Ni kikuru kumanya ngu abantu baine obugabe kucwamu ebi baine kwikiriza.” Omu mwanya gw’okuhakana n’abantu, ni kirungi kukoresa ebibuuzo ebiraabahwere kuteekateeka kandi baaketegyereza.” Bwanyima y’okuhurikiza ou arikubuurira, omureeberezi orikutaayaayira ebibiina nakira kugarukamu arikukoresa ekibuuzo eki, “Oraakiteekateekireho oti?”
4. Nitubaasa kuhwera tuta Abarikwikiririza omuri Buddha?
4 Abarikwikiririza omuri Buddha tibarikumanya ngu Ruhanga ariho. Ababuurizi abamwe omuri Bungyereza nibakira kukoresa akatabo Lasting Peace and Happiness—How to Find Them baba nibabuurira abantu nkabo. Bwanyima y’okuraba omu birikwanjura akatabo, nibahikaanisa ebiteekateeko aha kicweka “Kwonka shi Buzima Hariho Owaahangire Ebintu Byona?” n’ekicweka “Ekitabo Ekirikuhwera Abantu Boona Kutunga Emigisha.” Bwanyima, nibabaasa kumuha akatabo Eki Baibuli Erikwegyesa kandi bamugire ngu, “n’obu oraabe otarikwikiririza muri Ruhanga, okwega Baibuli nikiija kukugasira ahabw’okuba obuhabuzi oburimu nibwija kukuhwera.” Payoniya ori omu United States orikuheereza omu kicweka ekirimu Abachaina akagira ati: “Abantu baingi omu kicweka kyaitu nibakunda kushoma. N’ahabw’ekyo twaza kugarukayo nitushanga baashomire akatabo koona. Kwonka tibarikwetegyereza ntebeekanisa y’okwega Baibuli. N’ahabw’ekyo nimbaha akatabo Amakuru Marungi aha murundi gw’okubanza ahabw’okuba katebeekanisiibwe omu muringo ogurikuhiga abantu kuhikaanisa ebiteekateeko.” Omureeberezi orikutaayaayira ebibiina omu kicweka ahu ebibiina birikukoresa orurimi rw’Abachaina omuri United States akagira ngu nikibaasika kugaba akatabo Eki Baibuli Erikwegyesa aha murundi gw’okubanza. Kwonka nikiba kiri kirungi kutandikira omu shuura 2, erikushoboorora ebirikukwata aha Baibuli, beitu kutari kutandikira aha shuura y’okubanza 1, erikushoboorora ebirikukwata ahari Ruhanga.
5. Ahabw’enki ni kikuru kugira okugumisiriza?
5 Nikitwara obwire omuntu kubaasa kwikiririza omuri Ruhanga, n’ahabw’ekyo ni kirungi kugira okugumisiriza. Okugaaniira n’omuntu omurundi gw’okubanza nikibaasa kutamureetera kwikiriza ngu hariho Omuhangi. Kwonka waaguma noogaaniira nawe kumara obwire buraingwa, naabaasa kwikiriza ngu ariho nari ayetegyereza ahabw’enki abandi nibagira ngu Ruhanga ariho.
6. Niki ekirikureetera abamwe bataikiiririza mu Baibuli?
6 Abatarikwesiga Ebiri omu Baibuli: Obumwe omuntu orikumanya ngu Ruhanga ariho naabaasa kutafayo aha bi Baibuli erikwegyesa ahabw’okugira ngu tarikwikiriza ngu n’Ekigambo kya Ruhanga. Obundi naabaasa kuba naatuura omu ihanga ei batarikwikiririza muri Kristo kandi barikutwara Baibuli nk’eya Kristendomu. Nari naatuura omu ihanga ei barikwikiririza omuri Kristo, kwonka batarikufayo aha diini, ekyo kimureeteere kuteekateeka ngu Baibuli terikubaasa kumugasira. Abantu nk’abo nitubaasa kubahwera tuta kwikiririza omu Baibuli kandi bakahika aha kwikiriza kwega akatabo Eki Baibuli Erikwegyesa?
7. Ni muringo ki murungi ogurikubaasa kureetera abantu bakunda kwega Baibuli?
7 Ofiisi y’eitaagi omuri Greece ekahandiika eti: “Omuringo murungi gw’okuhweramu abatarikwikiririza mu Baibuli n’okugishuuruura tukabooreka ebirimu. Ababuurizi baingi beetegyereize ngu ebiri omu Baibuli nibikwata munonga aha mutima gw’omuntu okukira ebigambo byabo. (Heb. 4:12) Okureeba eiziina rya Ruhanga omu Baibuli kihwereire baingi kugira ekyetengo ky’okugishoma.” Ofiisi y’eitaagi omuri India ekahandiika eti: “Abahindu abaingi nibakunda kuhurira amazima agarikukwata aha magara, okufa, hamwe n’ekiraganiso ky’omu Baibuli eky’ensi etarimu kushoroora omu bantu.” Ababuurizi nibakoresa oburemeezi oburikuba buri omu kicweka kworeka abantu eki Baibuli erikugamba aha ku Obukama bwa Ruhanga buraije kubumaraho.
8. Nitubaasa kugambira ki abo abaine emiteekateekyere mibi ahari Baibuli ahabwa Kristendomu?
8 Omuntu yaaba aine emiteekateekyere egwire ahari Baibuli aha bwa Kristendomu, muhwere kumanya ngu Kristendomu neekoresa kubi Baibuli hamwe n’enyegyesa zaayo. Ofiisi y’eitaagi omuri India ekahandiika eti: “Obumwe ni kikuru kuhwera abantu kumanya ngu Baibuli teraakwatsiibwe amakanisa.” Bakagira ngu Abahindu nibakunda ekicweka 4 omu katabo What Is the Purpose of Life? How Can You Find It?, ekirikushoboorora oku amakanisa gaasiisire hamwe n’oku bahindwire Baibuli. Payoniya omuri Brazil naahiga abantu ati: “Ni kirungi kwega ebi Baibuli erikwegyesa. Baingi nibeega Baibuli ahabw’okwenda kugyetegyereza. Nimwija kutangaarira ebi muraayegye.”
9. Ahabw’enki tutashemereire kuhwa amaani abamwe baba batarikwenda kwega Baibuli aha murundi gw’okubanza?
9 Yehova naareeba omutima gwa buri omwe. (1 Sam. 16:7; Enf. 21:2) Naareeta ab’emitima egororokire omu kuramya okw’amazima. (Yoh. 6:44) Baingi aharibo tibaakegaga birikukwata ahari Ruhanga nari nibamanya bikye aha biri omu Baibuli. Okubuurira kwaitu nikubaha omugisha kumanyira kimwe amazima kubaasa kujunwa. (1 Tim. 2:4) N’ahabw’ekyo, omu kubanza abamwe baba batarikwenda kumanya ebi Baibuli erikwegyesa, otahwa amaani! Koresa ebitabo ebitwine kubahwera kugira omuhimbo gw’okwega Baibuli. Bwanyima noobaasa kubatwara omu katabo Niki Eki Baibuli Buzima Erikwegyesa? akarikukoresibwa omu kwegyesa abantu Baibuli.
[Akabokisi aha rupapura 4]
Ou orikubuurira yaagira ngu tarikwikiririza muri Ruhanga, teeraho kukoresa ebi:
• Mubuuze oti: “Niyo nteekateeka ei otwire oine?” kikubaasise kumanya ahabw’enki naateekateeka atyo.
• Yaaba naikiririza omuri Buddha, koresa akatabo Lasting Peace and Happiness—How to Find Them, orupapura 9-12.
• Yaaba naikiriza ngu ebintu bikabaho nibiruga omu bindi, noobaasa kukoresa ebiri ahaifo kumuhwera:
Awake! aha nsi y’omutwe “Mbwenu shi Kikahangwa?”
Vidiyo The Wonders of Creation Reveal God’s Glory
Akatabo A Satisfying Life—How to Attain It, ekicweka 4; Was Life Created?; na The Origin of Life—Five Questions Worth Asking
• Yaaba atarikwikiririza muri Ruhanga ahabw’obutariburinganiza n’okubonabona, noobaasa kukoresa ebiri ahaifo kumuhwera:
Akatabo Is There a Creator Who Cares About You?, eshuura 10
Akatabo Ruhanga Buzima Naatufaho?, ekicweka 6, na What Is the Purpose of Life?, ekicweka 6
• Mutware omu katabo Eki Baibuli Erikwegyesa yaaheza kumanya ngu Ruhanga ariho. Nikiba kiri kirungi kutandika n’akacweka 2 nari enshonga endiijo kurugiirira.aha ky’arikwenda kumanya.
[Akabokisi aha rupapura 5]
Teeraho kukoresa ebi, ou orikubuurira yaaba atarikwikiririza muri Baibuli:
• Za aha shuura 17 na 18 omu katabo Life—How Did It Get Here? By Evolution or by Creation?
• Abahindu, koresa akatabo Why Should We Worship God in Love and Truth?
• Abayudaaya, koresa akatabo Will There Ever Be a World Without War?, orupapura 3-11.
• Muhikaanise ebiteekateeko aha ku barikubaasa kugasirwa bagyendera aha misingye y’omu Baibuli. Ebi n’ebitabo ebi turikubaasa kukoresa kubahwera:
Awake! ahansi y’omutwe “Ebirikubaasa Kuhwera Amaka”
Vidiyo The Bible—Its Power in Your Life
Akatabo Amakuru Marungi Kuruga Ahari Ruhanga!, eishomo 9 na 11; A Book for All People, orupapura 22-26; na akatabo A Satisfying Life—How to Attain It, Ekicweka 2
Abarikwikiririza omuri Buddha, koresa akatabo The Pathway to Peace and Happiness, orupapura 3-7.
Abasiraamu, koresa akatabo Real Faith—Your Key to a Happy Life, ekicweka 3.
Waaba noobuurira omu kicweka ei barikwanga Baibuli, nikiba kitari kirungi kugamba ahu orikwiha ebigambo by’obwengye ebi orikugaaniira nabo kuhitsya obu oraagarukeyo emirundi mingi.
• Shoboorora oku obunabi bw’omu Baibuli buhikiirire. Ebitabo ebi orikubaasa kukoresa:
Vidiyo The Bible—Accurate History, Reliable Prophecy
Akatabo A Book for All People, Orupapura 27-29
• Mutware omu katabo Eki Baibuli Erikwegyesa ahonaaho yaabuuza eki Baibuli erikwegyesa aha nshonga zitari zimwe.
[Akabokisi aha rupapura 6]
Ou orikubuurira yaagira ati: “Tindikwikiiririza muri Ruhanga,” noobaasa kumugira oti:
• “Nimbaasa kukugambira ekyandeeteire naikiririza omu Muhangi?” Reero muhikaanise ebiteekateeko aha nshonga eziri omu katabo Reasoning, orupapura 84-6, nari kora entebeekanisa kumureetera akatabo aku waashomire kakakushemeza.
• “Kwonka shi Ruhanga ku yaakuba ariho, okaayenzire ngu abe naatwaza ata?” Baingi abu turikubuurira nibagira ngu baakayenzire kwiririra haihi Ruhanga oine rukundo, oburinganiza, embabazi kandi otarikushoroora mu bantu. Reero omworekye ebiri omu Baibuli ebiri kworeka ngu Ruhanga aine emitwarize egi. (Noobaasa n’okukoresa eshuura 1 omu katabo Eki Baibuli Erikwegyesa, kutandika n’akacweka 6.)
Ou orikubuurira yaagira ati: “Tindikwikiiririza muri Baibuli,” noobaasa kugira oti:
• “Hariho baingi abarikuteekateeka batyo. Nibagira ngu Baibuli terikuhikaana na sayansi nari ngu teine mugasho. Ngambira, oraafireyo kushoma Baibuli? [Tegyereza agarukyemu. Reero omworekye ebirikubanza aha rupapura 3 omu katabo A Book for All People, reero okamuhe.] Baingi tibarikwesiga Baibuli ahabw’okuba ediini ekoreise kubi ebi erikwegyesa. Ku ndaagarukye nitwija kuhikaanisa ebiteekateeko aha ky’okureeberaho ekiri aha rupapura 4 na 5.”
• “Abantu baingi baine enteekateeka nk’eyaawe. Nimbaasa ku kworeka ekirikunshemeza omu Baibuli? [Shoma Yobu 26:7 nari Isaaya 40:22, aharikworeka ngu aha bikwatiraine na sayansi Baibuli ehikire.] Baibuli erimu ebigambo by’obwengye ebirikubaasa kuhwera amaka. Ku ndaagarukye ninyija kukworeka kimwe aharibyo.”
• “Yebare kungambira ekyo. Ruhanga ku araabe yaahandiikiire abantu ekitabo, nooteekateeka ngu kikaabaire kirimu ki?” Mworekye ekiri omu Baibuli ekirikuhikaana n’ebi yaagarukamu.