Noijuka?
Oshomire n’obwegyendesereza Eminaara y’Omurinzi ey’omwaka ogu? Reeba yaaba noobaasa kugarukamu ebibuuzo ebi:
Niki ekirikutuhiga kuha Yehova ekitiinisa?
Nituha Yehova ekitiinisa ahabw’okugira ngu kimushemereire, n’ahabw’okwenda ngu abandi bamumanye.—w25.01, rup. 3.
Haagira owaatugwisa kubi, nitubaasa kukora ki kwongyera kuba abarikusaasira?
Tutarikwehuzya enyehurira zaitu kandi tukeetantara kubiika enziika. Twakora ekyo, nikituhwera kutaba enshaarizi.—w25.02, rup. 15-16.
Ahabw’enki entumwa Mako ari eky’okureeberaho kirungi aha b’eishe-emwe abato?
Mako akaikiriza obujunaanizibwa bw’okuheereza. N’obu araabe yaayehuriire kubi kandi nk’ou bareebize, akagumizamu naaheereza Yehova. Akahamya omukago gwe na Paulo n’abandi abakuzire omu by’omwoyo.—w25.04, rup. 27.
Yesu akaba naamanyisa ki obu yaashaba ngu: “Nkabamanyisa eiziina ryawe”? (Yoh. 17:26)
Abeegi be bakaba nibamanya eiziina rya Ruhanga. Kwonka Yesu akabahwera kumanya eki eiziina eryo ririkujwekyera, emitwarize ya Yehova, ebi yaakozire, n’ekigyendererwa kye.—w25.05, rup. 20-21.
Nitwijuka ki twaba abacureezi?
Nitwijuka ngu hariho ebi tutarikumanya. Nk’eky’okureeberaho, titurikumanya obu emperu eraabeho nari oku Yehova araatwaze omu bwire obwo. Kandi titurikumanya ekiraabeho nyentsya n’oku Yehova arikutumanya kukira oku turikwemanya.—w25.06, rup. 15-18.
Niki ekirikubaasa kutuhwera kugasirwa omu kicweka nari orubazo rwa boona?
Nitubaasa kwebuuza tuti: ‘Ni buhame ki oburikukoresibwa kushobororera abantu amazima ga Baibuli aga? Haine eky’okureeberaho eki naayegamu, eki ndikubaasa kukoresa naaba niinyegyesa omuntu ondiijo amazima aga? N’oha orikubaasa kugasirwa omu kicweka eki?’—w25.07, rup. 19.
Nitubaasa kwega ki aha kusaasira kwa Ruhanga twateekateeka aha ku yaatwariize Daudi?
N’obu Daudi araabe yaakozire ebibi by’amaani, Yehova akamusaasira ku yaayeteisize aihire aha mutima. (1 Bag. 9:4, 5) Ruhanga yaasaasira omuntu, tarikuguma naijuka ebibi ebi yaakozire, nari kumufubira ahabw’ebibi ebyo omu biro by’omumaisho.—w25.08, rup. 17.
Noobaasa kukora ki omwegi wa Baibuli yaagumirwa kwetegyereza enshonga?
Omwegi yaagumirwa kwikiriza enshonga na bwanyima y’okugimwegyesa gye kuruga omu Baibuli, noobaasa kugyehuzya reero okore nawe entebeekanisa y’okugigaaniiraho omurundi ogundi.—w25.09, rup. 24.
Baibuli neegira ngu ekibi kiine amaani g’okutubeihabeiha. (Heb. 3:13) Mu muringo ki?
Ekibi nikibaasa kutushendashenda kwejumba omu bikorwa bibi. Nikibaasa n’okutubeihabeiha kuguma nitubangaanisa yaaba buzima Yehova naatukunda.—w25.10, rup. 16.
Ni bintu ki bishatu ebirikubaasa kutuhwera kushaba twihire aha mutima?
(1)Nitubaasa kuteekateeka aha mitwarize ya Yehova. (2) Nitubaasa kuteekateeka aha bi turikurabamu reero tubigambire Yehova omu kushaba nka twaba nitwenda kusaasira omuntu. (3) Nitubaasa kwetwara twaba nitushaba. Ekyo nikiija kutuhwera kugamba ebituri aha mutima.—w25.10, rup. 19-20.
Nitubaasa kuhwera tuta abari omu myaka ya bukuru?
Nitubaasa kubataayaayira, kubateerera esimu, nari kugyenda nabo baaba nibaza omu irwariro. Kandi nitubaasa kukora nabo omu miringo etari emwe y’okubuurira.—w25.11, rup. 6-7.
Ni bintu ki ebi orikubaasa kukora kutebeekanisa omukoro gw’okugaitwa oguraahaise Yehova ekitiinisa?
Yorobera ebiragiro bya gavumenti. Hamya ngu omukoro gwaba ogw’ekitiinisa, kandi ogurikworeka emitwarize y’omwoyo ogurikwera. Jwara omu muringo guringaniire, kandi oyangire emigyenzo etarikuhikaana n’ebyahandiikirwe. Mwaba nimutebeekanisa omukoro, mugaaniire omu muringo murungi.—w25.12, rup. 21-24.