Ekicweka 11
Omusingye gw’Ensi Ensya Guriyo Niguteebwaho Hati
1, 2. Omu kuhikiirizibwa kw’obunabi bwa Baibuli, niki eki turikureeba n’amaisho gaitu kirikubaho?
EKINDI ekirungi n’okugira ngu obwahati, omusingye gw’ensi ya Ruhanga ensya guriyo niguteebwaho, kandi ensi ya Sitaane eriyo neyeyongyera kusiisikara. Nitureeba n’amaisho gaitu Ruhanga naarundaana abantu kuruga omu mahanga goona kandi naabahindura omusingye gw’ensi y’abantu abahindwirwe basya, eri haihi kuza omu mwanya gw’ensi egi eyebaganiisemu. Omu Baibuli ahari 2 Petero 3:13, ensi y’abantu abahindwirwe basya egi neeyetwa ‘ensi ensya.’
2 Obunabi bwa Baibuli kandi nibugira buti: “Omu biro bya bwanyima [obwire obu obu turimu] . . . , amahanga garyaija, gagire gati: Mwije twinamukye aha rushozi rwa MUKAMA [okuramya kwa Yehova okw’amazima], . . . atwegyese emitwarize ye, naitwe tubone kugigyenderamu.”—Isaaya 2:2-3.
3. (a) Obunabi bwa Isaaya nibuhikiirizibwa omuri baahi? (b) Ekitabo kya Baibuli ekirikuhererukayo nikibagambaho kita?
3 Obunabi obu hati nibuhikiirizibwa omuri abo abarikwikiriza ‘emihanda ya Ruhanga kandi bakagigyenderamu.’ Ekitabo kya Baibuli ekirikuhererukayo nikigamba aha bantu abari omu nsi yoona, abarikukunda obusingye, nka “omutwe muhango gw’abantu . . . abaarugire omu mahanga goona n’enganda zoona n’abantu boona n’endimi zoona,” ab’eishe-emwe aba buzima omu nsi yoona abarikuheereza Ruhanga bakwataniise. Kandi Baibuli neegira eti: “Abo nibo baarugire omu kubonabona kwingi.” Ekirikumanyisa, ngu nibaija kukira muheru y’obusingye obu obubi.—Okushuuruurwa 7:9, 14; Matayo 24:3.
Ab’eishe-emwe ab’Amazima omu Nsi Yoona
4, 5. Ahabw’enki Abajurizi ba Yehova omu nsi yoona baine obumwe?
4 Obukaikuru bw’Abajurizi ba Yehova nibateeraho kugyendera aha biragiro bya Ruhanga n’okukuratira emihanda ye. Baine amatsiko g’okutunga amagara agatahwaho omu nsi ya Ruhanga ensya. Barikworobera ebiragiro bya Ruhanga buri izooba, nibamworeka ku beteekateekire kushagika obutegyeki bwe hati hamwe n’omu nsi ensya. Buri hamwe, otarikwihirira aha ihanga nari erangi yaabo, niboorobera emitindo erikushushana—egyo ei Ruhanga yaataireho omu Kigambo kye. Niyo nshonga ahabw’enki bari ab’eishe-emwe ab’amazima abaine obumwe omu nsi yoona, ensi y’abantu abahindwirwe basya ei Ruhanga arikutaho.—Isaaya 54:13; Matayo 22:37, 38; Yohaana 15:9, 14.
5 Abajurizi ba Yehova tibarikwehimbisa ahabw’okugira obumwe bw’omutaano omu nsi yoona. Nibamanya ngu baine obumwe obu ahabw’omwoyo gwa Ruhanga ogw’amaani ogurikukora aha bantu abarikworobera ebiragiro bye. (Ebyakozirwe 5:29, 32; Abagalatia 5:22, 23) Ruhanga niwe arikubureetaho. Nk’oku Yesu yaagizire, “ekitarikubaasika ha bantu nikibaasika ahari Ruhanga.” (Luka 18:27) N’ahabw’ekyo, Ruhanga owaabaasiise ensi n’eiguru kubaho niwe arikubaasisa ensi y’abantu abahindwirwe basya kubaho.
6. Ahabw’enki obumwe obu Abajurizi ba Yehova baine nibubaasa kwetwa eky’okutangaaza omu bunaku obu?
6 N’ahabw’ekyo, omuringo ogu Yehova aritegyekamu omu nsi ensya nigureebekyera omuri abo abariba omusingye gw’ensi ensya abariyo nibarundaanwa hati. Kandi eki akoreire Abajurizi be obwire obu, n’eky’okutangaaza. Ahabw’enki? Ahabw’okuba Yehova areetaire Abajurizi be kugira obumwe obwa buzima omu nsi yoona, obutarikubaasa kushiishwa okwebaganisamu okurikureetwa amahanga, ediini n’ebindi. Abajurizi ba Yehova n’obu baraabe nibahika omu bukaikuru kandi bari omu nsi zirikurenga 235, nibakwatanisiza hamwe omu mukago oguhamiire kimwe. Omu byafaayo byona, obumwe bw’ab’eishe-emwe aba omu nsi yoona omu bunaku obu, buzima n’eky’okutangaaza—ekikozirwe Ruhanga.—Isaaya 43:10, 11, 21; Ebyakozirwe 10:34, 35; Abagalatia 3:28.
Okutaanisaho Abantu ba Ruhanga
7. Yesu akagira ngu abakuratsi be ab’amazima bakaba nibaija kumanyirwa ahari ki?
7 Nitubaasa kweyongyera tuta kumanya abantu abu Ruhanga arikukoresa nk’omusingye gw’ensi ye ensya? Ni baahi abarikuhikiiriza ebigambo bya Yesu ebiri omuri Yohaana 13:34, 35? Akagira ati: “Nimbaha ekiragiro kisya nti: Mukundane; nk’oku naabakunzire, naimwe mube nikwo mwakundana. Ku muriguma nimukundana, nibwo abantu boona baribamanya ku muri abeegi bangye.” Abajurizi ba Yehova nibaikiriza ebigambo bya Yesu ebi kandi babigyenderaho. Nk’ekigambo kya Ruhanga oku kirikuragiira, ‘nibakundana munonga.’ (1 Petero 4:8) ‘Nibajwara okukunda, ahakuba nikwo kukomerana byona bikakwatanisibwa hamwe.’ (Abakolosai 3:14). N’ahabw’ekyo, rukundo y’ab’eishe-emwe niyo “gaamu” erikubakomerana hamwe omu nsi yoona.
8. 1 Yohaana 3:10-12 nihooreka ki ekindi ekirikutaanisaho abantu ba Ruhanga?
8 Kandi, 1 Yohaana 3:10-12 nihagira hati: “Ekyo nikyo kimanyisa abaana ba Ruhanga n’abaana ba Sitaane; weena otakora by’okuhikiirira ti wa Ruhanga, n’obu yaakuba otakunda mwene ishe. Ahakuba obu nibwo butumwa obu mwahuriire okwiha iranaira, ngu tukundane, turekye kuba nka Kaini owaabaire ari ow’Omubi, akaita omurumuna.” N’ahabw’ekyo, abantu ba Ruhanga omu nsi yoona ti nshaarizi.
Akamanyiso Akandi Akarikubataanisaho
9, 10. (a) Abaheereza ba Ruhanga bakaba nibaija kumanyirwa aha kukora murimo ki omu biro by’aha mperu? (b) Abajurizi ba Yehova bahikiriize bata ebiri omuri Matayo 24:14?
9 Hariho ogundi muringo ogu orikubaasa kumanyiramu abaheereza ba Ruhanga. Omu bunabi bwe oburikukwata aha mperu y’ensi, Yesu akagamba aha bintu bingi ebyabaire nibiija kworeka obunaku obu nk’ebiro by’emperu. (Reeba Ekicweka 9.) Akamanyiso kakuru ak’obunabi obu nikoorekwa omu bigambo bya Yesu ebi ebiri omuri Matayo 24:14: “Engiri egi ey’obukama eryagambwa omu nsi zoona okuba eky’okuhamya aha mahanga goona; obwo nibwo emperu erihika.”
10 Twareebire obunabi obwo burikuhikiirizibwa? Eego. Kuruga obu ebiro by’emperu byatandika omuri 1914, Abajurizi ba Yehova batwire nibabuurira amakuru marungi g’Obukama omu nsi yoona omu muringo ogu Yesu yaaragiire, nikwo kugira, okubuurira omu maka g’abantu. (Matayo 10:7, 12; Ebyakozirwe 20:20) Obukaikuru bw’Abajurizi ba Yehova nibataayaayira abantu omu mahanga goona kubagambira aha by’ensi ensya. Eki nikyo kitumire waatunga akatabo aka, ahabw’okuba omurimo gw’Abajurizi ba Yehova nigutwariramu okuteera n’okugaba obuhumbi bw’ebitabo ebirikugamba aha Bukama bwa Ruhanga. Oine abandi abu orikumanya abarikubuurira aha Bukama bwa Ruhanga enju aha ndiijo omu nsi yoona? Kandi Mako 13:10 nihooreka ngu omurimo ogu ogw’okubuurira n’okwegyesa gushemereire “kubanza” kukorwa emperu etakahikire.
Okugarukamu Enshonga Nkuru eya Kabiri
11. Niki ekindi eki Abajurizi ba Yehova barikworeka ahabw’okworobera obutegyeki bwa Ruhanga?
11 Ahabw’okworobera ebiragiro hamwe n’emisingye ya Ruhanga, hariho ekindi eki Abajurizi ba Yehova babaasize kworeka. Nibooreka ngu Sitaane akaba naabeiha obu yaagira ngu abantu tibarikubaasa kuguma bari abeesigwa baaba nibagyezibwa, ekirikugarukamu enshonga ya kabiri erikukwata aha bwesigwa bw’abantu. (Yobu 2:1-5) Abajurizi ba Yehova nk’ekibiina ky’obukaikuru bw’abantu kuruga omu mahanga goona, nibooreka obwesigwa aha butegyeki bwa Ruhanga. N’obu baraabe bari abantu abatahikiriire kandi barikuhakanisibwa Sitaane, nibashagika Ruhanga aha nshonga y’obutegyeki.
12. Abajurizi ba Yehova nibatooreza okwikiriza kwa baahi?
12 Omu bwire obu, obukaikuru bw’Abajurizi ba Yehova nibongyera obujurizi bwabo aha bw’abajurizi baingi aba ira abaayorekire obwesigwa ahari Ruhanga. Bamwe ahari abo aba ira ni Abeeli, Noa, Yobu, Abrahamu, Saara, Isaaka, Yakobo, Debora, Ruusi, Daudi, na Danieli, n’abandi. (Abaheburaayo, eshuura 11) ‘N’omutwe muhango gw’abajurizi abeesigwa’ nk’oku Baibuli erikubeeta. (Abaheburaayo 12:1) Aba hamwe n’abandi otwariiremu n’abeegi ba Yesu bakaguma bari abeesigwa ahari Ruhanga. Kandi Yesu we wenka akataho eky’okureeberaho ekirikukirayo arikurinda obwesigwa.
13. Ni bigambo ki ebi Yesu yaagambire ahari Sitaane ebihikiriire?
13 Eki nikihamya ngu eki Yesu yaagambire ahari Sitaane arikugambira abeebembezi b’amadiini kihikire: “Kwonka mbwenu nimwenda kuunyita, nyowe omuntu owaabagambira eby’amazima ebi naahuriire ahari Ruhanga. . . . Muri aba Shoimwe Sitaane, kandi mukunda kukora ebi shoimwe ayetenga. We n’omwitsi okuruga iranaira, taragumiire mu mazima, ahakuba amazima tigamubamu. Ku abeiha, aba naagamba ebye, ahakuba n’omubeihi, ishe w’ebishuba.”—Yohaana 8:40, 44.
Noija Kucwamu Ki?
14. Niki ekiriyo nikihika aha musingye gw’ensi ensya?
14 Omusingye gw’ensi ensya ogu Ruhanga ariyo naataho omu kibiina ky’Abajurizi ba Yehova omu nsi yoona, nigweyongyera kuhama. Buri mwaka enkumi n’enkumi z’abantu nibakoresa obugabe bwabo bw’okwecweramu barikwegamira aha kumanya okuhikire, baikiriza obutegyeki bwa Ruhanga. Nibahinduka ekicweka ky’ensi ey’abantu abahindwirwe basya, baza aha rubaju rwa Ruhanga aha nshonga y’obutegyeki, kandi booreka butunu ku Sitaane ari omubeihi.
15. Ni murimo ki ogw’okushoroora oguraije kukorwa omu bunaku bwaitu?
15 Ahabw’okucwamu kushagika obutegyeki bwa Ruhanga, baryaba bahikire kuteebwa aha “rubaju rwa buryo” orwa Kristo yaaba naashoroora “entaama” kuruga omu “mbuzi.” Omu bunabi bwe aha biro by’emperu, Yesu akaranga ati: “Amahanga goona [garyateeranirwa] omu maisho ge; kandi aryagashoroora, nk’oku omuriisa ashoroora entaama omu mbuzi. Entaama aryazita aha rubaju rwe rwa buryo, kwonka embuzi aryazita aha rwa bumosho.” Entaama n’abantu abacureezi abarikukorera hamwe na beene-ishe Yesu, abarikworobera obutegyeki bwa Ruhanga. Embuzi n’abantu abagomi abarikwanga beene-ishe Yesu kandi bakanga kworobera obutegyeki bwa Ruhanga. Niki ekirarugyemu? Yesu akagira ati: ‘Abo [embuzi] baryacwekyerezibwa ebiro n’ebiro, kwonka abahikiriire bo [entaama] baryataaha omu magara agatahwaho.’—Matayo 25:31-46, NW.
16. Oshemereire kukora ki waaba nooyenda kutuura omuri Paradiso eri haihi kwija?
16 Buzima, Ruhanga naatufaho! Juba naija kureeta paradiso omu nsi. Nooyenda kutuura omuri Paradiso egyo? Ku kiraabe nikwo kiri, yoreka okusiima kwawe ahabw’ebi Yehova arikutuha orikumwegaho kandi orikugyendera aha bi orikwega. “Musherure MUKAMA naakiboneka, mumutakire akiri haihi. Omubi arekye omuhanda gwe, n’otahikiriire arekye ebiteekateeko bye, agarukye ahari MUKAMA, abone kumusaasira.”—Isaaya 55:6, 7.
17. Ahabw’enki tutashemereire kweziringa kucwamu ou twine kuheereza?
17 Tihariho bwire bw’okushiisha. Muheru y’obusingye obu eri haihi kuhika. Ekigambo kya Ruhanga nikihabura kiti: “Mutarikunda ensi n’obu byakuba ebintu ebigirimu. Omuntu weena ku akunda ensi, okukunda Isheboona kuba kutamurimu . . . Kandi ensi egi neehwaho n’okwetenga kwayo; kwonka okora ebi Ruhanga akunda, agumaho ebiro byona.”—1 Yohaana 2:15-17.
18. Niki eki oshemereire kukora ekirakubaasise kugira obwesigye n’ekihika ky’okutuura omu nsi ya Ruhanga ensya enungi?
18 Abantu ba Ruhanga bariyo nibatendekwa ahabw’amagara agatahwaho omu nsi ensya. Bariyo nibeega eby’omwoyo n’emyoga endiijo erikwetengwa omu kuhindura ensi paradiso. Nitukuhiga okushagika Ruhanga nk’omutegyeki n’okushagika omurimo gwe ogurikukiza amagara ogurikukorwa omu nsi yoona omu bunaku obu. Yega Baibuli n’Abajurizi ba Yehova, obaase kumanya Ruhanga orikukufaho kandi oraahezeho okubonabona. Omu muringo ogu naiwe noobaasa kuba ekicweka ky’omusingye gw’ensi ensya. Ku oraakore otyo, noobaasa kugira obwesigye ngu noija kusiimwa Ruhanga kandi ogire ekihika ky’okutuura omu nsi egyo ensya kandi enungi ebiro byona.
[Ekishushani ekiri aha rupapura 31]
Abajurizi ba Yehova baine obumwe obwa buzima omu nsi yoona
[Ekishushani ekiri aha rupapura 32]
Omusingye gw’ensi ya Ruhanga ensya guriyo niguteebwaho hati