Eishomo 15

Okuhweera Abandi Kukora ebi Ruhanga Akunda

Ahabw’enki nogambira abandi ebintu ebi ori kweega? (1)

N’oha ou ori kubaasa kugambira aha makuru marungi? (2)

Niki eki emitwaarize yaawe eri kubaasa kukora aha bandi? (2)

Ni ryaari obu ori kubaasa kuburira hamwe n’ekibiina? (3)

1. Ahu wahikira aha, oyegire ebirungi bingi okuruga omu Baiburi. Okumanya oku kukakureeteire entunguuka omu mitwaarize y’Ekikristaayo. (Abaefeso 4:22-24) Okumanya nk’okwo nikwetengwa okubaasa kutunga amagara agatahwaho. (Yohaana 17:3) Kwonka, abandi nibeetenga okuhurira amakuru marungi babaase okujunwa. Abakristaayo ab’amazima boona nibateekwa kubuurira abandi. N’ekiragiro kya Ruhanga.—Abarooma 10:10; 1 Abakorinso 9:16; 1 Timoseo 4:16.

2. Nobaasa kutandika ori kugambira abo abakuri haihi aha bintu birungi ebi ori kweega. Bigambire ab’omu maka gaawe, banywaani baawe, ab’ori kweega nabo, n’ab’ori kukora nabo. Ba ow’embabazi kandi ori kugumisiriza omu kubagambira. (2 Timoseo 2:24, 25) Kiijukye ngu, abantu nibareeba munonga emicwe y’omuntu, okukira oku bari kuhurikiza ebi ari kugamba. Nahabw’ekyo emicwe yaawe mirungi nebaasa kushendashenda abandi, kuhurikiriza obutumwa bw’ori kubagambira.—Matayo 5:16; 1 Petero 3:1, 2, 16.

3. Obwiire nibubaasa kuhika, oyeshangye oine ebiri kukwikiriza kutandika kubuurira hamwe n’ekibiina ky’Abajurizi ba Yehova, ekiri omu kicweeka ky’orimu. Eri n’eitembezo rikuru omu ntunguuka yaawe. (Matayo 24:14) Ka n’eky’okushemererwa ku okubaasize kuhweera omuntu ondiijo okuhinduka omuheereza wa Yehova akatunga amagara agatahwaho!—1 Abatesalonika 2:19, 20.