Eshuura y’Ikumi na Mushanju

Mutiine Ruhanga Omuka Yaanyu

1. Okugyendera aha buhabuzi oburi omu Kigambo kya Ruhanga kuhwereire kuta abari omu bushwere?

YEHOVA niwe Yaatandikireho obushwere kandi Ekigambo kye nikiha amaka obuhabuzi oburikukirayo oburungi. Ahabw’okugyendera aha buhabuzi obwo, abantu baingi babaasize kugira obushwere burungi. Ekirungi, abamwe abaabaire nibatuura hamwe batagaitsirwe bacwiremu kushemeza obushwere bwabo. Abandi baarekiire aho kushambana. Abashaija enshaarizi abaabaire nibatwariza abakazi baabo n’abaana baabo kubi beegire kuba abanyambabazi n’okutwaza gye.

2. Amaka g’Ekikristaayo garimu ki?

² Amaka g’Ekikristaayo garimu ebintu bingi, ka tugire, nk’oku turikutwara okuguma omu bushwere, ebi turikukora kuhikiiriza obujunaanizibwa bwaitu omu maka, n’oku turikutwarizamu ab’omu maka gaitu. (Abaefeso 5:33–6:4) Okumanya kwonka obuhabuzi obu Baibuli erikuha aha magara g’eka tikirikumara. Nituba tushemereire kubugyenderaho. Tihariho n’omwe omuriitwe orikwenda kuba nk’abo abu Yesu yaajunaine ahabw’okuhenda ebiragiro bya Ruhanga. Bakaba nibeebeiha ngu okworeka obweziriki omu diini nikimara. (Matayo 15:4-9) Titurikwenda kugira ngu nitutiina Ruhanga, haza tukaremwa kukyoreka omu maka gaitu. Kwonka nitwenda kworeka okutiina Ruhanga ‘okurikutugasha kihango.’—1 Timoseo 5:4; 6:6; 2 Timoseo 3:5.

Obushwere Bushemereire Kumara Bwire Ki?

3. (a) N’enki ekirikuhika aha bushwere bwingi, kwonka n’enki eki tushemereire kumariirira kukora? (b) Orikukoresa Baibuli yaawe, garukamu ebibuuzo ebyayorekwa aha muheru gw’akacweka aka.

³ Obushwere nibweyongyera kusiisikara. Abamwe abamazire emyaka bari hamwe omu bushwere nibacwamu bagaitururwa, reero bagaitwa n’ondiijo muntu. Kandi tikikyakitangaaza okuhurira ngu ababaire bashweraine kumara obwire bugufu bataanire. N’obu abandi baraabe nibatwaza batyo, itwe nitwenda kushemeza Yehova. Okubaasa kwetegyereza eki ekigambo kya Ruhanga kirikugamba aha kuhangaara kw’obushwere, ka tuteekateeke aha bibuuzo n’ebyahandiikirwe ebirikukurataho.

Omushaija n’omukazi ku barikugaitwa, nibaba bashemereire kuguma hamwe kumara bwire ki? (Mako 10:6-9; Abarooma 7:2, 3)

Ni nshonga ki emwe ei Ruhanga arikwikiriza omuntu kugaitururwa akashwer[w]a ondiijo? (Matayo 5:31, 32; 19:3-9)

Yehova naatwara ata okugaitururwa okutarikwikirizibwa mu Kigambo kye? (Malaki 2:13-16)

Baibuli neeshemba okutaana nk’omuringo gw’okushobororamu oburemeezi bw’omu maka? (1 Abakorinso 7:10-13)

Ni ryari obu okutaana kurikubaasa kwetengyesa? (Zaaburi 11:5; Luka 4:8; 1 Timoseo 5:8)

4. Ahabw’enki obushwere obumwe nibuhangaara?

⁴ Obushwere obumwe butebeekaine kandi bumazire obwire buraingwa. Ahabw’enki? Enshonga emwe n’ahabw’okuba abarikubutaahamu nibategyereza babanza baakura. N’ekindi, nikikuru okushwer[w]a omuntu ou murikushushanisa ebigyendererwa kandi ou murikubaasa kugaaniira aha nshonga zoona mutarikusherekana. Ekirikukirayo obukuru n’okushwer[w]a omuntu orikukunda Yehova kandi orikwesiga Ekigambo kye, akakikoresa omu kushoboorora oburemeezi. (Zaaburi 119:97, 104; 2 Timoseo 3:16, 17) Omuntu nk’ogwo tarikwija kuteekateeka ngu ebintu byaba bitagyenzire gye, naabaasa kutaana n’ou ashweraine nawe nari bagaitururwe. Tarikwija kwekwatsa enshobi za mutaahi we, atyo akanga kuhikiiriza obujunaanizibwa bwe. Beitu naija kwemera oburemeezi kandi asherure omuringo murungi ogw’okubushoboororamu.

5. (a) Obwesigwa ahari Yehova nibuhwera buta omu bushwere? (b) Ni birungi ki ebirikubaasa kuruga omu kuhamira aha biragiro bya Yehova n’obu haakuba hariho okuhakanisibwa?

⁵ Sitaane naagira ngu twabonabona, nituruga omu mihanda ya Yehova. (Yobu 2:4, 5; Enfumu 27:11) Kwonka Abajurizi ba Yehova abaingi ababonaboine ahabw’okuhiiganisibwa abu bashweraine nabo, bakihamiire omu bushwere bwabo. Bakihamiire ahari Yehova n’ebiragiro bye. (Matayo 5:37) Abamwe aha bagumisiriize, batungire omugisha gw’okureeba abakundwa baabo nibabegaitaho omu kuheereza Yehova—nangwa na bwanyima y’emyaka mingi barikubahiiganisa! (1 Petero 3:1, 2) Kwonka Abakristaayo abasigirweho abakundwa baabo ahabw’okugira ngu nibaheereza Yehova nari abo abu abakundwa baabo bangire kubeegaitaho omu kuheereza Yehova, nabo nibamanya ngu nibaija kuheebwa omugisha ahabw’okworeka ngu nibatiina Yehova.—Zaaburi 55:22; 145:16.

Buri Omwe Kuhikiiriza Obujunaanizibwa Bwe

6. Okubaasa kugira obushwere buhamire, ni ntebeekanisa ki ei tushemereire kukuratira?

⁶ Okugira obushwere buhamire tikirikumanyisa okutuura hamwe kwonka. Ekikuru ahari buri omwe aha bashweraine n’okukuratira entebeekanisa ya Yehova ey’obwebembezi. Eki nikireetaho obusingye n’obuteebekana omu maka. Omu kitabo kya 1 Abakorinso 11:3, nihagira hati: “Mumanye ku omutwe gw’omushaija ari Kristo n’omutwe gw’omukazi ku ari iba, kandi omutwe gwa Kristo ku ari Ruhanga.”

7. Amaka gashemereire kwebemberwa gata?

⁷ Waayetegyereza eki orunyiriri rwabanza kugambaho? Buzima, buri mushaija aine Orikumwebembera ou ashemereire kworobera, niwe Kristo. Eki nikimanyisa ngu omushaija ashemereire kworeka emitwarize ya Yesu omu kwebembera ab’omu maka ge. Kristo naayorobera Yehova, akunda munonga ekibiina, kandi akireeberera. (1 Timoseo 3:15) Akahika n’aha ‘kwehayo ahabwakyo.’ Yesu taine maryo, ti otarikufayo aha bandi, kureka ‘natwaza gye, kandi n’omucureezi omu mutima.’ Abo abu arikwebembera ‘nibatunga okuhuumura omu mitima yaabo.’ Omushaija ku arikwebembera ab’omuka ye omu muringo nk’ogwo, naayoreka ngu naayorobera Kristo. Obwo omukazi Omukristaayo tarikugumirwa kworobera iba n’okukwatanisa nawe.—Abaefeso 5:25-33; Matayo 11:28, 29; Enfumu 31:10, 28.

8. (a) Ahabw’enki okugyendera aha mitindo y’Ekikristaayo omu maka agamwe kirikubaasa kureebeka nk’ekitarikuhwera? (b) Tushemereire kukora ki kyaba kiri kityo?

⁸ Kwonka nabwe, omu maka nihaija kubamu oburemeezi. Omuze gw’okutenda kuragiirwa nigubaasa kuba gwabaire gwashenshiire omuntu atakatandikire kugyendera aha mitindo ya Baibuli. Okugamba n’omuntu ogwo omu muringo gw’embabazi nikibaasa kutahwera kihango. Nitumanya ngu Baibuli netwehanangiriza okweihamu “obushaarizi bwona, n’okuguubwa kubi n’oruyombo n’okujumiirana.” (Abaefeso 4:31) Kwonka shi n’enki ekirikubaasa kukorerwa bamwe omuka baaba batarikubaasa kuhurira okwihaho waabakankamira? Yesu taratwarize nk’abo abaabaire bamuhayira kandi bakamujuma, kureka akeesiga Ishe. (1 Petero 2:22, 23) N’ahabw’ekyo, haabaho oburemeezi omuka, omu mwanya gw’okukuratira emitwarize y’ensi, mworekye ngu nimutiina Yehova murikumushaba ku abahwera.—Enfumu 3:5-7.

9. Omu mwanya gw’okurondereza enshobe, n’enki eki abashaija Abakristaayo beegire kukora?

⁹ Empindahinduka nizibaasa kutabaho ahonaaho, kwonka obuhabuzi bwa Baibuli buzima nibukora, n’okugumisiriza twataho omutima kubugyenderaho. Abashaija baingi bakireebire ngu obushwere bwabo butandikire kuba burungi baaheza kutandika kutwaza nk’oku Kristo arikutwazamu ekibiina. Ekibiina tikirimu bantu abatarikukora nshobi. Kwonka Yesu naakunda ekibiina, akiteeraho eky’okureeberaho ekirungi, kandi akoresa Ebyahandiikirwe omu kwongyera kukiboneza. Akahayo amagara ge ahabwakyo. (1 Petero 2:21) Eky’okureeberaho kye kihwereire abashaija baingi Abakristaayo kwebembera gye n’okuha ab’omu maka gaabo obuhwezi. Eki nikikira okurondereza enshobe nari okwanga kugamba hamwe.

10. (a) Ni mu miringo ki ei omushaija nari omukazi—nangwa n’ogwo orikweyeta Omukristaayo—arikubaasa kutuma amagara g’ab’omuka gaaguma? (b) Niki ekirikubaasa kukorwa okutereeza embeera?

¹⁰ Kwonka shi omushaija ku yaakuba atarikufayo aha biteekateeko by’ab’omuka ye nari atarikutaho ntebeekanisa y’okushoma nabo Baibuli nari ey’okukorera hamwe ebindi bintu? Kandi shi omukazi ku yaakuba atarikukwatanisa n’iba nari atarikworeka ngu naatiina Ruhanga? Abamwe nibahwerwa kihango ku barikuhanuuramu n’ab’omu maka gaabo aha buremeezi obu baine. (Okutandika 21:10-12; Enfumu 15:22) Kwonka n’obu byona byakuba bitabaireho nk’oku turikuba nitwenda, buri omwe omuriitwe naabaasa kwongyera aha busingye bw’eka arikuteeraho kworeka ebyana by’omwoyo wa Ruhanga, kandi akooreka ngu buzima naafayo aha b’omu maka. (Abagalatia 5:22, 23) Embeera terikwija kushemera twategyereza omuntu ondiijo kubanza kugira eki yaakora, kureka twakora ekirikutwetengyesa, tutyo tukooreka ngu nitutiina Ruhanga.—Abakolosai 3:18-21.

Ah’Okwiha Eby’Okugarukamu

11, 12. N’enki eki Yehova atuhaire kutuhwera okubaasa kugira obusinguzi omu maka?

¹¹ Abantu nibasherurira haingi obuhabuzi oburikukwata aha nshonga z’amaka gaabo. Kwonka nitumanya ngu Ekigambo kya Ruhanga kirimu obuhabuzi oburikukirayo oburungi, kandi nikitushemeza okureeba ngu kurabira omu kibiina kye, Ruhanga naatuhwera kubugyenderaho. Iwe noogasirwa obuhwezi obwo?—Zaaburi 119:129, 130; Miika 4:2.

¹² Oyihireho okuza omu nteerane z’ekibiina, waataireho obwire bw’okushoma Baibuli butoosha n’ab’omuka yaawe? Amaka agarikukora ekyo nigaba nigakora ekirikubaasa kugahwera kugira obumwe omu kuramya nk’eka. Amaka gaabo nigeyongyera kubonera baagyendera aha Kigambo kya Ruhanga.—Eky’Ebiragiro 11:18-21.

13. (a) Ni nkahi ei turikubaasa kwiha obuhwezi twaba twine ebibuuzo ebirikukwata aha maka? (b) N’enki ekishemereire kureebwa omuri byona ebi turikucwamu?

¹³ Noobaasa kuba oine ebibuuzo ebirikukwata aha nshonga z’amaka nk’ebikwatiraine n’okubariirira oruzaaro. Hariho obu okwihamu enda kurikwikirizibwa? Omwana ku yaakuba atarikufa aha by’omwoyo, ashemereire kwejumba kirikwingana ki omu kuramya kw’omuka? Ebibuuzo bingi nk’ebyo nibishobororwaho omu bitabo ebihandiikirwe Abajurizi ba Yehova. Yega okukoresa ebitabo ebirikukoresibwa omu kwega Baibuli, otwariremu na za index, okubaasa kutunga eby’okugarukamu. Ku oraabe otaine ebitabo ebirikworekwa omu index, noobaasa kusherura omu ibiikiro ry’ebitabo eriri omu Kyombeko ky’Obukama. Nari noobaasa kusherura ebitabo ebi aha kompyuta yaawe. Noobaasa n’okwebuuza aha Bakristaayo abahamire omu by’omwoyo. Kwonka otakaateekateeka ngu butoosha nibaija kukugambira eky’okukora. Emirundi mingi niiwe oine kwecweramu nari imwe mwembi, iwe n’ou oshweraine nawe. Mucwemu omu muringo ogurikworeka ngu nimutiina Ruhanga, ti mwaba muri omu bantu honka kureka n’omu maka ganyu.—Abarooma 14:19; Abaefeso 5:10.

Eby’Okweijutsya

• Okworobera Yehova kwine kakwate ki n’okuba omwesigwa aha u oshweraine nawe?

• Twaba twine oburemeezi omu maka, n’enki ekirikubaasa kutuhwera kukora ebirikushemeza Ruhanga?

• N’obu abandi omuka baakuba batahikiriize obujunaanizibwa bwabo, itwe nitubaasa kukora ki okubaasa kutereeza embeera?

[Ekishushani ekiri aha rupapura]

Omushaija ashemereire kworeka emitwarize ya Yesu omu kwebembera amaka

[Ekishushani ekiri aha rupapura 157]

Ab’omu maka nibongyera kugira obumwe baayega hamwe Baibuli