‘Kugira Ngu Murekye Kugwa Omu Kwohibwa’

‘Mugume nimureeba nimushaba, kugira ngu murekye kugwa omu kwohibwa.’—MATAYO 26:41, NW.

OBUSAASI bukaba buri bwingi—nk’oku kyabaire kitakabahoga omu magara ge. Yesu Kristo omwana wa Ruhanga, akaba ari haihi n’omuheru gw’amagara ge omu nsi. Yesu aketegyereza ngu omu mwanya mukye akaba naaza kukwatwa, acwerwe orubanja rw’okufa, kandi ahanikwe aha muti. Akaba naamanya ngu eki yaabaire naaza kucwamu kukora kikaba nikibaasa kuhaisa eiziina ry’Ishe ekitiinisa nari okurijumisa. Yesu kandi akaba naamanya ngu amatsiko g’abantu ag’okuba abahuriire omu biro by’omu maisho gakaba geegami ahari ekyo eki yaabaire naaza kucwamu. Ayorekyereire ebi byona, n’enki eki yaabaire naaza kukora?

² Yesu n’abeegi be bakaza omu musiri gwa Gesesemaani. Gukaba guri omwanya ogu Yesu yaabaire naakunda. Bari omwo, akatsigaho abeegi be yaayeyongyerayo omu maisho kakye. Ari wenka, akashaba Ishe ow’omu iguru okumuha amaani, ayihire aha mutima yaamugambira ebiteekateeko bye n’enyehurira ye omu kushaba—ti gumwe kureka emirundi eshatu. N’obu araabe yaabaire ahikiriire, Yesu tarateekateekire ngu akaba naabaasa kworekyerera ebi byona omu maani ge ahabwe.—Matayo 26:36-44.

³ Ebiro ebi, naitwe nituhikwaho oburemeezi bwingi. Enyimaho omu katabo aka, tureebire ebirikuhamya ngu turi omu biro by’aha muheru gw’obusingye obu obubi. Ebigyezo n’obusaasi bwingi ebirikureetwa ensi ya Sitaane nibyeyongyera. Ebi turikucwamu hamwe n’ebikorwa bya bamwe omuriitwe abarikwegambaho ngu nibaheereza Ruhanga ow’amazima haine eki birikworeka aha eiziina rya Ruhanga kandi nibikora kihango aha matsiko ga buri muntu agu aine omu nsi ye ensya. Nitukunda Yehova. Nitwenda ‘kugumisiriza kuhika aha muheru’—aha muheru gw’amagara gaitu nari ogw’obusingye obu, ekiraabanze kwija kyona. (Matayo 24:13) Kwonka shi nitubaasa tuta kuguma nitwijuka obukuru bw’obwire bu turimu kandi tukaguma nitureeba?

⁴ Arikumanya ngu abeegi be—ab’omu kyasha ky’okubanza n’ab’ebiro ebi—bakaba nibaza kubugana oburemeezi, Yesu akabehanangiriza ati: ‘Mugume nimureeba, mushabe, kugira ngu mutakaagwa omu kwohibwa.’ (Matayo 26:41, NW) Ebigambo ebi bitwiniire makuru ki ebiro ebi? Noobugana kugyezibwa kwa muringo ki? Kwonka shi noobaasa ota ‘kuguma nooreeba’?

Okugyezibwa Kukora Ki?

⁵ Buri-izooba twena nitugyezibwa kugwa omu ‘mutego gwa Sitaane.’ (2 Timoseo 2:26) Baibuli neturabura ngu Sitaane okukira munonga naagyenderera abaramya ba Yehova. (1 Petero 5:8; Okushuuruurwa 12:12, 17) Aine kigyendererwa ki? Ti kugira ngu buriijo aba agyendereire kutwita. Ku turikufa turi abeesigwa ahari Ruhanga, Sitaane tarikusingura. Sitaane naamanya ngu Yehova, omu bunaku Bwe naija kumaraho okufa arikurabira omu kuzooka.—Luka 20:37, 38.

⁶ Sitaane hoona naayenda kucwekyereza ekintu ekikuru munonga okukira amagara agu twine hati—nibwo bwesigwa bwaitu ahari Ruhanga. Sitaane amaririire kuhamya ngu naabaasa kutwiha aha kuramya Yehova. N’ahabw’ekyo, ku twakushendashendebwa kutaba beesigwa—kurekyera aho kubuurira amakuru marungi nari okwehuzya emitindo y’Ekikristaayo—okwo kukaaba kuri okusingura ahari Sitaane! (Abaefeso 6:11-13) N’ahabw’ekyo, “Omwohi” naata emitego omu mihanda yaitu.—Matayo 4:3.

⁷ “Obugobya” bwa Sitaane buri omu miringo mingi. (Abaefeso 6:11) Naabaasa kutugyeza n’okwetenga ebintu, okutiina, okubangaanisa, nari okusherura eby’okweshemeza. Kwonka omuringo gumwe ogu arikukira kukoresa n’okutumaramu amaani. Nk’omuntu omunyabwengye, Sitaane naamanya ngu okumaramu amaani nikutugarura enyima omu by’omwoyo, kitureetera kugwa omu kabi. (Enfumu 24:10) N’ahabw’ekyo, twahurira ‘tuhendagurikire’ omu biteekateeko, naatugyeza ngu tubirugyeho.—Zaaburi 38:8.

⁸ Nk’oku turayeyongyere kwiririra omuheru gw’obusingye obu, nikireebeka ngu ebirikureeta okuhwamu amaani nibyeyongyera, kandi tikugira ngu itwe tibirikutukwataho. (Reeba akashanduuko “Bimwe aha Birikumaramu Amaani.”) Ekiraabe kiri kyo kyona, okuhwamu amaani nikutureetera kuba abeeremwa. ‘Okwetungira obwire’ bw’eby’omwoyo—ekirikutwariramu okwega Baibuli, okuza omu nteerane z’Ekikristaayo, hamwe n’okwejumba omu buheereza—nikibaasa kutaba kyangu waaba oruhire omu mubiri, omu biteekateeko, hamwe n’omu magara. (Abaefeso 5:15, 16) Ijuka ngu Omwohi naayenda ngu obirugyeho. Kwonka obu tibwo bunaku bw’okugaruka enyima nari shi obutafayo aha bukuru bw’ebiro ebi ebi turimu! (Luka 21:34-36) Noobaasa ota kwangira okugyezibwa kandi okaguma nooreeba? Yetegyereze ebiteekateeko bina ebirikubaasa kukuhwera.

‘Oshabe Obutoosha’

⁹ Yesigye Yehova orikurabira omu kushaba. Ijuka eky’okureeberaho kya Yesu omu musiri Gesesemaani. Aine obusaasi bwingi, akakora ki? Akahindukira Yehova okumuhwera, yaayezirika kushaba, “etuutu ye yaashusha nk’amatondo mahango g’eshagama omu kuragarika ahansi.” (Luka 22:44) Kiteekateekyeho. Yesu akaba naamanya Sitaane kurungi. Ari omu iguru, Yesu akaba yaayetegyereize ebyosyo byona ebi Sitaane arikwejunisa okunaga abaheereza ba Ruhanga omu mitego ye. Haza kandi, Yesu tarateekateekire ngu kikaba kyanguhi okubaasa kusingura buri ki Sitaane yaabaire naabaasa kumureeteho kyona. Omwana wa Ruhanga ohikiriire ku araabe yaareebire obukuru bw’okushaba obuhwezi n’amaani ga Ruhanga, itwe kandi nitukizaho!—1 Petero 2:21.

¹⁰ Ijuka kandi, ngu bwanyima y’okwehanangiriza abeegi be “okushaba obutoosha,” Yesu akagira ati: “Omutima gwo nigukunda, kwonka omubiri n’omweremwa.” (Matayo 26:41) N’omubiri gw’oha ogu Yesu yaabaire naagambaho? Buzimazima ti mubiri gwe ahabwe; tihaine bweremwa bwabaire buri omu mubiri gwe ogw’obuntu ogwabaire guhikiriire. (1 Petero 2:22) Kwonka kikaba kiri eky’omutaano aha beegi. Ahabw’obutahikiirira obu baahungwire, bakaba nibetenga munonga obuhwezi okubaasa kwangira okugyezibwa. (Abarooma 7:21-24) Egyo niyo nshonga ahabw’enki yaabehanangiriize—hamwe n’Abakristaayo boona ab’amazima aba bwanyima—okushaba obuhwezi omu kworekyerera okwohibwa. (Matayo 6:13) Yehova naagarukamu eshaara nk’ezo. (Zaaburi 65:2) Ata shi? Omu miringo nk’ebiri.

¹¹ Ogw’okubanza, Ruhanga naatuhwera okwetegyereza ebigyezo. Ebigyezo bya Sitaane biri nk’emitego etegirwe hoona-hoona omu muhanda ogurimu omwirima. Waaba otagireebire, noobaasa kugigwamu. Kurabira omuri Baibuli n’omu bitabo ebirikwegyesa Baibuli, Yehova naatworeka emitego ya Sitaane, atyo atubaasisa kwetantara okugwa omu kwohibwa. Okumara emyaka mingi, ebitabo ebiteirwe hamwe n’enteekateeka z’enteerane empango bitwire nibiturabura aha kabi akari omu kutiina abantu, omu bushambani, okukunda ebintu, hamwe n’omu bindi byosyo bya Sitaane. (Enfumu 29:25; 1 Abakorinso 10:8-11; 1 Timoseo 6:9, 10) Torikuhurira noosiima Yehova okukurabura aha bigyendererwa bya Sitaane? (2 Abakorinso 2:11) Okurabura okwo kwona n’okugarukwamu kw’eshaara zaawe okuhwerwa kwangira okwohibwa.

¹² Ogwakabiri, Yehova naagarukamu eshaara zeitu arikutuheereza amaani g’okugumisiririza okwohibwa. Ekigambo kye nikigira kiti: “Ruhanga . . . taribaikiriza kugyezibwa ekigyezo eki mutarikubaasa; kureka omu kigyezo ekyo aryabateeraho oburyo bw’okuhunga, ngu mubaase kukigumisiririza.” (1 Abakorinso 10:13) Ruhanga tariikiriza kigyezo okuturenga ngu tubure amaani g’okukigumisiririza—twaguma nitumwesiga. Naatuteeraho ata “oburyo bw’okuhunga”? ‘Naaheereza omwoyo orikwera abo abamushaba.’ (Luka 11:13) Omwoyo ogwo nigutuhwera okwijuka emisingye ya Baibuli erikubaasa kutugumya tukaguma tumaririire kukora ebihikire kandi atuha obwengye bw’okucwamu ebihikire. (Yohaana 14:26; Yakobo 1:5, 6) Omwoyo naatuhwera okworeka emitwarize egyo ei turikwetenga okubaasa kusingura ebyetengo bibi. (Abagalatia 5:22, 23) Omwoyo wa Ruhanga kandi naahiga ‘abaikiriza okutuhuumuriza.’ (Abakolosai 4:11) Torikusiima Yehova ahabw’okugarukamu eshaara zaawe arikukuha obuhwezi omu miringo ya rukundo nk’egi?

Ba ow’Oburyo omu bi Oineho Amatsiko

¹³ Okubaasa kuguma nitureeba, nitwetenga kuba ab’oburyo aha bi twineho amatsiko. Ahabw’emirabanamu y’omu magara, obumwe na bumwe nituruha. Kwonka twine kwijuka ngu Ruhanga takaraganisaga ngu nitwija kugira amagara gatarimu buremeezi omu busingye obu. Hoona n’omu bunaku bw’okuhandika Baibuli, abaheereza ba Ruhanga bakahikwaho oburemeezi, otwariiremu okuhiiganisibwa, obworo, enaku, hamwe n’endwara.—Ebyakozirwe 8:1; 2 Abakorinso 8:1, 2; 1 Abatesalonika 5:14; 1 Timoseo 5:23.

¹⁴ Ebiro ebi, naitwe twine oburemeezi. Nitubaasa kuhiiganisibwa, twerarikirire aha by’empiiha, tugire enaku, turware, kandi tubonabone n’omu miringo endiijo. Ku ogire ngu Yehova omu muringo gw’eky’okutangaaza naaturinda ebi byona, Sitaane buzima takaaboine ah’okwihirira kujuma Ruhanga? (Enfumu 27:11) Yehova obumwe na bumwe naikiriza abaheereza be okwohibwa n’okugyezibwa, nangwa n’okuhika aha kufeera omu mikono y’abahakanisa.—Yohaana 16:2.

¹⁵ Mbwenu shi obwo, n’enki eki Ruhanga araganiise? Nk’oku twaba twareebire, araganiise ngu naija kutubaasisa kugumisiririza okwohibwa oku turaabugane, ku turaagume nitumwesigira kimwe. (Enfumu 3:5, 6) Arikurabira omu Kigambo kye, omu mwoyo gwe, hamwe n’omu kibiina kye, naaturinda omu mwoyo, atuhwera okugumya enkorengana yaitu nawe. Twine enkorengana egyo ehamire, hoona n’obu twakufa, nitwija kusingura. Tihariho kintu kyona—n’obu kwakuba okufa—ekirikubaasa kuzibira Ruhanga kuha abaheereza be abeesigwa ebiconco. (Abaheburaayo 11:6) Kandi omu nsi ensya, eri haihi, Yehova buzima naija kureeta endiijo migisha yoona ei yaaraganiise abo abarikumukunda.—Zaaburi 145:16.

Ijuka Enshonga Enkuru

¹⁶ Okubaasa kugumisiriza kuhika aha muheru, twine kwijuka enshonga enkuru ahabw’enki Ruhanga naikiriza obubi kugumaho. Bumwe na bumwe oburemeezi ku bwakuturenga kandi tukagyezibwa kurekyera aho kuheereza, nitukora gye okweijutsya ngu Sitaane akareetaho okubangaanisa aha bukuru bwa Yehova nk’omutegyeki wa byona. Omubeihi ogu akareetaho okubangaanisa aha kwehayo n’aha bwesigwa bw’abaramya ba Ruhanga. (Yobu 1:8-11; 2:3, 4) Enshonga ezo hamwe n’omuringo gu Yehova atooraine kuzishobororamu nibikuru munonga okukira amagara gaitu. Bita shi?

¹⁷ Yehova okwikiriza oburemeezi obu kumara omwanya kibaasiise abantu abandi kumanya, kandi n’okwikiriza amazima. Teekateeka ahari eki: Yesu akabonabonesibwa kugira ngu tutungye amagara. (Yohaana 3:16) Ekyo tikirikutushemeza? Beitu nitwikiriza kugumisiririza oburemeezi kumara omwanya kugira ngu abandi babaase kutunga amagara? Okubaasa kugumisiriza kuhika aha muheru, twine kwetegyereza ngu obwengye bwa Yehova nibukirira kimwe obwaitu. (Isaaya 55:9) Naija kumaraho obubi omu bwire obuhikire kushobororeramu enshonga ezo ebiro byona kandi ahabw’oburungi bwaitu obw’obutwire bwona. Mbwenu buzimazima, kikaabaasikire kita ku kitakubaire omu muringo ogu? Omu mitwarize ya Ruhanga tihabamu okutainganisa!—Abarooma 9:14-24.

“Mwirire Haihi Ruhanga”

¹⁸ Okubaasa kuguma turikureeba omu by’omwoyo omu bunaku obu obu turimu, nitwetenga kuhamira ahari Yehova. Otaryebwa ngu Sitaane naakora kyona eki arikubaasa okushiisha omukago gwaitu na Yehova. Sitaane naayenda ngu twikirize ngu emperu teriija, kandi ngu tiharimu kigyendererwa omu kubuurira amakuru marungi nari okugyendera aha mitindo ya Baibuli. Manya we “n’omubeihi, ishe w’ebishuba.” (Yohaana 8:44) Twine kumariirira ‘kurwanisa Sitaane.’ Omukago gwaitu na Yehova n’ekintu eki tutashemereire kutwara nk’eky’omuhendo mukye. Baibuli na rukundo netwehanangiriza eti: “Mwirire haihi Ruhanga, nawe abone kubairira haihi.” (Yakobo 4:7, 8) Noobaasa ota kwirira haihi Yehova?

¹⁹ Okushaba okurimu okwecumintiriza nikukuru. Oburemeezi bw’omu magara aga bwareebeka nk’obwakurenga, gambira Yehova omazire aha kashansha. Ahu oraagarukire kumugambira ekyo buzima ekikusaasize, nikwo kiraije kukwanguhira kureeba naagarukamu eshaara zaawe. Eky’okugarukamu obutoosha nikibaasa kutaba ekyo eki orikuba nooteekateeka, kwonka eki orikwetenga kyaba kiri okumuha ekitiinisa n’okugumya obwesigwa, naija kukuha obuhwezi obu orikwetenga kugira ngu obaase kugumisiriza. (1 Yohaana 5:14) Nk’oku oraareebe obuhabuzi bwe nibukora omu magara gaawe, noija kugira omukago murungi nawe. Okushoma n’okuteekateeka munonga aha mitwarize n’emihanda ya Yehova, nk’oku erikworekwa omuri Baibuli, nakyo nikikuru. Okwecumintiriza nk’okwo nikukuhwera okumumanya gye; nikureetera omutima gwawe kweyongyera kumukunda. (Zaaburi 19:14) Kandi rukundo egyo, okukira ekindi kintu kyona, neija kukuhwera okurwanisa okwohibwa kandi ogume nooreeba.—1 Yohaana 5:3.

²⁰ Okubaasa kuguma haiha na Yehova, nikikuru kandi okuguma haihi n’ab’eishe-emwe bataahi baitu. Eki nikiza kushobororwaho omu kicweka ky’aha muheru ekya akatabo aka.

EBIBUUZO BY’OKWEGYERAHO

• N’enki eki Yesu yaakozire obu yaabaire ari omu busaasi bwingi haihi n’omuheru gw’amagara ge omu nsi, kandi n’enki eki yaayehanangiriize abeegi be kukora? (Bucw. 1-4)

• Ahabw’enki sitaane naagyenderera abaramya ba Yehova, kandi ni mu muringo ki ogu arikutwohamu? (Bucw. 5-8)

• Okubaasa kwangira okugyezibwa, ahabw’enki twine kushaba obutoosha (Bucw. 9-12), kuba ab’oburyo ahari ekyo eki twineho amatsiko (Bucw. 13-15), kwijuka enshonga enkuru (Bucw. 16-17), hamwe ‘n’okwirira haihi Ruhanga’ (Bucw. 18-20)?

[Akabokisi aha rupapura 25]

Bimwe aha Birikumaramu Amaani

Amagara/bukuru. Ku twakurwara endwara etarikukira nari emyaka ya bukuru yaatureetera obweremwa, nitubaasa kugira amaganya ahabw’okuba nituba tutarikubaasa kukora ekirikukira aha ki turikukora omu kuheereza Ruhanga.—Abaheburaayo 6:10.

Okuhwamu amaani. Nitubaasa kuhwamu amaani twareeba bakye bonka barikwikiriza Ekigambo kya Ruhanga eki turikubuurira.—Enfumu 13:12.

Okwehurira nk’otaine mugasho. Ahabw’okutwazibwa kubi kumara obwire buraingwa, omuntu naabaasa kuteekateeka ngu tarikukundwa, n’obu kwakuba okukundwa Yehova.—1 Yohaana 3:19, 20.

Okugwisibwa kubi. Omuntu ku arikugwisibwa kubi ow’eishe-emwe mutaahi we, nikibaasa kumukora kubi munonga, agyezibwe n’okureka kuza omu nteerane z’Ekikristaayo nari okwejumba omu kubuurira.—Luka 17:1.

Okuhiiganisibwa. Abantu abatari b’enyikiriza yaawe nibabaasa kukuhakanisa, kukuhiiganisa nari okukujuma.—2 Timoseo 3:12; 2 Petero 3:3, 4.

[Ekishushani ekiri aha rupapura 26]

Yesu akatwehanangiriza “okushaba obutoosha” okubaasa kutunga obuhwezi omu kurwanisa okwohibwa