Abaafiire Buzima Baryazooka?

EKI BAIBULI ERIKWEGYESA

“Haryabaho okuzooka.”​—Ebyakozirwe 24:15, Baibuli ey’Orunyankore-Rukiga, eya 1964.

OKU ORIKUGASIRWA WAIKIRIZA EKYO

Nikikuhuumuriza omuntu waawe yaafa.​—2 Abakorinso 1:3, 4.

Nikikuhwera kutatiina okufa.​—Abaheburaayo 2:15.

Noogira amatsiko agaabuzima ngu abantu baawe abaafiire nibaija kuzooka ogaruke obe nabo.​—Yohaana 5:28, 29.

NITUBAASA KWIKIRIZA EKI BAIBULI ERIKUGAMBA?

Eego, ahabw’enshonga nka ishatu:

• Ruhanga niwe Bukomooko bw’amagara. Baibuli neegira ngu Yehova Ruhanga ‘n’enshuro y’amagara.’ (Zaaburi 36:9; Ebyakozirwe 17:24, 25) Ogwo owaahangire byona ebiine amagara buzima naabaasa kuzoora omuntu owaafiire.

• Ira Ruhanga akazoora abantu. Baibuli neegamba aha bantu munaana abaazoirwe bakagaruka bakaba abahuriire omu nsi. Omu baazookire hakaba harimu abato, abakuru, abashaija, n’abakazi. Abamwe bakaba bazoorwa baaheza kufa, kwonka haine owaazoirwe bwanyima y’okumara ebiro bina omu kituuro!​—Yohaana 11:39-44.

• Ruhanga aine ekihika ky’okugarukamu kuzoora abantu. Yehova naayanga okufa kandi naakureeba nk’omuzigu. (1 Abakorinso 15:26) Aine ekihika ky’okwihaho omuzigu ogwo, arikuzoora abaafiire. Aine ekihika ky’okuzoora abo abu arikureeba ngu bahikire kuzoorwa bakagaruka kutuura omu nsi.​—Yobu 14:14, 15.