Okugarukana kwa Yakobo na Esau

Yehova akaraganisa Yakobo ngu naaza kumurinda nk’oku yaabaire arinzire Abrahamu na Isaaka. Yakobo akaba naatuura omu mwanya ogurikwetwa Harani, ahu yaatungire omukazi, akagira eka mpango, n’ebintu bingi munonga.

Bwanyima Yehova akagambira Yakobo ati: ‘Garuka omu nsi yaanyu.’ N’ahabw’ekyo Yakobo n’eka ye bakatandika orugyendo ruraingwa kugaruka owaabo. Ku baabaire bari omu muhanda abantu bamwe bakaija ahari Yakobo baamugira bati: ‘Esau ariyo naija, kandi aine abashaija 400.’ Yakobo akatiina ngu Esau naayenda kumukora kubi n’ab’omu ka ye. Akashaba Yehova ati: ‘Ninkweshengyereza njuna mukuru wangye.’ Ekiro ekyakuratsireho Yakobo akooherereza Esau ekiconco ky’entaama, embuzi, ente, engamira n’endogoya.

Ekiro ekyo Yakobo ku yaabaire ari wenka, akareeba maraika. Maraika akafukaana nawe bwarugaho bwasheesha. N’obu Yakobo araabe yaasaasire, taramurekwire. Maraika akamugira ati: ‘Ndekura ngyende.’ Yakobo akamugira ati: ‘Tindikwija kukurekura otampaire mugisha.’

Bwanyima maraika akaha Yakobo omugisha. Obwo Yakobo akamanya ngu Yehova akaba atarikwija kwikiriza Esau kumukora kubi.

Omu kasheeshe ako, Yakobo ku yaimukize amaisho, akareeba Esau naija n’abashaija be 400. Yakobo akeebembera eka ye kandi yainama ahansi emirundi mushanju. Esau akairuka kumubugana, yaamubumbatira. Bombi bakarira kandi baagarukana. Nooteekateeka ngu Yehova akakwatwaho ata oku Yakobo yaatwarize?

Bwanyima Esau akagaruka omu ka ye, na Yakobo yaagaruka owe. Yakobo akaba aine abaana b’aboojo 12. Bakaba nibeetwa, Reubeeni, Simeoni, Leevi, Yuda, Daani, Nafutaali, Gaadi, Asheri, Isakaari, Zebuluuni, Yosefu, na Benyamiini. Kandi, Yehova akakoresa Yosefu kujuna abantu be. Noomanya oku yaabajunire? Ka tureebe.