Omugabe Musya n’Abakazi Babiri Emanzi

Bwanyima ya Yoshua kwebembera abantu ba Yehova kumara emyaka mingi, akafa aine emyaka 110. Obu yaabaire atakafire, Abaisraeli bakaba nibaramya Yehova. Kwonka ku yaafiire, bakatandika kuramya ebishushani nk’Abanyakanaani. Ahabw’okugira ngu Abaisraeli tibaragumire niboorobera Yehova, akaikiriza omugabe wa Kanaani orikwetwa Yabini kubarwanisa. Abantu bakeeshengyereza Yehova kubahwera. Kandi Yehova akabaha omwebembezi musya, Baraki. Akaba naija kubahwera kugarukira Yehova.

Nabikazi Debora, akatuma ahari Baraki. Akaba amureetaire obutumwa oburikuruga ahari Yehova, obwabaire nibugira buti: ‘Twara abashaija 10,000, muze kubugana amahe ga Yabini aha mugyera Kishoni. Okwo niyo murisingurira Sisera, mukuru w’amahe ga Yabini.’ Baraki akagambira Debora ati: ‘Niinyija kugyenda waaba nooyenda kugyenda naanye.’ Debora akamugira ati: ‘Niinyija kugyenda naiwe. Kwonka omanye ngu tiiwe oraite Sisera. Yehova agizire ngu omukazi niwe araamwite.’

Debora akagyenda na Baraki n’amahe aha rushozi Tabora kwetebeekanisiza okurwana. Ahonaaho Sisera ku yaakimanyire, akatebeekanisa ebigaari bye by’okurwanisa n’amahe ge yaaza omu ruhanga Kishoni. Debora akagambira Baraki ati: ‘Eri izooba Yehova naaza kukuha obusinguzi.’ Baraki n’abashaija be 10,000 bakashuuma omu ruhanga kubugana amahe g’amaani aga Sisera.

Yehova akareetera omugyera Kishoni kwijura amaizi gaaza buri hamwe. Ebigaari bya Sisera by’okurwanisa bikakwatira omu byondo. Sisera akaruga aha kigaari kye yairuka. Baraki n’amahe ge bakasingura amahe ga Sisera kwonka Sisera akahunga. Akairuka yaayeshereka omu ihema ry’omukazi orikwetwa Yayeli. Yayeli akamuha amate kandi yaamushweka burangiti. Omurwani ogwo akaba aruhire yaagwejegyera. Bwanyima Yayeli akamwizira naashooba, yaamuteera enkondo y’eihema omu mutwe yaamwita.

Baraki akaija naasherura Sisera. Yayeli akashohora naaruga omu ihema rye kandi yaagira ati: ‘Ija nkworekye omushaija ou orikusherura.’ Baraki ku yaatahiremu, akareeba Sisera ari ahansi afiire. Baraki na Debora bakahimbisa Yehova barikweshongora ahabw’okuhwera Abaisraeli kusingura abazigu baabo. Israeli ekagira obusingye omu myaka 40 eyaakuratsireho.