Yehova Akaha Samusooni Amaani Maingi

Abaisraeli baingi bakaba bagarukire omu kuramya ebishushani, n’ahabw’ekyo Yehova akaikiriza Abafilistia kutegyeka ensi yaabo. Kwonka hakaba hariho Abaisraeli abamwe abaabaire nibakunda Yehova. Omwe ahari abo akaba ari Manoa. We n’omukazi we bakaba bataine baana. Eizooba rimwe Yehova akatuma maraika aha mukazi wa Manoa. Maraika akamugira ati: ‘Noija kuzaara omwana w’omwojo. Naija kujuna Israeli Abafilistia. Naija kuba Omunaziiri.’ Abanaziiri bakaba bari baahi? Bakaba bari abaheereza ba Yehova ab’omutaano. Abanaziiri bakaba batarikwikirizibwa kutega eishokye ryabo.

Ku haahingwireho obwire, Manoa akazaara omwana w’omwojo, kandi yaamweta Samusooni. Samusooni ku yaakuzire, Yehova akamuha amaani maingi. Akaita entare ataine by’okurwanisa. Omurundi gumwe, Samusooni akaita Abafilistia 30 wenka. Abafilistia bakamwanga kandi baatandika kumusherura kumwita. Ekiro kimwe Samusooni ku yaabaire agwejegyeire omuri Gaaza, bakaza aha irembo baategyereza ngu bamwite omu kasheeshe. Kwonka ahagati y’ekiro, Samusooni akaimuka, yaaza aha irembo ry’orurembo, yaatwara orwigi rw’eirembo. Akarwekorera aha mabega yaarutwaara aha mutwe gw’ekibungo haihi na Heburooni.

Bwanyima, Abafilistia bakaza owa Delila omwishiki ou Samusooni yaabaire naakunda, baamugira bati: ‘Nitwija kukuha ebicweka bingi by’efeeza ku oraamanye ahabw’enki Samusooni aine amaani maingi. Nitwenda kumukwata tumute omu kihome.’ Delila akaba naayenda esente, n’ahabw’ekyo akaikiriza. Omu kubanza, Samusooni akanga kumugambira ahabw’enki aine amaani maingi. Kwonka Delila akaguma naamubuuza kuhitsya obu yaamugambiire enaama ye. Akamugira ati: ‘Eishokye ryangye tibakarisharaga ahakuba ndi Omunaziiri. Ku baakuurishara, nkaahwamu amaani.’ Samusooni akakora enshobe y’amaani kumugambira ekyo.

Ahonaaho Delila akagambira Abafilistia ati: ‘Nimmanya enaama ye.’ Akagwejegyeza Samusooni aha bibero bye, reero yaamushara eishokye. Delila akagamba munonga ati: ‘Samusooni, Abafilistia bari aha.’ Samusooni akaimuka, kwonka akaba atakiine maani ge. Abafilistia bakamukwata, baamwihamu amaisho, kandi bamuta omu kihome.

Eizooba rimwe Abafilistia baingi baaketeeranira omu hekalu ya ruhanga waabo Dagoni, baateera orwari nibagira ngu, ‘ruhanga waitu ahaireyo Samusooni omu mikono yaitu. Mwete Samusooni, atuzaanire.’ Bakamweta baamuta ahagati y’enyomyo, kandi baamushungisa. Samusooni akashaba ati: ‘Ai Yehova, ninkweshengyereza mpa amaani omurundi ogu gwonka.’ Obwo, eishokye rya Samusooni rikaba ryagarukireho. Akatsindika enyomyo za hekalu n’amaani ge goona. Ekyombeko kyona kikagwa, abantu boona abaabaire bari omu hekalu baafa, kandi na Samusooni akafa.