Paulo Okwoherezibwa Rooma

Orugyendo rwa Paulo orwa kashatu omu kubuurira rukahendera ari omuri Yerusaalemu. Akakwatwa kandi yaateebwa omu kihome. Omu kiro akatunga okworekwa, Yesu akamugira ati: ‘Noija kuza Rooma, obe niyo waabuurira.’ Paulo akihwa Yerusaalemu yaatwarwa Kaisarea, ahu yaamazire emyaka ebiri ari omu kihome. Paulo ku yaabaire naahozesibwa Omutegyeki Festo, akamugarukamu ati: ‘Niinyenda kuhozesibwa Kaisaari, omuri Rooma.’ Festo akamugira ati: “Waajurira ahari Kaisaari; owa Kaisaari obe niyo waaza.” Paulo akateebwa aha meeri eyaabaire neeza Rooma, kandi ab’eishe-emwe babiri, Luka na Aristariiko, bakagyenda nawe.

Ku baabaire bari aha nyanja, hakabaho eihunga ry’amaani kumara ebiro baingi. Buri omwe akateekateeka ngu nibaza kufa. Kwonka Paulo akabagira ati: ‘Bashaija ’mwe, eki kiro maraika wa Ruhanga angambiire ati: “Paulo, otatiina. Noija kuza Rooma, kandi boona abari naiwe aha meeri nibaija kuba gye.” Mugume! Titurikwija kufa.’

Eihunga rikamara ebiro 14. Bwanyima, bakareeba enkungu. Ekirwa ekyo kikaba nikyetwa Melita. Emeeri ekacweka, kwonka abantu 276 boona abaabaire bari aha meeri egyo bakambuka baahika aha nkungu. Abamwe bakaziha kandi abandi bakagyendera aha bicweka by’emeeri baahika aha nkungu. Abantu ba Melita baakabagirira embabazi babahembera omuriro gw’okubaha obutagatsi.

Bwanyima y’ameezi ashatu, abaserukare bakatwara Paulo Rooma aha bwato obundi. Ku yaahikireyo, ab’eishe-emwe bakaija kumubugana. Paulo ku yaabareebire, akasiima Yehova kandi yaagira obumanzi. N’obu Paulo araabe yaabaire akomirwe, akaba naikirizibwa kutuura omu nju ei yaabaire naashashurira kandi arikurindwa abaserukare. Akamarayo emyaka ebiri. Abantu bakaba baija kumureeba, kandi akaba ababuurira ebirikukwata aha Bukama bwa Ruhanga abeegyesa n’ebirikukwata ahari Yesu. Kandi Paulo akahandiikira n’ebibiina by’omuri Asia na Buyudaaya amabaruha. Buzima Yehova akakoresa Paulo kubuurira amakuru marungi omu mahanga maingi.