EISHOMO 18

Okushoboororera Gye Abakuhurikiize

1 Abakorinso 9:19-23

EKY’OKUKORA: Reeteera abakuhurikiize kuteekateeka aha nshonga, kibareetere kureeba ngu baayega ekintu ky’omugasho munonga.

Fayo kumanya eki abakuhurikiize batwire nibamanya. Omu mwanya gw’okubagambira eki batwire nibahurira, bahwere kwetegyereza enshonga omu muringo musya.

Enshonga ezirikumanywa zigambeho orikurahuka, kwonka oyetware waaba nooshoboorora enshonga ensya.
Condooza aha nshonga kandi ogiteekateekyeho. Kyaba nikibaasika, gamba aha buhame obu abakuhurikiize batakateekateekahoga, nari aha biherize kubaho kworeka enshonga nkuru. Teekateeka munonga aha bi orikuza kugambaho n’oku birikuhikaana n’obuhame obu orikwenda kukoresa.

Teekateeka aha bi orikuza kugambaho waaba noobishwijuma orikwebuuza ebibuuzo nk’ebi, ‘niki, ahabw’enki, ryari, nkahi, n’oha, nari kita.’ Shemeza omuringo ogu orikwegyesamu orikubuuza ebibuuzo nk’ebyo kandi obigarukyemu.
Yoreka omugasho gw’ebi orikwegyesa. Shoboorora oku obuhabuzi bw’Ebyahandiikirwe burikubaasa kuhwera abakuhurikiize baabugyenderaho omu bi barikukora. Gamba aha mbeera ezimwe, emiteekateekyere, n’ebikorwa ebirikubaasa kuhwera abakuhurikiize.