Taho Ebigyendererwa by’Omwoyo Kuhimbisisa Omuhangi Waawe

Omutsigazi yaaba atarikumanya ei arikuza, naaba ataine rugyendo.” Ebigambo ebyo ebyagambirwe omuhangu omwe Omurooma, nibihamya ngu twine kugira ebigyendererwa twaba nitwenda kuba ab’omugasho.

Baibuli neegamba aha bantu abaabaire baine ebigyendererwa. Noa, akamara emyaka nka 50 ’[arikukora] emeeri ey’okukiza ab’omu nju ye.” Nabi Musa nawe “akaba ategyereize ekihembo eki araaheebwe.’ (Abaheburaayo 11:7, 26) Yoshua owaahunguriire Musa, nawe akaheebwa ekigyenderwa kuruga ahari Ruhanga eky’okusingura ensi ya Kanaani.—Eky’Ebiragiro 3:21, 22, 28; Yoshua 12:7-24.

Omu kyasha ky’okubanza Y.A.K., entumwa Paulo akataho ebigyendererwa arikwihirira aha bigambo bya Yesu ebirikugira ngu ’engiri egi ey’obukama neija kugambwa omu nsi zoona.’ (Matayo 24:14) Obutumwa n’okworekwa kuruga ahari Yesu, n’obujunaazibwa ‘bw’okutwara eiziina rya Yesu omu maisho g’Abanyamahanga,’ bikahiga Paulo kukora kihango omu kutandikaho ebibiina Ebikristaayo omuri Asia na Europe.—Ebyakozirwe 9:15; Abakolosai 1:23.

Eego, okumara emyaka mingi, abaheereza ba Yehova batwire nibataho ebigyendererwa kandi nibabihikaho kubaasa kuhimbisa Ruhanga. Hati, nitubaasa kutaho tuta ebigyendererwa by’omwoyo? Ni bigyendererwa ki ebi turikubaasa kutaho kandi ni bintu ki ebi turikubaasa kukora kubihikaho?

Enshonga Ehikire n’Ekintu Kikuru

Noobasa kutaho ekigyendererwa omu buri kimwe, kandi ensi egi eijwiremu abantu abaine ebigyendererwa. Kwonka ebigyendererwa eby’omwoyo tibirikushushana n’eby’ensi. Enshonga erikureetera ab’ensi kutaho ebigyendererwa n’okwenda kutunga obugaiga, okurangaanwa n’obushoboorozi. Ka n’enshobe y’amaani okutaho ekigyendererwa ky’okutunga amaani n’okurangaanwa! Ebigyendererwa ebirikuhimbisisa Yehova Ruhanga n’ebyo ebiine akakwate n’okuramya kwaitu n’emirimo y’Obukama. (Matayo 6:33) Ebigyendererwa nk’ebyo nitubitaho turikwihirira ahari rukundo ei twinire Ruhanga hamwe n’abataahi kandi n’okuheereza Ruhanga.—Matayo 22:37-39; 1 Timoseo 4:7.

Ka tuteho ebigyendererwa by’omwoyo ebihikire, yaaba nitwenda kwongyera aha buheereza bwaitu, nari kutunguuka omu by’omwoyo. Kwonka obumwe n’obu twakutaho ebigyendererwa ahabw’enshonga ehikire nitubaasa kuremwa kubihikiiriza. Mbwenu shi nitubaasa kutaho tuta ebigyendererwa kandi tukabihikiiriza?

Gira Ekyetengo ky’Amaani

Yetegyereze oku Yehova yaahangire eiguru n’ensi. Bwanyima ya buri mwanya gw’okuhanga Yehova akaba ahendera naagira ati: “Bwaira, bwasheesha.” (Okutandika 1:5, 8, 13, 19, 23, 31) Aha kutandika kwa buri kuhanga akaba naamanya ekigyendererwa eki aine ahabw’eizooba eryo. Kandi Ruhanga akahikiriiza ekigyendererwa kye ky’okuhanga ebintu. (Okushuuruurwa 4:11) Yobu omwesigwa akagira ngu ‘eki [Yehova] arikwenda, kibe nikyo kyakorwa.’ (Yobu 23:13) Buzima, kikashemeza Yehova ‘kureeba byona ebi yaahanga’ biri “birungi munonga”!—Okutandika 1:31.

Twaba nitwenda kuhika aha bigyendererwa byaitu, naitwe twine kugira ekyetengo ky’amaani ky’okubihikiiriza. Niki ekiratuhwere kugira ekihika ekyo? N’obu ensi yaabaire erimu busha Yehova akaba naabaasa kuteera akashushani akareeba ebirungi ebirarugyemu bwanyima, ensi nungi eboneire erikumuhimbisisa. Nikyo kimwe, kubaasa kugira ekihika ky’okuhikiiriza ekigyendererwa kyaitu twine kuteekateeka aha birungi ebirarugyemu twahikiiriza ekigyendererwa ekyo. Ekyo nikyo Tony oine emyaka 19 yaakozire. Tarayebirwe ebi yaareebire obu baataayaayira ofiisi y’eitaagi ey’Abajurizi ba Yehova omuri Europe. Bwanyima y’okutaayaaya okwo eki yaabaire naayebuuza kikaba kiri ngu, ‘Omuntu naayehurira ata yaatuura omu mwanya nk’ogwo kandi akaheerezayo?’ Tony tararekyeire aho kukiteekateekaho kandi akaguma naakununkirira ekigyendererwa ekyo. Ka kyamushemeize bwanyima y’emyaka mikye ku yaikiriziibwe kuheereza aha ofiisi y’eitaagi!

Okunywana abaaherize ebigyendererwa nk’ebi twine nikibaasa kutureetera kugira ekihika ky’okubihikaho. Jayson, oine 30, akaba atarikukunda kubuurira obu yaabaire ari omushogoyo. Kwonka bwanyima y’okuheza siniya akaba payoniiya, kandi yaaba omubuurizi w’Obukama ow’obutwire. Niki ekyahweraire Jayson kugira ekyetengo ky’okuba payoniya? Naagira ati: “Okugaaniira n’abaabaireho baapayoniya n’okubuurira nabo kikampwera munonga.”

Okuhandiika Ebigyendererwa Byaitu Nikibaasa Kuhwera

Ekiteekateeko nikyetegyerezibwa gye twatoorana ebigambo by’okukoresa kukishoboorora. Sulemaani akagira ngu ebigambo birungi n’eby’amaani nk’emihunda omu kuha obuhabuzi. (Omubuurizi 12:11) Ebigambo ebyo byahandiikwa nibihika aha mutima gwaitu n’ebiteekateeko. Niyo nshonga ahabw’enki Yehova yaaragiire abagabe ba Israeli boona kukoporora ebiragiro bakabita omu kitabo kyabo? (Eky’Ebiragiro 17:18) N’ahabw’ekyo ni kirungi kuhandiika ebigyendererwa byaitu n’oku turaabihikyeho, oburemeezi obu turikubaasa kutunga n’oku turaabusingure. Nitubaasa n’okumanya ebi twine kushomaho n’emyoga ei twine kugira, n’abantu abarikubaasa kutuhwera nari kutushagika.

Okweteeraho ebigyendererwa kikahwera Geoffrey otwire ari payoniya ow’omutaano omu kicweka ekyehereire omu ihanga rimwe omuri Asia. Akagwerwa akagwe obu omukazi we yaafa kitaraariire. Kubaasa kumanyiira embeera egyo, Geoffrey akacwamu kwejumbira kimwe omu buheereza bwe nka payoniya arikutaho ebigyendererwa. Bwanyima y’okuhandiika ebigyendererwa bye, akashaba reero yaaza kubuurira n’ekigyendererwa ky’okutandikaho abeegi bashatu ba Baibuli okwezi kutakahendeire. Buri izooba akaba ashwijuma ebi yaakora kandi bwanyima y’ebiro ikumi akaba areeba ahu yaahika. Mbwenu shi akabaasa kuhika aha kigyendererwa kye? Eego!, hati aine okushemererwa ahabw’okutunga abeegi bana basya.

Taho Ebigyendererwa Bigufu Kumanya ahu Waahika

Ebigyendererwa ebimwe nibibaasa kureebeka nk’ebigumire munonga. Ahari Tony owaaba yaagambirweho, okuheereza aha ofiisi y’eitaagi ey’Abajurizi ba Yehova kikaba kiri nk’ekirooto. Ahakuba emituurire ye ekaba etari mirungi, kandi akaba atakeehaireyo ahari Ruhanga. Kwonka Tony akacwamu kuhikaanisa amagara ge n’emitindo ya Yehova, kandi yaataho ekigyenderwa ky’okubatizibwa. Ku yaaherize kuhika aha kigyendererwa ekyo akaba payoniya omuhwezi, kandi bwanyima yaaba payoniya ow’obutwire, arikuhandiika ahari kalenda ebiro obu yaahikiiriza ebigyenderwa ebyo. Bwanyima y’obwire arikuhereeza nka payoniya, okuhereeza aha ofiisi y’eitaagi kikaba kitarikureebeka nk’ekitarikubaasika.

Naitwe nitugasirwa twataho ebigyendererwa ebigufu n’ebiraingwa. Ebigyendererwa ebyo nibiija kutuhwera kuhika aha bigyenderwa byaitu eby’obwire buraingwa. Butoosha twaguma nitushwijuma ahu twahika omu kuhikiiriza ebigyendererwa bikye nikituhwrea kuguma tutaire omutima aha by’obwire buraingwa. Okushaba Yehova nakyo nikituhwera. Entumwa Paulo akeehanangiriza ati: “Mushabe obutoosha.”—1 Abatesalonika 5:17.

Okumariirira n’Okutahanika Nibyetengyesa

N’obu twakuba twine engyenderwaho nungi n’ekyetengo ky’amaani kuhikiriza ebigyendererwa byaitu, obumwe nituremwa. Omwegi orikwetwa Yohaana Mako ka aine kuba yaagwirwe kubi obu entumwa Paulo yaayanga kumutwara aha rugyendo rwe rwa kabiri orw’obumisaani! (Ebyakozirwe 15:37-40) Ebyo Mako akabyegyeraho kandi yaataho ekigyenderwa ky’okwongyera aha buhereeza bwe. Kandi akakihikaho. Bwanyima y’obwire, Paulo naagamba kurungi ahari Mako kandi akashemererwa arikuheereza n’entumwa Petero omuri Babylon. (2 Timoseo 4:11; 1 Petero 5:13) Kandi akatunga omugisha gw’omutaano ogw’okuhandiika ebirikukwata ahari Yesu n’omurimo gwe gw’okubuurira.

Omu kuteeraho kwaitu kuhika aha bigyenderwa byaitu eby’omwoyo nihabaasa kugira ebya tugarura enyima. Omu mwanya gw’okuhanika, twine kwetegyereza, tukashwijuma kandi tukahinduramu. Twatunga obureemezi twine kumariirira kandi twetantera kuhanika. “Emirimo yaawe gyegyekyerere [Yehova], obwo nibwo enaama zaawe zirihamibwa,” Omugabe Sulemaani nikwo arikutuhamiza—Enfumu 16:3.

Kwonka obumwe, embeera nizireetera okuhikiiriza ebigyendererwa ebimwe kuguma. Nk’eky’okureeberaho, amagara mabi nari obujunaanizibwa bw’okureeberera amaka gaitu nibibaasa kuturemesa kuhika aha bigyendererwa ebimwe. Ka tugume nitwijuka ngu ekicoonco ekirikurayo n’eky’amagara agatahwaho, omu iguru nari omuri paradiso aha omu nsi. (Luka 23:43; Abafilipi 3:13, 14) Eki nitukitunga tuta? Entumwa Yohaana akahandika ati: ‘Orikukora ebi Ruhanga arikukunda, naagumaho ebiro byona.’ (1 Yohaana 2:17) N’obu embeera zaitu ziraabe zitarikutubaasisa kuhika aha bigyendererwa ebimwe, nabwo nitubaasa ‘kutiina Ruhanga, tworobere ebiragiro bye.’ (Omubuurizi 12:13) Ebigyendererwa by’omwoyo nibituhwera kuguma tutaire omutima aha bi Ruhanga arikukunda. N’ahabw’ekyo ka tumariirire kutaho ebigyendererwa ebirikuhimbisisa Omuhangi waitu.

[Akabokusi]

Bimwe aha bigyendererwa by’omwoyo

○ Kushoma Baibuli buri izooba

○ Kushoma buri kicweka eky’Omunaara gw’Omurinzi na Awake!

○ Kwongyera aha mutindo gw’okushaba kwaitu

○ Kugira emitwariza y’omwoyo gurikwera

○ Kwongyera aha buheereza

○ Kwongyera kubuurira gye n’okwegyesa gye

○ Kwongyera aha bukoryo bw’okubuurira nk’okukoresa esimu, kitaraariire, n’omu myanya y’obushuubuzi