Yetantare ‘Kurahuka Kuhahaaza Omutima’!

1, 2. Ahabw’enki omu nsi harimu ebishuba bingi obunaku obu, kandi nibijanjaara mu muringo ki? (Reeba ekishushani aha kutandika.)

OBUNAKU obu omu nsi harimu obugobya bwingi n’ebishuba bingi. Eki tikishemereire kututangaaza. Baibuli neekyoreka gye ngu Sitaane Omuregi n’omubeihi, kandi n’omutegyeki w’ensi egi. (1 Tim. 2:14; 1 Yoh. 5:19) Ku turaagume nitwirira haihi n’emperu, Sitaane naija kuguma naayeyongyera kugira ekiniga ahabw’okuba “aine omwanya mukye” ogutsigaireyo. (Kush. 12:12) N’ahabw’ekyo, eki kishemereire kutureetera kumanya ngu abo abarikubeihwabeihwa Sitaane nibaija kweyongyera kuba abanyabishuba, na munonga barikuteeraho kubeiha abo abarikuramya Yehova.

² Eby’empurizana obumwe nibigamba ebitahikire aha Bajurizi ba Yehova hamwe n’ebi barikwikiriza. Abantu nibakoresa empapura z’amakuru, tiivi n’emikura ya Intaneeti kujanjaaza ebishuba. Ekirikurugamu, abamwe nibagira ekiniga ahabw’okugira ngu nibaikiriza ebishuba ebyo batabandize kuhamya yaaba n’amazima.

3. Niki ekirikubaasa kutuhwera kutakuratira ebishuba bya Sitaane?

³ Ebyahandiikirwe ebiine omugasho gw’okuhabura, nibibaasa kutuhwera kutakuratira ebishuba bya Sitaane. (2 Tim. 3:16) Ni kikuru kwegyera aha ebi entumwa Paulo yaahandiikire ebirikworeka ngu Abakristaayo b’omuri Tesalonika omu kyasha ky’okubanza bakabeihwabeihwa baikiriza ebitahikire. Akabehanangiriza ‘kutarahuka kuhahaaza emitima bakabura obwengye.’ (2 Tes. 2:1, 2) Niki eki turikubaasa kwegyera aha kwehanangiriza kwa Paulo, kandi nitubaasa kukugyenderaho tuta?

OBUHABUZI OMU BUNAKU OBUHIKIRE

4. Abakristaayo b’omuri Tesalonika bakaheebwa buhabuzi ki aha bikwatiraine n’okwija kw’ekiro kya Yehova, kandi itwe nituheebwa buhabuzi ki?

⁴ Omu baruha ei Paulo yaahandiikire Abatesalonika, akabagambira aha kwija kw’ekiro kya Yehova. Akaba atarikwenda ngu ab’eishe-emwe bagyenzi be bagume batarikukimanya kibaremese kwetebeekanisa. Akahiga “abaana b’omushana” ngu ‘bagume nibareeba, batasinda.’ (Shoma 1 Abatesalonika 5:1-6.) Obunaku obu tutegyereize okucwekyerezibwa kwa Babulooni Orukuru, nigo madiini g’ebishuba goona. Egi niyo eraije kuba entandikiro y’ekiro kya Yehova ekikuru. Twine okushemererwa ahabw’okugira ngu nitwetegyereza gye oku ebigyendererwa bya Yehova biraahikiirizibwe. Kandi nitukira kutunga obuhabuzi omu bunaku obuhikire kurabira omu kibiina kugira ngu tugume nitureeba. Twagyendera aha buhabuzi obu, nikibaasa kutuhwera kumariirira kuheereza Ruhanga.​—Rom. 12:1.

5, 6. (a) Paulo akagamba ahari ki omu baruha ya kabiri ei yaahandiikire Abatesalonika? (b) Yesu arikuhwerwa Ruhanga ari haihi kukora ki, kandi tushemereire kwebuuza ki?

⁵ Paulo ahonaaho aherize kwoherereza Abatesalonika ebaruha y’okubanza, akaboherereza n’eya kabiri. Omu baruha eya kabiri akata omutima aha kubonabona kwingi okuraabeho Yesu ku araabe naacwera emanja “abatarikumanya Ruhanga n’abarikwanga kworobera engiri.” (2 Tes. 1:6-8) Eshuura 2 ey’ebaruha egi neeyoreka ngu bamwe omu kibiina bakaba ‘bajagariire’ ahabw’ekiro kya Yehova baahika n’aha kuteekateeka ngu kikaba nikiija kuhika ahonaaho. (Shoma 2 Abatesalonika 2:1, 2.) Abakristaayo aba ira bakaba nibamanya bikye aha bikwatiraine n’ekigyendererwa kya Yehova, nk’oku Paulo bwanyima yaagambire aha bunabi ati: “Nitumanyaho kakye; nituragura kakye; kwonka ebihikire ku biriija, ebitahikire biryaihwaho.” (1 Kor. 13:9, 10) Kwonka bakaba nibabaasa kugumizamu bari abeesigwa barikugyendera aha buhabuzi obu Yehova yaahweraire entumwa Paulo, entumwa Petero n’abandi b’eishe-emwe abashukirweho amajuta kuhandiika obunaku obwo.

⁶ Paulo kubaasa kubahwera kugira emiteekateekyere mirungi, arikuhwerwa Ruhanga akashoboorora ngu hakaabaireho abarikwehagura aha mazima ‘n’omuntu omugomi,’ ekiro kya Yehova kitakahikire.a N’ahabw’ekyo, obwire ku bwakuhikire, Yesu ‘akaacwekyereize’ abo boona abaabeihirwe. Entumwa Paulo akooreka ngu “bakanga kukunda amazima,” niyo nshonga ahabw’enki baabaire nibaija kucwekyerezibwa. (2 Tes. 2:3, 8-10) Noobaasa kwebuuza oti: ‘Ninkunda munonga amazima? Niingyendera aha nyetegyereza ezishemereire kukuratirwa ekibiina kyaitu omu nsi yoona, nk’oku kirikworekwa omu munaara ogu hamwe n’ebitabo byaitu ebindi ebirikushoboorora ahari Baibuli?’

TOORANA GYE ABANYWANI

7, 8. (a) Ekibiina Ekikristaayo ekya ira kikaba kiine buremeezi ki? (b) Niki ekirikubaasa kuba eky’akabi aha Bakristaayo obunaku obu?

⁷ Enyegyesa z’abarikwehagura aha mazima tizo zonka ezaabaire ziri ez’akabi aha Bakristaayo. Paulo akahandiikira Timoseo ngu “okwetenga empiiha n’omuzi gw’ebibi byona.” Kandi akooreka ngu hakaba ‘hariho bamwe abaagiriire ebyo omururu, bakahaba, bakaruga omu kwikiriza, bakeecumitira kimwe n’enaku nyingi.’ (1 Tim. 6:10) “Emirimo y’obuzaarwa bw’omubiri” nibyo byetengo by’omubiri, nabyo bikaateganiise abantu.​—Gal. 5:19-21.

⁸ Paulo akarabura Abatesalonika ngu hakaba nihaija kubaho “n’entumwa z’ebishuba.” Bamwe aharibo bakaba nibaija kuba ‘nibagamba eby’obuhabe, niboosya abeegi ngu babakurate.’ (2 Kor. 11:4, 13; Byak. 20:30) Bwanyima Yesu akasiima ekibiina kya Efeso ahabw’okugira ngu kikaba kitarikubaasa “kugumisiririza abantu babi.” Abaefeso ‘bakeetegyereza’ ngu abantu abo bakaba nibabeiha kandi bari entumwa z’ebishuba. (Kush. 2:2) Omu baruha ya kabiri ei Paulo yaahandiikire Abatesalonika, akabehanangiriza ati: “Mbwenu nitubaragiira, b’eishe-emwe, omu iziina rya Mukama waitu Yesu Kristo, mwetantare ow’eishe-emwe weena omweremwa.” Kandi akagamba n’aha Bakristaayo ‘abatarikwenda kukora.’ (2 Tes. 3:6, 10) N’ahabw’ekyo, ku baraabe baabaire baine kwetantara omweremwa otarikwenda kukora, kikaabaire eky’obwengye kwetantarira kimwe omuntu oyehagwire aha mazima! Buzima obunaku obwo abantu nk’abo bakaba bari ab’akabi kandi baine kwetantarwa, n’omu bunaku obu twine kwetantara abantu nk’abo.​—Enf. 13:20.

9. Ahabw’enki tushemereire kwegyendesereza omuntu yaatandika kuteebereza aha bintu ebitarikugambwaho omu Baibuli nari kwetomboitera ekibiina kya Yehova?

⁹ Obu okubonabona kwingi kuri haihi kutandika kandi n’emperu eri haihi kuhika, obuhabuzi obwo obuhandiikisiibwe Ruhanga obwahairwe ab’omu kyasha ky’okubanza nibutukwataho munonga. Titurikwenda kuba nk’abatarikumanya ekigyendererwa ky’embabazi za Yehova tukafeerwa amagara agatahwaho. (2 Kor. 6:1) Tushemereire kwegyendesereza omuntu orikwija omu nteerane zaitu yaateeraho kutureetera kutandika kuteebereza aha bintu ebitarikugambwaho omu Baibuli nari kwetomboitera ekibiina kya Yehova.​—2 Tes. 3:13-15.

“MUGUMYE EMITWARIZE EI TWABEEGYEISE”

10. Abakristaayo omuri Tesalonika bakahigwa kuhamira ha nyegyesa ki?

¹⁰ Paulo akahiga ab’eishe-emwe omuri Tesalonika ‘kwemerera bahamire’ kandi bakahamira aha bi baayegire. (Shoma 2 Abatesalonika 2:15.) Ni nyegyesa ki ezi Paulo yaabaire naabagambira kuhamiraho? Akaba atarikubagambira kuhamira aha nyegyesa ezi baayegyesiibwe amadiini g’ebishuba. Kureka, bakaba baine kuhamira aha nyegyesa za Yesu n’ezi Ruhanga yaahweraire Paulo n’abandi kuhandiika omu Baibuli. Paulo akasiima ab’eishe-emwe bagyenzi be omu kibiina kya Korinso, nk’oku yaahandiikire ati: “Nimbasiima ahabw’okuunyijuka omuri byona, n’okugumizamu omu migyenzo n’oku naagibeegyeise.” (1 Kor. 11:2) Obu enyegyesa ezo zaabaire niziruga ahari Yehova n’omwana we, zikaba zihikire kandi zirikwesigwa.

11. Ni miringo ki ei abamwe barikubaasa kuhaba bakaruga omu kwikiriza?

¹¹ Obu Paulo yaabaire naahandiikira Abaheburaayo, akata omutima aha miringo ebiri ei Abakristaayo barikubaasa kuhabamu bakaruga omu kwikiriza. (Shoma Abaheburaayo 2:1; 3:12.) Akagamba aha ‘kubirugaho’ hamwe ‘n’okuhaba.’ Obwato nibubaasa kutandika mporampora kuruga aha nkungu y’omugyera. Kandi bwagumizamu, nibubaasa kuza hare n’enkungu y’omugyera. Kandi n’omuntu naabaasa kukoresa amaani ge kureetera obwato kuza hare n’enkungu y’omugyera. Eby’okureeberaho byombi nibyoreka ekirikubaasa kubaho omuntu yaikiriza kubeihwabeihwa nari akahwa amaani omu kwikiriza kwe.

12. Ni bintu ki ebirikubaasa kushiisha omukago gwaitu na Yehova?

¹² Ekyo nikibaasa kuba nikyo kyahikire ahari bamwe omuri Tesalonika. Kandi shi obunaku obu? Hariho ebintu bingi ebirikureetera abantu kushiisha obwire. Teekateeka aha bwire obu abantu abarikumara bari aha Intaneeti, barikushoma obutumwa nari barikubugarukamu, barikwejumba omu by’okweshemeza, nari okumanya ebirikukwata aha mizaano. Kimwe ahari ebi nikibaasa kuhuzya Omukristaayo kandi obweziriki bwe butuube. Niki ekirikurugamu? Naabaasa kushanga atakiine bwire bw’okushaba, bw’okweyegyesa Ekigambo kya Ruhanga, bw’okuza omu nteerane, n’okuza omu kubuurira. Nitubaasa kukora ki kwetantara ebintu nk’ebyo kutuubya okwikiriza kwaitu?

EBIRIKUTURINDA KUTAHAHAARA OMUTIMA

13. Nk’oku kyagambirweho omu Baibuli, abantu baingi baine miteekateekyere ki, kandi niki ekiraatuhwere kurinda okwikiriza kwaitu?

¹³ Twine kuguma nitumanya obwire obu turimu kandi ngu banywani baitu abatarikwenda kwikiriza ngu turi omu ‘biro by’emperu,’ nibabaasa kutushiisha. Entumwa Petero arikuhandiika aha bunaku obu akagira ati: “Haryaija abagaaniizi abarikugaaniiza, nibakuratira okwetenga kwabo okubi, nibagira bati: Ku yaaraganiise kwija! Mbwenu arahi? Ahakuba okwiha obu baatatenkuriitwe baagwejegyera, byona bituura nk’oku byabaire biri aha kutandika kw’okuhangwa kw’ensi.” (2 Pet. 3:3, 4) Twaguma nitushoma Ekigambo kya Ruhanga buri izooba, nikiija kutuhwera kuguma nitwijuka ngu turi omu ‘biro by’emperu.’ Abarikwehagura aha mazima abaagambirweho bakareebeka kare kandi na hati bakiriho. “Omuntu omugomi ogwo” akiriho na hati kandi naahakanisa abaheereza ba Ruhanga. Tushemereire kuguma tweteekateekire turikumanya ngu ekiro kya Yehova kiri haihi.​—Zef. 1:7.

14. Okuba abeeziriki omu kubuurira nikiturinda kita?

¹⁴ muringo mukuru gw’okwetantara kuhahaaza omutima, n’okwejumba obutoosha omu omurimo gw’okubuurira amakuru marungi g’Obukama. N’ahabw’ekyo obu Yesu Kristo omutwe gw’ekibiina yaaragiira abakuratsi be kuhindura abantu abeegi n’okubeegyesa kworobera byona ebi yaabegyeise, akaba naabaha obuhabuzi obwabaire nibwija kubarinda. (Mat. 28:19, 20) Kubaasa kugyendera aha buhabuzi obwo, twine kuba turi abeeziriki omu murimo gw’okubuurira. Mbwenu shi nooteekateeka ngu ab’eishe-emwe omuri Tesalonika bakaba babuurira ahabw’okugira ngu baine kukikora? Ijuka ebigambo ebi Paulo yaabagambiire ebi: “Mutaraaza Omwoyo; mutagaya ebya baanabi.” (1 Tes. 5:19, 20) Obunabi obu turikwega kandi tukabuuriraho n’abandi, ka nibushemeza!

15. Ni bintu ki ebi turikubaasa kwegaho omu kuramya kw’eka?

¹⁵ Twena nitwenda kuhwera ab’omu maka gaitu kwongyera kuba ababuurizi barungi. Ab’eishe-emwe baingi bashangire ngu nikihwera munonga okukoresa obwire obumwe obw’okuramya kwabo okw’eka kwetebeekanisiza okubuurira. Noobaasa kushanga kirikuhwera kugaaniira aha ku murikubaasa kwongyera kuhwera abo abarikwenda kumanya ebirikukiraho. Mwagarukayo aha barikwenda kumanya ebirikukirayo, nimwija kugaaniira ahari ki? Ni nshonga ki ezirikubaasa kureetera abantu kwenda kugumizamu nibeega? Ni bwire ki oburungi obw’okugarukayo aha bantu? Kandi abandi obwire obumwe obw’okuramya okw’eka nibabukoresa kwetebeekanisiza enteerane. Noobaasa kwongyera kuzetebeekanisiza n’okuzeejumbamu? Okuzeejumbamu nikwija kuhamya okwikiriza kwawe reero kikuhwere kutahahaaza omutima. (Zab. 35:18) Buzima, okwejumba omu kuramya okw’eka nikiija kukuhwera kwetantara okuteebereza n’okubangaanisa.

16. Niki ekirikuhiga Abakristaayo abashukirweho amajuta kutahahaaza omutima?

¹⁶ Twateekateeka oku Yehova atwire naahwera abantu kwongyera kwetegyereza obunabi bwa Baibuli, nikibaasa kutureetera kusiima ebirungi ebi turaatungye omu biro by’omumaisho. Abashukirweho amajuta baine amatsiko g’okuza omu iguru kutegyeka na Kristo. Ekyo ka nikibahiga kutahahaaza omutima! Nitubaasa kugyendera aha bigambo bya Paulo ebi yaahandiikiire Abatesalonika ebi: ‘Kitushemerereire kusiima Ruhanga obutoosha ahabwanyu, b’eishe-emwe abarikukundwa Mukama, ahakuba Ruhanga akabatoorana ahabw’okwezibwa omwoyo n’okwikiriza amazima.’​—2 Tes. 2:13.

17. Obuhabuzi oburi omu 2 Abatesalonika 3:1-5 nibukugaruramu buta amaani?

¹⁷ Kandi abo abaine amatsiko g’okutunga amagara agatahwaho omu nsi nabo baine kuteeraho kwetantara kuhahaaza omutima. Ku oraabe oine amatsiko g’okutuura omu nsi ebiro byona, guma noijuka ebigambo ebi Paulo yaahandiikiire bagyenzi be abashukirweho amajuta ab’omuri Tesalonika. (Shoma 2 Abatesalonika 3:1-5.) Twena tushemereire kusiima ebigambo ebyo. Ebaruha ibiri ezi Paulo yaahandiikiire Abatesalonika nizituhwera kwetantara kuteebereza aha bintu ebitarikugambwaho omu Baibuli n’okubangaanisa. Ahabw’okugira ngu turi omu biro by’emperu, nitusiima munonga obuhabuzi obu.