‘Kunda Yehova Ruhanga Waawe’

1. Niki ekyareeteire rukundo ya Ruhanga n’Omwana we kuhama?

OMWANA wa Yehova, Yesu Kristo akagira ngu naakunda Ishe. (Yoh. 14:31) Kandi Yesu akagira ati: “Ishe akunda Omwana.” (Yoh. 5:20) Ekyo tikishemereire kututangaaza, ahakuba Yesu obu yaabaire atakaizire mu nsi nk’omuntu, akaba ari “omukozi mukuru” wa Ruhanga. (Enf. 8:30) Yesu ahabw’okukora hamwe na Ishe, akeega bingi ebirikukwata aha mitwarize ya Ishe, kandi akaba aine enshonga nyingi ezaabaire nizimureetera kumukunda. Buzima, rukundo yaabo ekahama ahabw’omukago ogu baabaire baine.

2. (a) Okukunda nikutwariramu ki? (b) Nituza kushwijuma bibuuzo ki?

² Okukunda nikutwariramu okworeka ngu noofayo munonga aha muntu. Daudi akeeshongora ati: “Ninkukunda, ai MUKAMA, maani gangye.” (Zab. 18:1) Nikwo tushemereire kukunda tutyo Ruhanga ahakuba nawe naatukunda. Twayorobera Yehova, naija kutukunda. (Shoma Eky’Ebiragiro 7:12, 13.) Kwonka shi buzima nitubaasa kukunda Ruhanga, obu tutarikubaasa kumureeba? Nikimanyisa ki okukunda Yehova? Ahabw’enki tushemereire kumukunda? Nitubaasa kworeka tuta ngu nitukunda Yehova Ruhanga?

EKIRIKUBAASA KUTUREETERA KUKUNDA RUHANGA

3, 4. Niki ekirikutubaasisa kukunda Yehova?

³ “Ruhanga n’Omwoyo”; n’ahabw’ekyo, titurikubaasa kumureeba. (Yoh. 4:24) Kwonka nitubaasa kumukunda, kandi omu Byahandiikirwe nituragiirwa kumukunda. Nk’eky’okureeberaho, Musa akagambira Abaisraeli ati: “Ogume okunde MUKAMA Ruhanga waawe n’omutima gwawe gwona, n’amagara gaawe goona n’amaani gaawe goona.”​—Bir. 6:5.

⁴ Ahabw’enki tushemereire kukundira kimwe Ruhanga? N’ahabw’okugira ngu akatuhanga twine ekyetengo ky’eby’omwoyo, kandi turikubaasa kworeka rukundo. Twigutsa gye ekyetengo kyaitu eky’eby’omwoyo, nitweyongyera kukunda Yehova kandi ekyo kitureetera kugira okushemererwa. Yesu akagira ati: “Baine omugisha abooro omu mutima ahabw’okuba abo obukama bw’omu iguru n’obwabo.” (Mat. 5:3) Aha bikwatiraine n’eki abamwe barikweta ekyetengo ky’abantu eky’okuramya, ekitabo kya A. C. Morrison ekirikwetwa Man Does Not Stand Alone, nikigira kiti: “Tushemereire kutangaara kandi tukashoberwa ahabw’oku abantu omu nsi yoona barikusherura kandi bakaikiririza omu w’obushoboorozi bwona otarikureebwa.”

5. Nitumanya tuta ngu twasherura Ruhanga nitumubona?

⁵ Mbwenu shi okusherura Ruhanga n’ekya busha? Ngaaha, Ruhanga naayenda ngu tumusherure. Entumwa Paulo ekyo akakyoreka butunu obu yaabuurira abantu abaabaire bari aha Areopaago. Bakaba nibateekateeka ngu nikibeetengyesa kuza omu hekalu kuramya Aseena Ruhanga waabo. Kwonka Paulo akabagira ngu “Ruhanga owaahangire ensi n’ebintu byona ebirimu” tarikubaasa kutuura omu hekalu ezombekirwe n’emikono. Akongyeraho ngu Ruhanga “akahanga amahanga goona ag’abantu, naabakomoora aha muntu omwe, ngu batuure omu nsi yoona. Niwe yaataireho obunaku bw’emyaka okwihaihana, akataho emyatano y’ahu abantu batwire; ngu babone kusherura Ruhanga, nibabandagira baine amatsiko g’okumugwaho, n’obu araabe atari hare n’omuntu weena omuriitwe.” (Byak. 17:24-27) Buzima, abantu baasherura Ruhanga, nibamubona. Abajurizi ba Yehova abarikurenga omu bukaikuru mushanju n’ekicweka babaasize kumumanya kandi buzima nibamukunda.

EKI KIRIKUMANYISA OKUKUNDA RUHANGA

6. Yesu akagira ngu ‘ekiragiro kikuru kandi eky’okubanza’ ni kiiha?

⁶ Rukundo ei twiniire Yehova eshemereire kuba neeruga aha mutima. Yesu ekyo akakyoreka gye obu Omufarisaayo yaamubuuza ati: “Mwegyesa, ekiragiro ekikuru omu biragiro nikiiha?” Yesu akamugarukamu ati: “Kunda Mukama Ruhanga waawe n’omutima gwawe gwona, n’amagara gaawe goona, n’obwengye bwawe bwona. Eki nikyo kiragiro kikuru kandi eky’okubanza.”​—Mat. 22:34-38.

7. Nikimanyisa ki okukunda Ruhanga (a) ‘n’omutima gwaitu gwona’? (b) ‘n’amagara gaitu goona’? (c) ‘n’obwengye bwaitu bwona’?

⁷ Yesu akaba naamanyisa ki obu yaagira ngu twine kukunda Ruhanga n’omutima gwaitu gwona? Akaba naamanyisa ngu twine kukunda Yehova n’omutima gwaitu gwona ogw’akamanyiso, ekirikutwariramu ebyetengo byaitu, n’enyehurira. Kandi twine kumukunda ‘n’amagara gaitu goona.’ Ekindi, twine kukunda Ruhanga ‘n’obwengye bwaitu bwona’ nari okwetegyereza kwaitu kwona. Ekirikumanyisa ngu twine kukundira kimwe Yehova.

8. Okukundira kimwe Ruhanga nikiija kutuhiga kukora ki?

⁸ Twaba nitukunda Ruhanga n’omutima gwaitu gwona, n’amagara gaitu goona, n’obwengye bwaitu bwona, nitwija kuba abeegi barungi b’Ekigambo kye, nitwija kukora ebirikuhikaana n’ekigyendererwa kye, kandi nitwija kubuurira amakuru marungi g’Obukama twine omuhimbo. (Mat. 24:14; Rom. 12:1, 2) Rukundo eyaabuzima ei twiniire Yehova neija kutureetera kumwirira haihi. (Yak. 4:8) Buzima, titurikubaasa kuhandiika enshonga zoona ahabw’enki twine kukunda Ruhanga. Kwonka, ka tushwijume zimwe aharizo.

EKISHEMEREIRE KUTUREETERA KUKUNDA YEHOVA

9. Ahabw’enki twine kukunda Omuhangi waitu kandi orikutuha ebirikwetengyesa?

⁹ Yehova niwe Muhangi waitu kandi orikutuha ebirikwetengyesa. Paulo akagira ati: “Omuriwe, tuba abahuriire, tugyenda kandi tugumaho.” (Byak. 17:28) Yehova akatuha ensi nungi munonga. (Zab. 115:16) Naatuha eby’okurya hamwe n’ebindi bintu ebi turikwetenga kubaasa kuba abahuriire. N’ahabw’ekyo, Paulo akabaasa kugambira abatuuzi b’omuri Lusitura abaabaire nibaramya ebishushani ati: “Ruhanga ohuriire . . . tararekyeire aho kubura eky’okumuhamya, ahakuba akaguma naabakora gye, naabagwisiza enjura okuruga omu iguru, naabeereza emyaka omu bunaku bwayo, naabahaazya eby’okurya, naijuza emitima yaanyu okushemererwa.” (Byak. 14:15-17) Mbwenu shi egyo t’enshonga nkuru eshemereire kutureetera kukunda Omuhangi waitu orikukirayo kandi orikutuha ebirikwetengyesa?​—Mub. 12:1.

10. Tushemereire kutwara tuta entebeekanisa ya Ruhanga ey’okwihaho ekibi n’okufa?

¹⁰ Ruhanga ataireho entebeekanisa y’okwihaho ekibi n’okufa ebi twahungwire ahari Adamu. (Rom. 5:12) Buzima, “Ruhanga ayoreka okukunda kwe oku atukunda, ahakuba ku twabaire tukiri abanyabibi, Kristo yaatufeera.” (Rom. 5:8) Hatariho kubanganisa, nitukunda Yehova ahabw’okugira ngu atuteeraireho entebeekanisa erikutubaasisa kusaasirwa ebibi byaitu, twayeteisa kandi tukaikiririza omu kitambo kya Yesu.​—Yoh. 3:16.

11, 12. Yehova atuhaire amatsiko ga muringo ki?

¹¹ Yehova naatuha amatsiko agarikutureetera kugira okushemererwa n’obusingye. (Rom. 15:13) Amatsiko agu Ruhanga arikutuha, nigatuhwera kusingura ebirikugyeza okwikiriza kwaitu. Abashukirweho amajuta abarikuguma bari ‘abeesigwa okuhitsya aha kufa; nibaija kutunga ekirunga ky’amagara.’ (Kush. 2:10) Abaine amatsiko g’okutuura omu nsi abaraagume bari abeesigwa, nibaija kutunga emigisha etahwaho omu Paradiso. (Luk. 23:43) Tushemereire kutwara tuta emigisha ei turikwija kutunga? Ka nikitureetera kugira okushemererwa, obusingye, kandi tukakunda ogwo orikutuha “engabirano yoona enungi n’ekiconco kyona ekihikire”!​—Yak. 1:17.

¹² Ruhanga atuhaire amatsiko g’okuzooka. (Byak. 24:15) Hatariho kubanganisa, ku turikufeerwa omukundwa nitusaasa, kwonka ahabw’okugira ngu twine amatsiko g’okuzooka, ‘titurikuganya nk’abandi abataine matsiko.’ (1 Tes. 4:13) Ahabw’okugira ngu Yehova naakunda abantu, aine ekihika ky’okuzoora abafu, okukira munonga abeesigwa, nka Yobu. (Yob. 14:15) Teekateeka aha kushemererwa okuraabeho omu nsi abaraazookye ku baraabe nibaakiirwa. Ka nitwija kweyongyera kukunda Tataitwe ow’omu iguru, otuhaire amatsiko g’omutaano ag’okuzooka!

13. Ni buhame ki oburikworeka ngu Ruhanga naatufaho?

¹³ Yehova buzima naatufaho. (Shoma Zaaburi 34:6, 18, 19; 1 Petero 5:6, 7.) Ahabw’okumanya ngu Ruhanga waitu butoosha naaba ayeteekateekire kuhwera abo abarikuguma bari abeesigwa ahariwe, nituhurira twine oburinzi ahabw’okugira ngu turi ‘entaama z’omu iriisizo rye.’ (Zab. 79:13) Kandi, rukundo ya Ruhanga neija kweyongyera kureeberwa omu bi araatukorere kurabira omu Bukama bwe oburikwebemberwa Mesia. Yesu Kristo Omugabe otoorainwe ku araaheze kwihaho obushaarizi, omwaga, n’obubi omu nsi, abantu abarikworobera Ruhanga nibaija kugira obusingye n’ebintu ebirikumara. (Zab. 72:7, 12-14, 16) Ebyo byona nibitureetera kukunda Ruhanga waitu, n’omutima gwaitu gwona, n’amagara gaitu goona, n’obwengye bwaitu bwona.​—Luk. 10:27.

14. Ruhanga atuhaire mugisha ki ogw’omuhendo?

¹⁴ Yehova atuhaire omugisha gw’omuhendo ogw’okumuheereza nk’Abajurizi be. (Isa. 43:10-12) Nitukunda Yehova ahabw’okutuha omugisha ogu ogw’okumushagika nk’ow’obushoboorozi bwona, n’ahabw’okuha amatsiko abantu abari omu nsi egi erimu oburemeezi. Kandi, nitugamba twine okwikiriza n’obuhame ahabw’okugira ngu nitubuurira amakuru marungi turikukoresa Ekigambo kya Ruhanga, ou ebiraganiso bye hataine ekirikubaasa kubiremesa kuhikiirira. (Shoma Yoshua 21:45; 23:14.) Emigisha hamwe n’enshonga ezirikutureetera kukunda Yehova ni nyingi munonga. Kwonka shi nitubaasa kworeka tuta ngu nitumukunda?

OKU TURIKUBAASA KWOREKA NGU NITUKUNDA RUHANGA

15. Okwega n’okugyendera aha biri omu Kigambo kya Ruhanga nikituhwera kita?

¹⁵ Okwega n’okugyendera aha biri omu Kigambo kya Ruhanga. Twakora tutyo, nitworeka ngu nitukunda Yehova kandi ngu buzima nitwenda ngu ekigambo kye kibe ‘omushana ogujwera omuhanda gwaitu.’ (Zab. 119:105) Twaba twine amaganya, nitubaasa kutunga okuhuumurizibwa omu buhame oburi omu bigambo ebi: “Omutima oguhendekire, ogweteisiize kimwe, ai Ruhanga, torigugaya.” Kandi “ku nteekateeka bingi, naayemereza omutima, okuhuumuriza kwawe kugwisa gye amagara gangye.” (Zab. 51:17; 94:18, 19) Yehova naagirira embabazi abo abarikubonabona, kandi Yesu nawe naasaasibwa abantu. (Isa. 49:13; Mat. 15:32) Okwega Baibuli nikubaasa kutuhwera kumanya ngu Yehova naatufaho, ekirikutureetera kumukundira kimwe.

16. Okushaba obutoosha nikutureetera kuta kwongyera kukunda Ruhanga?

¹⁶ Shaba Ruhanga obutoosha. Okushaba nikutuhwera kwirira haihi ogwo “ohurira okushaba.” (Zab. 65:2) Ku turikumanya ngu Ruhanga naagarukamu okushaba kwaitu, nitweyongyera kumukunda. Nk’eky’okureeberaho, nitubaasa kuba tureebire ngu tarikubaasa kutureka kugyezibwa kurenga aha bi turikubaasa kwemera. (1 Kor. 10:13) Twaba twine ebirikutwerarikiriza, nitubaasa kutunga “obusingye bwa Ruhanga.” (Fil. 4:6, 7) Obumwe, nitubaasa kushabira aha mutima nk’oku Nehemia yaakozire, kandi tukimanye ngu okushaba kwaitu kugarukirwemu. (Neh. 2:1-6) ‘Twagumizamu nitushaba tuhamire,’ kandi tukakimanya ngu Yehova naagarukamu okushaba kwaitu, rukundo ei tumwiniire neeyeyongyera, kandi nitweyongyera kugira obuhame ngu naija kutuhwera kwemera ebirikugyeza okwikiriza kwaitu.​—Rom. 12:12.

17. Twaba nitukunda Ruhanga, nitwija kutwara tuta enteerane?

¹⁷ Guhindure omucwe gwawe kuguma nooza omu nteerane z’Ekikristaayo eza buri saabiiti, ez’ebiro bibiri n’ebiro bishatu. (Heb. 10:24, 25) Abaisraeli bakaba beeteeranira hamwe kuhurikiza n’okwega ebirikukwata ahari Yehova, kugira ngu bamutiine kandi boorobere ebiragiro bye. (Bir. 31:12) Ti mugugu kukora ebi Ruhanga arikukunda twaba nitumukunda buzima. (Shoma 1 Yohaana 5:3.) N’ahabw’ekyo, ka tuteereho kutaikiriza ekintu kyona kutureetera kutwara okuza omu nteerane nk’ekitari kikuru. Titurikwenda kwikiriza ekintu kyona kutureetera kutuubya ahari rukundo ei twabaire twiniire Yehova omu kubanza.​—Kush. 2:4.

18. Rukundo ei twiniire Ruhanga neetuhiga kukora ki aha bikwatiraine n’amakuru marungi?

¹⁸ Ba omweziriki omu kubuurira abandi amakuru marungi. (Gal. 2:5) Rukundo ei twiniire Ruhanga neetuhiga kugamba aha Bukama oburikutegyekwa Mesia omwana we ow’omuhendo, orikwija ‘kurwanirira amazima’ ahari Haramagedoni. (Zab. 45:4; Kush. 16:14, 16) Ka nikireeta okushemererwa kwejumba omu kuhindura abantu abeegi, orikubahwera kwega ebirikukwata ahari rukundo ya Ruhanga n’ekiraganiso kye eky’ensi ensya!​—Mat. 28:19, 20.

19. Ahabw’enki twine kusiima entebeekanisa ya Ruhanga ey’okuriisa entaama ze?

¹⁹ Yoreka ngu noosiima entebeekanisa ya Ruhanga ey’okuriisa entaama ze. (Byak. 20:28) Yehova niwe atuhaire abareeberezi abarikufayo butoosha ahabw’oburungi bwaitu. Abareeberezi bari ‘nk’omwanya ogw’okwekingaho omuyaga, n’obwegamo bw’eihunga, kandi bari nk’emigyera y’amaizi aha itaka ryomire, n’ekicuucu ky’eibaare omu nsi erikurusya.’ (Isa. 32:1, 2) Ka nitusiima munonga omwanya gw’okwegamamu omuyaga gw’amaani nari eihunga ry’amaani! Omushana gwaba nigwotsya munonga, nitushemererwa twaza omu kibunda omu nyanga y’eibaare. Ebigambo ebi ebiri omu Isaaya nibituhwera kukimanya ngu abareeberezi nibatuha obuhwezi obu turikwetenga kandi batuhuumuriza. Twayorobera abo abarikwebembera ekibiina, nitworeka ngu nitusiima “ebiconco” ebi Ruhanga ahaire abantu, kandi tworeka ngu nitukunda Ruhanga na Kristo Omutwe gw’ekibiina.​—Efe. 4:8; 5:23; Heb. 13:17.

GUMA NOOYONGYERA AHARI RUKUNDO EI OINIIRE RUHANGA

20. Waaba nookunda Ruhanga, noija kutwara ota ebiri omu Yakobo 1:22-25?

²⁰ Waaba oine omukago murungi na Yehova, noija kuba ‘orikworobera Ekigambo, beitu kutari kukihurira kwonka.’ (Shoma Yakobo 1:22-25.) Omuntu orikworobera ekigambo, naaba aine okwikiriza okurikumuhwera kubuurira n’obweziriki n’okwejumba omu nteerane z’Ekikristaayo. Ahabw’okugira ngu buzima nookunda Ruhanga, noija kworobera ekiragiro kye ekihikiriire ekirikutwariramu byona ebi arikwenda ngu okore.​—Zab. 19:7-11.

21. Okushaba kwawe kuruga aha mutima nikubaasa kugyeragyeranisibwa naki?

²¹ Twaba nitukunda Ruhanga nitwija kumushaba obutoosha twihire aha mutima. Daudi omuhandiiki wa Zaaburi, arikugyeragyeranisa okushaba kwe n’okwotsya obubaane omu bunaku bw’Ebiragiro, akagira ati: “Okushaba kwangye kube nk’omugaju omu maisho gaawe [Yehova], n’okwimutsya emikono yangye kube nk’ekitambo ky’omu mwabazyo.” (Zab. 141:2; Kur. 30:7, 8) Okweshengyereza kwawe, okutaka kwawe, okuhimbisa kwawe kuruga aha mutima n’okusiima Ruhanga kwawe, biine kuba nk’obubaane bw’omugaju oburikujwekyera okushaba okurikusiimwa.​—Kush. 5:8.

22. Ni rukundo ya muringo ki ei turikuza kushwijuma?

²² Yesu akagira ngu tushemereire kukunda Ruhanga hamwe n’abataahi. (Mat. 22: 37-39) Nk’oku turikuza kureeba twaba nitugumizamu kushwijuma omutwarize ogu, rukundo ei twiniire Yehova n’emisingye ye nibiija kutuhwera kukoragana gye n’abantu bagyenzi baitu, n’okukunda abataahi.